📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್‌
ಸರ್ವೆಸ್ಪರ್ ಅಶೆಂ ಮ್ಹಣ್ತಾ:
ನೀತ್ ಸಾಂಬಾಳಾ, ಪ್ರಮಾಣಿಕ್ಪಣಾನ್ ಚಲಾ;
ಕಿತ್ಯಾಕ್ ಮ್ಹಜಿ ಸೊಡ್ವಣ್ ಲಾಗಿಂ ಪಾವ್ಲ್ಯಾ,
ಮ್ಹಜಿ ನೀತ್ ಉಗ್ಡಾಪಿ ಜಾಲ್ಯಾ.
ಸರ್ವೆಸ್ಪರಾಚಿ ಸೆವಾ ಕರ್ಚೆ ಖಾತಿರ್,
ತಾಚ್ಯಾ ನಾಂವಾಚೊ ಮೋಗ್ ಕರ್ಚೆ ಖಾತಿರ್,
ತಾಚೆ ಸೆವಕ್ ಜಾಂವ್ಚೆ ಖಾತಿರ್
ತಾಚೆ ಭಕ್ತ್ ಜಾಲ್ಲ್ಯಾ ಪರ್ಕ್ಯಾ ಮನ್ಶಾಂಕ್,
ಮ್ಹಣ್ಜೆ ಸಾಬ್ಬತ್ ಭಷ್ಟಾಯ್ನಾಸ್ತಾಂ ಪಾಳ್ತಲ್ಯಾ
ಆನಿ ಮ್ಹಜೊ ಸೊಲ್ಲೊ ಥಿರಾಸಣೆನ್ ಸಾಂಬಾಳ್ತಲ್ಯಾ ಸಕ್ಟಾಂಕ್,
ಹಾಂವ್ ಮ್ಹಜ್ಯಾ ಪವಿತ್ರ್ ಪರ್ವತಾಚೆರ್ ಹಾಡ್ತಲೊಂ
ಆನಿ ಮ್ಹಜ್ಯಾ ಮಾಗ್ಣ್ಯಾಚ್ಯಾ ಘರಾಂತ್ ತಾಂಕಾಂ ಸಂತೊಸ್ಭರಿತ್ ಕರ್ತಲೊಂ
ಮ್ಹಜೆ ವೆದಿಚೆರ್ ತಾಣಿಂ ಭೆಟಯ್ಲಲ್ಯೊ ಹೋಮ್‍ ಬಲಿಯೊ ಆನಿ ಯಜ್ಞ್
ಮ್ಹಾಕಾ ಪಸಂದ್ ಜಾತಲ್ಯೊ,
ಕಿತ್ಯಾಕ್ ಮ್ಹಜೆಂ ಘರ್ ಸಗ್ಳ್ಯಾ ಪರ್ಜಾಂಕ್
ಮಾಗ್ಣ್ಯಾಚೆಂ ಘರ್ ಮ್ಹಣ್ ಮ್ಹಣ್ತಲಿಂ.

ಶ್ಲೋಕ್: ಸರ್ವ್ ಪರ್ಜಾ ತುಕಾ ಹರ್ಸುಂ, ದೆವಾ;
         ಸರ್ವ್ ಪರ್ಜಾ ತುಕಾ ಹರ್ಸುಂ.

1. ಜಾ ತುಂ ಕೃಪಾಳ್, ದೆವಾ, ಆನಿ ತುಜೊಆಶೀರ್ವಾದ್ ಆಮ್ಚೆರ್ ಪಡುಂ:
   ತುಜ್ಯಾ ಪರ್ಜಳಿಕ್ ಮುಖಮಳಾಚಿ ದೀಷ್ಟ್ ಆಮ್ಚೆರ್ ಫಾಂಕುಂ.
   ಹೆ ವರ‍್ವಿಂ ಅಖ್ಖ್ಯಾ ಸಂಸಾರಾರ್ ತುಜಿ ಖುಶಿ ಕಳಿತ್ ಜಾಂವ್
   ಸರ್ವ್ ರಾಷ್ಟ್ರಾಂ ತುಜಿ ಸೊಡ್ವನ್ ಒಳ್ಕುನ್ ಘೆಂವ್.
2. ದೆವಾ, ಸರ್ವ್ ಜನಾಂಗಾಂ ತುಕಾ ವಾಖಣುಂ,
   ಸರ್ವ್ ರಾಷ್ಟ್ರಾಂ ತುಜಿ ಸ್ತುತಿ ಕರುಂ.
   ತುಂ ತಾಂಚಿ ರಾಜ್ವಟ್ಕಿ ನ್ಯಾಯ್-ನಿತಿ ಪರ್ಮಾಣೆಂ ಕರ‍್ತಾಯ್
   ದೆಸಾಂ ಭಾಸಾಂಚ್ಯಾ ಲೊಕಾಕ್ ಶಾಭಿತಾಯೆನ್ ಚಲಯ್ತಾಯ್.
3. ಸರ್ವ್ ಪರ್ಜಾ ತುಕಾ ವಾಖಣುಂ, ಸರ್ವೆಸ್ಪರಾ
   ಪರ್ಜಾ ತುಕಾ ವಾಖಣುಂ;
   ದೇವ್ ಆಮ್ಕಾಂ ಆಪ್ಲೊ ಆಶೀರ್ವಾದ್ ದೀಂವ್
   ಆನಿ ಸಗ್ಳಿ ಪ್ರಿಥುಮ್ ತಾಚ್ಯಾ ಪಾಂಯಾಂ ಪಡುಂ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಆತಾಂ, ಜುದೆವ್ ನ್ಹಯ್ ಆಸ್ಲಲ್ಯಾ ತುಮ್ಚೆ ಲಾಗಿಂ ಹಾಂವ್ ಉಲೊಂವ್ಕ್ ಆಪೇಕ್ಷಿತಾಂ; ಜುದೆವ್ ನ್ಹಯ್ ಆಸ್ಲಲ್ಯಾಂಚೊ ಧರ್ಮ್‍ದೂತ್ ಹಾಂವ್, ದೆಕುನ್ ಮ್ಹಜ್ಯಾ ಮ್ಹಣಿಯಾರ್ಪಣಾಂತ್ ಮ್ಹಾಕಾ ಅಭಿಮಾನ್. ಕಿತ್ಯಾಕ್ ತುಮ್ಚೆ ವಿಶ್ಯಾಂತ್ ಮ್ಹಜ್ಯಾ ಖಾಶಾ ಕುಳಿಯೆಚ್ಯಾಂ ಥಂಯ್ ಏಕ್ ಥರಾಚೊ ಮಸರ್ ಪೆಟೊವ್ನ್, ತಾಂಚೆ ಮಧ್ಲ್ಯಾ ಥೊಡ್ಯಾಂಕ್ ಪುಣ್‍ಯೀ ಬಚಾವ್ ಕರ್ಚೊ ಮ್ಹಜ್ಯಾ ಮ್ಹಣಿಯಾರ್ಪಣಾಚೊ ಶೆವಟ್. ತಾಂಕಾಂ ಪಯ್ಸ್ ಕೆಲ್ಲೆ ವರ್ವಿಂ, ಸಗ್ಳೊ ಸಂಸಾರ್ ದೆವಾಲಾಗಿಂ ರಾಜಿ ಜಾಲೊ; ತರ್ ತಾಂಕಾಂ ಗೊಪಾಂತ್ ಘೆತ್ಲಲೆ ವರ್ವಿಂ ಕಿತೆಂ ಸಕ್ಕಡ್ ಘಡೊಂಕ್ ಆಸತ್? ಮೆಲ್ಲ್ಯಾಂಕ್ ಲಾಭ್ಚೆಂ ಜಿವಂತ್ಪಣ್‍ಚ್ ಮ್ಹಣಜಯ್!
ಕಾರಣ್, ಆಪ್ಲೆಂ ದೆಣೆಂ ಕಶೆಂ ದಿಲ್ಲ್ಯಾ ಆಪೊವ್ಣ್ಯಾವಿಶಿಂ ದೇವ್ ಬಿಲ್ಕುಲ್ ಆಪ್ಲೆಂ ಮನ್ ಬದ್ಲಿನಾ. ಏಕ್ ಕಾಳಾರ್ ದೆವಾಕ್ ತುಮಿ ಖಾಲ್ ಜಾಯ್ನಾಸ್ತಾಂ ಜಿಯೆಲ್ಯಾತ್. ಪುಣ್ ಆತಾಂ ಜುದೆವಾಂಚ್ಯಾ ಅವಿಧೇಯ್ಪಣಾಕ್ ಲಾಗುನ್, ದೆವಾಚಿ ತುಮ್ಕಾಂ ಕಾಕುಳ್ತ್ ಲಾಭ್ಲ್ಯಾ. ತಶೆಂಚ್ ತಾಂಕಾಂಯೀ ಏಕ್ ದೀಸ್ ಕಾಕುಳ್ತ್ ಲಾಭ್ಚೆ ಖಾತಿರ್ ಹ್ಯಾ ತುಮ್ಚ್ಯಾ ವಿಧೇಯ್ಪಣಾಚ್ಯಾ ಕಾಳಾರ್ ತೆ ಅವಿಧೇಯ್ ಜಾಂವ್ಕ್ ಪಾವ್ಲ್ಯಾತ್. ವ್ಹಯ್, ದೆವಾನ್ ಸಮೆಸ್ತಾಂಕ್ ಅವಿಧೇಯ್ಪಣಾಚ್ಯಾ ಪಾಸಾಂತ್ ಘಾಲ್ಯಾಂತ್, ಸಮೆಸ್ತ್ ಮನ್ಶಾಂಕ್ ಆಪ್ಣ್ಣೆಂ ಕಾಕುಳ್ತ್ ದಾಖೊಂವ್ಚೆ ಖಾತಿರ್.

ಜೆಜು ಸರ್ಗಾ-ರಾಜ್ಯಾಚಿ ಬರಿ ಖಬರ್‌ ಗಾಜಯ್‌ತ್ತ್‌
ಆನಿ ಲೊಕಾ ಮಧ್ಲಿ ಸರ್ವ್ ಥರಾಂಚಿ ಪಿಡಾಶಿಡಾ ಗೂಣ್ ಕರಿತ್ತ್‌ ಗೆಲೊ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ಉಪ್ರಾಂತ್ ಜೆಜು ಥಂಯ್ಚೊ ಭಾಯ್ರ್ ಸರ್ನ್ ತೀರ್ ಆನಿ ಸಿದೊನ್‍ಚ್ಯಾ ಪ್ರಾಂತಾಕ್ ಗೆಲೊ. ತೆದ್ವಾಂ ತ್ಯಾ ಗಾಂವಾಂತ್ಲಿ ಎಕ್ಲಿ ಖಾನಾಆನ್‍ಗಾರ್ನ್ ಸ್ತ್ರೀ ಮುಖಾರ್ ಆಯ್ಲಿ ಆನಿ ಬೊಬ್ ಮಾರ್ನ್ ತಾಚೆಲಾಗಿಂ ಮ್ಹಣಾಲಿ: “ಧನಿಯಾ, ದಾವಿದಾಚ್ಯಾ ಪುತಾ, ಮ್ಹಜಿ ಕಾಕುಳ್ತ್ ಕರ್! ಮ್ಹಜಿ ಧುವ್ ದೆಂವ್ಚಾರ್ ಲಾಗೊನ್ ಭೋವ್ ಚಡ್ ವೊಳ್ವಳ್ತಾ.” ಪುಣ್ ಜೆಜುನ್ ತಿಕಾ ಜಾಪ್ ದೀವ್ನ್ ಏಕ್ ಉತಾರ್ ಸಯ್ತ್ ಮ್ಹಳೆಂನಾ. ಥೊಡ್ಯಾ ವೆಳಾನ್ ತಾಚೆ ಶಿಸ್ ಯೇವ್ನ್ ತಾಚೆಲಾಗಿಂ ಪರಾತುನ್ ಮ್ಹಣಾಲೆ: “ತಿಕಾ ಚಿಕ್ಕೆ ಧಾಡ್ನ್ ಸೊಡ್! ಆಮ್ಚ್ಯಾ ಪಾಟ್ಲ್ಯಾನ್ ತಿ ಬೊಬ್ ಮಾರಿತ್ ಯೆತಾ.” ಜೆಜುನ್ ಜಾಪ್ ದಿಲಿ: “ಇಸ್ರಾಯೆಲ್ ಘರಾಣ್ಯಾಂತ್ಲ್ಯಾ ಚುಕೊನ್ ಗೆಲ್ಲ್ಯಾ ಬಕ್ರ್ಯಾಂಕ್ ಮ್ಹಣ್ ಮಾತ್ರ್ ಮ್ಹಾಕಾ ಧಾಡ್ಲಾ.” ತಿ ತಾಚೆ ಮುಖಾರ್ ಯೇವ್ನ್ ಸರ್ಪಡುನ್ ಮ್ಹಣಾಲಿ: “ಸಾಯ್ಬಾ, ಮ್ಹಾಕಾ ಪಾವ್.” ಪುಣ್ ಜೆಜುನ್ ತಿಕಾ ಜಾಪ್ ದಿಲಿ: “ಘರ್ಚ್ಯಾ ಭುರ್ಗ್ಯಾಂಚೊ ಉಂಡೊ ಕಾಡ್ನ್ ಸುಣ್ಯಾಂಕ್ ದಿವ್ಚೊ ಸಮ ನ್ಹಯ್.” ತಿ ಮ್ಹಣಾಲಿ: “ತೆಂ ನೀಜ್, ಧನಿಯಾ, ತರಿಪುಣ್ ಸುಣಿಂ ಆಪ್ಲ್ಯಾ ಧನಿಯಾಚ್ಯಾ ಮೆಜಾರ್ ಥಾವ್ನ್ ಪಡ್ಲಲೆ ಉಂಡ್ಯಾಕುಡ್ಕೆ ಖಾತಾತ್ ನ್ಹಯ್?” ಹೆಂ ಆಯ್ಕುನ್ ಜೆಜು ತಿಕಾ ಜಾಪ್ ದೀವ್ನ್ ಮ್ಹಣಾಲೊ: “ಬಾಯೇ, ವರ್ತೊ ತುಜೊ ಭಾವಾರ್ಥ್! ತುಜೆ ಅಪೇಕ್ಷೆ ಪರ್ಮಾಣೆ ತುಕಾ ಜಾಂವ್.” ಆನಿ ತೇಚ್ ಘಡಿಯೆ ತಿಚಿ ಧುವ್ ಬರಿ ಜಾಲಿ.