📖 ಆಯ್ತಾರಾಚಿಂ ವಾಚ್ಪಾಂ

ಉಗ್ಡಾಪಣ್‌ ಪುಸ್ತಕಾಂತ್ಲೆಂ ವಾಚಪ್
ತೆದ್ವಾಂ ಸರ್ಗಿಂ ದೆವಾಚೆಂ ಮಂದಿರ್ ಉಗ್ತೆಂ ಜಾಲೆಂ ಆನಿ ತಾಚ್ಯಾ ಸೊಲ್ಲ್ಯಾಚಿ ಪೇಟ್ ತಾಂತುಂ ಆಸ್ಲಲಿ ದಿಷ್ಟಿ ಪಡ್ಲಿ.
ತೆದ್ವಾಂ ಅಂತ್ರಾಳಿಂ ಏಕ್ ವ್ಹಡ್ ಖುಣಾ ದಿಷ್ಟಿ ಪಡ್ಲಿ: ಏಕ್ ಸ್ತ್ರೀ ಸುರ್ಯೊ ನ್ಹೆಸ್ಲಲಿ, ತಿಚ್ಯಾ ಪಾಂಯಾಂಥಳಾ ಚಂದ್ರ್, ಆನಿ ತಿಚ್ಯಾ ಮಸ್ತಕಾರ್ ಬಾರಾ ನೆಕೆತ್ರಾಂಚೊ ಮುಕುಟ್. ತೆದ್ವಾಂ ಅಂತ್ರಳಿಂ ಆನ್ಯೆಕ್ ಖುಣಾ ದಿಷ್ಟಿ ಪಡ್ಲಿ: ಏಕ್ ಮಹಾಸರಪ್, ಉಜ್ಯಾಬರಿ ತಾಂಬ್ಡೊ; ತಾಕಾ ಸಾತ್ ತಕ್ಲ್ಯೊ ಆನಿ ಧಾ ಶಿಂಗಾಂ; ತಾಚೆ ಹರ್ಯೆಕ್ ತಕ್ಲೆರ್ ಏಕ್ ಮುಕುಟ್. ಆಪ್ಲೆ ಶಿಮ್ಟೆನ್ ಅಂತ್ರಳಾ ವಯ್ಲ್ಯಾ ನೆಕೆತ್ರಾಂಚೊ ತಿನಾಂತ್ ಏಕ್ ವಾಂಟೊ ತಾಣೆ ಮಾರ್ನ್ ಝಡೊವ್ನ್ ಭುಮಿಚೆರ್ ಘಾಲೊ. ಉಪ್ರಾಂತ್ ಪ್ರಸೂತ್ ಜಾಂವ್ಕ್ ತಯಾರ್ ಜಾಲ್ಲೆ ಸ್ತ್ರೀಯೇ ಹುಜಿರ್ ತೊ ಉಬೊ ರಾವ್ಲೊ; ತಿಚೆಂ ಭುರ್ಗೆಂ ಭುಂಯ್ ಪಡ್ಲಲ್ಯಾಕ್ಷಣ್ ತಾಕಾ ಗ್ರಾಸುಂಕ್ ಮ್ಹಣ್ ತೊ ತಯಾರ್ ಜಾಲ್ಲೊ. ಸ್ತ್ರಿಯೆನ್ ಏಕ್ ಚೆರ್ಕ್ಯಾ ಭುರ್ಗ್ಯಾಕ್ ಜಲ್ಮ್ ದಿಲೊ; ಹೊಚ್ ತೊ ಲೊಂಕ್ಡಾಚೆ ಬೆತ್ಕಾಟೆನ್ ಸರ್ವ್ ರಾಷ್ಟ್ರಾಂ ವಯ್ರ್ ರಾಜ್ವಟ್ಕಿ ಚಲೊಂವ್ಕ್ ನೆಮ್ಲಲೊ. ಪುಣ್ ಜಲ್ಮಲ್ಲ್ಯಾ ತ್ಯಾ ಭುರ್ಗ್ಯಾಕ್ ದೆವಾ ಆನಿ ತಾಚ್ಯಾ ಶಿಯಾಸಣಾ ಹುಜಿರ್ ತಕ್ಷಣ್ ಉಕಲ್ನ್ ವ್ಹೆಲೊ. ತಿ ಸ್ತ್ರೀ ಅರಣ್ಯಾಕ್ ಪೊಳ್ನ್ ಧಾಂವ್ಲಿ.
ತೆದ್ವಾಂ ಸರ್ಗಾರ್ ವ್ಹಡ್ ಏಕ್ ತಾಳೊ ಹಾಂವೆಂ ಆಯ್ಕಲೊ:
“ಆತಾಂ ಜಾಲ್ಯಾರ್ ತಾರಣ್ ಆಯ್ಲೆಂ;
ದೆವಾಚಿ ಪದ್ವಿ ಆನಿ ರಾಜ್ವಟ್ಕಿ
ಆನಿ ತಾಚ್ಯಾ ಕ್ರಿಸ್ತಾಚೊ ಅಧಿಕಾರ್ ಸ್ಥಾಪಿತ್ ಜಾಲೊ.”

ಶ್ಲೋಕ್: ಓಫಿರ್ಚ್ಯಾ ಭಾಂಗಾರಾನ್ ನೆಟೊವ್ನ್
         ತುಜ್ಯಾಉಜ್ವ್ಯಾಕ್ ಬಸುನ್ ಆಸಾ ರಾಣಿ.

1. ತುಜ್ಯಾ ಸ್ತ್ರೀ ಪರಿವಾರಾಂತ್ ರಾಜ್-ಕುಂವರ‍್ಣಿಯಿ ಆಸಾತ್,
   ಓಫಿರ್ಚ್ಯಾ ಭಾಂಗಾರಾನ್ ನೆಟೊವ್ನ್ ತುಜ್ಯಾಉಜ್ವ್ಯಾಕ್ ಬಸುನ್ ಆಸಾ
   ತಿಚ್ ಪಾಟಾಚಿ ರಾಣಿ.
2. ಆಯ್ಕ್ ಧುವೇ, ಆನಿ ಹಾಂವ್ ಸಾಂಗ್ತಾಂ ತೆಂ ಚಿಂತುನ್ ಪಳೆ,
   ತುಜೊ ಖಾಶಾ ಲೋಕ್ ಆನಿ ಮಾಯ್-ಬಾಪಾಚೆಂಘರ್ ತುಂ ವಿಸರ್‌,
   ರಾಯ್ ತುಜ್ಯೆ ಸುರುಪಾಯೆಕ್ ಭುಲ್ತಲೊ,
   ತುಜೊ ಪತಿ ತೊ, ತಾಚಿ ಸೆವಾ ಭಕ್ತಿನ್ ಕರ್.
3. ಅನಂದಾಚ್ಯಾ ಸಂತೊಸಾಚ್ಯಾ ಸಂಭ್ರಮಾನ್ ತಿಂ ಮುಖಾರ್ ಯೆತಾತ್
   ಆನಿ ರಾಯಾಚ್ಯಾ ಮಂದಿರಾಂತ್ ತಿಂ ಭಿತರ್ ಸರ‍್ತಾತ್‌.

ಸಾಂ.ಪಾವ್ಲುನ್‌ ಕೊರಿಂಥ್‌ಗಾರಾಂಕ್‌ ಬರಯ್‌ಲ್ಲ್ಯಾ ಪಯ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಆತಾಂ ನಿಜಾಕ್‍ಯೀ ಕ್ರಿಸ್ತಾಕ್ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲಾ; ಮರಣ್ ಪಾವ್ಲಲ್ಯಾಂಕ್ ಮೆಲ್ಲ್ಯಾಂತ್ಲಿಂ ಉಠಯ್ತಲೆ ಮ್ಹಣ್ ತೊ ಜಾಮಿನಿ ಜಾಲಾ. ಕಿತ್ಯಾಕ್ ಏಕ್ ಮನ್ಶಾವರ್ವಿಂ ಮರಣ್ ಆಯ್ಲೆಂ; ತಶೆಂಚ್ ಏಕ್ ಮನ್ಶಾ ವರ್ವಿಂ ಮೆಲ್ಲ್ಯಾಂಚೆಂ ಪುನರ್‌ ಜಿವಂತ್ಪಣ್‍ಯೀ ಯೆತಾ. ಜಶೆಂ ಆದಾಂವ್ ಥಂಯ್ ಸಮೆಸ್ತ್ ಮೊರ್ತಾತ್ ತಶೆಂ ಕ್ರಿಸ್ತಾ ಥಂಯ್ ಸಮೆಸ್ತಾಂಕ್ ಜಿವಂತ್ ಉಠಯ್ತಲೆ. ಪುಣ್ ಹರ್ಯೆಕ್ಲ್ಯಾಕ್ ತಾಚೇ ತಾಚೇ ಸರ್ತೆ ಪ್ರಕಾರ್: ಸಕ್ಟಾಂಚಿ ಜಾಮಿನಿ ಕಸೊ ಪಯ್ಲೆಂ ಕ್ರಿಸ್ತಾಕ್; ಉಪ್ರಾಂತ್ ಕ್ರಿಸ್ತಾಚ್ಯಾ ಯೆಣ್ಯಾ ವೆಳಾರ್ ಕ್ರಿಸ್ತಾಚ್ಯಾ ಎಕ್ವಟಾಂತ್ ಆಸ್ಲಲ್ಯಾ ಸಮೆಸ್ತಾಂಕ್. ಉಪ್ರಾಂತ್ ಯೆತಲೊ ಅಂತ್ ಜೆದ್ವಾಂ ಸರ್ವ್ ರಾಜ್ವಟ್ಕಿ,ಅಧಿಕಾರ್ ಆನಿ ಪದ್ವಿ ತೊ ನಾಸ್ ಕರ್ತಲೊ ಆನಿ ದೆವಾ ಬಾಪಾಕ್ ಆಪ್ಲೆಂ ರಾಜ್ಯ್ ಒಪುನ್ ದಿತಲೊ. ಕಿತ್ಯಾಕ್ ದೆವಾನ್ ತಾಚ್ಯಾ ವೈರಿಂಕ್ ಪಾಂಯಾಂಥಳಾ ಘಾಲಿಸರ್ ಕ್ರಿಸ್ತಾನ್ ರಾಜ್ವಟ್ಕಿ ಚಲೊಂವ್ಚಿ ಗರ್ಜ್. ಆನಿ ನಿಮಾಣೆಂ ಪಾಡಾವ್ ಜಾತಲೊ ತೊ ವೈರಿ ಮರಣ್‍ಚ್; ಕಿತ್ಯಾಕ್ “ಸರ್ವ್ ವಸ್ತು ದೆವಾನ್ ತಾಚ್ಯಾ ಪಾಂಯಾಂಥಳಾ ಘಾಲ್ಯಾತ್.” ಮ್ಹಣ್ತಾ ಪವಿತ್ರ್ ಪುಸ್ತಕ್.

ಮರಿಯೆಕ್ ಸರ್ಗಿಂ ಉಕಲ್ನ್ ವ್ಹೆಲ್ಯಾ,
ದೇವ್‌ದುತಾಂಚೆ ಕೋರ್ ಸಂತೊಸ್ ಆನಿ ಉಲ್ಲಾಸ್ ಪಾವ್ತಾತ್.

ಲೂಕಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತ್ಯಾ ವೆಳಿಂ ದೇವ್‌ದುತಾನ್ ಮರಿಯೆಕ್ ನಮಾನ್ ಕರ್ನ್ ಥೊಡ್ಯಾಚ್ ದಿಸಾಂನಿ ಮರಿ ಉಠುನ್ ಜುದಾಚ್ಯಾ ದೊಂಗ್ರಾಳ್ ಪ್ರದೇಶಾಂತ್ಲ್ಯಾ ಏಕ್ ಶಹರಾಕ್ ಧಾಂವ್‍ಧಾಂವಿಂ ಗೆಲಿ. ಥಂಯ್ ಜಾಕರಿಚ್ಯಾ ಘರಾ ಭಿತರ್ ಸರ್ನ್, ಎಲಿಜಾಬೆತಿಕ್ ತಿಣೆ ನಮಾನ್ ಕೆಲೊ. ಎಲಿಜಾಬೆತಿನ್ ಮರಿಯೆಚೊ ನಮಾನ್ ಆಯ್ಕತಚ್, ತಿಚೆ ಕುಶಿಂತ್ ಆಸ್ಲಲ್ಯಾ ಬಾಳ್ಕಾನ್ ಉಡಿ ಮಾರ್ಲಿ; ಆನಿ ಎಲಿಜಾಬೆತ್ ಪವಿತ್ರ್ ಅತ್ಮ್ಯಾನ್ ಭರೊನ್, ವ್ಹಡ್ಲ್ಯಾ ತಾಳ್ಯಾನ್ ಮ್ಹಣಾಲಿ: “ಸ್ತ್ರೀಯಾಂ ಭಿತರ್ ತುಂ ಸದೆಂವ್ ಆನಿ ಸದೆಂವ್ ತುಜೆ ಕುಶಿಚೆಂ ಫಳ್. ಮ್ಹಜ್ಯಾ ಸೊಮಿಯಾಚೆ ಮಾತೆನ್ ಮ್ಹಜೆ ಭೆಟೆಕ್ ಯೆಂವ್ಚೆಂ ಹೆಂ ಭಾಗ್ ಖಂಯ್ ಥಾವ್ನ್ ಮ್ಹಾಕಾ ಫಾವೊ ಜಾಲೆಂ? ತುಜ್ಯಾ ನಮಾನಾಚೊ ಸಬ್ದ್ ಮ್ಹಜ್ಯಾ ಕಾನಾಂತ್ ಪಡ್ತಚ್, ಮ್ಹಜೆ ಕುಶಿಂತ್ಲ್ಯಾ ಬಾಳ್ಕಾನ್ ಉಲ್ಲಾಸಾನ್ ಉಡಿ ಮಾರ್ಲಿ. ಸರ್ವೆಸ್ಪರಾನ್ ಆಪ್ಣಾಕ್ ಕಳಿತ್ ಕೆಲ್ಲ್ಯೊ ಸಂಗ್ತಿ ಘಡೊನ್ ಯೆತಲ್ಯೊ ಮ್ಹಣ್ ಸತ್ಮಾನ್ಲಲಿ ತುಂ ಕಿತ್ಲಿ ಭಾಗಿ!”
ತವಳ್ ಮರಿ ಮ್ಹಣಾಲಾಗ್ಲಿ:
“ಮ್ಹಜೊ ಜೀವ್ ಸರ್ವೆಸ್ಪರಾಚಿ ವ್ಹಡ್ವಿಕ್ ಗಾತಾ,
ಮ್ಹಜೊ ಅತ್ಮೊ ದೆವಾ ಮ್ಹಜ್ಯಾ ತಾರಕಾ ಥಂಯ್ ಸಂತೊಸಾನ್ ಉಡ್ತಾ.
ಕಿತ್ಯಾಕ್, ಅಪ್ಲೆ ಕಿರ್ಕೊಳ್ ಚರಣ್‍ದಾಸಿಚೆರ್ ತಾಣೆ ದಯಾದೀಷ್ಟ್ ಘಾಲಿ.
ದೆಕುನ್ ಹ್ಯಾ ಫುಡಾಂ ಸರ್ವ್ ಸಂತತಿ ಮ್ಹಾಕಾ ಸದೆಂವ್ ಮ್ಹಣುನ್ ಪಾಚಾರ್ತಲ್ಯೊ.
ಕಿತ್ಯಾಕ್ ಸಕ್ತಿವಂತಾನ್ ಮ್ಹಜೆ ಪಾಸತ್ ವಿಚಿತ್ರ್ ಕಾಮಾಂ ಕೆಲ್ಯಾಂತ್,
ಭಾಗೆವಂತ್ ತಾಚೆಂ ನಾಂವ್.
ಆಪ್ಣಾಕ್ ಭಿಯೆತಲ್ಯಾಂಚೆರ್ ದಾಖಯ್ತಾ ತೊ ಕಾಕುಳ್ತ್,
ಸಂತತೆ ಥಾವ್ನ್ ಸಂತತೆ ಪರ್‍ಯಾನ್,
ಆಪ್ಲ್ಯಾ ಬಾವ್ಳ್ಯಾನ್ ತಾಣೆಂ ಬಳ್ ದಾಖಯ್ಲಾಂ,
ಆಪ್ಲ್ಯಾ ಕಾಳ್ಜಾಂತ್ ವ್ಹಡ್ಪಣ್ ಚಿಂತ್ತಲ್ಯಾ ಗರ್ವ್ಯಾಂಕ್ ತಾಣೆಂ ಧುಸ್ಪಟಾಯ್ಲ್ಯಾತ್.
ಪದ್ವೆದಾರಾಂಕ್ ಊಂಚಾಸನಾಂ ಥಾವ್ನ್ ತಾಣೆಂ ಸಕ್ಲಾ ಘಾಲ್ಯಾತ್
ಆನಿ ಕಿರ್ಕೊಳ್ಯಾಂಕ್ ಊಂಚ್ ಉಬಾರ್ಲ್ಯಾತ್.
ಭುಕೆಲ್ಲ್ಯಾಂಕ್ ತಾಣೆ ಬರ್‍ಯಾ ವಸ್ತುಂನಿ ಭರ್ಲ್ಯಾತ್
ಆನಿ ಗ್ರೆಸ್ತಾಂಕ್ ರಿತ್ಯಾ ಹಾತಾಂನಿ ಪಾಟಿಂ ಧಾಡ್ಲ್ಯಾತ್.
ಆಮ್ಚ್ಯಾ ಪುರ್ವಜಾಂಕ್ ದಿಲ್ಲೆ ಭಾಸಾವ್ಣೆಕ್ ತಾಣೆ ಪಾಳೊ ದಿಲೊ ಆನಿ ಇಸ್ರಾಯೆಲಾಕ್, ಆಪ್ಲ್ಯಾ ಚಾಕ್ರಾಕ್ ತೊ ಆಧಾರ್ ದೀವ್ನ್ ಆಯ್ಲೊ.
ಉಗ್ಡಾಸ್ ತಾಣೆಂ ದವರ್ನ್ ದಾಖಯ್ಲಿ ದಯಾ ಅಬ್ರಾಹಾಮಾಕ್ ಆನಿ ತಾಚೆ ಸಂತತೆಕ್ ಸದಾಂಕಾಳ್.”
ಮರಿ ಚಡುಣೆಂ ತೀನ್ ಮಹಿನೆ ಎಲಿಜಾಬೆತಿ ಸಾಗಾತಾ ರಾವ್ಲಿ; ಉಪ್ರಾಂತ್ ಆಪ್ಲ್ಯಾ ಘರಾ ಪಾಟಿಂ ಗೆಲಿ.