📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಪ್
ದಳ್ಬಾರಾಂಚೊ ಸರ್ವೆಸ್ಪರ್ ಸಿಯೊನ್ ಪರ್ವತಾರ್
ಸಗ್ಳ್ಯಾ ಪರ್ಜಾಂಕ್ ಏಕ್ ವ್ಹಡ್ ಜೆವಣ್ ತಯಾರ್ ಕರ್ತಲೊ,
ಚರ್ಬೆಚ್ಯಾ ಮಾಸಾಂಚೆಂ ಆನಿ ಪರ್ನ್ಯಾ ದಾಕಾಂಸೊರ್ಯಾಚೆಂ ಜೆವಣ್,
ಸಾರಾಚ್ಯಾ ಆನಿ ಚರ್ಬೆಚ್ಯಾ ಮಾಸಾಂಚೆಂ, ಗಾಳುನ್ ಕಾಡ್ಲಲ್ಯಾ ಪರ್ನ್ಯಾ ದಾಕಾಸೊರ್ಯಾಚೆಂ.
ಹ್ಯಾ ಪರ್ವತಾರ್, ಸಗ್ಳ್ಯಾ ಪರ್ಜಾಂಚೆರ್ ಪಡ್ಲಲೊ ಆಸಾ ತೊ ಪಡ್ದೊ,
ಸಗ್ಳ್ಯಾ ರಾಷ್ಟ್ರಾಂಚೆರ್ ಪಾಂಗರ್ಲಲೆಂ ಆಸಾ ತೆಂ ಪಾಂಗ್ರುಣ್
ತೊ ಕಾಡುನ್ ಉಡಯ್ತಲೊ.
ತೊ ಸಾಸ್ಣಾಕ್ ಮರಣಾಚೊ ನಾಸ್ ಕರ್ತಲೊ.
ಸರ್ವೆಸ್ಪರ್ ದೇವ್ ಹರೆಕ್ ಮುಖಾವಯ್ಲಿಂ ದುಖಾಂ ಪುಸುನ್ ಕಾಡ್ತಲೊ;
ತೊ ಆಪ್ಲೆ ಪರ್ಜೆಚೊ ಕಳಂಕ್ ಆಖ್ಯೆ ಪೃಥ್ವೆ ವಯ್ಲೊ ಕಾಡುನ್ ಪಯ್ಸ್ ಕರ್ತಲೊ
ಕಿತ್ಯಾಕ್ ಸರ್ವೆಸ್ಪರ್ ಉಲಯ್ಲಾ.
ತ್ಯಾ ದಿಸಾ ಸಗ್ಳಿಂ ಮ್ಹಣ್ತಲಿಂ:
“ಪಳೆಯಾ, ಹೊ ಆಮ್ಚೊ ದೇವ್,
ತೊ ಆಮ್ಚಿ ಸೊಡ್ವಣ್ ಕರ್ತಲೊ ಮ್ಹಣ್
ಆಮಿ ತಾಚೆರ್ ವಿಶ್ವಾಸ್ ದವರ್ಲೊ.
ಹೊಚ್ ತೊ ಸರ್ವೆಸ್ಪರ್, ಆಮಿ ತಾಚೆರ್ ವಿಶ್ವಾಸ್ ದವರ್-ಲ್ಲೊ.
ತಾಣೆಂ ಆಮ್ಚಿ ಸೊಡ್ವಣ್ ಕೆಲ್ಯಾ
ದೆಕುನ್ ಆಮಿ ಉಲ್ಲಾಸುಂಯಾ ಆನಿ ಸಂತೊಸ್ಭರಿತ್ ಜಾವ್ಯಾಂ.”
ಕಿತ್ಯಾಕ್ ಸರ್ವೆಸ್ಪರಾಚೊ ಹಾತ್ ಹ್ಯಾ ಪರ್ವತಾರ್ ಆಸ್ತಲೊ.

ಶ್ಲೋಕ್: ಸರ್ವೆಸ್ಪರಾಚೆ ಘರಿಂ ಸದಾಂಕಾಲ್ ಹಾಂವ್ ಜಿಯೆತಲೊಂ.

1. ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ ಉಣೆಂ ನಾ,
   ಪಾಚ್ವೊ ಚರೊವ್ ಮೆಳ್ತಾ ಥಂಯ್ ತೊ ಮ್ಹಾಕಾ ವಿಶೆವ್ ದಿತಾ;
   ನಿಶಾಂತ್ ಉದ್ಕಾ ಸರ್ಶಿಂ ಮ್ಹಾಕಾ ತೊ ಅಪೊವ್ನ್ ವರ್ತಾ,
   ಮ್ಹಜ್ಯಾ ಜಿವಾಕ್ ನವ್ಯಾನ್ ಘಟಾಯ್ ದಿತಾ.
2. ಅಪ್ಲ್ಯಾ ನಾಂವಾ ಸರಿ ತೊ ಮ್ಹಾಕಾ ನೀಟ್ ವಾಟೆನ್ ಚಲಯ್ತಾ
   ಕಾಳೊಕಾಚ್ಯಾ ಭುಂಯಾರಾಂತ್ಲ್ಯಾನ್ ಹಾಂವ್ ಚಲ್ತಾಂ
   ತರ್‌ಯೀ ಕಸಲ್ಯಾಚ್ ವಾಯ್ಟಾಕ್ ಹಾಂವ್ ಭಿಯೆಂವ್ಚೊ ನಾ;
   ಕಿತ್ಯಾಕ್ ತುಂ ಮ್ಹಜ್ಯೆ ಸವೆಂ ಆಸಾಯ್;
   ತುಜೊ ದಾಂಡೊ ಆನಿ ಬೆತ್ ಆಸಾತ್ ತಿಂ ಮ್ಹಾಕಾ ಧಯ್ರ್ ದಿತಾ.
3. ಗಡ್ದ್ ಜೆವಣ್ ಮ್ಹಜ್ಯಾ ದುಸ್ಮಾನಾಂ ಹುಜಿರ್ ತುವೆಂ ತಯಾರ್ ಕೆಲಾಂಯ್
   ತೆಲಾನ್ ಮ್ಹಜೆಂ ಮಾತೆಂ ತುಂ ಮಾಖ್ತಾಯ್
   ಮ್ಹಜೆಂ ಕೊಪ್ ಭರೊನ್ ವೊಮ್ತತಾ
4. ಖಂಡಿತ್ ಜಾವ್ನ್ ಸಗ್ಳ್ಯಾ ಮ್ಹಜ್ಯಾ ಜಿವಿತಾಂತ್,
   ತುಜಿ ದಯಾಮಯಾ ಮ್ಹಜ್ಯೆ ಸವೆಂ ಆಸ್ತಲಿ,
   ಆನಿ ಸರ್ವೆಸ್ಪರಾಚ್ಯೆ ಘರಿಂ ಸದಾಂಕಾಲ್ ಹಾಂವ್ ಜಿಯೆತಲೊಂ.

ಸಾಂ. ಪಾವ್ಲುನ್‌ ಫಿಲಿಪ್ಪಿಗಾರಾಂಕ್ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೊ,
ದುರ್ಬಳ್ಕಾಯೆನ್ ಜಿಯೆಂವ್ಕ್‌ಯೀ ಹಾಂವ್ ಜಾಣಾ, ಗ್ರೇಸ್ತ್-ಕಾಯೆನ್ ಜಿಯೆಂವ್ಕ್‌ಯೀ ಹಾಂವ್ ಜಾಣಾ; ಸಗ್ಳ್ಯಾನ್ ಆನಿ ಸರ್ವ್ ಪರಿಸ್ಥಿತಿಂನಿ ಧಾದೊಶಿ ಜೆಂವ್ಕ್‍ಯೀ ಆನಿ ಉಪಾಶಿಂ ಪಡೊಂಕ್‍ಯೀ ಹಾಂವ್ ಶಿಕ್ಲಾಂ. ಗರ್ಜೆ ತಿತ್ಲೆಂ ಆಸುನ್ ಜಿಯೆಂವ್ಚೆಂ ವಾ ಅಡ್ಚಣೆಂತ್ ಜಿಯೆಂವ್ಚೆಂ, ಹೆಂ ಸಗ್ಳೆಂ ಮ್ಹಾಕಾ ಕಳ್ತಾ. ಮ್ಹಾಕಾ ಬಳ್ ದಿತಲ್ಯಾ ಸವೆಂ ಸರ್ವ್ ಸಂಗ್ತಿ ಕರುಂಕ್ ಹಾಂವ್ ಸಕ್ತಾಂ. ತರಿಪುಣ್ ಮ್ಹಜ್ಯಾ ಕಷ್ಟಾಂತ್ ವಾಂಟೆಲಿ ಜಾಂವ್ಕ್ ತುಮಿ ಫುಡೆಂ ಸರ್ಲ್ಯಾತ್, ಹೆಂ ತುಮ್ಚೆ ಥಂಯ್ ಆಸಾ ತೆಂ ಬರೆಂ ಮನ್ ದಾಖಯ್ತಾ. ಜೆಜು ಕ್ರಿಸ್ತಾ ಥಂಯ್ ತುಮ್ಕಾಂ ಆಸ್ಲಲೆ ಧಾರಾಳ್ ಸಂಪತ್ತೆ ವರ್ವಿಂ ಮ್ಹಜೊ ದೇವ್ ಸರ್ವ್ ತುಮ್ಚ್ಯಾ ಗರ್ಜಾಂಕ್ ಉದಾರ್ಪಣಿಂ ಪಾವ್ತಲೊ. ಆಮ್ಚ್ಯಾ ದೆವಾಕ್ ಆನಿ ಬಾಪಾಕ್ ಜಾಂವ್ ಮಹಿಮಾ ಸಾಸ್ಣಾಚ್ಯಾ ಸಾಸ್ಣಾಕ್. ಆಮೆನ್.

ಅಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೊ ಬಾಪ್ ತುಮ್ಯ್ಚಾ ಅಂತಸ್ಕರ್ನಾಚೆ ದೊಳೆ ಉಘಡುಂ,
ಅಶೆಂ ಕಸಲ್ಯಾ ಭರ್ವಶ್ಯಾಕ್ ತುಮ್ಕಾಂ ಅಪಯ್ಲ್ಯಾಂತ್ ಮ್ಹಣ್ ತುಮಿ ಸಮ್ಜತಲ್ಯಾತ್

ಮಾತೆವಾ ಪರ್ಮಾಣೆಂ ಶುಭ್‌ವಾರ್ತಾಮಾನ್‌
ತ್ಯಾ ವೆಳಿಂ ಜೆಜು ಪರ್ತ್ಯಾನ್ ಲೊಕಾ ಲಾಗಿಂ ಒಪಾರಿಂನಿ ಉಲಯ್ಲೊ. “ಸರ್ಗಿಂಚೆಂ ರಾಜ್ಯ್ ಅಶೆಂ ಮ್ಹಣ್ಯೆತ್: ಏಕ್ ರಾಯಾನ್ ಆಪ್ಲ್ಯಾ ಪುತಾಚ್ಯಾ ಲಗ್ನಾಕ್ ಏಕ್ ವ್ಹೊರಾ ಜೆವಣ್ ದಿಲೆಂ. ಜಾಂಕಾಂ ವ್ಹೊವ್ಳಿಕ್ ಸಾಂಗ್ಲಲಿ ತಾಂಕಾಂ ಆಪೊವ್ನ್ ಹಾಡುಂಕ್ ಮ್ಹಣ್ ಆಪ್ಲ್ಯಾ ಚಾಕ್ರಾಂಕ್ ತಾಣೆಂ ಧಾಡ್ಲೆ. ಪುಣ್ ತೆ ಯೆಂವ್ಕ್ ಆಯ್ಕಲೆನಾಂತ್. ಜೆವ್ಣಾಕ್ ಆಪಯ್‍ಲ್ಲ್ಯಾಂ ಸರ್ಶಿಂ ಪರ್ತ್ಯಾನ್ ದುಸ್ರ್ಯಾ ಚಾಕ್ರಾಂಕ್ ಧಾಡ್ನ್ ತಾಣೆಂ ಸಾಂಗಯ್ಲೆಂ: ‘ಮ್ಹಜೆಂ ಜೆವಣ್ ತಯಾರ್ ಜಾಲಾಂ; ಮ್ಹಜೆ ಪಾಡೆ ಆನಿ ಪುಷ್ಟಿ ಜಾನ್ವಾರಾಂ ಮಾರ್ಲ್ಯಾಂತ್; ಸಕ್ಕಡ್‍ಯೀ ಆಯ್ತೆಂ ಜಾಲಾಂ. ಲಗ್ನಾಚ್ಯಾ ಉತ್ಸವಾಕ್ ಯೆಯಾ.’ ಪುಣ್ ಕಾಂಯ್ ಗಣ್ಣೆಂ ಕರಿನಾಸ್ತಾನಾ ತೆ ಆಪಾಪ್ಲ್ಯಾ ಕಾಮಾಕ್ ಚಲ್ತಚ್ ರಾವ್ಲೆ: ಎಕ್ಲೊ ಆಪ್ಲ್ಯಾ ಶೆತಾಕ್ ಗೆಲೊ, ದುಸ್ರೊ ಆಪ್ಲೆ ಆಂಗ್ಡಿ ಗೆಲೊ. ಹೆರಾಂನಿ ಚಾಕ್ರಾಂಕ್ ಧರ್ಲೆ ಆನಿ ತಾಂಚೆ ವಿಕ್ಳಾಪ್ ಕರ್ನ್ ತಾಂಕಾಂ ಜಿವೆಶಿಂ ಮಾರ್ಲೆ. ಹಿ ಖಬರ್ ಆಯ್ಕುನ್ ರಾಯ್ ರಾಗಾನ್ ಪೆಟ್ಲೊ ಆನಿ ಆಪ್ಲಿಂ ಸೈನಾಂ ಧಾಡ್ನ್ ತ್ಯಾ ಖುನಿಗಾರಾಂಚೊ ತಾಣೆಂ ಸಂಹಾರ್ ಕೆಲೊ ಆನಿ ತಾಂಚೆಂ ಶಹರ್ ಭಸ್ಮುನ್ ಸೊಡ್ಲೆಂ. ಉಪ್ರಾಂತ್ ತಾಣೆಂ ಆಪ್ಲ್ಯಾ ಚಾಕ್ರಾಂಕ್ ಆಪೊವ್ನ್ ಮ್ಹಳೆಂ: ‘ವ್ಹೊರಾ ಜೆವಣ್ ತಯಾರ್ ಆಸಾ ಖರೆಂ, ಪುಣ್ ಆಪಯ್‍ಲ್ಲ್ಯಾ ವ್ಹೊವ್ಳ್ಯಾಂಕ್ ತೆಂ ಫಾವೊ ನಾ ಜಾಲೆಂ. ದೆಕುನ್ ವಚಾ ತುಮಿ ರಾಜ್ಯ್‍ರಸ್ತ್ಯಾಂನಿ ಆನಿ ಜಿತ್ಲೆ ತುಮ್ಕಾಂ ಮೆಳ್ತಾತ್, ತಿತ್ಲ್ಯಾಂಕ್‍ಯೀ ಲಗ್ನಾ ಉತ್ಸವಾಕ್ ಆಪೊವ್ನ್ ಹಾಡಾ.’ ಅಶೆಂ ತಾಚೆ ಚಾಕರ್ ವಾಟಾಂವಾಟಾಂನಿ ಗೆಲೆ ಆನಿ ಮೆಳ್ಳಲ್ಯಾ ಸಮೆಸ್ತಾಂಕ್, ಬರ್ಯಾಂಕ್‍ಯೀ, ಖೊಟ್ಯಾಂಕ್‍ಯೀ, ತಾಣಿಂ ಜಮೊ ಕೆಲೆ; ಆನಿ ಲಗ್ನಾಚೊ ಮಾಟೊವ್ ಸಯ್ರ್ಯಾಂನಿ ಭರ್ಲೊ.
ಸಯ್ರ್ಯಾಂಕ್ ಪಳೆಂವ್ಕ್ ರಾಯ್ ಮಾಟ್ವಾಕ್ ಆಯ್ಲೊ ಆನಿ ಥಂಯ್ ಲಗ್ನಾಚಿ ನ್ಹೆಸೊಣ್ ನ್ಹೆಸನಾತ್‍ಲ್ಲ್ಯಾ ಎಕ್ಲ್ಯಾಕ್ ತಾಣೆಂ ದೆಖ್ಲೊ. ರಾಯಾನ್ ತಾಚೆಲಾಗಿಂ ವಿಚಾರ್ಲೆಂ: ‘ಇಷ್ಟಾ, ಲಗ್ನಾಚಿ ನ್ಹೆಸೊಣ್ ನಾಸ್ತಾನಾ ಕಸೊ ತುಂ ಹಾಂಗಾ ಭಿತರ್ ಸರ್ಲೊಯ್?’ ಪುಣ್ ತಾಣೆಂ ಜಾಪ್ ಕಾಡ್ಲಿನಾ. ತವಳ್ ರಾಯಾನ್ ಚಾಕ್ರಾಂಕ್ ಸಾಂಗ್ಲೆಂ: ‘ತಾಚೆ ಹಾತ್‍ಪಾಂಯ್ ಬಾಂಧುನ್ ತಾಕಾ ಭಾಯ್ಲ್ಯಾ ಕಾಳೊಕಾಂತ್ ಉಡಯಾ; ಥಂಯ್ ಜಾತಲೆಂ ರಡ್ಣೆಂ ಆನಿ ದಾಂತ್‍ಖಿರ್ಲೊಣಿ.’ ಕಿತ್ಯಾಕ್ ಆಪಯ್‍ಲ್ಲೆ ಸಬಾರ್ ಆಸಾತ್, ಪುಣ್ ವಿಂಚುನ್ ಕಾಡ್‍ಲ್ಲೆ ಥೊಡೆಚ್.”