📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್‌
ಮ್ಹಜ್ಯಾ ಇಷ್ಟಾಕ್ ಏಕ್ ಗೀತ್ ಗಾಯ್ತಾಂ,
ತಾಚ್ಯಾ ದಾಕಾಂಮಳ್ಯಾ ವಿಶಿಂ ಮ್ಹಜೆಂ ಮೊಗಾ ಗೀತ್ ಗಾಯ್ತಾಂ.
ಎಕಾ ಪಿಕಾಳ್ ದೊಂಗ್ರಾರ್
ಮ್ಹಜ್ಯಾ ಇಷ್ಟಾಚೊ ಏಕ್ ದಾಕಾಂಮಳೊ ಆಸ್ಲೊ.
ತಾಣೆ ತೊ ಖಣ್ಲೊ ಆನಿ ಫಾತರ್ ಕಾಡುನ್ ನಿತಳ್ ಕೆಲೊ,
ಆನಿ ಥಂಯ್ ಉತ್ತಮ್ ದಾಕ್ವಾಲಿ ಲಾಯ್ಲ್ಯೊ.
ತಾಂಚೆ ಮಧೆಂ ತಾಣೆ ಏಕ್ ಬುರುಜ್ ಬಾಂದ್ಲೊ
ಆನಿ ಥಂಯ್ ಕೊಳಂಬಿ ತಯಾರ್ ಕೆಲಿ;
ತೊ ಮಳೊ ತಾಕಾ ದಾಕೊ ದಿತಲೊ ಮ್ಹಣ್ ತೊ ಆಶೆವ್ನ್ ರಾವ್ಲೊ,
ಪೂಣ್ ತಾಣೆ ದಿಲ್ಯೊ ರಾನ್ವಟ್ ದಾಕೊ.
ತರ್ ಆತಾಂ, ಜೆರುಸಾಲೆಮಾಚ್ಯಾ ನಿವಾಸ್ಯಾಂನೊ
ಆನಿ ಜುದಾಚ್ಯಾ ಮನ್ಶಾಂನೊ,
ಮ್ಹಜೆ ಆನಿ ಮ್ಹಜ್ಯಾ ದಾಕಾಂಮಳ್ಯಾ ಮಧೆಂ ನೀತ್ ಕರಾ.
ಮ್ಹಜ್ಯಾ ದಾಕಾಂಮಳ್ಯಾಕ್ ಹಾಂವೆಂ ಆನಿಕ್ ಕಿತೆಂ ಕರುಂಕ್ ಜಾಯ್ ಆಸ್ಲೆಂ
ಆನಿ ತೆಂ ಹಾಂವ್ ಕರಿನಾಸ್ತಾಂ ರಾವ್ಲಾಂ?
ತೊ ಮ್ಹಾಕಾ ಬರ್ಯೊ ದಾಕೊ ದಿತಲೊ ಮ್ಹಣ್ ಹಾಂವ್ ಆಶೆವ್ನ್ ರಾವ್ಲೊಂ,
ಪೂಣ್ ತಾಣೆ ಮ್ಹಾಕಾ ರಾನ್ವಟ್ ದಾಕೊ ಕಿತ್ಯಾಕ್ ಮ್ಹಣ್ ದಿಲ್ಯೊ?
ತರ್ ಆತಾಂ ಮ್ಹಜ್ಯಾ ದಾಕಾಂ ಮಳ್ಯಾಕ್
ಹಾಂವ್ ಕಿತೆಂ ಕರುಂಕ್ ವೆತಾಂ ತೆಂ ಸಾಂಗ್ತಾಂ:
ಹಾಂವ್ ತಾಚಿ ವೋಂಯ್ ಕಾಡ್ತಲೊಂ
ಆನಿ ತೊ ಚರವಾಚೊ ಜಾಗೊ ಜಾತಲೊ;
ತಾಚೊ ದೊರೊ ಕೊಸ್ಳಾವ್ನ್ ಘಾಲ್ತಲೊಂ
ಆನಿ ತೊ ಪಾಂಯಾತಳಾ ಮಸ್ತೊನ್ ವೆತಲೊ.
ಹಾಂವ್ ತೊ ಪಾಡ್ ಜಾಂವ್ಕ್ ಸೊಡ್ತಲೊಂ;
ಕೋಣ್‍ಚ್ ತೊ ಬೆಂಡ್ಚೊ ನಾ ವಾ ಖಣ್ಚೊ ನಾ,
ತಾಂತುಂ ಝಿಲ್ಕುಟಾಂ ಜಾತಲಿಂ
ಆನಿ ಕಾಂಟೆಕುಂಟೆ ವಾಡ್ತಲೆ.
ಕುಪಾಂನಿ ತಾಚೆರ್ ಪಾವ್ಸ್ ಘಾಲಿನಾ ಜಾಂವ್ಕ್
ಹಾಂವ್ ತಾಂಕಾಂ ಆಜ್ಞ್ಯಾ ದಿತಲೊಂ.
ದಳ್ಬಾರಾಂಚ್ಯಾ ಸರ್ವೆಸ್ಪರಾಚೊ ದಾಕಾಂಮಳೊಚ್ ಇಸ್ರಾಯೆಲಾಚೆಂ ಘರಾಣೆಂ,
ಆನಿ ಜುದಾಚೊ ಲೋಕ್‍ಚ್ ತಾಚೆಂ ಅಪುರ್ಬಾಯೆಚೆಂ ಝಾಡ್.
ತೊ ನ್ಯಾಯ್‍ನಿತಿಚಿ ಆಶಾ ಧರುನ್ ರಾವ್ಲೊ,
ಪೂಣ್ ತಾಕಾ ಪಳೆಂವ್ಕ್ ಮೆಳ್ಳೊ ರಗ್ತಪಾತ್;
ತೊ ಪ್ರಾಮಾಣಿಕ್ಪಣಾಚಿ ಆಶಾ ಧರುನ್ ರಾವ್ಲೊ,
ಪೂಣ್ ತಾಕಾ ಆಯ್ಕುಂಕ್ ಮೆಳ್ಳಿ ಬೊಬಾಟ್.

ಶ್ಲೋಕ್: ಇಸ್ರಾಯೆಲಾಚೆಂ ಘರಾಣೆಂಚ್ ಸರ್ವೆಸ್ಪರಾಚೊ ದಾಕಾಂ-ಮಳೊ.

1. ಎಜಿಪ್ತಾಂತ್ಲಿ ಹುಮ್ಟುನ್ ಏಕ್ ದಾಕ್ವಲ್ ತುವೆಂ ಹಾಡ್ಲಿಯ್,
   ಜನಾಂಗಾ೦ಕ್ ಧಾಂವ್ಡಾವ್ನ್ ತುವೆಂ ತಿ ರೊಯ್ಲಿಯ್,
   ದರ‍್ಯಾ ಪರ‍್ಯಾನ್ ತಿಣೆ ಫಾಂಟೆ ಸೊಡ್ಲೆ,
   ವ್ಹಡ್ಲ್ಯೆ ನಂಯ್ ಪರ‍್ಯಾನ್ ತಿಣೆ ಕೊಂಬ್ರೆ ದಿಲೆ
2. ತರ್ ಕಿತ್ಯಾಕ್ ತಿಚ್ಯೆ ದೊರೆ ತುವೆಂ ಪರ‍್ತಿಲ್ಯಾಯ್?
   ವಾಟೆನ್ ವೆತಾತ್ ತಿಂ ಸಕ್ಕಡ್‌ಯಿ ಹಾತ್ ಘಾಲ್ನ್ ದಾಕೊ ಖುಂಟ್ತಾತ್
   ರಾನ್-ದುಕೊರ್ ಪಳೆ ಕಶಿ ತಾಚಿ ದೆಸ್ವಾಟ್ ಕರ‍್ತಾತ್
   ವ್ಹಯ್, ರಾನ್ವಟ್ ಸಾವ್ಜಾಂ ತೆಂ ಉಸ್ತುನ್-ಮಸ್ತುನ್ ಸೊಡ್ತಾತ್.
3. ದಳ್ಬಾರಾಂಚ್ಯಾ ದೆವಾ, ಆಮ್ಚೆಶಿಂ ಪಾಟಿಂ ಯೆ,
   ಸರ್ಗಿ೦ ಥಾವ್ನ್ ಪಾಟಿಂ ಪರ್ತೊನ್ ಆಮ್ಕಾಂ ಪಳೆ,
   ಹ್ಯೆ ದಾಕ್ವಲಿಚಿ ಭೆಟ್ ಕರ್, ತಿಚಿ ಜತನ್ ಕರ್,
   ತುಜ್ಯಾ ಉಜ್ವ್ಯಾ ಹಾತಾನ್ ರೊವ್ನ್ ತುವೆಂ ತಿ ವ್ಹಯ್ ಕೆಲ್ಲಿಯ್.‌
4. ಆಮಿ ತುಜ್ಯೆ ಸರ್ಶಿಲಿಂ ಪಯ್ಸ್ ಸರುನ್ ವೆಚಿನಾಂವ್,
   ಆಮ್ಕಾಂ ನವ್ಯಾ ಜಿವಾನ್ ಭರ್, ತೆದ್ವಾಂ ತುಜಿ ಕೀರ್ತ್ ಆಮಿ ಗಾಯ್ತೆಲ್ಯಾಂವ್.
   ದಳ್ಬಾರಾಂಚ್ಯಾ ದೆವಾ ಆಮ್ಕಾಂ ಪಾಟಿಂ ಹಾಡ್
   ತುಜ್ಯಾ ಮುಖಮಳಾಚೊ ಪರ್ಜಳ್ ಆಮ್ಚೆರ್ ಫಾಂಕುಂ,
   ಆನಿ ಆಮ್ಕಾಂ ಸೊಡ್ವಣ್ ಮೆಳ್ತಲಿ.

ಸಾಂ. ಪಾವ್ಲುನ್‌ ಫಿಲಿಪ್ಪಿಗಾರಾಂಕ್ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೊ,
ಕಸಲೊಚ್ ಖಂತ್‍ಹುಸ್ಕೊ ಧರಿನಾಕಾತ್; ಹರ್ಯೆಕ್ ತುಮ್ಚಿ ಗರ್ಜ್ ಮಾಗ್ಣ್ಯಾನ್ ಆನಿ ಉಪ್ಕಾರಿ ಮನಾನ್ ದೆವಾಕ್ ಕಳಿತ್ ಕರಾ. ತವಳ್ ಆಮ್ಚೆ ಜಾಣ್ವಾಯೆನ್ ಆಟಾಪುಂಕ್ ನಜೊ ಜಾಲ್ಲೆಂ ತೆಂ ದೆಣೆಂ, ದೆವಾಚೆಂ ಸಮಾಧಾನ್ ತುಮ್ಚಿಂ ಕಾಳ್ಜಾಂ ಆನಿ ತುಮ್ಚಿಂ ಮನಾಂ ಕ್ರಿಸ್ತಾ ಜೆಜುಚ್ಯಾ ಎಕ್ವಟಾಂತ್ ಶಾಬಿತ್ ರಾಕ್ತಲೆಂ.
ಶೆಕಿಂ, ಭಾವಾಂಭಯ್ಣಿಂನೋ, ಜೆಂ ಕಿತೆಂ ಸತ್ ಆನಿ ಜೆಂ ಕಿತೆಂ ಮರ್ಯಾದೆಚೆಂ, ನಿರ್ಮಳ್, ನಿತಿಚೆಂ, ಮೊಗಾಪಾತ್ರ್ ಆನಿ ಬರೆಂ ಮಾನಾಪಾತ್ರ್, ತಶೆಂಚ್ ಉತ್ತಮ್ ಮ್ಹಣ್ ಲೆಖ್ಚೆಂ ಆನಿ ಹೊಗ್ಳಿಕ್ ಫಾವೊ ಜಾಲ್ಲೆಂ ತಸಲ್ಯಾಚೆರ್ ತುಮ್ಚೆಂ ಗಮನ್ ವ್ಹರಾ. ಮ್ಹಜೆ ಲಾಗ್ಚೆಂ ತುಮಿ ಕಿತೆಂ ಶಿಕ್ಲ್ಯಾತ್ ವಾ ಘೆತ್ಲಾಂ, ಆಯ್ಕಲಾಂ ವಾ ಪಳೆಲಾಂ ತೆಂ ಪಾಳುಂಕ್ ಫುಡೆಂ ಸರಾ. ಸಮಾಧಾನ್ ದಿತಾ ತೊ ದೇವ್ ತುಮ್ಚೆ ಸವೆಂ ಆಸ್ತಲೊ.

ಹಾಂವೆಂ ತುಮ್ಕಾಂ ವಿಂಚುನ್ ಕಾಡ್ಲ್ಯಾಂತ್, ಮ್ಹಣ್ತಾ ಸೊಮಿ,
ತುಮಿ ಭಾಯ್ರ್ ಸರ್ನ್ ವಚೊನ್ ಬಾಳ್ತಾ ತಸಲೆಂ ಫಳ್ ದಿಂವ್ಚ್ಯಾಕ್
ಹಾಂವೆಂ ತುಮ್ಕಾ ನೆಮ್ಲ್ಯಾತ್.

ಮಾತೆವಾ ಪರ್ಮಾಣೆಂ ಶುಭ್‌ವಾರ್ತಾಮಾನ್
ಜೆಜುನ್‌ ಪ್ರಧಾನ್‌ ಯಾಜಕಾಂಕ್‌ ಆನಿ ಲೊಕಾಚ್ಯಾ ಮಾಲ್ಘಡ್ಯಾಂಕ್‌ ಹಿ ಏಕ್‌ ಒಪಾರ್ ಸಾಂಗ್ಲಿ : "ಎಕ್ಲೊ ಭುಂಯ್ಕಾರ್ ಆಸ್ಲೊ. ತಾಣೆ ಏಕ್ ದಾಕಾಂಮಳೊ ಲಾಯ್ಲೊ. ತಾಚೆ ಭೊಂವ್ತಿಂ ಏಕ್ ವೋಯ್ ಘಾಲಿ; ತಾಚ್ಯಾ ಮಧೆಂ ದಾಕಾಂರೊಸಾಕ್ ಏಕ್ ಘಾಣ್ಯಾಫೊಂಡ್ ಖೊಂಡ್ಲೊ ಆನಿ ಪಾರೊ ಕರುಂಕ್ ಏಕ್ ಭುರುಜ್ ಬಾಂಧ್ಲೆಂ. ಉಪ್ರಾಂತ್ ಮೊಳೊ ಒಕ್ಲಾಂಕ್ ಗೆಣಿಕ್ ದೀವ್ನ್ ತೊ ಪರ್ಗಾಂವಾಕ್ ಗೆಲೊ. ಫೊಳ್ ಪಿಕ್ಚೊ ವೇಳ್ ಯೆತಚ್, ಗೆಣಿ ಬಾಬ್ತಿಂ ಫೊಳಾಂಚೊ ವಾಂಟೊ ಘೆಂವ್ಚ್ಯಾಕ್ ಆಪ್ಲ್ಯಾ ಚಾಕ್ರಾಂಕ್ ತಾಣೆ ಒಕ್ಲಾಂ ಸರ್ಶಿಂ ಧಾಡ್ಲೆ. ಪುಣ್ ತ್ಯಾ ಒಕ್ಲಾಂನಿ ತಾಚ್ಯಾ ಚಾಕ್ರಾಂಕ್ ಧರ್ಲೆ ಆನಿ ಎಕ್ಲ್ಯಾಕ್ ತಾಣಿಂ ಸರ್ಸರಿ ಮಾರ್ ಘಾಲೆ. ದುಸ್ರ್ಯಾಚೊ ಜೀವ್ ಕಾಡ್ಲೊ ಆನಿ ತಿಸ್ರ್ಯಾಕ್ ಫಾತ್ರಾಯ್ಲೊ. ಪರ್ತ್ಯಾನ್ ತಾಣೆ ಪಯ್ಲೆಂಚ್ಯಾ ಪ್ರಾಸ್ ಚಡ್ ಹೆರ್ ಚಾಕ್ರಾಂಕ್ ಧಾಡ್ಲೆ; ಪುಣ್ ಒಕ್ಲಾಂನಿ ತಾಂಕಾಂಯೀ ತೆಚ್‍ಪರಿಂ ಚಲಯ್ಲೆ. ಶೆವಟಿಂ ತಾಣೆ ಆಪ್ಲ್ಯಾ ಪುತಾಕ್‍ಚ್ ಧಾಡ್ಲೊ. ‘ಮ್ಹಜ್ಯಾ ಪುತಾಕ್ ಪುಣ್‍ಯೀ ತೆ ಮರ್ಯಾದ್ ದಿತಲೆ’ ಮ್ಹಣ್ ತಾಣೆ ಚಿಂತ್ಲೆಂ. ಪುಣ್ ಪುತಾಕ್ ಪಳೆತಚ್ ತೆ ಒಕ್ಲಾಂಚೆ ಎಕಾಮೆಕಾಲಾಗಿಂ ಮ್ಹಣಲಾಗ್ಲೆ: ‘ಅಳೆ, ದಾಯ್ಜಾಚೊ ವಾರಿಸ್ದಾರ್! ಯೆಯಾ, ತಾಕಾ ಆಮಿ ಲಗಾಡ್ ಕಾಡ್ಯಾಂ ಆನಿ ತಾಚೆಂ ದಾಯ್ಜ್ ಆಮ್ಚೆಂ ಜಾತಲೆಂ.’ ಅಶೆಂ ತಾಕಾ ತಾಣಿಂ ಧರ್ಲೊ ಆನಿ ದಾಕಾಂಮಳ್ಯಾಂತ್ಲೊ ಭಾಯ್ರ್ ವೊಡ್ನ್ ಘಾಲ್ನ್ ಜಿವೆಶಿಂ ಮಾರ್ಲೊ. ತರ್ ದಾಕಾಂಮಳ್ಯಾಚೊ ಧನಿ ಪಾಟಿಂ ಯೆತಚ್, ತ್ಯಾ ಒಕ್ಲಾಚ್ಯಾಂಕ್ ಕಿತೆಂ ಕರಿತ್ ಮ್ಹಣ್ ತುಮಿ ಚಿಂತ್ತಾತ್?” ತೆ ಮ್ಹಣಾಲೆ : “ತ್ಯಾ ನಷ್ಟ್ಯಾಂಕ್ ತೊ ಲಗಾಡ್ ಕಾಡ್ತಲೊ, ಆನಿ ಅಪ್ಲೊ ದಾಕಾಂಮಳೊ ಫಾವೊತ್ಯಾ ವೆಳಾರ್ ಗೇಣ್ ಫಾರಿಕ್ ಕರ್ತಲ್ಯಾಂಕ್ ಗೆಣಿಕ್ ದಿತಲೊ.” ತಾಕಾ ಜೆಜು ಮ್ಹಣಾಲೊ: “ಪವಿತ್ರ್ ಪುಸ್ತಕಿಂ ಹೆ ಪರಿಂ ಬರೊವ್ನ್ ಆಸ್ಲಲೆಂ ತುಮಿ ವಾಚ್ಲಾಂಮೂ?
‘ಬಾಂಧ್ಪ್ಯಾಂನಿ ಉಪ್ಕಾರ್ನಾ ಮ್ಹಣುನ್ ಸಾಂಡ್‍ಲ್ಲೊ ಫಾತರ್‌ಚ್
ಜಾಂವ್ಕ್ ಪಾವ್ಲೊ ಮುಲ್ಯಾಫಾತರ್;
ಸರ್ವೆಸ್ಪರಾಚೆಂ ಕಾಮ್ ತೆಂ,
ಆಮ್ಚ್ಯಾ ದೊಳ್ಯಾಂಕ್ ತೆಂ ಏಕ್ ವಿಚಿತ್ರ್!’”