📖 ಆಯ್ತಾರಾಚಿಂ ವಾಚ್ಪಾಂ

ಎಜೆಕಿಯಲ್‌ ಪ್ರವಾದ್ಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಪ್
ಸರ್ವೆಸ್ಪರ್ ಅಶೆಂ ಮ್ಹಣ್ತಾ: ತುಮಿ ಮ್ಹಣ್ತಾತ್: “ಸರ್ವೆಸ್ಪರ್ ಕರ್ತಾ ತೆಂ ಸಾರ್ಕೆಂ ನ್ಹಯ್.” ಇಸ್ರಾಯೆಲಾಚ್ಯಾ ಘರಾಣ್ಯಾ, ಆಯ್ಕ್! ಹಾಂವ್ ಕರ್ತಾಂ ತೆಂ ಸಾರ್ಕೆಂ ನ್ಹಯ್, ವಾ ತುಮಿ ಕರ್ತಾತ್ ತೆಂ ಸಾರ್ಕೆಂ ನ್ಹಯ್? ನಿತಿವಂತ್ ಮನಿಸ್ ಆಪ್ಲೆಂ ನಿತಿವಂತ್ಪಣ್ ಸಾಂಡುನ್ ವಾಯ್ಟ್ ಕರ್ತಾ ಆನಿ ಮರ್ತಾ ತೆದ್ನಾ, ತೊ ಆಪ್ಣೆ ಕೆಲ್ಲ್ಯಾ ವಾಯ್ಟಾಕ್ ಲಾಗುನ್ ಮರ್ತಾ. ಪೂಣ್ ಖೊಟೊ ಮನಿಸ್ ಆಪ್ಲೆಂ ಖೊಟೆಪಣ್ ಸಾಂಡುನ್ ನ್ಯಾಯ್‍ನಿತಿನ್ ಚಲ್ತಾ ತೆದ್ನಾ, ತೊ ಅಪ್ಲೊ ಜೀವ್ ವಾಂಚಯ್ತಾ. ಆಪ್ಣೆಂ ಕೆಲ್ಲ್ಯಾ ಸಗ್ಳ್ಯಾ ಪಾತ್ಕಾಂಕ್ ತಾಣೆ ಪಾಟ್ ಕೆಲ್ಯಾ ದೆಕುನ್ ತೊ ಖರೆಂಚ್ ಜಿಯೆತಲೊ; ತೊ ಮರ್ಚೊ ನಾ.

ಶ್ಲೋಕ್: ತುವೆಂ ದಾಖಯ್ಲಲ್ಯೆ ದಯೆಚೊ ಉಗ್ಡಾಸ್ ಕರ್, ಸರ್ವೆಸ್ಪರಾ.

1. ತುಜ್ಯೊ ವಾಟೊ ಮ್ಹಾಕಾ ಒಳ್ಕುಂಕ್ ದೀ ಸರ್ವೆಸ್ಪರಾ,
   ತುಜ್ಯೆ ಮಾರೊಗ್ ಮ್ಹಾಕಾ ದಾಕಯ್.
   ತುಜ್ಯಾ ಸತಾಚ್ಯೆ ವಾಟೆನ್ ಮ್ಹಾಕಾ ಚಲೊವ್ನ್ ವರ್ನ್ ಮ್ಹಾಕಾ ಶಿಕಯ್
   ಕಿತ್ಯಾಕ್ ತುಂ ಮ್ಹಜೊ ದೇವ್, ತುಂಚ್ ಮ್ಹಜೊ ತಾರೊಕ್.
2. ಉಗ್ಡಾಸ್ ಕರ್ ಸರ್ವೆಸ್ಪರಾ, ಸುರ್ವೆರ್ ಥಾವ್ನ್ ತುಂವೆಂ ದಾಕಯ್ಲಲೆಂ ವಿಶ್ವಾಸಿಪಣ್
   ಕೆದಿಂಚ್ ವಿಸ್ರುನಾಕಾ ಪುರ್ವಿಲ್ಯಾ ಕಾಳಾಂಚೊ ತುಜೊ ಮೋಗ್.
   ಮ್ಹಜ್ಯಾ ತರ್ನಾಟ್ಪಣಾಚ್ಯಾ ಕಾಳಾರ್ ಕೆಲ್ಲ್ಯಾಪಾತ್ಕಾಂಚೊ ಉಗ್ಡಾಸ್ ಧರಿನಾಕಾ
   ತುಜ್ಯಾ ನಿರಂತರಿ ಮೊಗಾಕ್ ಆನಿ ಬರೆಪಣಾಕ್ ಸರಿಜಾವ್ನ್ ತುಂ ಮ್ಹಜೊ ಉಗ್ಡಾಸ್ ಕರ್.
3. ಸರ್ವೆಸ್ಪರ್ ಬರೊ ಆನಿ ಆಪ್ಲ್ಯಾ ಉತ್ರಾಕ್ ಚುಕನಾ ತೊ
   ವಾಟ್ ಚುಕ್ಲಲ್ಯಾಂಕ್ ತೊ ಸಾರ್ಕೆ ವಾಟೆಕ್ ಹಾಡ್ತಾ
   ಖಾಲ್ತ್ಯಾಂಕ್ ಸತಾಚ್ಯಾ ಮಾರ್ಗಾನ್ ತೊ ಚಲೊವ್ನ್ ವರ್ತಾ
   ದುಬ್ಳ್ಯಾ-ಧಾಕ್ಟ್ಯಾಂಕ್ ಆಪ್ಲ್ಯೊ ವಾಟೊ ತೊ ದಾಕಯ್ತಾ.

ಸಾಂ.ಪಾವ್ಲುನ್‌ ಫಿಲಿಪ್ಪಿಗಾರಾಂಕ್ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೋ,
ಜರ್ ಕ್ರಿಸ್ತಾ ಥಂಯ್ ಕಸಲಿಯೀ ಭುಜ್ವಣ್ ತುಮಿ ಮ್ಹಾಕಾ ದಿತಾತ್ ವಾ ಮೊಗಾ ಥಾವ್ನ್ ಯೆತಾ ತೆಂ ಉತ್ತೇಜನ್ ತುಮ್ಚೆ ಥಂಯ್ ಕಾಂಯ್ ಆಸಾ; ಜರ್ ಅತ್ಮಿಕ್ ಎಕ್ವಟ್ ತುಮಿ ಕಾಂಯ್ ದಾಖೊಂವ್ಚೊ ಆಸಾ ವಾ ಎಕಾಮೆಕಾಚ್ಯಾ ಮಯ್ಪಾಸಾನ್ ಆನಿ ಕಣ್ವಾಳಾಯೆನ್ ತುಮಿ ಭರ್ಲ್ಯಾತ್; ತರ್ ಎಕ್‍ಚ್ ಮೊಗಾನ್, ಎಕ್‍ಚ್ ಅತ್ಮ್ಯಾನ್ ಆನಿ ಎಕ್‍ಚ್ ಮನಾನ್ ಎಕ್ವಟ್ ಸಾಂಬಾಳ್ನ್ ಮ್ಹಜೊ ಸಂತೊಸ್ ತುಮಿ ಭರ್ಪೂರ್ ಕರಾ. ಸ್ವಾರ್ಥಾಕ್ ಪಡುನ್ ವಾ ಪೊಕಳ್ ದವ್ಲತೆ ಖಾತಿರ್ ಕಸಲೆಂಚ್ ತುಮಿ ಕರಿನಾಕಾತ್; ಬಗರ್ ಖಾಲ್ತ್ಯಾ ಮನಾಚೆ ಜಾವ್ನ್, ಹೆರಾಂ ತುಮ್ಚೆ ಪ್ರಾಸ್ ಚಡ್ ಬರಿಂ ಮ್ಹಣ್ ತುಮಿ ಲೆಖಾ. ತುಮ್ಚೊಚ್ ಸ್ವಂತ್ ಆದಾಯ್ ಪಳೆನಾಕಾತ್; ಬಗರ್ ಹೆರಾಂಚೆಂಯೀ ಬರೆಪಣ್ ತುಮಿ ಸೊಧಾ. ತುಮ್ಚೆಂ ಮನ್ ಕ್ರಿಸ್ತಾ ಜೆಜುಚೆಂ ಮನ್ ಜಾಂವ್.
ಸಂಯ್ಭಾನ್ ತೊ ದೇವ್.
ತರ್‌ಯೀ ತ್ಯಾ ಸಮಸಮ್‍ಪಣಾಕ್ ತೊ ಲಬ್ದೊನ್ ರಾವ್ಲೊನಾ.
ಬಗರ್ ಮನ್ಶಾಸಾರ್ಕೊ ಜಾವ್ನ್,
ಗುಲಾಮಾಚೆಂ ರೂಪ್ ಘೆವ್ನ್,
ತಾಣೆಂ ಆಪ್ಣಾಕ್‍ಚ್ ಪೂರ್ಣ್‍ಪಣಿ ಖಾಲಿ ಕೆಲೊ
ಮನ್ಶಾ ರುಪಾನ್ ತೊ ದಿಷ್ಟಿ ಪಡ್ಲೊ,
ಆನಿ ಆಪ್ಣಾಕ್‍ಚ್ ಖಾಲ್ತೊ ಕರ್ನ್, ಮೊರ್ನಾ ಪರ್ಯಾನ್ -
ಖುರ್ಸಾಚ್ಯಾ ಮೊರ್ನಾ ಪರ್ಯಾನ್!
ತೊ ವಿಧೇಯ್ ಜಾಲೊ.
ದೆಕುನ್ ದೆವಾನ್ ತಾಕಾ ಅತಿ ಊಂಚ್ ಉಬಾರ್ಲೊ
ಆನಿ ಸರ್ವ್ ನಾಂವಾಂ ಪ್ರಾಸ್ ವರ್ತೆಂ ನಾಂವ್ ತಾಕಾ ದಿಲೆಂ.
ಅಶೆಂ ತಾಣೆಂ ಖುಶಿ ವ್ಹೆಲಿ
ಬಾಗ್ವಜಯ್ ಮ್ಹಣ್ ಹ್ಯಾ ನಾಂವಾಕ್ ಹರ್ಯೆಕ್ ದಿಂಬಿ.
ಸರ್ಗಿಂ, ಸಂಸಾರಿಂ ಆನಿ ಪಾತಾಳಿಂ
ಆನಿ ಪರ್ಗಟಿಜಯ್ ಮ್ಹಣ್ ಹರ್ಯೆಕ್ ಜಿಬೆನ್ ದೆವಾ ಬಾಪಾಚೆ
ಮಹಿಮೆಕ್ ಜೆಜು ಕ್ರೀಸ್ತ್ ಮ್ಹಣ್ ಸೊಮಿ.

ಮ್ಹಜೆ ಬಕ್ರೆ ಮ್ಹಜೊ ತಾಳೊ ಆಯ್ಕತಾತ್, ಮ್ಹಣ್ತಾ ಸೊಮಿ
ಹಾಂವ್ ತಾಂಕಾ ಒಳ್ಕತಾಂ ಆನಿ ತೆ ಮ್ಹಜ್ಯಾ ಪಾಟ್ಲ್ಯಾನ್ ಯೆತಾತ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ಪ್ರಧಾನ್ ಯಾಜಕಾಂಕ್ ಆನಿ ಜುದೆವಾಂಚ್ಯಾ ಮಾಲ್ಘಡ್ಯಾಂಕ್ ಜೆಜುನ್ ಮ್ಹಳೆಂ: ಆತಾಂ ತುಮ್ಕಾಂ ಹೆಂ ಕಶೆಂ ದಿಸ್ತಾ ಸಾಂಗಾ: ಎಕ್ಲ್ಯಾ ಮನ್ಶಾಕ್ ದೋಗ್ ಪೂತ್ ಆಸ್ಲೆ. ತೊ ಆಪ್ಲ್ಯಾ ಪಯ್ಲ್ಯಾ ಪುತಾ ಸರ್ಶಿಂ ಯೇವ್ನ್ ಮ್ಹಣಾಲೊ: ‘ಪುತಾ, ತುಂ ಆಜ್ ವಚುನ್ ದಾಕಾಂಮಳ್ಯಾಂತ್ ಕಾಮ್ ಕರ್.’ ‘ನಾ, ಹಾಂವ್ ವಚನಾ’ ತಾಣೆ ಜಾಪ್ ದಿಲಿ, ಉಪ್ರಾಂತ್ ತಾಣೆಂ ಆಪ್ಲೆಂ ಮನ್ ಬದ್ಲಿಲೆಂ ಆನಿ ತೊ ಗೆಲೊ. ಮಾಗಿರ್ ಬಾಪುಯ್ ಧಾಕ್ಟ್ಯಾ ಪುತಾ ಸರ್ಶಿಂ ಯೇವ್ನ್ ತಶೆಂಚ್ ಮ್ಹಣಾಲಾಗ್ಲೊ. ‘ಜಾಯ್ತ್ ಬಾಬಾ, ವೆತಾಂ’ ಮ್ಹಣುನ್ ತಾಣೆ ಜಾಪ್ ದಿಲಿ; ಪುಣ್ ತೊ ಗೆಲೊನಾ. ಹ್ಯಾ ದೊಗಾಂ ಪುತಾಂ ಪಯ್ಕಿ ಕೊಣೆ ತರ್ ಬಾಪಾಯ್ಚಿ ಖುಶಿ ಕೆಲಿ?” ತಾಣಿಂ ಜಾಪ್ ದಿಲಿ: “ಪಯ್ಲ್ಯಾನ್.” ಜೆಜು ತಾಂಚೆಲಾಗಿಂ ಮ್ಹಣಾಲೊ: “ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ, ಸುಂಕಾಗಾರ್ ಆನಿ ಕಲ್ವಂತಾಂ ತುಮ್ಚೆ ಪ್ರಾಸ್ ಪಯ್ಲಿಂ ಸರ್ಗಿಂಚ್ಯಾ ರಾಜ್ಯಾಂತ್ ರಿಗ್ತಾತ್. ಕಿತ್ಯಾಕ್ ತುಮ್ಕಾಂ ಜಿವಿತಾಚಿ ಸಾರ್ಕಿ ವಾಟ್ ದಾಖೊವ್ನ್ ದಿಂವ್ಕ್ ಮ್ಹಣ್ ಜುವಾಂವ್ ಆಯ್ಲೊ, ಪುಣ್ ತುಮಿ ತಾಕಾ ಸತ್ಮಾನ್ಲೊನಾ, ಸುಂಕಾಗಾರಾಂನಿ ಆನಿ ಕಲ್ವಂತಾಂನಿ ತಾಕಾ ಸತ್ಮಾನ್ಲೊ. ಹೆಂ ತುಮಿ ಪಳೆಲೆಂ ಜಾಲ್ಯಾರ್‌ಯೀ, ಮನ್ ಬದ್ಲುನ್ ತುಮಿ ತಾಕಾ ಸತ್ಮಾನ್ಲೊನಾ.