📖 ಆಯ್ತಾರಾಚಿಂ ವಾಚ್ಪಾಂ

ಜಾಣ್ವಾಯೆಚ್ಯಾ ಪುಸ್ತಕಾಂತ್ಲೆಂ ವಾಚಪ್
ದೆವಾಚಿ ಒಳಕ್ ನಾತ್ಲಲಿಂ ಸರ್ವ್ ಮಾನ್ಶಾಂ ಪಿಶಿಂ.
ದಿಸ್ತಾತ್ ತ್ಯಾ ಬರ್ಯಾ ವಸ್ತುಂ ಉದೆಶಿಂ
ಜೊ ಆಸಾ ತಾಚಿ ಒಳಕ್ ಕರುನ್ ಘೆಂವ್ಕ್‌ ತಿಂ ಸಕ್ಲಿಂ ನಾಂತ್,
ಘಡ್ಲಲ್ಯಾ ವಸ್ತುಂಕ್ ಚೀತ್ ದೀವ್ನ್
ಘಡ್ಣಾರಾಕ್ ತಿಂ ಒಳ್ಕುಂಕ್ ನಾಂತ್.
ಉಜೊ, ವಾರೆಂ ವಾ ಝಡ್ಝಡಿತ್ ವಾರೆಂ,
ನೆಕೆತ್ರಾಂ ಮಂಡಳ್, ಉದ್ಕಾಚೊ ಲೋಟ್ ವಾ ಆಕಾಸಾಚೆ ದಿವೆ,
ಹಿಂ ಸಗ್ಳಿಂ ಸಂಸಾರ್ ಚಲೊವ್ಪಿ ದೇವ್ ಮ್ಹಣ್ ತಿಂ ಸಮ್ಜಲಿಂ.
ಹ್ಯಾ ವಸ್ತುಂಚೆ ಸೊಬಾಯೆಕ್ ಭುಲೊನ್
ತಾಂಣಿಂ ಹೊ ದೇವ್ ಮ್ಹಣ್ ಲೆಖ್ಲ್ಯೊ ಜಾಲ್ಯಾರ್,
ತಾಂಚೊ ಧನಿ ತಾಂಚೆ ಪ್ರಾಸ್ ಶ್ರೇಷ್ಟ್
ಮ್ಹಣ್ ತಾಂಣಿಂ ಸಮ್ಜುನ್ ಘೆಂವ್ಕ್ ಜಾಯ್ ಆಸ್ಲೆಂ;
ಕಿತ್ಯಾಕ್ ಸೊಬಾಯೆಚ್ಯಾ ಮೂಳ್ ಘಡ್ಣಾರಾನ್ ತ್ಯೊ ರಚ್‌ಲ್ಲ್ಯೊ.
ತಾಂಚಿ ಪದ್ವಿ, ಆನಿ ತಾಂಚೆಂ ಬಳ್ ತಾಂಕಾಂ ವಿಸ್ಮಿತ್ ಕರುಂಕ್ ಪಾವ್ಲಿಂ ಜಾಲ್ಯಾರ್,
ತ್ಯೊ ಕೆಲ್ಯಾತ್ ತೊ ತಾಂಚೆ ಪ್ರಾಸ್ ಚಡ್ ಪದ್ವೆದಾರ್
ಮ್ಹಣ್ ತಾಂಣಿಂ ಸಮ್ಜುನ್ ಘೆಂವ್ಕ್‌ ಜಾಯ್ ಆಸ್ಲೆಂ,
ಕಿತ್ಯಾಕ್ ರಚ್ನಾಂಚ್ಯಾ ವ್ಹಡ್ಪಣಾ ಆನಿ ಸೊಬಾಯೆವರ್ವಿಂ ಅನುಮಾನ್ ಕರುನ್
ತಾಂಚ್ಯಾ ರಚ್ಣಾರಾಕ್ ಆಮಿ ಒಳ್ಕುಂಕ್ ಪಾವ್ತಾಂವ್.
ತರಿ ಹ್ಯಾ ಮನ್ಶಾಂಚೊ ಗುನ್ಯಾಂವ್ ವ್ಹಡ್ ನ್ಹಯ್, ಕಿತ್ಯಾಕ್ ದೆವಾಕ್ ಸೊದ್ತಾನಾ
ಆನಿ ತೊ ಮೆಳ್ಚೆ ಖಾತಿ‌ರ್ ಅತ್ರೆಗ್ತಾನಾ
ತಿಂ ವಾಟ್ ಚುಕೊನ್ ಗೆಲಿಂ ಜಾವ್ಯೆತ್.
ತಾಣೆಂ ಕೆಲ್ಲ್ಯಾ ವಸ್ತುಂ ಮದೆಂ ರಾವುನ್ ತಾಂಚೊ ಠಾವ್ ಘೆತಾನಾ,
ತಾಂಚೆಂ ಭಾಯ್ಲೆಂ ರೂಪ್ ಪಳೆವ್ನ್ ತಿಂ ಭುಲ್ತಾತ್,
ಕಿತ್ಯಾಕ್ ದಿಸ್ತ್ಯೊ ವಸ್ತು ಸೊಬಿತ್ ಆಸಾತ್.
ತರಿ, ತಾಂಕಾಂ ಗುನ್ಯಾಂವ್ ನಾ ಮ್ಹಣ್ ಸಾಂಗುಂಕ್ ಜಾಯ್ನಾ,
ಕಿತ್ಯಾಕ್ ಸಂಸಾರಾಚೊ ಠಾವ್ ಘೆಂವ್ಕ್ ತಾಂಕಾಂ ಇತ್ತಿ ಜಾಣ್ವಾಯ್ ಆಸಾ ಜಾಲ್ಯಾರ್,
ತಾಚ್ಯಾ ಧನಿಯಾಕ್ ಹಾಚೆ ಪ್ರಾಸ್ ವೆಗಿಂ ಸೊಧುನ್ ಕಾಡುಂಕ್
ತಾಂಚ್ಯಾನ್ ಕಿತ್ಯಾಕ್ ಜಾಲೆಂ ನಾ?

ಶ್ಲೋಕ್: ಆಕಾಸ್ ದೆವಾಚಿ ಮಹಿಮಾ ವರ್ಣಿತಾ,
         ಅಂತ್ರಾಳ್ ತಾಚ್ಯಾ ಹಾತಾಂಚಿ ಕೃತ್ಯಾಂ ಪರ್ಗಟ್ತಾ.

1. ಏಕ್ ದೀಸ್ ದುಸ್ರ್ಯಾ ದಿಸಾಕ್ ಹಿ ಗಜಾಲ್ ಸಾಂಗ್ತಾ,
   ಏಕ್ ರಾತ್ ದುಸ್ರೇ ರಾತಿಕ್ ಹಿ ಖಬರ್ ಕಳಯ್ತಾ.
   ಉಲೊವ್ಪ್ ನಾ, ಉತ್ರಾಂ ನಾಂತ್,
   ತಾಂಚೊ ತಾಳೊ ಆಯ್ಕುಂಕ್ ಯೆನಾ.
2. ತರೀ ಪ್ರಥ್ವೆರ್ ಶೆಕಾನ್‌ಶೆಕ್ ತಾಂಚೊ ತಾಳೊ ಗಾಜ್ತಾ,
   ಸಂಸಾರಾಚ್ಯಾ ಶಿಮಾಂ ಪರ್ಯಾಂತ್
   ತಾಂಚೊ ಸಂದೇಶ್ ಪಾವ್ತಾ
   ಆಕಾಸಾರ್ ಸುರ್ಯಾಕ್ ತಾಣೆಂ ಏಕ್ ತಂಬು ಘಾಲಾ.
3. ನೊವ್ರ್ಯಾ ಪರಿಂ ಆಪ್ಲ್ಯಾ ಲಗ್ನಾ ಕುಡಾಂತ್ಲೊ ತೊ ಭಾಯ್ರ್ ಸರ್ತಾ
   ವಿರಾ ಭಾಶೆನ್ ಉಲ್ಲಾಸಾನ್ ಆಪ್ಲಿ ಧಾಂವ್ ಮಾರುಂಕ್ ಯೆತಾ
   ಮಳ್ಬಾಚ್ಯೆ ಎಕೆ ಶಿಮೆರ್ ತೊ ಉದೆತಾ ಆನಿ ಆನ್ಯೆಕೆ ಶಿಮೆ ಪರ್ಯಾಂತ್ ಪಾವ್ತಾ
   ತಾಚ್ಯೆ ಧಗಿಂತ್ಲೆಂ ಕಿತೆಂಚ್ ಲಿಪೊಂವ್ಕ್ ಜಾಯ್ನಾ.

ಸಾಂ ಪಾವ್ಲುನ್ ಕೊಲೊಸ್ಸೆಗಾರಾಂಕ್ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್

ಭಾವಾಂ-ಭಯ್ಣಿಂನೋ,
ತೊಚ್ ಪ್ರತಿರೂಪ್ ಅದೃಶ್ಯ್ ದೆವಾಚೆಂ,
ಪ್ರಥಮ್ ಜನಿತ್ ಸರ್ವ್ ರಚ್ನಾಂ ಮಧೆಂ,
ತಾಚೆ ಥಂಯ್ ಸರ್ಗಿಂಚಿಂ ಆನಿ ಪೃಥ್ವೆಚಿಂ,
ದಿಸ್ತಾತ್ ತಿಂ ಆನಿ ದಿಸನಾತ್‌ಲ್ಲಿಂ ಸರ್ವ್ ರಚ್ನಾಂ-
ಸಿಯಾಸಣಾಂ, ಸ್ವಾಮಿತ್ವಾಂ, ಅಧಿಕಾರಿ ಆನಿ ಪ್ರಭುತ್ವಾಂ-ದೆವಾನ್ ರಚ್ಲಿಂ
ಸರ್ವ್ ರಚ್ನಾಂ ಜಾವ್‌ ಪಯ್ಲೆಂ ತೊ ಆಸ್‌ಲ್ಲೊ.
ಸರ್ವ್ ವಸ್ತು ತಾಚೆ ಮಾರಿಫತ್ ಅಸ್ತಿತ್ವಾಂತ್ ಆಸಾತ್.
ತೊಚ್ ಮಸ್ತಕ್ ಕುಡಿಚೆಂ, ಮ್ಹಣ್ಜೆ ಪವಿತ್ರ್ ಸಭೆಚೆಂ,
ಆರಂಭ್ ವಾ ಪಯ್ಲೆಂ ಫೊಳ್ ಜಿವಂತ್ ಜಾಲ್ಲ್ಯಾಂಚೆಂ.
ದೆವಾಚಿಚ್ ಖುಶಿ ಅಶಿ ಚಾಲಿ:
ತಾಚೆ ಥಂಯ್ ಆಪ್ಣಾಚಿ ಸಗ್ಳಿ ಸಂಪೂರ್ಣತಾ ಬಿಡಾರ್ ಕರುನ್ ಆಸ್ಚಿ
ಆನಿ ತಾಚ್ಯಾ ಖುರ್ಸಾಚ್ಯಾ
ರಗ್ತಾ ಮಾರಿಫತ್ ಸಮಾಧಾನ್ ಸ್ಥಾಪಿತ್ ಕರ್ನ್,
ಭುಮಿಚ್ಯಾ ಆನಿ ಅಂತ್ರಾಳಾಚ್ಯಾ
ಸರ್ವ್ ರಚ್ನಾಂಕ್‌ ಆಪ್ಣಾಂ ಥಂಯ್ ರಾಜಿ ಕರುನ್ ಘೆವ್ಚಿ ಮ್ಹಣ್.

ಕಿತ್ಲಿ ಅಗಣಿತ್ ಸರ್ವೆಸ್ಪರಾ ತುಜಿಂ ಕೃತ್ಯಾಂ!
ಜಾಣ್ವಾಯೆನ್ ತುವೆಂ ತಿಂ ಸಗ್ಳಿಂ ಕೆಲ್ಯಾಂಯ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ

ತ್ಯಾ ವೆಳಿಂ, ಜೆಜು ಶಿಸಾಂಲಾಗಿಂ ಮ್ಹಣಾಲೊ: "ಕೊಣಾಕ್‌ಚ್ ದೋಗ್ ಧನಿಯಾಂಚಿ ಚಾಕ್ರಿ ಕರುಂಕ್ ಸಾಧ್ಯ್ ನಾ. ಕಾರಣ್, ಎಕ್‌ಚ್ ತೊ ಎಕ್ಲ್ಯಾಚೊ ದ್ವೇಶ್ ಕರ್ತಲೊ ಆನಿ ದುಸ್ರ್ಯಾಚೊ ಮೋಗ್ ಕರ್ತಾಲೊ; ವಾ ತೊ ಪಯ್ಲ್ಯಾಕ್ ಲಬ್ದತಲೊ ಆನಿ ದುಸ್ರ್ಯಾಚಿ ಬೆಪರ್ವಾ ಕರ್ತಲೊ ತುಮ್ಚ್ಯಾನ್ ದೆವಾಚಿಯಿ ದುಡ್ವಾಚಿ ಚಾಕ್ರಿ ಕರುಂಕ್ ಜಾಯ್ನಾ.”

ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚ್ಯಾ ಜಿವಾಕ್ ಕಿತೆಂ ಖಾವ್ಚೆಂ ಜೆವ್ಚೆಂ ಆನಿ ತುಮ್ಚೇ ಕುಡಿಕ್ ಕಿತೆಂ ನ್ಹೆಸ್ಚೆಂ ಪಾಂಗರ್ಚೆಂ ಮ್ಹಣುನ್ ಲೆಖಾ ವರ್ತೊ ಹುಸ್ಕೊ ತುಮ್ಮಾಂ ನಾಕಾ. ಖಾಣಾ ಪ್ರಾಸ್ ಜೀವ್ ವರ್ತೊ ಆನಿ ನ್ಹೆಸ್ಣಾ ಪ್ರಾಸ್ ಕೂಡ್ ವರ್ತಿ ನ್ಹಯ್? ಪಳೆಯಾ ಅಂತ್ರಾಳಾಚಿಂ ಸುಕ್ಣಿಂ ತಿಂ ವೊಂಪಿನಾತ್, ಲುಂವಿನಾತ್ ವಾ ತುಪ್ಯಾಂನಿ ಪುಂಜಾಯ್ನಾತ್. ತರಿಪುಣ್ ತುಮ್ಚೊ ಸರ್ಗಿಂಚೊ ಬಾಪ್ ತಾಂಕಾಂ ಪೊಸ್ತಾ. ತುಮಿ ತಾಂಚೆ ಪ್ರಾಸ್ ಕಿತ್ಲ್ಯಾಕ್‌ಯೀ ಉತ್ತೀಮ್ ನ್ಹಯ್? ತುಮ್ಚೆಂ ಮಧೆಂ ಕೊಣ್ ಚಿಂತಾ ಕರ್ನ್ ಆಪ್ಲೆಂ ಆವ್ಕ್ ಥೊಡ್ಯಾ ವೆಳಾಕ್ ಪುಣ್‌ಯೀ ಚಡೊಂವ್ಕ್ ಸಕತ್? ಆನಿ ನ್ಹೆಸ್ಣಾ ವಿಶ್ಯಾಂತ್ ತುಮಿ ಕಿತ್ಯಾಕ್ ಖಂತ್ ಕರ್ಚಿ? ಶೆತಾಂತ್ಲಿ ತಿಂ ಕಾಟ್ ಫುಲಾಂ ಕಶಿಂ ವಾಡ್ತಾತ್ ತೆಂ ಪಳೆಯಾ, ತಿಂ ಘೊಳನಾತ್ ವಾ ವೊಳಿನಾತ್. ತರಿಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಸಾಲ್ಮಾಂವ್ ರಾಯ್ ಲೆಗುನ್ ಆಪ್ಲ್ಯಾ ಸಗ್ಳ್ಯಾ ವೈಭವಾಂತ್ ತಾಂತ್ಲ್ಯಾ ಏಕ್ ಫುಲಾಸಾರ್ಕೊ ನ್ಹೆಸ್‌ಲ್ಲೊ ನಾ. ಆಜ್ ಆಸಾ ಆನಿ ಫಾಲ್ಯಾ ರಾಂದ್ನಿಂತ್ ಲಾಸ್ತಾತ್ ತ್ಯಾ ಶೆತಾ೦ತ್ಲೆಂ ತಣ್ ಸಯ್ತ್ ಜರ್ ದೇವ್ ಹೆ ಪರಿಂ ನ್ಹೆಸಯ್ತಾ, ತರ್ ಕಿತ್ಲ್ಯಾ ವರ್ತ್ಯಾ ಥರಾನ್ ತುಮ್ಕಂ ತೊ ನ್ಹೆಸೊಂವ್ಚೊನಾ, ಉಣ್ಯಾ ಭಾವಾರ್ಥಾಚ್ಯಾಂನೊ! ದೆಕುನ್ ಕಿತೆಂ ಖಾವ್ಚೆಂ ಆನಿ ಕಿತೆಂ ಪಿಯೆವ್ಚೆಂ ಆನಿ ಕಿತೆಂ ನ್ಹೆಸ್ಚೆಂ ? ಅಶೆಂ ಮ್ಹಣುನ್ ತುಮಿ ಖಂತ್ ಕರಿನಾಕಾತ್, ಹೆಂ ಸಗ್ಳೆಂ ಸೊಧ್ಚೆಂ ಅನ್ಭಾವಾರ್ಥ್ಯಾಂನಿ.ಹ್ಯಾ ಸರ್ವಾಂಚಿ ತುಮ್ಕಾಂ ಗರ್ಜ್ ಆಸಾ ಮ್ಹಣ್ ಸರ್ಗಿ೦ ಆಸ್ಲಲೊ ತುಮ್ಚೊ ಬಾಪ್ ಜಾಣಾ. ದೆಕುನ್ ಸೊಧಾ ತುಮಿ ಪಯ್ಲೆಂ ದೆವಾಚೆಂ ರಾಜ್ಯ್ ಆನಿ ತಾಚಿ ಖುಶಿ, ಆನಿ ಹ್ಯೊ ಸರ್ವ್ ವಸ್ತುಯಿ ತೊ ತುಮ್ಕಾಂ ದಿತಲೊ. ಫಾಲ್ಯಾಂಚೆಂ ಚಿಂತುನ್ ಖಂತ್ ಕರಿನಾಕಾತ್. ಫಾಲ್ಯಾಚಿ ಖಂತ್ ಫಾಲ್ಯಾಕ್, ಆಯ್ಚಿ ಖಂತ್ ಆಜಿಕ್ ಪುರೊ.