📖 ಆಯ್ತಾರಾಚಿಂ ವಾಚ್ಪಾಂ

ಸಿರಾಖಾಚ್ಯಾ ಪುಸ್ತಕಾಂತ್ಲೆಂ ವಾಚಪ್
ರಾಗ್ ಆನಿ ಕ್ರೋಧ್, ಹ್ಯೊ ದೋನ್‍ಯೀ ವಸ್ತು ನಷ್ಟ್ಯೊ,
ತರೀ ಪಾತ್ಕಿ ತಾಂಕಾಂ ವೇಂಗ್ ಮಾರ್ತಾ.
ಸರ್ವೆಸ್ಪರ್ ಫಾರಿಕ್ಪಣ್ ಘೆತಲ್ಯಾಚೆಂ ಫಾರಿಕ್ಪಣ್ ಘೆತಲೊ,
ಕಿತ್ಯಾಕ್ ತೊ ತಾಚ್ಯಾ ಪಾತ್ಕಾಚೆಂ ಲೇಖ್ ದವರ್ತಾ.
ತುಜ್ಯಾ ಪೆಲ್ಯಾನ್ ತುಕಾ ಕೆಲ್ಲೊ ಅನ್ಯಾಯ್ ಭೊಗ್ಶಿ,
ಆನಿ ತುಂ ಮಾಗ್ಣೆಂ ಕರ್ತಾಯ್ ತೆದ್ನಾ ತುಜಿಂ ಪಾತ್ಕಾಂ ಭೊಗ್ಸತಲಿಂ.
ಏಕ್ ಮನಿಸ್ ದುಸ್ರ್ಯಾಚೊ ರಾಗ್ ಧರುನ್ ಆಸಾ ಜಾಲ್ಯಾರ್,
ತಾಚ್ಯಾನ್ ಸರ್ವೆಸ್ಪರಾ ಲಾಗಿಂ ಕಾಕುಳ್ತ್ ಕಶಿ ಮಾಗುಂಕ್ ಜಾಯ್ತ್?
ಆಪ್ಣಾ ಸಾರ್ಕ್ಯಾ ಮನ್ಶಾಕ್ ತೊ ದಯಾ ದಾಕಯ್ನಾ ಜಾಲ್ಯಾರ್,
ಆಪ್ಲ್ಯಾಚ್ ಪಾತ್ಕಾಚೆಂ ಭೊಗ್ಸಣೆಂ ತಾಚ್ಯಾನ್ ಕಶೆಂ ಮಾಗುಂಕ್ ಜಾಯ್ತ್?
ಮಾಸಾರಗ್ತಾಚೊ ಜಾವ್ನ್-ಯೀ ತೊ ರಾಗ್ ಧರುನ್ ರಾವತ್ ಜಾಲ್ಯಾರ್,
ತಾಚ್ಯಾ ಪಾತ್ಕಾಚೆಂ ಭೊಗ್ಸಣೆಂ ತಾಕಾ ಕೋಣ್ ದಿತ್?
ನಿಮಾಣ್ಯಾ ವಸ್ತುಂಚೊ ಉಗ್ಡಾಸ್ ಧರ್ ಆನಿ ದುಸ್ಮಾನ್ಕಾಯ್ ಸೊಡ್;
ತುಂ ಮರ್ತಲೊಯ್ ಆನಿ ಕುಸ್ತಲೊಯ್ ಮ್ಹಣ್ ಉಗ್ಡಾಸ್ ಧರ್
ಆನಿ ಆಜ್ಞಾ ಪಾಳ್.
ಆಜ್ಞಾಂಚೊ ಉಗ್ಡಾಸ್ ಧರ್ ಆನಿ ತುಜ್ಯಾ ಪೆಲ್ಯಾಚೆರ್ ರಾಗಾರ್ ಜಾಯ್ನಾಕಾ, ಮಹೋನ್ನತಾಚ್ಯಾ ಸೊಲ್ಲ್ಯಾಚೊ ಉಗ್ಡಾಸ್ ಕರ್ ಆನಿ ಅಪ್ರಾಧಾಂಚಿ ಪರ್ವಾ ಕರಿನಾಕಾ.
ಝಗ್ಡ್ಯಾಂ ಥಾವ್ನ್‌ ಪಯ್ಸ್‌ ರಾವ್‌,ಆನಿ ತುಜಿಂ ಪಾತ್ಕಾಂ ಉಣಿಂ ಜಾತಲಿಂ,
ಕಿತ್ಯಾಕ್‌ ರಾಗಿಷ್ಟ್‌ ಮನಿಸ್‌ ಝಗ್ಡಿಂ ಉಪ್ಜಯ್ತಾ,
ಪಾತ್ಕಿ ಇಷ್ಟಾಗತ್‌ ತುಟಯ್ತಾ
ಆನಿ ಶಾಂತಿನ್‌ ಜಿಯೆತೆಲ್ಯಾ ಮನ್ಶಾಂ ಮದೆಂ ದುಸ್ಮಾನ್ಕಾಯ್‌ ಉತ್ಪನ್ನ್‌ ಕರ್ತಾ.

ಶ್ಲೋಕ್: ಸರ್ವೆಸ್ಪರ್ ಸಗ್ಳೊಚ್ ಕಣ್ವಳೊ ಆನಿ ದಯಾಳ್,
         ರಾಗ್ ಕರುಂಕ್ ಸವ್ಕಾಸ್, ಕಾಕುಳ್ತಿನ್ ಅಪಾರ್.

1. ಅತ್ಮ್ಯಾ ಮ್ಹಜ್ಯಾ, ಸರ್ವೆಸ್ಪರಾಕ್ ಹರ್ಸಿ.
   ಜಿವಾ ಮ್ಹಜ್ಯಾ, ತಾಚೆಂ ಪವಿತ್ರ್ ನಾಂವ್ ನಾಂವಾಡ್;
   ಅತ್ಮ್ಯಾ ಮ್ಹಜ್ಯಾ, ಸರ್ವೆಸ್ಪರಾಕ್ ಹರ್ಸಿ,
   ಆನಿ ತಾಚೆ ಸರ್ವ್ ಉಪ್ಕಾರ್ ಕೆದಿಂಚ್ ವಿಸ್ರುನಾಕಾ.
2. ತೊಚ್ ಸರ್ವ್ ತುಜೆ ಅಪ್ರಾಧ್ ಭೊಗ್ಸಿತಾ,
   ಸಕ್ಕಡ್ ಪಿಡೆಂಕ್ ಒಕತ್ ದಿತಾ;
   ಫೊಂಡಾ೦ತ್ಲೊ ತುಜೊ ಜೀವ್ ತೊ ರಾಖ್ತಾ.
   ಮೋಗ್ ಆನಿ ದಯಾ ಮ್ಹಣ್ತಾತ್ ತಸಲ್ಯಾ
   ಫುಲಾಂಚ್ಯಾ ಮುಕುಟಾನ್ ತುಕಾ ನೆಟಯ್ತಾ.
3. ತಾಚೊ ಕ್ರೋಧ್ ಸದಾಂಚ್ ಉರ‍್ತಾ ತಸ್ಲೊ ನ್ಹಯ್‌,
   ವ್ಹಯ್‌, ತೊ ಸದಾಂಕಾಲ್ ರಾಗ್ ಧರ್ನ್ ರಾಂವ್ಚೊ ನಾ.
   ಆಮ್ಚ್ಯಾ ಪಾತ್ಕಾಂಕ್ ಫಾವೊ ತ್ಯಾ ಮಾಪಾನ್ ತೊ ಖ್ಯಾಸ್ತ್ ಲಾಯ್ನಾ
   ಆಮ್ಚ್ಯಾ ಗುನ್ಯಾಂವಾ೦ಕ್ ಫಾವೊ ತೆಂ ಫಾರಿಕ್ಪಣ್ ತೊ ಘೆನಾ.

ಸಾಂ.ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೋ,
ಕಿತ್ಯಾಕ್‌ ಆಮ್ಚೆ ಮಧ್ಲೊ ಕೊಣ್‍ಚ್ ಆಪ್ಣಾ ಖಾತಿರ್ ಮ್ಹಣ್ ಜಿಯೆನಾ ವಾ ಆಪ್ಣಾ ಖಾತಿರ್ ಮ್ಹಣ್ ಮೊರನಾ. ಆಮಿ ಜಿಯೆತಾಂವ್ ಜಾಲ್ಯಾರ್ ತೆಂ ಸೊಮಿಯಾ ಖಾತಿರ್; ಆಮಿ ಮೊರ್ತಾಂವ್ ಜಾಲ್ಯಾರ್ ತೆಂಯೀ ಸೊಮಿಯಾ ಖಾತಿರ್. ತಶೆಂ ಆಸ್ತಾಂ ಜಿಯೆಲ್ಯಾರ್‍ಯೀ ಮೆಲ್ಯಾರ್‌ಯೀ ಆಮಿ ಸೊಮಿಯಾಚಿಂಚ್. ಕಿತ್ಯಾಕ್ ಜಿವಂತ್ ಆಸ್ಲಲ್ಯಾಂಚೊ ಆನಿ ಮೆಲ್ಲ್ಯಾಂಚೊ ಆಪುಣ್ ಸೊಮಿ ಜಾಯ್ಜಯ್ ಮ್ಹಣ್ ಕ್ರೀಸ್ತ್ ಮೆಲೊ ಆನಿ ಜಿವಂತ್ ಉಠ್ಲೊ.

ಏಕ್ ನವೊ ಉಪದೆಸ್ ಹಾಂವ್ ತುಮ್ಕಾಂ ದಿತಾಂ, ಮ್ಹಣ್ತಾ ಸೊಮಿ,
ಜಶೆಂ ಹಾಂವೆಂ ತುಮ್ಚೊ ಮೋಗ್ ಕೆಲೊ.
ತಶೆಂ ತುಮಿಯ್ ಎಕಾಮೆಕಾಚೊ ಮೋಗ್ ಕರಾ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತವಳ್ ಪೆದ್ರುನ್ ಜೆಜು ಸರ್ಶಿಂ ಯೇವ್ನ್ ವಿಚಾರ್ಲೆಂ: “ಸೊಮಿಯಾ, ಮ್ಹಜೊ ಭಾವ್ ಮ್ಹಜೆರ್ ಚೂಕ್ ಕರಿತ್ ಆಸಾ ಜಾಲ್ಯಾರ್, ಕಿತ್ಲೆ ಪಾವ್ಟಿ ಹಾಂವೆಂ ತಾಕಾ ಭೊಗ್ಶಿಜಯ್? ಸಾತ್ ಪಾವ್ಟಿಂಗೀ?” ಜೆಜುನ್ ತಾಕಾ ಜಾಪ್ ದಿಲಿ: “ಸಾತ್ ಪಾವ್ಟಿಂ ನ್ಹಯ್, ಬಗರ್ ಸಾತಾಂಚೆ ಸತ್ತರ್ ಪಾವ್ಟಿಂ.”
“ಸರ್ಗಿಂಚೆಂ ರಾಜ್ ಅಶೆಂ ಮ್ಹಣ್ಯೆತ್: ಏಕ್ ರಾಯಾನ್ ಏಕ್ ಪಾವ್ಟಿ ಆಪ್ಲ್ಯಾ ಚಾಕ್ರಾಲಾಗ್ಚೆಂ ಲೆಖ್ ಘೆಂವ್ಕ್ ಖುಶಿ ವ್ಹೆಲಿ. ಲೆಖ್ ಘೆಂವ್ಕ್ ಧರ್ಲೆಂ ತಿತ್ಲೆಂಚ್, ಕೊರೊಡಾಂನಿ ತಾಕಾ ದೆವೆಂ ಆಸ್ಲಲ್ಯಾ ಎಕ್ಲ್ಯಾಕ್ ತಾಚೆ ಮುಖಾರ್ ಹಾಡ್ಲೊ. ಪುಣ್ ಫಾರಿಕ್ ಕರುಂಕ್ ತಾಚೆಲಾಗಿಂ ಕಾಂಯ್ಚ್ ನಾತ್‍ಲ್ಲೆಂ ದೆಕುನ್ ತಾಕಾ, ತಾಚೆ ಬಾಯ್ಲೆ ಭುರ್ಗ್ಯಾಂಕ್ ಆನಿ ತಾಚೆಂ ಮ್ಹಣ್ ಆಸ್ಲಲೆಂ ಸಕ್ಕಡ್ ವಿಕುಂಕ್ ಜಾಯ್ ಮ್ಹಣ್ ತಾಚ್ಯಾ ಧನಿಯಾಚಿ ಹುಕುಮ್ ಜಾಲಿ. ತವಳ್ ತೊ ಚಾಕರ್ ಧನಿಯಾಚ್ಯಾ ಪಾಂಯಾಂ ಪಡುನ್ ‘ಮ್ಹಾಕಾ ಥೊಡಿ ಪುರ್ಸತ್ ದೀ ಆನಿ ತುಜೆಂ ಸಗ್ಳೆಂ ಹಾಂವ್ ಫಾರಿಕ್ ಕರ್ತಾಂ’ ಮ್ಹಣುನ್ ಪರಾತಿಲಾಗ್ಲೊ. ಧನಿ ಚಾಕ್ರಾಚೆರ್ ಮೊವಾಳ್ಳೊ ಆನಿ ತಾಚೆಂ ರೀಣ್ ಮಾಫಿ ಕರ್ನ್, ತಾಕಾ ವಚುಂಕ್ ಸೊಡ್ಲೊ. ಪುಣ್ ಹೊ ಚಾಕರ್ ಭಾಯ್ರ್ ಗೆಲೊ ತಿತ್ಲೊಚ್, ಮೆಳ್ಳೊ ತಾಕಾ ತಾಚೊ ಏಕ್ ಸಾಂಗಾತಿ ಚಾಕರ್. ತಾಣೆ ಹಾಕಾ ಶೆಂಭರ್ ರುಪಯ್ ದೆವೆಂ ಆಸ್‍ಲ್ಲೆ. ಹಾಣೆ ತಾಕಾ ಧರ್ನ್ ಉಬೊ ಕೆಲೊ ಆನಿ ತಾಚೊ ಗಳೊ ಚಿರ್ಡುನ್ ಮ್ಹಳೆಂ: ‘ಮ್ಹಾಕಾ ದೆವೆಂ ಆಸಾ ತೆಂ ಆತಾಂಚ್ ಫಾರಿಕ್ ಕರ್.’ ತವಳ್ ತೊ ಸಾಂಗಾತಿ ಚಾಕರ್ ಹಾಚ್ಯಾ ಪಾಂಯಾಂ ಪಡುನ್, ‘ಮ್ಹಾಕಾ ಥೊಡಿ ಪುರ್ಸತ್ ದೀ ಆನಿ ತುಜೆಂ ಸಗ್ಳೆಂ ಹಾಂವ್ ಫಾರಿಕ್ ಕರ್ತಾಂ’ ಮ್ಹಣುನ್ ಪರಾತಿಲಾಗ್ಲೊ. ಪುಣ್ ಹೊ ಚಾಕರ್ ಆಯ್ಕನಾ ಜಾಲೊ; ಮಾತ್ರ್ ನ್ಹಯ್, ತಾಣೆ ರೀಣ್ ಫಾರಿಕ್ ಕರಿಸರ್ ತಾಕಾ ಹಾಣೆ ಬಂದೆಂತ್ ದವರಯ್ಲೊ. ಘಡ್‍ಲ್ಲಿ ಸಂಗತ್ ಪಳೆವ್ನ್ ಹೆರ್ ಚಾಕ್ರಾಂಕ್ ಭೋವ್ ಚಡ್ ದುಖ್ಲೆಂ ಆನಿ ಜಾಲ್ಲಿ ಸಗ್ಳಿ ಗಜಾಲ್ ತಾಣಿಂ ಯೇವ್ನ್ ಆಪ್ಲ್ಯಾ ಧನಿಯಾಕ್ ಕಳಯ್ಲಿ. ತವಳ್ ಧನಿಯಾನ್ ತ್ಯಾ ಚಾಕ್ರಾಕ್ ಆಪ್ಣಾ ಹುಜಿರ್ ಆಪೊಂವ್ಕ್ ಲಾವ್ನ್ ಮ್ಹಳೆಂ: ‘ನಷ್ಟ್ಯಾ ಚಾಕ್ರಾ, ತುವೆಂ ಮ್ಹಜೆಲಾಗಿಂ ಪರಾತ್ಲೆಂಯ್ ದೆಕುನ್ ಹಾಂವೆಂ ತುಕಾ ಸಗ್ಳೆಂ ರೀಣ್ ಮಾಫಿ ಕೆಲೆಂ. ತರ್ ಹಾಂವೆಂ ತುಜಿ ದಯಾ ಕೆಲ್ಲೆಬರಿ, ತುವೆಂಯೀ ತುಜ್ಯಾ ಸಾಂಗಾತಿ ಚಾಕ್ರಾಚಿ ದಯಾ ಕರಿಜಯ್ ಆಸ್ಲಿ ನ್ಹಯ್?’ ಧನಿ ಇತ್ಲೊ ರಾಗಾನ್ ಪೆಟ್ಲೊ ಕೀ, ಆಪ್ಣಾಕ್ ದೆವೆಂ ಆಸ್ಲಲೆಂ ತೆಂ ಸಗ್ಳೆಂ ಫಾರಿಕ್ ಕರ್ತಾ ಮ್ಹಣಾಸರ್ ತ್ಯಾ ಚಾಕ್ರಾಕ್ ತಾಣೆಂ ಕಸಬ್ಯಾಂಚೆ ಅಧೀನ್ ಕೆಲೊ. ಆನಿ ತುಮಿಯೀ ಹರ್ಯೆಕ್ಲೊ ತುಮ್ಚ್ಯಾ ಭಾವಾಕ್ ಕಾಳ್ಜಾಂತ್ ಥಾವ್ನ್ ಭೊಗ್ಶಿನಾತ್ ಜಾಲ್ಯಾರ್, ಮ್ಹಜೊ ಸರ್ಗಿಂಚೊ ಬಾಪ್ ತುಮ್ಕಾಂಯೀ ತಶೆಂಚ್ ಕರ್ತಲೊ.”