📖 ಆಯ್ತಾರಾಚಿಂ ವಾಚ್ಪಾಂ

ಎಜೆಕಿಯಲ್‌ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್‌
ಸರ್ವೆಸ್ಪರಾಚೆಂ ಉತರ್‌ ಮ್ಹಾಕಾ ಹ್ಯೆ ಪರಿಂ ಆಯ್ಲೆಂ:ಮನ್ಶಾಪುತಾ, ಹಾಂವೆಂ ತುಕಾ ಇಸ್ರಾಯೆಲಾಚ್ಯಾ ಘರಾಣ್ಯಾ ಪಾಸತ್ ರಾಕ್ಣೊ ಕಸೊ ನೆಮ್ಲಾ. ಮ್ಹಜ್ಯಾ ತೊಂಡಾಂತ್ಲೆಂ ಏಕ್ ಉತಾರ್ ತುಂ ಆಯ್ಕತಲೊಯ್ ತೆದ್ನಾ ತುವೆಂ ಮ್ಹಜೆ ತರ್ಫೆನ್ ತಾಂಕಾಂ ಚತ್ರಾಯ್ ದಿಂವ್ಕ್ ಜಾಯ್. “ಖೊಟ್ಯಾ ಮನ್ಶಾ, ತುಂ ಖರೆಂಚ್ ಮರ್ತಲೊಯ್,” ಅಶೆಂ ಹಾಂವ್ ತಾಕಾ ಸಾಂಗಿನ್ ಜಾಲ್ಯಾರ್, ಆನಿ ತ್ಯಾ ಖೊಟ್ಯಾ ಮನ್ಶಾನ್ ಆಪ್ಲೆ ಚಾಲಿಕ್ ಪಾಟ್ ಕರುಂಕ್ ತಾಚೆ ಕಡೆ ಉಲೊವ್ನ್ ತಾಕಾ ಚತ್ರಾಯ್ ದಿನಾ ಜಾಶಿ ಜಾಲ್ಯಾರ್ ತೊ ಖೊಟೊ ಮನಿಸ್ ಆಪ್ಲ್ಯಾ ಗುನ್ಯಾಂವಾಕ್ ಲಾಗುನ್ ಮರ್ತಲೊ, ಪೂಣ್ ಹಾಂವ್ ತುಕಾ ತಾಚ್ಯಾ ಮರಣಾಚೊ ಜಬಾಬ್ದಾರ್ ಕರ್ತಲೊಂ. ಪೂಣ್ ತ್ಯಾ ಖೊಟ್ಯಾ ಮನ್ಶಾನ್ ಆಪ್ಲೆ ಚಾಲಿಕ್ ಪಾಟ್ ಕರುಂಕ್ ತುಂ ತಾಕಾ ಚತ್ರಾಯ್ ದಿಶಿ ಜಾಲ್ಯಾರ್ ಆನಿ ತೊ ಆಪ್ಲೆ ಚಾಲಿಕ್ ಪಾಟ್ ಕರಿನಾ ಜಾಯ್ತ್ ಜಾಲ್ಯಾರ್, ತೊ ಆಪ್ಲ್ಯಾ ಗುನ್ಯಾಂವಾಕ್ ಲಾಗುನ್ ಮರ್ತಲೊ, ಪೂಣ್ ತುಂ ತುಜೊ ಜೀವ್ ವಾಂಚಯ್ತಲೊಯ್.

ಶ್ಲೋಕ್: ಆಜ್ ಸರ್ವೆಸ್ಪರಾಚೊ ತಾಳೊ ತುಮ್ಕಾಂ ಆಯ್ಕಾತ್ ಜಾಲ್ಯಾರ್
         ತುಮ್ಚಿಂ ಕಾಳ್ಜಾಂ ಧಾರುಣ್ ಕರಿನಾಕಾತ್.

1. ಯೆಯಾ, ಸಂತೊಸಾನ್ ಸರ್ವೆಸ್ಪರಾಕ್ ಉಲ್ಲಾಸ್ಯಾಂ,
   ಆಮ್ಚ್ಯಾ ತಾರಣಾಚೆಂ ಖಡಾಪ್ ಜಾವ್ನಾಸ್ಲಲ್ಯಾಕ್ ವಾಖಣ್ಯಾಂ,
   ಅರ್ಗಾಂ ಸ್ತುತಿ ಕರುಂಕ್ ತಾಚ್ಯೆ ಸಮೊರ್ ಯೆವ್ಯಾಂ,
   ಗಿತಾ೦ ಗಾಯನಾಂನಿ ತಾಚಿ ಕೀರ್ತ್ ಗಾವ್ಯಾಂ.
2. ಯೆಯಾ, ಸರ್ಪಡುನ್ ತಾಕಾ ಆರಾಧನ್ ಕರ‍್ಯಾಂ,
   ಆಮ್ಕಾ೦ ರಚ್ಲಲ್ಯಾ ದೆವಾ ಹುಜಿರ್ ದಿಂಬಿಯಾ೦ನಿ ಪಡ್ಯಾಂ,
   ತೊ ಆಮ್ಚೊ ದೇವ್, ಆಮಿ ತಾಚ್ಯಾ ಚರವಾಚ್ಯೊ ಶೆಳಿಯೊ,
   ತೊ ಪೋಸ್ ಕರುನ್ ಸಾಂಬಾಳ್ತಾ ತೊ ಹಿಂಡ್.
3. ಆಜ್ ತಾಚೊ ತಾಳೊ ತುಮ್ಕಾಂ ಆಯ್ಕತ್ ಜಾಲ್ಯಾರ್‌,
   ಅರಣ್ಯಾಂತ್‌ ಕೆಲ್ಲ್ಯೆಬರಿ ತುಮ್ಚಿಂ ಕಾಳ್ಜಾಂ ಧಾರುಣ್ ಕರಿನಾಕಾತ್.
   ಥಂಯ್ ಮೆರೀಬಾಂತ್ ಆನಿ ಮಾಸ್ಸಾಂತ್ ತುಮ್ಚ್ಯಾ ಪುರ್ವಜಾಂನಿ,
   ಮ್ಹಜಿ೦ ಮಹತ್ಕರ‍್ಯಾಂ ದೆಖ್-ಲ್ಲ್ಯಾಂನಿ,
   ಮ್ಹಾಕಾ ಪಾರ್ಕಿಲೊ ಆನಿ ಮ್ಹಜಿ ಪರೀಕ್ಷಾ ಕೆಲಿ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೊ,
ಎಕಾಮೆಕಾಚೊ ಮೋಗ್ ಕರ್ಚೊ - ಹ್ಯಾ ಏಕ್ ರಿಣಾ ಭಾಯ್ರ್ ಕೊಣಾಯ್ಚ್ಯಾ ಕಸಲ್ಯಾಯೀ ರಿಣಾಂತ್ ತುಮಿ ರಾವನಾಕಾತ್. ಕಿತ್ಯಾಕ್ ಪೆಲ್ಯಾಚೊ ಮೋಗ್ ಕರ್ತಲೊ ಸಗ್ಳೆಂ ನಿಯಮ್‍ಶಾಸ್ತ್ರ್ ಪಾಳ್ತಾ. “ಪ್ರದ್ವಾರ್ ಕರಿನಾಕಾ, ಜಿವೆಶಿಂ ಮಾರಿನಾಕಾ, ಚೊರಿನಾಕಾ, ಪೆಲ್ಯಾಚ್ಯಾ ವಸ್ತುಂಚಿ ಆಶಾ ಕರಿನಾಕಾ,” ಹೆ ಆನಿ ಹೆರ್ ಖಂಯ್ಚೆಯೀ ಉಪದೆಸ್ ಆಸಾತ್ ಜಾಲ್ಯಾರ್, “ತುಜೊ ಕರ್ತಾಯ್ ತಸೊ ತುಜ್ಯಾ ಪೆಲ್ಯಾಚೊಯೀ ಮೋಗ್ ಕರ್.” ಹ್ಯಾ ಏಕ್ ಆದೇಶಾಂತ್ ತೆ ಸಮೆಸ್ತ್ ಆಟಾಪ್ಲ್ಯಾತ್. ಮೋಗ್ ಪೆಲ್ಯಾಕ್ ಕಸಲೆಂಚ್ ವಾಯ್ಟ್ ಕರಿನಾ; ದೆಕುನ್ ಮಯಾಮೊಗಾಂತ್ ಆಸಾ ನಿಯಮ್‍ಶಾಸ್ತ್ರಾಚಿ ಸಂಪೂರ್ಣತಾ.

ಕ್ರಿಸ್ತಾ ಥಂಯ್ ಸಗ್ಳೊ ಸಂಸಾರ್ ದೆವಾನ್ ಆಪ್ಣಾಲಾಗಿಂ ರಾಜಿ ಜಾಯ್ಸೊ ಕೆಲಾ;
ಹಿ ಬರಿ ಖಬರ್ ಪರ್ಗಟ್ಚೆಂ ಮಣಿಯಾರ್ಪಣ್ ಆಮ್ಚ್ಯೆ ತಾಬೆನ್ ಸೊಡ್ನ್ ದಿಲಾಂ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತ್ಯಾ ವೆಳಿಂ ಜೆಜು ಆಪ್ಲ್ಯಾ ಶಿಸಾಂಕ್‌ ಸಾಂಗಲಾಗ್ಲೊ:“ತುಜೊ ಭಾವ್ ಚೂಕ್ ಕರಿತ್ ಜಾಲ್ಯಾರ್, ತುಂ ವಚ್ ಆನಿ ತಾಚಿ ಚೂಕ್ ತುಜೆ ಆನಿ ತಾಚೆ ಮಧೆಂ ಗುಟಾನ್ ತಾಕಾ ದಾಖೊವ್ನ್ ದಿ. ತೊ ತುಕಾ ಆಯ್ಕತ್ ಜಾಲ್ಯಾರ್, ತುಜ್ಯಾ ಭಾವಾಕ್ ತುವೆಂ ಪಾಟಿಂ ಹಾಡ್ಲೊಯ್ ಮ್ಹಣ್ ಜಾಲೆಂ. ಪುಣ್ ತೊ ತುಕಾ ಆಯ್ಕನಾ ಜಾಯ್ತ್ ಜಾಲ್ಯಾರ್, ದುಸ್ರ್ಯಾ ಎಕ್ಲ್ಯಾಕ್ ವಾ ದೊಗಾಂಕ್ ತುಜೆ ಸಾಂಗಾತಾ ಆಪೊವ್ನ್ ವ್ಹರ್; ಕಿತ್ಯಾಕ್ ‘ಹರ್ಯೆಕ್ ಫಿರ್ಯಾದ್ ದೋಗ್ ವಾ ತೇಗ್ ಸಾಕ್ಷಿ ಆಸೊನ್ ರುಜು ಕರುಂಕ್‍ ಜಾಯ್.’ ಆನಿ ತೊ ತಾಂಕಾಯೀ ಆಯ್ಕನಾ ಜಾಯ್ತ್ ಜಾಲ್ಯಾರ್, ಹಿ ಸಗ್ಳಿ ಸಂಗತ್ ಸಭೆಕ್ ಕಳಯ್. ಆನಿ ತೊ ಸಭೆಕ್‍ಯೀ ಆಯ್ಕನಾ ಜಾಯ್ತ್ ಜಾಲ್ಯಾರ್, ತೊ ಏಕ್ ಅನ್ಭಾವಾರ್ಥ್ಯಾಬರಿ ವಾ ಸುಂಕಾಗಾರಾಬರಿ ಮ್ಹಣ್ ಲೆಖುನ್ ತಾಕಾ ಸೊಡ್ನ್ ಸೊಡ್ʼ.
ದೆಕುನ್ ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೆಂ ಕಿತೆಂ ಸಂಸಾರಿಂ ತುಮಿ ಬಾಂಧ್ತಾತ್, ತೆಂ ಸರ್ಗಿಂಯೀ ಬಾಂಧೊನ್ ಆಸ್ತಲೆಂ; ಆನಿ ಜೆಂ ಕಿತೆಂ ಸಂಸಾರಿಂ ತುಮಿ ಸೊಡಯ್ತಾತ್, ತೆಂ ಸರ್ಗಿಂಯೀ ಸೊಡೊವ್ನ್ ಆಸ್ತಲೆಂ.
ತ್ಯಾ ಶಿವಾಯ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚೆ ಭಿತರ್ಲೆ ದೋಗ್ ಜಣ್ ಏಕ್ ಮನಾಚೆ ಜಾವ್ನ್, ಖಂಯ್ಚಿಯೀ ಏಕ್ ವಸ್ತ್ ಮಾಗ್ತಿತ್ ಜಾಲ್ಯಾರ್, ಮ್ಹಜೊ ಸರ್ಗಿಂಚೊ ಬಾಪ್ ತಿ ತಾಂಕಾಂ ದಿತಲೊ. ಜಂಯ್ ದೋಗ್ ವಾ ತೇಗ್ ಮ್ಹಜೆ ನಾಂವಿಂ ಸಾಂಗಾತಾ ಮೆಳ್ತಾತ್, ಥಂಯ್ ಹಾಂವ್ ಆಸಾಂ ತಾಂಚೇ ಮಧ್ಗತ್.”