📖 ಆಯ್ತಾರಾಚಿಂ ವಾಚ್ಪಾಂ

ಜೆರೆಮಿಯಾ ಪ್ರವಾದ್ಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಪ್‌
ಸರ್ವೆಸ್ಪರಾ, ತುವೆಂ ಮ್ಹಾಕಾ ಭುಲಯ್ಲೊಯ್, ಆನಿ ಹಾಂವ್ ತುಕಾ ಭುಲ್ಲೊಂ;
ತುಂ ಮ್ಹಜೆ ಪ್ರಾಸ್ ಬಳಿಷ್ಟ್ ದೆಕುನ್, ತುವೆಂ ಮ್ಹಜೆರ್ ಜಯ್ತ್ ವ್ಹೆಲೆಂಯ್.
ಹಾಂವ್ ದೀಸ್‍ಭರ್ ಕೆಂಡ್ಣ್ಯಾಂಚೊ ಮಾಲ್ ಜಾಲಾಂ,
ಹರೆಕ್ಲೊ ಮ್ಹಜ್ಯೊ ಖೆಬ್ಡಾಯೊ ಕರ್ತಾ.
ಹರೆಕ್ ಪಾವ್ಟಿಂ ಹಾಂವ್ ಉಲಯ್ತಾನಾ
ಹಾಂವೆಂ ಬೊಬಾಟ್ ಮಾರುನ್ ಮ್ಹಣುಂಕ್ ಜಾಯ್:
“ಜುಲುಮ್ ಆನಿ ನಾಸ್!”
ಸರ್ವೆಸ್ಪರಾಚೆಂ ಉತಾರ್ ಮ್ಹಾಕಾ
ದೀಸ್‍ಭರ್ ಆಕ್ಮಾನಾಚೆಂ ಆನಿ ಕೆಂಡ್ಣ್ಯಾಂಚೆಂ ಕಾರಣ್ ಜಾಲಾಂ.
“ಹಾಂವ್ ತಾಚೊ ಉಗ್ಡಾಸ್ ಕರ್ಚೊ ನಾಂ,
ತಾಚ್ಯಾ ನಾಂವಾನ್ ಹಾಂವ್ ಆನಿಕ್ ಉಲೊಂವ್ಚೊ ನಾಂ”,
ಅಶೆಂ ಹಾಂವ್ ಮ್ಹಣ್ತೊಂ,
ಪೂಣ್ ಮ್ಹಜ್ಯಾ ಕಾಳ್ಜಾಂತ್
ಏಕ್ ಜಳ್ತೊ ಉಜೊ ಪೆಟ್ಲಾಸೊ ದಿಸ್ತಾ,
ಮ್ಹಜ್ಯಾ ಹಾಡಾಂನಿ ತೊ ರಿಗ್ಲಾ,
ತಾಕಾ ದಮಾಂವ್ಕ್ ಪ್ರಯತ್ನ್ ಕರುನ್ ಹಾಂವ್ ಥಕ್ಲಾಂ,
ಮ್ಹಜ್ಯಾನ್ ಹೆಂ ಸೊಸುಂಕ್ ಜಾಯ್ನಾ.

ಶ್ಲೋಕ್: ಮ್ಹಜ್ಯಾ ಸೊಮಿಯಾ, ಮ್ಹಜ್ಯಾ ದೆವಾ,
         ತುಕಾ ಮ್ಹಜೊ ಅತ್ಮೊ ತಾನೆತಾ.

1. ದೆವಾ, ತುಂಚ್ ಮ್ಹಜೊ ದೇವ್,
   ತುಜ್ಯಾ ದರ್ಶನಾಕ್ ಹಾಂವ್ ಅತ್ರೆಗುನ್ ಆಸಾಂ,
   ತುಕಾ ಮ್ಹಜೊ ಅತ್ಮೊ ತಾನೆತಾ,
   ಉದಕ್ ನಾತ್ಲಲ್ಯಾ ಸುಕ್ಯೆ ಧರ‍್ನಿಬರಿ
   ಮ್ಹಜಿ ಕೂಡ್ ತುಕಾ ಲಾಲೆತಾ.
2. ತುಜ್ಯಾ ಮಂದಿರಾಂತ್ ತುಕಾ ಹಾಂವ್ ದೀಷ್ಟ್ ಉಬರ‍್ತಾಂ,
   ತುಜಿ ಪದ್ವಿ ಆನಿ ಮಹಿಮಾ ದೆಖುಂಕ್ ಹಾಂವ್ ಆಶೆತಾಂ.
   ತುಜ್ಯಾ ಮೊಗಾಚೊ ಅನ್ಭೋಗ್ ಜಿವಾ ಪ್ರಾಸ್ ಶ್ರೇಷ್ಠ್‌,
   ಮ್ಹಜೆ ಓಂಠ್ ತುಜಿ ಮಹಿಮಾ ವರ್ನಿತಾತ್.
3. ಸಗ್ಳ್ಯೆ ಮ್ಹಜ್ಯೆ ಜಿಣಿಯೆಂತ್ ಹಾಂವ್ ತುಕಾ ವಾಖಣ್ತಲೊಂ,
   ತುಜೆಂ ನಾಂವ್ ಕಾಡ್ನ್ ಹಾತ್ ಜೊಡ್ತಲೊಂ;
   ಪರ್ವಣೆಚ್ಯಾ ಜೆವ್ಣಾ ಪರಿಂ ಮ್ಹಜೊ ಅತ್ಮೊ ಧಾದೊಶಿ ಜಾತಲೊ,
   ಸಂತೊಸಾಚ್ಯಾ ತಾಳ್ಯಾನ್ ಮ್ಹಜೆ ಓಂಠ್ ತುಕಾ ವಂದಿತೆಲೆ.
4. ಕಿತ್ಯಾಕ್ ತುಂ ಮ್ಹಜೊ ಸದಾಂಚೊ ಕುಮಕ್‌ದಾರ್
   ತುಜ್ಯಾ ಪಾಕಾಟ್ಯಾಂಚ್ಯೆ ಸಾವ್ಳೆಖಾಲ್ ಹಾಂವ್ ಸಂತೊಸ್ತಾಂ.
   ಮ್ಹಜೊ ಅತ್ಮೊ ತುಕಾ ತೆಂಗುನ್ ರಾವ್ತಾ,
   ತುಜೊ ಉಜ್ವೊ ಹಾತ್ ಮ್ಹಾಕಾ ಸಾಂಬಾಳ್ನ್ ಧರ್ತಾ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂನೊ, ದೆವಾನ್ ಆಮ್ಚೆ ವಯ್ರ್ ದಾಖಯ್ಲಲೆ ವ್ಹಡ್ ಕಾಕುಳ್ತಿಚೊ ಉಗ್ಡಾಸ್ ಕಾಡ್ನ್ ಹಾಂವ್ ತುಮ್ಚೆಲಾಗಿಂ ಪ್ರಾರ್ಥಿತಾಂ; ತಾಕಾ ಮಾನ್ತಾ ತಸಲೆಂ ಏಕ್ ಪವಿತ್ರ್ ಆನಿ ಜಿವೆಂ ಬಲಿದಾನ್ ಜಾವ್ನ್ ತುಮ್ಕಾಂಚ್ ತುಮಿ ದೆವಾಕ್ ಸಮರ್ಪುನ್ ದೀಜಯ್. ಹೆಂ ಜಾಂವ್ ತುಮ್ಚೆಂ ಅತ್ಮಿಕ್ ಬಲಿದಾನ್. ಹ್ಯಾ ಸಂಸಾರಾಚಿ ಚಾಲ್ ತುಮಿ ಆಧಾರಿನಾಕಾತ್, ಬದ್ಲಾಕ್ ತುಮ್ಚಿಂ ಮನಾಂ ನವಿಂ ಜಾಂವ್. ತುಮ್ಚೆ ಜಿಣಿಯೆಚೆಂಚ್ ರುಪಾಂತರ್ ಜಾಂವ್. ತವಳ್ ತುಮಿ ದೆವಾಚಿ ಖುಶಿ ಕಿತೆಂ ಮ್ಹಣ್ ಸೊಧುನ್ ಕಾಡುಂಕ್ ಪಾವ್ತಲ್ಯಾತ್, ಆನಿ ಖಂಯ್ಚೆಂ ಬರೆಂ, ದೆವಾಕ್ ಮಾನ್ತಾ ತಸಲೆಂ ಆನಿ ಸಂಪೂರ್ಣ್ ಮ್ಹಣ್ ತುಮಿ ಸಮ್ಜುನ್ ಘೆತೆಲ್ಯಾತ್.

ಅಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೊ ಬಾಪ್
ತುಮ್ಚ್ಯಾ ಅಂತಸ್ಕರ್ನಾಚೆ ದೊಳೆ ಉಘಡುಂ,
ಅಶೆಂ ಕಸಲ್ಯಾ ಭರ್ವಸ್ಯಾಕ್ ತುಮ್ಕಾಂ ಅಪಯ್ಲ್ಯಾಂತ್ ಮ್ಹಣ್ ತುಮಿ ಸಮ್ಜತಲ್ಯಾತ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತವಳ್ ಥಾವ್ನ್ ಜೆಜು ಆಪ್ಣೆಂ ಜೆರುಜಲೆಮಾಕ್ ವೆಚಿ ಗರ್ಜ್ ಮ್ಹಣ್ ಆಪ್ಲ್ಯಾ ಶಿಸಾಂಕ್ ಸಾಂಗುಂಕ್ ಲಾಗ್ಲೊ. ಥಂಯ್ ಮಾಲ್ಗಡ್ಯಾಂ, ಶಾಸ್ತ್ರ್ಯಾಂ ಆನಿ ಪ್ರಧಾನ್ ಯಾಜಕಾಂಚ್ಯಾ ಹಾತಾಂತ್ ಆಪ್ಣಾಕ್ ಜಾಯ್ತೆಂ ಸೊಸುಂಕ್ ಆಸ್ತಲೆಂ, ಆಪುಣ್ ಮರಣ್ ಪಾವ್ತಲೊಂ ಆನಿ ತಿಸ್ರ್ಯಾ ದಿಸಾ ದೇವ್ ಆಪ್ಣಾಕ್ ಜಿವಂತ್ ಉಠಯ್ತಲೊ ಮ್ಹಣುನ್ ತಾಣೆ ತಾಂಕಾಂ ಸ್ವಷ್ಟ್ ಕಳಿತ್ ಕೆಲೆಂ. ತೆದ್ವಾಂ ಪೆದ್ರು ತಾಕಾ ಕುಶಿನ್ ಆಪೊವ್ನ್, “ದೇವ್ ತೆಂ ನಿರ್ಮಿನಾ ಜಾಂವ್, ಸೊಮಿಯಾ! ತುಕಾ ತೆಂ ಕೆದಿಂಚ್ ಘಡ್ಚೆಂ ನಾಕಾ!” ಮ್ಹಣುನ್ ಭೆಷ್ಟಾಂವ್ಕ್‍ಲಾಗ್ಲೊ. ತಿತ್ಲ್ಯಾರ್ ಜೆಜು ಪೆದ್ರು ಥಂಯ್ ಘುಂವೊನ್ ಮ್ಹಣ ಲಾಗ್ಲೊ: “ಮ್ಹಜೇ ಸರ್ಶಿಲೊ ಪಯ್ಸ್ ಸರ್, ಸೈತಾನಾ! ಮ್ಹಜೆ ವಾಟೆರ್ ಆಡ್ಕಳ್ತಾ ತೊ ಫಾತರ್ ತುಂ! ಕಿತ್ಯಾಕ್ ದೇವ್ ಚಿಂತ್ತಾ ತಶೆಂ ತುಂ ಚಿಂತಿನಾಂಯ್, ಮನಿಸ್ ಚಿಂತ್ತಾ ತಶೆಂ ತುಂ ಚಿಂತ್ತಾಯ್.”
ಉಪ್ರಾಂತ್ ಜೆಜು ಆಪ್ಲ್ಯಾ ಶಿಸಾಂಕ್ ಮ್ಹಣಾಲೊ: “ಕೊಣಾಕ್ ಜರ್ ಮ್ಹಜೊ ಪಾಟ್ಲಾವ್ ಕರುಂಕ್ ಖುಶಿ ಆಸಾ, ತರ್ ಆಪ್ಣಾಕ್‍ಚ್ ತೊ ಇನ್ಕಾರ್ ಕರುಂದಿ, ಆಪ್ಲೊ ಖುರಿಸ್ ಉಕಲ್ನ್ ಘೆಂವ್ದಿ ಆನಿ ಮ್ಹಜ್ಯಾ ಪಾಟ್ಲ್ಯಾನ್ ಯೆಂವ್ದಿ. ಜೊ ಕೊಣ್ ಆಪ್ಲೊ ಜೀವ್ ವಾಂಚೊಂವ್ಕ್ ಸೊಧ್ತಾ, ತೊ ಆಪ್ಲೊ ಜೀವ್ ಹೊಗ್ಡಾಯ್ತಾ; ಪುಣ್ ಜೊ ಕೊಣ್ ಮ್ಹಜೆ ಪಾಸತ್ ಆಪ್ಲೊ ಜೀವ್ ಹೊಗ್ಡಾಯ್ತಾ, ತೊ ಆಪ್ಲೊ ಜೀವ್ ನಿಜಾಕ್‍ಯೀ ವಾಟಾಯ್ತಾ. ಮನ್ಶಾನ್ ಆಪ್ಲೊ ಜೀವ್ ಹೊಗ್ಡಾವ್ನ್ ಸಗ್ಳೊ ಸಂಸಾರ್ ಜೊಡ್ಲೊಚ್ ಮ್ಹಣ್ಯಾಂ, ತರ್ ಹಾಂತುಂ ತಾಕಾ ಕಿತೆಂ ಫಾಯ್ದೊ? ವಾ ಆಪ್ಲೊ ಜೀವ್ ಪಾಟಿಂ ಘೆಂವ್ಕ್ ಮನ್ಶಾನ್ ದುಸ್ರೆಂ ಕಿತೆಂ ದಿವ್ಯೆತ್? ಮನ್ಶಾಪೂತ್ ಆಪ್ಲ್ಯಾ ಬಾಪಾಚೆ ಮಹಿಮೆನ್ ಆಪ್ಲ್ಯಾ ದುತಾಂ ಸವೆಂ ಯೆತಲೊ; ಆನಿ ತೆ ವೆಳಿಂ ಹರ್ಯೆಕ್ಲ್ಯಾಕ್ ತಾಚ್ಯಾ ತಾಚ್ಯಾ ಕರ್ನ್ಯಾಂ ಪರ್ಮಾಣೆಂ ಪ್ರತಿಪಳ್ ದಿತಲೊ.”