📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್‌
ಶೆಬ್ನಾಕ್, ರಾವ್ಳೆರಾಚ್ಯಾ ಕಾರ್ಭಾರ್‍ಯಾಕ್, ದಳ್ಭಾರಾಂಚೊ ಸರ್ವೆಸ್ಪರ್ ಅಶೆಂ ಸಾಂಗ್ತಾ:
"ಹಾಂವ್ ತುಕಾ ತುಜ್ಯಾ ಹುದ್ದ್ಯಾಂತ್ಲೊ ಕಾಡ್ತಲೊಂ,
ಆನಿ ತುಜ್ಯಾ ಸ್ಥಾನಾ ವಯ್ಲೊ ವೊಡುನ್ ಸಕ್ಲಾ ಘಾಲ್ತಲೊಂ;
ಆನಿ ತ್ಯಾ ದಿಸಾ ಹಾಂವ್ ಮ್ಹಜ್ಯಾ ಸೆವಕಾಕ್,
ಹಿಲ್ಕೀಯಾಚ್ಯಾ ಪುತಾ ಎಲಿಯಾಕಿಮಾಕ್ ಆಪಯ್ತಲೊಂ.
ಹಾಂವ್ ತಾಕಾ ತುಜೊ ದಗ್ಲೊ ನ್ಹೆಸಯ್ತಲೊಂ,
ತುಜೊ ಕಮರ್‌ಬಂದ್ ತಾಕಾ ಬಾಂದ್ತಲೊಂ
ಆನಿ ತುಜೊ ಅಧಿಕಾರ್ ತಾಚೆ ಹಾತಿಂ ದಿತಲೊಂ;
ತೊ ಜೆರುಜಲೆಮಾಚ್ಯಾ ನಿವಾಸ್ಯಾಂಕ್
ಆನಿ ಜುದಾಚ್ಯಾ ಘರಾಣ್ಯಾಕ್ ಏಕ್ ಬಾಪುಯ್ ಜಾತಲೊ.
ಹಾಂವ್ ತಾಚ್ಯಾ ಭುಜಾಚೆರ್
ದಾವಿದಾಚ್ಯಾ ಘರಾಣ್ಯಾಚಿ ಚಾವಿ ಘಾಲ್ತಲೊಂ;
ತೊ ಉಗಡ್ತಲೊ, ಆನಿ ಕೋಣ್‍ಚ್ ಧಾಂಪ್ಚೊ ನಾ,
ತೊ ಧಾಂಪ್ತಲೊ, ಆನಿ ಕೋಣ್‍ಚ್ ಉಗಡ್ಚೊ ನಾ.
ಏಕ್ ಖುಂಟೊ ಕಸೊ ಹಾಂವ್ ತಾಕಾ ಸುರಕ್ಷಿತ್ ಜಾಗ್ಯಾರ್ ಲಾಯ್ತಲೊಂ,
ಆಪ್ಲ್ಯಾ ಪುರ್ವಜಾಂಚ್ಯಾ ಘರಾಣ್ಯಾಕ್ ತೊ ಏಕ್ ಮಹಿಮೆಚೆಂ ಶಿಂವಾಸನ್ ಜಾತಲೊ.

ಶ್ಲೋಕ್: ತುಜೊ ಮೋಗ್, ಸರ್ವೆಸ್ಪರಾ, ಸಾಸ್ಣಾಕ್ ಬಾಳ್ತಾ
         ತುಜ್ಯಾ ಹಾತಾಂಚಿಂ ಕೃತ್ಯಾಂ ತುಂ ವಿಸರ‍್ನಾಕಾ.

1. ಮ್ಹಜ್ಯಾ ತೊಂಡಾಂತ್ಲೆಂ ಪ್ರಾರ್ಥನ್ ಆಯ್ಕುನ್ ಘೆತ್ಲೆಂಯ್‌ ಮ್ಹಣ್, ಸರ್ವೆಸ್ಪರಾ
   ಸಗ್ಳ್ಯಾ ಮ್ಹಜ್ಯಾ ಕಾಳ್ಜಾನ್ ಹಾಂವ್ ತುಕಾ ಧಿನ್ವಾಸ್ತಾಂ;
   ತುಜ್ಯಾ ದುತಾಂ ಮುಖಾರ್ ತುಜೆಂ ಕೀರ್ತನ್ ಗಾಯ್ತಾಂ,
   ತುಜ್ಯಾ ಪವಿತ್ರ್ ಮಂದಿರಾ ಸಮೊರ್ ತುಕಾ ಸಾಷ್ಟಾಂಗ್ ನಮಸ್ಕಾರ್ ಕರ‍್ತಾಂ.
2. ತುಂ ಬರೊ ಆನಿ ವಿಶ್ವಾಸಿ,
   ಸಕ್ಟಾಂ ಪ್ರಾಸ್ ವರ್ತೆಂ ತುಜೆಂ ನಾಂವ್ ಆನಿ ತುವೆಂ ದಿಲ್ಲೆಂ ಉತಾರ್
   ದೆಕುನ್ ತುಜ್ಯಾ ನಾಂವಾಚಿ ಹೊಗ್ಳಿಕ್ ಗಾತಾಂ.
   ತುಕಾ ಉಲೊ ಮಾರ‍್ಲಲ್ಯಾ ವೆಳಾ ತುವೆಂ ಮ್ಹಾಕಾ ಕಾನ್ ದಿಲೆಯ್,
   ಮ್ಹಜೆಂ ಕಾಳಿಜ್ ಘಟ್ ಕರ್ನ್ ಮ್ಹಾಕಾ ಧಯ್ರಾನ್ ಭರ‍್ಲೊಯ್.‌
3. ಸರ್ವೆಸ್ಪರ್, ಖರೊಚ್ ಮಹೋನ್ನತ್, ತರ್‌ಯೀ ಖಾಲ್ತ್ಯಾಂಚೆರ್ ತೊ ದೀಷ್ಟ್ ಘಾಲ್ತಾ,
   ಪುಣ್ ಗರ್ವಿಷ್ಟಾಂಚಿ ಒಳಕ್ ತೊ ಪಯ್ಸ್ ಥಾವ್ನ್೦ಚ್ ಧರ‍್ತಾ.
   ತುಜೊ ಮೋಗ್, ಸರ್ವೆಸ್ಪರಾ, ಸಾಸ್ಣಾಕ್ ಬಾಳ್ತಾ,
   ತುಜ್ಯಾ ಹಾತಾಚಿಂ ಕೃತ್ಯಾಂ ತುಂ ವಿಸರ‍್ನಾಕಾ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಹಾ! ಕಿತ್ಲಿ ಅಗಾಧ್ ದೆವಾಚಿ ಸಂಪತ್ತ್! ಕಿತ್ಲಿ ನಿಗೂಢ್ ತಾಚಿ ಜಾಣ್ವಾಯ್ ಆನಿ ಸಮ್ಜಣಿ! ಕೊಣ್ ಆಟಾಪಿತ್ ತಾಚಿಂ ಫೈಸಲಾಂ, ಕೊಣ್ ಪಾರ್ಕಿತ್ ತಾಚ್ಯೊ ವಾಟೊ?
"ಸರ್ವೆಸ್ಪರಾಚಿಂ ಚಿಂತ್ನಾಂ ಕೊಣ್ ತೊ ಜಾಣಾ ಜಾಲ್ಲೊ?
ಕೊಣ್ ತೊ ತಾಕಾ ಆಲೋಚನ್ ದಿಂವ್ಕ್ ಸಕ್ತಲೊ?
ಕೊಣೆ ತೆಂ ತಾಕಾ ಪಯ್ಲೆಂ ದಿಲಾಂ ಆನಿ
ಉಪ್ರಾಂತ್ ಪ್ರತಿಫಳ್ ಮ್ಹಣ್ ತಾಚೆಲಾಗ್ಚೆಂ ಘೆತ್ಲಾಂ?"
ಸರ್ವ್ ವಸ್ತು ತಾಚೆ ಥಾವ್ನ್ ಅರಂಭ್ ಜಾತಾತ್, ತಾಚೆ ಮಾರಿಫತ್ ಆನಿ ತಾಚೆ ಖಾತಿರ್ ಶೆವಟ್ ಜೊಡ್ತಾತ್. ತಾಕಾ ಜಾಂವ್ ಮಹಿಮಾ ಸದಾಂ ಸರ್ವದಾಂ. ಆಮೆನ್.

ಪೆದ್ರು ವ ಖಡಪ್‌ ತುಂ,
ಆನಿ ಹ್ಯಾ ಖಡ್ಪಾಚೆರ್ ಮ್ಹಜಿ ಧರ್ಮ್‌-ಸಭಾ ಹಾಂವ್‌ ಬಾಂಧ್ತಲೊಂ
ಆನಿ ಪಾತಾಳಾಚೆ ದಾರ್‍ವಟೆ ತಿಚೆರ್ ಜಯ್ತ್ ವ್ಹರುಂಕ್ ಸಕ್ಚೆನಾಂತ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ಉಪ್ರಾಂತ್ ಸೆಜಾರೇಯಾ ಫಿಲಿಪ್ಪಿ ನಾಂವಾಚ್ಯಾ ಪ್ರಾಂತಾಂತ್ ಯೇವ್ನ್ ಪಾವ್‍ಲ್ಲ್ಯಾ ವೆಳಾರ್, ಜೆಜುನ್ ಆಪ್ಲ್ಯಾ ಶಿಸಾಂಲಾಗಿಂ ವಿಚಾರ್ಲೆಂ: “ಮನ್ಶಾಪುತಾಕ್ ಲೋಕ್ ಕೊಣ್ ಮ್ಹಣ್ ಮ್ಹಣ್ತಾತ್?” ತಾಣಿಂ ಜಾಪ್ ದಿಲಿ: “ಥೊಡೆ ತೊ ಸ್ನಾನ್‍ದಾತಾರ್ ಜುವಾಂವ್ ಮ್ಹಣ್ತಾತ್, ಹೆರ್ ಥೊಡೆ ತೊ ಎಲಿಯಾ ಮ್ಹಣ್ತಾತ್, ಆನಿ ಹೆರ್ ತೊ ಯೆರೆಮಿಯಾ ವಾ ಪ್ರವಾದ್ಯಾಂ ಪೈಕಿ ಎಕ್ಲೊ ಮ್ಹಣ್ತಾತ್.” ತವಳ್ ಜೆಜು ತಾಂಕಾಂ ವಿಚಾರಿ: “ಪುಣ್ ತುಮಿ, ಹಾಂವ್ ಕೊಣ್ ಮ್ಹಣ್ ಮ್ಹಣ್ತಾತ್?” ಸಿಮಾಂವ್ ಪೆದ್ರುನ್ ಜಾಪ್ ದೀವ್ನ್ ಮ್ಹಳೆಂ: “ತುಂ ಕ್ರೀಸ್ತ್, ಜಿವ್ಯಾ ದೆವಾಚೊ ಪೂತ್.” ತವಳ್ ಜೆಜು ಪೆದ್ರುಕ್ ಮ್ಹಣಾಲೊ: “ಭಾಗಿ ತುಂ ಸಿಮಾಂವ್, ಯೊನಾಚ್ಯಾ ಪುತಾ! ಕಿತ್ಯಾಕ್ ಹೆಂ ತುಕಾ ಉಗ್ಡಾಪೆಂ ಕೆಲೆಂ ಕೊಣ್‍ಯೀ ಮನ್ಶಾನ್ ನ್ಹಯ್, ಬಗರ್ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾನ್. ಹಾಂವ್ ತುಕಾ ಸಾಂಗ್ತಾಂ: ‘ತುಂ ಪೆದ್ರು ಮ್ಹಣ್ಜೆ ಖಡಪ್; ಆನಿ ಹ್ಯಾ ಖಡ್ಪಾಚೆರ್ ಮ್ಹಜಿ ಧರ್ಮ್‍ಸಬಾ ಹಾಂವ್ ಬಾಂಧ್ತಲೊಂ ಆನಿ ಪಾತಾಳಾಚೆ ದಾರ್ವಟೆ ತಿಚೆರ್ ಜಯ್ತ್ ವ್ಹರುಂಕ್ ಸಕ್ಚೆನಾಂತ್. ಹಾಂವ್ ತುಕಾ ಸರ್ಗಿಂಚ್ಯಾ ರಾಜ್ಯಾಚ್ಯೊ ಚಾವಿಯೊ ದಿತಲೊಂ. ಜೆಂ ಕಿತೆಂ ಸಂಸಾರಿಂ ತುಂ ಆಡ್ವಾರ್ತಲೊಯ್, ತೆಂ ಸರ್ಗಿಂಯೀ ಆಡ್ವಾರ್ಲಲೆಂ ಜಾತಲೆಂ; ಆನಿ ಜೆಂ ಕಿತೆಂ ಸಂಸಾರಿಂ ತುಂ ಸೊಡಯ್ತಲೊಯ್, ತೆಂ ಸರ್ಗಿಂಯೀ ಸೊಡಯ್ಲಲೆಂ ಜಾತಲೆಂ.” ಉಪ್ರಾಂತ್ ಆಪುಣ್ ಕ್ರೀಸ್ತ್ ಮ್ಹಣ್ ಕೊಣಾಕ್‍ಯೀ ಸಾಂಗಿನಯೆ ಮ್ಹಣುನ್ ತಾಣೆ ಆಪ್ಲ್ಯಾ ಶಿಸಾಂಕ್ ಕಠಿಣ್ ತಾಕಿದ್ ದಿಲಿ.