📖 ಆಯ್ತಾರಾಚಿಂ ವಾಚ್ಪಾಂ

ರಾಯಾಂಚ್ಯಾ ಪಯ್ಲ್ಯಾ ಪುಸ್ತಕಾಂತ್ಲೆಂ ವಾಚಪ್
ರಾತ್ ಸಾರ್ಚೆ ಖಾತಿರ್ ಎಲಿಯಾ ಹೊರೆಬ್‌ ದೊಂಗ್ರಾರ್‌ ಪಾವ್ಲಲ್ಯಾ ವೆಳಾರ್‌,ಎಕಾ ಭುಂಯಾರಾಂತ್ ಭಿತರ್ ಸರ್ಲೊ. ಸರ್ವೆಸ್ಪರಾನ್ ತಾಕಾ ಮ್ಹಳೆಂ: “ಭಾಯ್ರ್ ಸರ್ ಆನಿ ಸರ್ವೆಸ್ಪರಾ ಮುಕಾರ್ ದೊಂಗ್ರಾರ್ ಉಬೊ ರಾವ್.” ಉಪ್ರಾಂತ್ ಸರ್ವೆಸ್ಪರ್ ತೆ ವಾಟೆನ್ ಉತ್ರುನ್ ಗೆಲೊ. ಸರ್ವೆಸ್ಪರಾ ಮುಕ್ಲ್ಯಾನ್ ಏಕ್ ವ್ಹಡ್, ಬಳಿಷ್ಟ್ ಝೊಡ್‍ವಾರೆಂ ಮಾರ್ಲೆಂ. ತ್ಯಾ ವಾರ್ಯಾನ್ ದೊಂಗರ್ ಫುಟಯ್ಲೆ ಆನಿ ಖಡ್ಪಾಂಚೊ ಚುರೊ ಕೆಲೊ. ಪೂಣ್ ಸರ್ವೆಸ್ಪರ್ ಝೊಡ್‍ವಾರ್ಯಾಂತ್ ನಾತ್ಲೊ. ಝೊಡ್‍ವಾರ್ಯಾ ಉಪ್ರಾಂತ್ ಭುಂಯ್‍ಕಾಂಪ್ ಜಾಲಿ. ಪೂಣ್ ಸರ್ವೆಸ್ಪರ್ ಭುಂಯ್‍ಕಾಂಪಿಂತ್ ನಾತ್ಲೊ. ಭುಂಯ್‍ಕಾಂಪಿ ಉಪ್ರಾಂತ್ ಉಜೊ ಆಯ್ಲೊ. ಪೂಣ್ ಸರ್ವೆಸ್ಪರ್ ಉಜ್ಯಾಂತ್ ನಾತ್ಲೊ. ಉಜ್ಯಾ ಉಪ್ರಾಂತ್ ಏಕ್ ಹಳೂ, ಲ್ಹಾನ್ ಆವಾಜ್ ಆಯ್ಕಲೊ. ಹೊ ಆಯ್ಕತಚ್ ತಾಣೆಂ ದಗ್ಲ್ಯಾನ್ ಆಪ್ಲೆಂ ತೊಂಡ್ ಧಾಂಪ್ಲೆಂ ಆನಿ ಭಾಯ್ರ್ ಸರುನ್ ತೊ ಭುಂಯಾರಾಂತ್ ಭಿತರ್ ಸರ್ಚೆ ಕಡೆ ರಾವ್ಲೊ.

ಶ್ಲೋಕ್: ತುಜಿ ಕಾಕುಳ್ತ್ ಆಮ್ಕಾಂ ದಾಖಯ್,ಸೊಮಿಯಾ,
ಆನಿ ದಯೆನ್ ಆಮ್ಚಿ ಸೊಡ್ವಣ್ ಕರ್.

1. ಸರ್ವೆಸ್ಪರ್ ಕಿತೆಂ ಸಾಂಗ್ತಾ ತೆಂ ಹಾಂವ್ ಆಯ್ಕತಲೊಂ
   ತೊ ಆಪ್ಲ್ಯಾ ಭಕ್ತಾಂಕ್ ಸಮಾಧಾನಾಚೆಂ ಉತಾರ್ ಸಾಂಗ್ತಾ.
   ತಾಚಿ ಭ್ಯೆಂ ಭಿರಾಂತ್ ಆಸ್ಲಲ್ಯಾಂಕ್ ತಾಚಿ ಕುಮಕ್ ಲಾಗಿಂ ಆಸಾ,
   ಅಶೆಂ ತಾಚಿ ಮಹಿಮಾ ಆಮ್ಚ್ಯಾ ಗಾಂವಾಂತ್ ವಸ್ತಲಿ.
2. ಮೋಗ್ ಆನಿ ವಿಶ್ವಾಸೀಪಣ್ ಎಕಾಮೆಕಾ ಭೆಟ್ತಾತ್
   ನೀತ್ ಆನಿ ಶಾಂತಿ ಎಕಾಮೆಕಾ ಆರಾವ್ನ್ ಧರ‍್ತಾತ್;
   ವಿಶ್ವಾಸೀಪಣ್ ಭುಮಿಂತ್ಲೆಂ ಉಬ್ಜತಲೆಂ,
   ನಿತಿವಂತ್ಪಣ್ ಸರ್ಗಾರ್ ಥಾವ್ನ್ ನದರ್ ಘಾಲ್ತಲೆಂ.
3. ಖಂಡಿತ್ ಜಾವ್ನ್ ಸರ್ವೆಸ್ಪರ್ ಆಮ್ಕಾಂ ಸಮೃದ್ಧಿ ಪಾಠಯ್ತಲೊ,
   ಆನಿ ಆಮ್ಚಿ ಭುಂಯ್ ಆಪ್ಲೆಂ ಫೊಳ್ ದಿತಲಿ;
   ನಿತಿವಂತ್ಪಣ್ ತಾಚ್ಯೆ ಫುಡ್ಲ್ಯಾನ್ ವೆತಲೆಂ
   ಆನಿ ಅಶೆಂ ವಚುನ್‌ ತಾಚಿ ವಾಟ್ ತಯಾರ್ ಕರ‍್ತಲೆಂ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಕ್ರಿಸ್ತಾಚೊ ಭಕ್ತ್ ಹಾಂವ್ ಸತ್ ಉಲಯ್ತಾಂ, ಫಟ್ ಮಾರಿನಾ; ಪವಿತ್ರ್ ಅತ್ಮ್ಯಾಚ್ಯಾ ಉಜ್ವಾಡಾನ್ ಪ್ರೇರಿತ್ ಜಾಲ್ಲೆಂ ಮ್ಹಜೆಂ ಅಂತಸ್ಕರ್ನ್ ಹಾಂವ್ ಸಾಂಗ್ತಾಂ ತೆಂ ಖರೆಂ ಮ್ಹಣ್ ರುಜ್ವಾತ್ ದಿತಾ; ಮ್ಹಾಕಾ ಆಸಾ ಏಕ್ ವ್ಹಡ್ ಖಂತ್; ಆನಿ ಮ್ಹಜೆಂ ಕಾಳಿಜ್ ಥಾಂಬನಾತ್ಲಲೇ ದುಖಿನ್ ಭರ್ಲಾಂ. ಮ್ಹಜ್ಯಾ ಭಾವಾಂಚ್ಯಾ ಮ್ಹಣ್ಜೆ ರಗ್ತಾಮಾಸಾ ಪರ್ಮಾಣೆ ಮ್ಹಜೆ ಸಂಬಂಧಿ ಆಸ್‍ಲ್ಲ್ಯಾಂಚ್ಯಾ ಫಾಯ್ದ್ಯಾಕ್ ಪಡ್ಚೆಂ ಜಾಲ್ಯಾರ್, ಹಾಂವ್‍ಚ್ ದೆವಾಚೊ ಶಿರಾಪ್ ಪಡ್ಲಲೊಂ ಆನಿ ಕ್ರಿಸ್ತಾ ಥಾವ್ನ್ ವೆಗ್ಳೊ ಜಾಲ್ಲೊಂ ತಸಲೊ ಜಾಲ್ಯಾರ್‍ಯೀ ವ್ಹಡ್ ನ್ಹಯ್ ಆಸ್ಲೆಂ. ಇಸ್ರಾಯೆಲ್ ಕುಳಿಯೆಚಿಂ ತಿಂ: ದೆವಾನ್ ತಾಂಕಾಂ ಆಪ್ಲಿಂ ಭುರ್ಗಿಂ ಕರ್ನ್ ಘೆತ್ಲಲಿಂ ಆನಿ ಆಪ್ಲಿ ಮಹಿಮಾ ಉಘಡ್ಲಲಿ; ತಾಂಚೆಲಾಗಿಂ ಕರಾರ್ ಕೆಲ್ಲೆ, ನಿಯಮ್‍ಶಾಸ್ತ್ರ್ ಆನಿ ಆರಾಧನಾಚ್ಯೊ ರಿತಿ ದಿಲ್ಲ್ಯೊ ಆನಿ ಭಾಸಾವ್ಣ್ಯೊ ಕೆಲ್ಲ್ಯೊ. ತಿಂ ಸಗ್ಳಿಂ ಧರ್ಮ್‍ಪುರ್ವಜಾಂಚೆ ಸಂತತಿಚಿಂ, ಆನಿ ಕ್ರೀಸ್ತ್ ಮನ್ಶಾ ಸಂಯ್ಭಾನ್ ತಾಂಚೆ ಕುಳಿಯೆಚೊ. ಸಮೆಸ್ತಾಂ ವಯ್ರ್ ರಾಜ್ಯ್ ಕರ್ತಲ್ಯಾ ದೆವಾಕ್ ಜಾಂವ್ ಹೊಗ್ಳಪ್ ಸದಾಂಕಾಳ್. ಆಮೆನ್.

ಸರ್ವೆಸ್ಪರಾಚಿ ವಾಟ್ ಹಾಂವ್ ಪಳೆವ್ನ್‌ಚ್ ಆಸಾಂ,
ತಾಚ್ಯಾ ಉತ್ರಾಚೆರ್ ಹಾಂವ್ ಪಾತ್ಯೆವ್ನ್ ರಾವ್ತಾಂ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ಉಪ್ರಾಂತ್ ಜೆಜುನ್ ಶಿಸಾಂಕ್ ದೊಣಿರ್ ಚಡಶೆಂ ಆನಿ ಆಪ್ಣಾ ಫುಡೆಂ ಪಲ್ತಡಿ ವಚಶೆಂ ತಾಕಿದ್ ದೀವ್ನ್ ಲೊಕಾಕ್ ಧಾಡ್ನ್ ಸೊಡ್ಲೆಂ. ಲೊಕಾಕ್ ಧಾಡ್ನ್ ಜಾತಚ್, ತೊ ಎಕ್ಲೊಚ್ ಮಾಗ್ಣೆಂ ಕರುಂಕ್ ಮ್ಹಣ್ ದೊಂಗ್ರಾಕ್ ಗೆಲೊ. ಕಾಳೊಕ್ ಪಡ್ತಾನಾ ಥಂಯ್ ತೊ ಎಕ್ಲೊಚ್ ಆಸ್ಲೊ. ಹೆಣೆಂ ದೋಣ್ ತಡಿ ಥಾವ್ನ್ ಸುಮಾರ್ ಪಯ್ಸ್ ಪಾವ್‍ಲ್ಲಿ, ಪುಣ್ ವಾರೆಂ ವಿರೋಧ್ ವ್ಹಾಳ್ತಾಲೆಂ ಜಾಲ್ಲ್ಯಾನ್, ಲ್ಹಾರಾಂಕ್ ತಿ ವಯ್ರ್ ಸಕ್ಲಾ ಜಾಂವ್ಕ್ ಲಾಗ್ಲಿ. ಫಾಂತ್ಯಾಚಿಂ ತೀನ್ ವೊರಾಂ ಉತರ್ಲಲಿಂ ಜಾತಿತ್, ಜೆಜು ಉದ್ಕಾಚೆರ್ ಚಲುನ್ ತಾಂಚೆ ಸರ್ಶಿಂ ಆಯ್ಲೊ. ಉದ್ಕಾಚೆರ್ ತೊ ಚಲುನ್ ಯೆತಾಲೊ ತೆಂ ಪಳೆವ್ನ್ ತೆ ಇತ್ಲೆ ಘಾಬರ್ಲೆ ಕೀ, “ತೆಂ ಮೆಲ್ಲೆಂ!” ಮ್ಹಣುನ್ ತಾಣಿಂ ಭಿಯಾನ್ ಬೊಬ್ ಮಾರ್ಲಿ. ಪುಣ್ ತೆಚ್ ಘಡಿಯೆ ಜೆಜು ತಾಂಚೆಲಾಗಿಂ ಉಲೊವ್ನ್ ಮ್ಹಣಾಲೊ: “ಧೈರ್ ಘೆಯಾ, ಹಾಂವ್ ತೊ, ಭಿಯೆನಾಕಾತ್!” ತಿತ್ಲ್ಯಾರ್ ಪೆದ್ರು ಜಾಪ್ ದೀವ್ನ್ ಮ್ಹಣಾಲೊ: “ಸೊಮಿಯಾ, ತುಂಚ್ ತೊ ಜಾಲ್ಯಾರ್, ಮ್ಹಾಕಾ ಉದ್ಕಾ ವಯ್ಲ್ಯಾನ್ ತುಜೆ ಸರ್ಶಿಂ ಯೇಂವ್ಕ್ ಫರ್ಮಾಯ್.” “ಯೆ” ಮ್ಹಣಾಲೊ ಜೆಜು ತಾಕಾ. ತವಳ್ ಪೆದ್ರು ದೊಣಿ ವಯ್ಲೊ ದೆಂವುನ್ ಜೆಜು ಸರ್ಶಿಂ ವಚುಂಕ್ ಉದ್ಕಾಚೆರ್ ಚಲುಂಕ್ ಲಾಗ್ಲೊ. ಪುಣ್ ವಾರೆಂ ಜೊರಾನ್ ವ್ಹಾಳ್ತಾಲೆಂ, ತೆಂ ಪಳೆವ್ನ್ ತೊ ಭಿಯೆಲೊ ಆನಿ ಬುಡೊಂಕ್ ಲಾಗ್ಲೊ. ತಿತ್ಲ್ಯಾರ್, “ಸೊಮಿಯಾ, ಮ್ಹಾಕಾ ಬಚಾವ್ ಕರ್” ಮ್ಹಣುನ್ ತಾಣೆ ಬೋಬ್ ಮಾರ್ಲಿ. ತಕ್ಷಣ್ ಜೆಜುನ್ ಹಾತ್ ದೀವ್ನ್ ತಾಕಾ ಧರ್ಲೊ ಆನಿ ಮ್ಹಳೆಂ: “ಉಣ್ಯಾ ಭಾವಾರ್ಥಾಚ್ಯಾ, ಕಿತ್ಯಾಕ್ ತುಂ ದುಭಾವ್ಲೊಯ್?” ಉಪ್ರಾಂತ್ ತೆ ದೋಗ್ ದೊಣಿರ್ ಚಡ್ತಚ್ ವಾರೆಂ ರಾವ್ಲೆಂ. ತವಳ್ ದೊಣಿರ್ ಆಸ್ಲಲೆ ಜೆಜುಚ್ಯಾ ಪಾಂಯಾಂಕ್ ಪಡುನ್ ಮ್ಹಣಾಲೆ: “ನಿಜಾಕ್‍ಯೀ ದೆವಾಚೊ ಪೂತ್ ತುಂ!”