📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಾಪ್‌
ಸರ್ವೆಸ್ಪರ್ ಅಶೆಂ ಮ್ಹಣ್ತಾ:
ತುಮಿ ತಾನ್ ಲಾಗ್ಲಲ್ಯಾಂನೊ, ಉದ್ಕಾಶಿಂ ಯೆಯಾ;
ತುಮ್ಚೆ ಕಡೆ ದುಡು ನಾ ತರೀ ಯೆಯಾ!
ದುಡು ನಾಸ್ತಾಂ ವಿಕ್ತೆಂ ಘೆಯಾ ಆನಿ ಖಾಯಾ,
ಯೆಯಾ, ಫಾರಿಕ್ ಕರಿನಾಸ್ತಾಂ ದಾಕಾಂ ಸೊರೊ ಆನಿ ದೂದ್ ವಿಕ್ತಿಂ ಘೆಯಾ.
ಪೋಷಣ್ ದಿನಾಂತ್ ತ್ಯಾ ವಸ್ತುಂಚೆರ್ ತುಮಿ ದುಡು ಕಿತ್ಯಾಕ್ ಖರ್ಚಿತಾತ್?
ತುಮ್ಕಾಂ ಧಾದೊಶಿ ಕರಿನಾಂತ್ ತ್ಯಾ ವಸ್ತುಂಚೆರ್ ತುಮ್ಚಿ ಜೋಡ್ ಕಿತ್ಯಾಕ್ ಹೊಗ್ಡಾಯ್ತಾತ್?
ಚತ್ರಾಯೆನ್ ಮ್ಹಜೆಂ ಆಯ್ಕಾ, ಆನಿ ಬರೆಂ ಖಾಣ್ ತುಮ್ಕಾಂ ಮೆಳ್ತಲೆಂ
ಆನಿ ಪಕ್ವಾನ್ನಾಂ ಖಾವ್ನ್ ತುಮಿ ಧಾದೊಶಿ ಜಾತಲ್ಯಾತ್.
ಕಾನ್ ದಿವ್ನ್ ಆಯ್ಕಾ ಆನಿ ಮ್ಹಜೆಶಿಂ ಯೆಯಾ,
ಆಯ್ಕಾ, ಆನಿ ತುಮಿ ಜಿಯೆತಲ್ಯಾತ್.
ಹಾಂವೆಂ ದಾವಿದಾಕ್ ಭಾಸಾಯ್‍ಲ್ಲ್ಯಾ ಆಶಿರ್ವಾದಾಂ ಪರ್ಮಾಣೆಂ
ಹಾಂವ್ ತುಮ್ಚೆ ಕಡೆ ಏಕ್ ಸಾಸ್ಣಿಕ್ ಕರಾರ್ ಕರ್ತಲೊಂ.

ಶ್ಲೋಕ್: ತುಜೆ ಹಾತ್ ಉಸೊವ್ನ್, ಸರ್ವೆಸ್ಪರಾ,ಆಮ್ಕಾಂ ತುಂ ಧಾದೊಶಿ ಕರ್ತಾಯ್.

1. ಸೊಮಿ ದಯಾಳ್ ಆನಿ ಕಾಕುಳ್ತ್ದಾರ್‌,
   ಸೊಸ್ಣಿಕಾಯೆನ್ ಆನಿ ಪ್ರಿತಿ ಮೊಗಾನ್ ಭರ್ಲಲೊ,
   ಸಮೆಸ್ತಾಂಕ್ ಸರ್ವೆಸ್ಪರ್ ಕಿತ್ಲೊ ಬರೊ!
   ಸಗ್ಳ್ಯೆ ಆಪ್ಲ್ಯೆ ರಚ್ನೆ ಥಂಯ್ ಕಣ್ವಾಳಾಯೆನ್ ಭರ್ಲಲೊ
2. ಸಮೆಸ್ತ್ ರಚ್ಣಾಂಚೆ ದೊಳೆ ತುಜೆರ್‌ಚ್ ಆಸಾತ್,
   ಆನಿ ತುಂ ಸಕ್ಟಾಂಕ್ ವೆಳಾ ವೆಳಾರ್ ತಾಂಚೊ ಗ್ರಾಸ್ ದಿತಾಯ್.
   ತುಜೆ ಹಾತ್ ಉಸೊವ್ನ್
   ಆಮ್ಕಾಂ ತುಂ ಧಾದೊಶಿ ಕರ್ತಾಯ್.
3. ಸರ್ವೆಸ್ಪರಾಚ್ಯೊ ವಾಟೊ ಸಗ್ಳ್ಯೊಚ್ ನಿತಿವಂತ್‌
   ಸರ್ವ್ ಅಪ್ಲ್ಯಾ ಕರ್‍ಣ್ಯಾಂನಿ ತೊ ದಯಾಳ್
   ಆಪ್ಣಾಕ್ ಉಲೊ ಮಾರ್ತಾಲ್ಯಾ ಸಮೆಸ್ತಾಂಕ್ 
   ವ್ಹಯ್ ಖರ್‍ಯಾ ಮನಾನ್ ಉಲೊ ಮಾರ್ತಲ್ಯಾಂಕ್
   ಸರ್ವೆಸ್ಪರ್ ಲಾಗಿಂಚ್ ಆಸಾ

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಾಪ್
ಭಾವಾಂ-ಭಯ್ಣಿಂನೋ,
ಕೊಣ್ ತೊ ಆಮ್ಕಾಂ ಕ್ರಿಸ್ತಾಚ್ಯಾ ಮೊಗಾ ಥಾವ್ನ್ ವೆಗ್ಳಿಂ ಕರ್ತಲೊ? ಕಷ್ಟ್ ವಾ ಆಡ್ಚಣಿ? ದಗ್ಧವ್ಣಿ? ಖಾಣಾ ಜೆವ್ಣಾಚೊ ವಾ ನ್ಹೆಸ್ಣಾಚೊ ತತ್ವಾರ್? ಅಪಾಯ್ ವಾ ತಲ್ವಾರ್?
ಜಾಲ್ಯಾರ್‍ಯೀ ಹ್ಯಾ ಸರ್ವಾಂತ್‍ಯೀ ಜಾಣೆಂ ಆಮ್ಚೊ ಮೋಗ್ ಕೆಲಾ ತಾಚೇ ಮಾರಿಫತ್ ಆಮಿ ಸಂಪೂರ್ಣ್ ಜಯ್ತ್ ಜೊಡ್ತಾಂವ್. ಕಿತ್ಯಾಕ್ ಇತ್ಲೆಂ ಹಾಂವ್ ಖಂಡಿತ್ ಜಾಣಾಂ: ಮರಣ್ ಜಾಂವ್ ಜಿವಿತ್ ಜಾಂವ್, ದೇವ್‍ದೂತ್ ಜಾಂವ್ ಸಂಯ್ಭಾ ವರ್ತ್ಯೊ ಸಕ್ತ್ಯೊ ವಾ ಪದ್ವ್ಯೊ ಜಾಂವ್, ಆತಾಂಚೊ ಕಾಳ್ ಜಾಂವ್ ಫುಡ್ಲೊ ಕಾಳ್ ಜಾಂವ್, ಅಂತ್ರಾಳ್ ಜಾಂವ್ ಪಾತಾಳ್ ಜಾಂವ್ - ಕೊಣ್‍ಯೀ ಜಾಂವ್ ಕಿತೆಂಯೀ ಜಾಂವ್ ಜೆಜು ಕ್ರಿಸ್ತಾ ಆಮ್ಚ್ಯಾ ಸೊಮಿಯಾ ಥಂಯ್ ಆಮ್ಕಾಂ ಮೆಳ್ಳಲ್ಯಾ ದೆವಾಚ್ಯಾ ಮೊಗಾ ಥಾವ್ನ್ ಆಮ್ಕಾಂ ವೆಗ್ಳಿಂ ಕರುಂಕ್ ಸಕ್ಚೆಂ ನಾ.

ಉಂಡ್ಯಾ ವರ್ವಿಂ ಮಾತ್ರ್ ಮನಿಸ್ ಜಿಯೆನಾ,
ಬಗಾರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ
ಹರ್ಯೇಕಾ ಉತ್ರಾ ವರ್ವಿಂ ತೊ ಜಿಯೆತಾ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ.
ಸ್ನಾನಿಕ್ ಜುವಾಂವ್ಚ್ಯಾ ಮೊರ್ನಾಚಿ ಖಬರ್ ಆಯ್ಕತಚ್, ಜೆಜು ಥಂಯ್ಚೊ ಭಾಯ್ರ್ ಸರ್ಲೊ ಆನಿ ಏಕ್ ದೊಣಿರ್ ಬಸುನ್ ಏಕ್ ವ್ಹೊರೆ ವಿಂಗಡ್ ಸುವಾತೆಕ್ ಗೆಲೊ. ಪುಣ್ ತಿ ಖಬರ್ ಮೆಳ್ತಚ್ ಲೋಕ್ ಶಹರಾಂ ಥಾವ್ನ್ ಪಾಂಯ್‍ವಾಟೇನ್ ಹಾರಿಂ ಹಾರಿಂನಿ ತಾಚಿ ಪಾಟ್ ಧರ್ನ್ ಗೆಲೊ.ಅಶೆಂ ತೊ ದೊಣಿ ವಯ್ಲೊ ಸಕ್ಲಾ ದೆಂವ್ತಾನಾ ಥಂಯ್ ಎಕ್ಟಾಂಯ್ ಜಾಲ್ಲೊ ವ್ಹಡ್ ಲೊಕಾ ಜಮೊ ದೆಖ್ತಚ್ ತಾಚೆಂ ಕಾಳಿಜ್ ಕಳ್ವಳ್ಳೆಂ ಆನಿ ತಾಂಚ್ಯಾ ಪಿಡೆಸ್ತಾಂಕ್ ತಾಣೆಂ ಗೂಣ್ ಕೆಲಿಂ.
ಸಾಂಜ್ ಜಾವ್ನ್ ಯೆತಾನಾ, ತಾಚೆ ಶಿಸ್ ತಾಚೇ ಸರ್ಶಿಂ ಯೇವ್ನ್ ಮ್ಹಣಾಲೆ: “ಹಿ ಏಕ್ ಎಕ್ಸುರಿ ಸುವಾತ್ ಆನಿ ವೇಳ್‍ಯೀ ಉತರ್ಲೊ. ಲೊಕಾಕ್ ಧಾಡ್ನ್ ಸೊಡ್. ಹಳ್ಳ್ಯಾಂನಿ ವಚುನ್ ಜೆಂವ್ಕ್ ಖಾಂವ್ಕ್ ಕಾಂಯ್ ಮೆಳ್ತಾ ಜಾಲ್ಯಾರ್ ತಿಂ ಮೊಲಾಕ್ ಘೆಂವ್ದಿ.” ಪುಣ್ ಜೆಜುನ್ ತಾಂಕಾಂ ಜಾಪ್ ದಿಲಿ: “ತಾಂಣಿಂ ವೆಚಿ ಗರ್ಜ್ ನಾ. ತುಮಿಚ್ ತಾಂಕಾಂ ಕಾಂಯ್ ಪುಣ್‍ಯೀ ಖಾಂವ್ಕ್ ದಿಯಾ.” ತೆ ತಾಚೇಲಾಗಿಂ ಮ್ಹಣಾಲೆ: “ಆಮ್ಚೆ ಲಾಗಿಂ ಹಾಂಗಾ ಕಾಂಯ್ಚ್ ನಾ; ಆಸಾತ್ ಮ್ಹಳ್ಯಾರ್ ಫಕತ್ ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ.” ಜೆಜು ತಾಂಕಾಂ ಮ್ಹಣಾಲೊ: “ತೆಂ ಮ್ಹಾಕಾ ಹಾಂಗಾ ಹಾಡ್ನ್ ದಿಯಾ.” ಆನಿ ಲೊಕಾಕ್ ತಣಾರ್ ಬಸೊಂವ್ಕ್ ತಾಣೆಂ ತಾಕಿದ್ ದಿಲಿ. ಉಪ್ರಾಂತ್ ತಾಣೆಂ ತೆ ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ ಹಾತಿಂ ಘೆತ್ಲ್ಯೊ. ಸರ್ಗಾಕ್ ದೀಷ್ಟ್ ಲಾವ್ನ್ ಅರ್ಗಾಂ ದಿಲಿಂ ಆನಿ ಉಂಡೆ ಮೊಡ್ನ್ ಶಿಸಾಂಕ್ ದಿಲೆ. ಶಿಸಾಂನಿ ಲೊಕಾಕ್ ವಾಂಟ್ಲೆ.ಸಮೆಸ್ತ್ ಜೇವ್ನ್ ಧಾದೊಶಿ ಜಾಲೆ. ಉರ್ಲಲ್ಯಾ ಕುಡ್ಕ್ಯಾಂನಿ ಬಾರಾ ದಾಲಿಂ ಭರ್ನ್ ಕಾಡ್ಲಿಂ.ಸ್ತ್ರಿಯೋ ಆನಿ ಭುರ್ಗಿಂ ಸೊಡ್ಲ್ಯಾರ್, ಜೆವ್ಲಲೆ ದಾದ್ಲೆ ಮನಿಸ್ ಪಾಂಚ್ ಹಜಾರ್ ಜಾತಿತ್.