📖 ಆಯ್ತಾರಾಚಿಂ ವಾಚ್ಪಾಂ

ರಾಯಾಂಚ್ಯಾ ಪಯ್ಲ್ಯಾ ಪುಸ್ತಾಕಾಂತ್ಲೆಂ ವಾಚಪ್.
ಗಿಬೆಯೊನಾಂತ್ ಸರ್ವೆಸ್ಪರ್ ಸಾಲ್ಮಾಂವ್ಕ್ ರಾತಿಂ ಎಕಾ ಸಪ್ಣಾಂತ್ ದಿಷ್ಟಿ ಪಡ್ಲೊ. ದೆವಾನ್ ತಾಕಾ ಸಾಂಗ್ಲೆಂ: “ಹಾಂವೆಂ ತುಕಾ ಕಿತೆಂ ದಿಂವ್ಕ್ ಜಾಯ್ ತೆಂ ಮಾಗ್.”
ಸರ್ವೆಸ್ಪರಾ, ಮ್ಹಜ್ಯಾ ದೆವಾ, ತುವೆಂ ಮ್ಹಾಕಾ, ತುಜ್ಯಾ ಸೆವಕಾಕ್, ಮ್ಹಜ್ಯಾ ಬಾಪಾಯ್ ದಾವಿದಾಚೆ ಸುವಾತೆರ್ ರಾಯ್ ಕೆಲಾಯ್; ಪೂಣ್ ಹಾಂವ್ ಆಜುನ್ ಭುರ್ಗೊ ಆನಿ ಹಾಂವೆಂ ಕಿತೆಂ ಕರುಂಕ್ ಜಾಯ್ ತೆಂ ಹಾಂವ್ ನೆಣಾ. ತುವೆಂ ವಿಂಚುನ್ ಕಾಡ್ಲಲೆ ಪರ್ಜೆ ಮಧೆಂ ತುಜೊ ಸೆವಕ್ ಆಸಾ; ಹಿ ಪರ್ಜಾ ಇತ್ಲಿ ವ್ಹಡ್ ಆಸಾ ಕಿ ತಿ ಮೆಜುಂಕ್ ವಾ ಆಟಾಪುಂಕ್ ಜಾಯ್ನಾ. ತುಜೆ ಪರ್ಜೆಕ್ ನಿತಿನ್ ಚಲೊಂವ್ಕ್ ಆನಿ ಬರ್ಯಾ ಆನಿ ವಾಯ್ಟಾ ಮಧ್ಲೊ ಫರಕ್ ಸಮ್ಜುನ್ ಘೆಂವ್ಕ್ ಗರ್ಜ್ ಆಸ್ಲಲಿ ಜಾಣ್ವಾಯ್ ತುಜ್ಯಾ ಸೆವಕಾಕ್ ದಿ. ನಾ ತರ್ ಎದೆ ವ್ಹಡ್ ಪರ್ಜೆಕ್ ಚಲೊವ್ನ್ ವ್ಹರುಂಕ್ ಕೋಣ್ ಸಕತ್?” ಸಾಲ್ಮಾಂವ್ನ್ ಕೆಲ್ಲೆಂ ಹೆಂ ಮಾಗ್ಣೆಂ ಸರ್ವೆಸ್ಪರಾಕ್ ಮಾನ್ವಲೆಂ. ದೆಕುನ್ ದೆವಾನ್ ತಾಕಾ ಜಾಪ್ ದಿಲಿ: “ತುವೆಂ ತುಜೆ ಪಾಸತ್ ಲಾಂಬ್ ಆವ್ಕ್ ವಾ ಗ್ರೇಸ್ತ್-ಕಾಯ್ ವಾ ತುಜ್ಯಾ ದುಸ್ಮಾನಾಂಚೊ ಜೀವ್ ಮಾಗುಂಕ್ ನಾಂಯ್, ಬಗರ್ ನ್ಯಾಯ್ ನಿರ್ಣಯಾ ಖಾತಿರ್ ಗರ್ಜ್ ಆಸಾ ತಿ ಜಾಣ್ವಾಯ್ ಮಾಗ್ಲಿಯ್. ಇತ್ಲೆಂಚ್ ತುವೆಂ ಮಾಗ್ಲೆಂಯ್ ದೆಕುನ್, ಹಾಂವ್ ತುವೆಂ ಮಾಗ್ಲಲೆಂ ತೆಂ ದಿತಲೊಂ. ಹಾಂವ್ ತುಕಾ ಇತ್ಲೆ ಬುದ್ವಂತ್ಕಾಯೆನ್ ಆನಿ ಜಾಣ್ವಾಯೆನ್ ಭರ್ಲಲೆಂ ಕಾಳಿಜ್ ದಿತಲೊಂ ಕಿ ತುಕಾ ಸಮಾಸಮ್ ಆಜುನ್ ಕೋಣ್‍ಚ್ ಆಸ್ಲಲೊ ನಾ ಆನಿ ತುಜೆ ಉಪ್ರಾಂತ್ ಕೋಣ್‍ಚ್ ಆಸ್ಚೊ ನಾ.

ಶ್ಲೋಕ್: ತುಜ್ಯಾ ಉಪದೆಸಾಂಚೊ ಸರ್ವೆಸ್ಪರಾ, ಹಾಂವ್‌ ಕಿತ್ಲೊ ಮೋಗ್ ಕರ್ತಾಂ !

1. ತುಜೆಂ ಉತಾರ್ ಪಾಳ್ಚೆಂ ಮ್ಹಳ್ಯಾರ್ ಮ್ಹಜೊ ದಾಯ್ಜಾಚೊ ವಾಂಟೊ-
   ಅಸೊ ಹಾಂವೆಂ ನಿರ್ಧಾರ್ ಕೆಲಾ, ಸರ್ವೆಸ್ಪರಾ.
   ತುಜ್ಯಾ ತೊಂಡಾಂತ್ ಥಾವ್ನ್ ಯೆತಾತ್ ತಿಂ ನಿಯಮಾಂ
   ಮ್ಹಾಕಾ ರುಪ್ಯಾ ಆನಿ ಭಾಂಗಾರಾ ಪ್ರಾಸ್ ಚಡ್ ಮೊಲಾಧಿಕ್‌.
2. ಪುಣ್ ತುಜ್ಯಾ ಚಾಕ್ರಾಕ್ ಭಾಸಾಯ್ಲಾಂಯ್ ತ್ಯಾ ಪರ್ಮಾಣೆಂ
   ತುಜ್ಯಾ ಮೊಗಾನ್ ಮ್ಹಾಕಾ ಭುಜಯ್ ಆನಿ ಧಯ್ರ್ ದೀ.
   ಕಣ್ವಾಳಾಯೆನ್ ಮ್ಹಾಕಾ ವಾಗಯ್ ಆನಿ ಮ್ಹಜೊ ಜೀವ್ ವಾಂಚ್ತಲೊ,
   ಕಿತ್ಯಾಕ್ ತುಜ್ಯಾ ಧರ್ಮ್-ಶಾಸ್ತ್ರಾಂತ್ ಆಸಾ ಮ್ಹಜಿ ದಾಧೊಸ್ಕಾಯ್‌.
3. ದೆಕುನ್‌ಚ್ ಆಪುಟ್ ಭಾಂಗಾರಾ ಪ್ರಾಸ್ ಚಡ್
   ತುಜ್ಯಾ ಉಪಾದೆಸಾಂಚೊ ಹಾಂವ್ ಮೋಗ್ ಕರ್ತಾಂ.
   ವ್ಹಯ್, ತುಜ್ಯಾ ಕಾಯ್ದ್ಯಾಂ ಪರ್ಮಾಣೆಂ ಹಾಂವ್ ಚಲ್ತನಾ
   ಸರ್ವ್ ಥರಾಂಚ್ಯೊ ಫಟ್ಕಿರ‍್ಯೊ ವಾಟೊ ಹಾಂವ್ ಕಾಂಠಾಳ್ತಾಂ.
4. ತುಜಿ ಖುಶಿ ಖರಿಚ್ ವಿಚಿತ್ರ್‌,
   ದೆಕುನ್ ಹಾಂವ್ ತಿ ಪಾಳ್ತಾಂ.
   ತುಜ್ಯಾ ಉತ್ರಾಚೆಂ ಉಗ್ಡಾಪಣ್ ಮತಿಕ್ ಉಜ್ವಾಡ್
   ಆನಿ ಸಾಧ್ಯಾ ಕಾಳ್ಜಾಚ್ಯಾಂಕ್ ಸಮ್ಜಣಿ ದಿತಾ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್.
ಹ್ಯಾ ಶಿವಾಯ್‌,ಆಪ್ಣಾಚೊ ಮೋಗ್ ಕರ್ತಲ್ಯಾಂಕ್, ಮ್ಹಣ್ಜೆ ಜಾಂಕಾಂ ಆಪ್ಣೆಂ ನಿಶ್ಚಿತ್ ಕೆಲ್ಲ್ಯಾ ಶೆವಟಾಕ್ ಸರಿ ಜಾವ್ನ್ ಆಪೊವ್ಣೆಂ ದಿಲಾಂ ತಾಂಕಾಂ ಸರ್ವ್ ಸಂಗ್ತಿ ದೇವ್ ತಾಂಚ್ಯಾ ಬರ್ಯಾಕ್ ಪಡಶೊ ಕರ್ತಾ ಮ್ಹಣ್ ಆಮಿ ಜಾಣಾಂವ್. ಜಾಂಕಾಂ ವಿಂಚುನ್ ಕಾಡ್ಚೆ ಆದಿಂಚ್ ತೊ ಒಳ್ಕುನ್ ಜಾಣಾ, ತಾಂಕಾಂ ಆಪ್ಲ್ಯಾ ಪುತಾಚ್ಯಾ ಸಾರ್ಕ್ಯಾಚಿಂ ಜಾಂವ್ಕ್ ತಾಣೆಂ ನಿರ್ಮಿಲಾಂ. ಅಶೆಂ, ಜಾಯ್ತ್ಯಾ ಭಾವ್ ಭಾಂವ್ಡಾಂಚ್ಯಾ ಘರಾಂತ್ ಆಪ್ಲ್ಯಾ ಪುತಾನ್ ಮಾಲ್ಗಡೊ ಪೂತ್ ಜಾಯ್ಜಯ್ ಮ್ಹಣ್ ತಾಣೆಂ ಯೆವ್ಜಿಲೆಂ. ಹ್ಯಾ ಪಾಸತ್ ಜಾಂಕಾಂ ತಾಣೆಂ ಅಸಲೆ ಯೆವ್ಜಣೆಕ್ ನಿರ್ಮಿಲಿಂ ತಾಂಕಾಂ ತಾಣೆ ಆಪಯ್ಲಿಂ; ಜಾಂಕಾಂ ತಾಣೆ ಆಪಯ್ಲಿಂ ತಾಂಕಾಂ ತಾಣೆ ನಿತಿವಂತ್ ಕೆಲಿಂ; ಜಾಂಕಾಂ ತಾಣೆ ನಿತಿವಂತ್ ಕೆಲಿಂ ತಾಂಕಾಂ ತಾಣೆ ಆಪ್ಲೆ ಮಹಿಮೆಂತ್ ಭಾಗಿದಾರಾಂ ಕೆಲಿಂ.

ಸದೆಂವ್ ತುಂ ಬಾಪಾ, ಸರ್ಗಾ-ಸಂಸಾರಾಚ್ಯಾ ಧನಿಯಾ,
ಕಿತ್ಯಾಕ್ ಸರ್ಗಿಂಚ್ಯಾ ರಾಜ್ಯಾಚೆ ಘುಟ್ ಲ್ಹಾನಾಂಕ್ ತುವೆಂ ಉಘಡ್ಲ್ಯಾಯ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ.
ತ್ಯಾ ವೆಳಿಂ ಜೆಜು ಲೊಕಾ ಜಮ್ಯಾ ಲಾಗಿಂ ಮ್ಹಣಾಲೊ:“ಸರ್ಗಿಂಚೆಂ ರಾಜ್ಯ್ ಮ್ಹಳ್ಯಾರ್ ಶೆತಾಂತ್ ಪೂರ್ನ್ ದವರ್‌ಲ್ಲ್ಯಾ ಏಕ್ ದಿರ್ವ್ಯಾಬರಿ. ಕೊಣ್ ಎಕ್ಲ್ಯಾಕ್ ತೆಂ ಮೆಳ್ತಾ ಆನಿ ತೊ ಪರ್ತ್ಯಾನ್ ತೆಂ ಲಿಪಯ್ತಾ. ಉಪ್ರಾಂತ್ ಸಂತೊಸಾನ್ ವಚುನ್ ತೊ ಆಪ್ಲೆಂ ಆಸ್ತ್-ಬದಿಕ್ ಸಗ್ಳೆಂ ವಿಕ್ತಾ ಆನಿ ತೆಂ ಶೆತ್ ಮೊಲಾಕ್ ಘೆತಾ.
ಸರ್ಗಿಂಚೆಂ ರಾಜ್ಯ್ ಮ್ಹಳ್ಯಾರ್ ಬರಿಂ ಮೊತಿಯಾಂ ಸೊಧುನ್ ವೆತಲ್ಯಾ ಏಕ್ ಸಾವ್ಕಾರಾ ಬರಿ. ಚಡ್ ಮೊಲಾಚೆಂ ಏಕ್ ಮೊತಿಂ ತಾಕಾ ಮೆಳ್ತಚ್ ತೊ ವೆತಾ ಆನಿ ಆಪ್ಣಾಚೆಂ ಆಸ್ತ್ ಬದಿಕ್ ಸಗ್ಳೆಂ ವಿಕುನ್ ತೆಂ ಮೊತಿಂ ತೊ ಮೊಲಾಕ್ ಘೆತಾ.
ಪರ್ತ್ಯಾನ್, ಸರ್ಗಿಚೆಂ ರಾಜ್ಯ್ ಏಕ್ ಜಾಳಾಬರಿ. ತೆಂ ದರ್ಯಾಂತ್ ಉಡಯ್ತಚ್ ಸರ್ವ್ ಜಿನ್ಸಾಂಚಿ ಮಾಸ್ಳಿ ತಾಂತುಂ ಸಾಂಪಡ್ತಾ. ಜಾಳ್ ಭರ್ಲ್ಯಾ ಉಪ್ರಾಂತ್ ತೆಂ ವೊಡ್ತಾತ್ ಆನಿ ವೆಳೆರ್ ಬಸೊನ್ ಮಾಸ್ಳಿ ವಿಂಚ್ತಾತ್. ಬರಿ ಮಾಸ್ಳಿ ಭಾಟಿಯಾಂನಿ ಭರ್ತಾತ್ ಆನಿ ನಾಕಾರಿ ಭಾಯ್ರ್ ಉಡಯ್ತಾತ್. ತೆ ಪರಿಂ ಘಡ್ತಲೆಂ ಸಂಸಾರಾಚ್ಯಾ ಅಂತ್‍ಕಾಳಾರ್; ದೇವ್‍ದೂತ್ ವೆತಲೆ ಆನಿ ಖೊಟ್ಯಾಂಕ್ ಬರ್ಯಾಂ ಥಾವ್ನ್ ವೆಗ್ಳೆ ಕರ್ನ್ ಉಜ್ಯಾಚ್ಯಾ ಆಗ್ಟ್ಯಾಂತ್ ಉಡಯ್ತಲೆ. ಥಂಯ್ ಜಾತಲೊ ವಿಳಾಪ್ ಆನಿ ದಾಂತ್ ಖಿರ್ಲೊಣಿ.
ಹೆಂ ಸಗ್ಳೆಂ ತುಮ್ಕಾಂ ಸಮ್ಜಲೆಂಮೂ?” ವಿಚಾರ್ಲೆಂ ಜೆಜುನ್. “ವ್ಹಯ್” ಜಾಪ್ ದಿಲಿ ತಾಣಿಂ. ತೊ ತಾಂಕಾಂ ಮ್ಹಣಾಲೊ: “ತಶೆಂ ಮ್ಹಳ್ಯಾರ್ ಸರ್ಗಿಂಚ್ಯಾ ರಾಜ್ಯಾ ವಿಶ್ಯಾಂತ್ ಶಿಕೊವ್ಣ್ ಘೆತಲೊ ಹರ್ಯೆಕ್ ಧರ್ಮ್‍ಶಾಸ್ತ್ರಿ ಏಕ್ ಘರ್-ಧನಿಯಾಬರಿ, ಜೊ ಆಪ್ಲ್ಯಾ ಭಂಡಾರಾಂತ್ಲೆಂ ನವೆಂ ಆನಿ ಪರ್ನೆಂ ಭಾಯ್ರ್ ಹಾಡ್ತಾ.”