📖 ಆಯ್ತಾರಾಚಿಂ ವಾಚ್ಪಾಂ

ಜಾಣ್ವಾಯೆಚ್ಯಾ ಪುಸ್ತಾಕಾಂತ್ಲೆಂ ವಾಚಪ್‌
ಕಿತ್ಯಾಕ್‌ ಸಗ್ಳ್ಯಾಂಚಿ ಜತ್ನಾಯ್ ಘೆತಲೊ
ತುಜೆ ಭಾಯ್ರ್ ದುಸ್ರೊ ಕೋಣ್‍ಚ್ ದೇವ್ ನಾ;
ತುವೆಂ ಅನಿತಿನ್ ನ್ಯಾಯ್‍ನಿರ್ಣಯ್ ಕರುಂಕ್ ನಾಂಯ್ ಮ್ಹಣ್
ದುಸ್ರ್ಯಾ ಖಂಯ್ಚ್ಯಾಚ್ ದೆವಾ ಮುಕಾರ್
ರುಜು ಕರುನ್ ದಾಕೊಂವ್ಚಿ ಗರ್ಜ್ ನಾ.
ಕಿತ್ಯಾಕ್ ತುಜಿ ಪದ್ವಿ ತುಜ್ಯಾ ನಿತಿವಂತ್ಪಣಾಚೆಂ ಮೂಳ್,
ಸಗ್ಳ್ಯಾಂಚೆರ್ ತುಕಾ ಆಸಾ ತೆಂ ಧನಿಪಣ್
ತುಕಾ ಸಗ್ಳ್ಯಾಂಚಿ ದಯಾ ಕರುಂಕ್ ಲಾಯ್ತಾ.
ಲೋಕ್ ತುಜೆಂ ಸರ್ವ್‌ ಪದ್ವೆದಾರ್ಪಣ್ ಮಾನುನ್ ಘೆನಾ ತೆದ್ನಾ
ತುಂ ತುಜಿ ಸಕತ್ ದಾಕಯ್ತಾಯ್;
ಆನಿ ತಾಚಿ ಒಳಕ್ ಆಸುನ್‍ಯೀ ಉದ್ಧಟ್ಪಣ್ ದಾಕಯ್ತಲ್ಯಾಂಕ್
ತುಂ ಶಿಕ್ಷಾ ಲಾಯ್ತಾಯ್.
ಪೂಣ್ ಸಕ್ತೆನ್ ತುಂ ಭೋವ್ ವರ್ತೊ ಜಾಲ್ಯಾರ್‌ಯೀ
ಮೊವಾಳಾಯೆನ್ ತುಂ ನೀತ್ ಕರ್ತಾಯ್
ಆನಿ ವ್ಹಡ್ ದಯಾಳಾಯೆನ್ ಆಮ್ಚೆರ್ ಅಧಿಕಾರ್ ಚಲಯ್ತಾಯ್,
ಕಿತ್ಯಾಕ್ ತುಂ ತುಜೆ ಖುಶೆ ಪರ್ಮಾಣೆ
ತುಜಿ ಪದ್ವಿ ದಾಕೊಂವ್ಕ್ ಸಕ್ತಾಯ್.
ಅಸಲ್ಯಾ ವ್ಯವಹಾರಾ ವರ್ವಿಂ ತುವೆಂ ತುಜೆ ಪರ್ಜೆಕ್ ಶಿಕಯ್ಲೆಂಯ್,
ಪ್ರಾಮಾಣಿಕ್ ಮನ್ಶಾಂನಿ ದಯಾಳ್ ಆಸುಂಕ್ ಜಾಯ್
ಮ್ಹಣ್ ತಾಂಕಾಂ ದಾಕೊವ್ನ್ ದಿಲೆಂಯ್;
ಪಾತ್ಕಾಚೆಂ ಪ್ರಾಚಿತ್ ಕರುಂಕ್
ತುಂ ತುಜ್ಯಾ ಭುರ್ಗ್ಯಾಂಕ್ ಆವ್ಕಾಸ್ ದಿತಾಯ್ ಮ್ಹಣ್
ತುವೆಂ ತಾಂಕಾಂ ಭರ್ವಾಸೊ ದಿಲೊಯ್.

ಶ್ಲೋಕ್: ತುಂ, ದೆವಾ, ದುಲಬ್ ಆನಿ ಕಣ್ವಾಳೊ.

1. ತುಂ, ದೆವಾ, ದುಲಬ್ ಆನಿ ಕಣ್ವಾಳೊ,
   ತುಕಾ ಉಲೊ ಮರ‍್ತಲ್ಯಾಂ ಥಂಯ್‌ ದಯಾಮಯೆನ್ ಭರ‍್ಲಲೊ
   ಮ್ಹಜ್ಯಾ ಮಾಗ್ಣ್ಯಾಕ್ ಕಾನ್ ದೀ, ಸರ್ವೆಸ್ಪರಾ
   ಮ್ಹಜ್ಯೆ ಖಾಲ್ತ್ಯೆ ವಿನೊವ್ಣೆಕ್ ಜಾಪ್ ದಿ.
2. ಸರ್ವೆಸ್ಪರಾ, ತುಕಾ ನಮಾನ್ ಕರುಂಕ್ ಸರ್ವ್‌ ರಾಷ್ಟ್ರಾಂ ಮುಕಾರ್ ಸರ್ತಲಿಂ,
   ತುಜ್ಯಾ ಪಾಂಯಾಂ ಪಡುನ್ ತುಜೆಂ ನಾಂವ್ ವಾಖಣ್ತೆಲಿಂ:
   ಕಿತ್ಯಾಕ್, ಮಹೋನ್ನತ್ ಆನಿ ಮಹತ್ಕರ‍್ಯಾಂ ಚಲಯ್ತಾ ತೊ ತುಂ ಎಕ್ಲೊಚ್,
   ವ್ಹಯ್‌,ತುಂ ಎಕ್ಲೊಚ್ ದೇವ್.!
3. ಪುಣ್ ತುಂ, ಸಾಯ್ಬಾ, ದಯಾಳ್ ಆನಿ ಕಾಕುಳ್ತಿಚೊ ದೇವ್‌,
   ಲಾಂಬ್‌ ಸೊಸ್ಣಿಕಾಯೆಚೊ ದೇವ್ ತುಂ.
   ಸದಾಂ ದಯಾಳ್ ಆನಿ ವಿಶ್ವಾಸಿ ತುಂ!
   ತರ್ ಮ್ಹಾಕಾ, ದೃಢ್ ಕರ್ನ್ ಪಳೆ, ಮ್ಹಜಿ ದಯಾ ಕರ್.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಆಮ್ಚೆ ಅಸ್ಕತ್ಕಾಯೆಂತ್ ಆಮ್ಕಾಂ ಅತ್ಮ್ಯಾಚೊ ಆಧಾರ್ ಆಸಾ. ಕಿತ್ಯಾಕ್ ಕಿತೆಂ ಆನಿ ಕಶೆಂ ಮಾಗ್ಚೆಂ ತೆಂ ಆಮಿ ನೆಣಾಂವ್ ಜಾಲ್ಲ್ಯಾನ್, ಉತ್ರಾಂನಿ ಉಚಾರುಂಕ್ ಜಾಯ್ನಾ ತೆಂ ಅತ್ಮೊಚ್ ಆಮ್ಚೆ ಖಾತಿರ್ ಆಪ್ಲ್ಯಾ ಹಾಸ್ಕಾರ್ ಸುಸ್ಕಾರಾಂನಿ ವಿನಂತಿ ಕರ್ತಾ. ಆನಿ ಆಮ್ಚ್ಯಾ ಅಂತಸ್ಕರ್ನಾಚೆ ಗುಟ್ ಜಾಣಾ’ಸಾ ತೊ ದೇವ್ ಅತ್ಮ್ಯಾಚಿ ಖುಶಿ ಕಿತೆಂ ಮ್ಹಣ್ ಜಾಣಾ; ಕಿತ್ಯಾಕ್ ಅತ್ಮೊ ದೆವಾಚೆ ಖುಶೆಕ್ ಸರಿ ಜಾವ್ನ್ ದೆವಾಚ್ಯಾ ಖಾಶಾ ಲೊಕಾ ಖಾತಿರ್ ದೆವಾಲಾಗಿಂ ವಿನತಿ ಕರ್ತಾ.

ಬಾಪಾ, ಸರ್ಗಾ-ಸಂಸಾರಾಚ್ಯಾ ಧನಿಯಾ
ಹಾಂವ್‌ ತುಕಾ ಅರ್ಗಾಂ ದಿತಾಂ.
ಕಿತ್ಯಾಕ್ ಸರ್ಗಿಂಚ್ಯಾ ರಾಜ್ಯಾಚೆ ಘುಟ್ ತುವೆಂ ಲ್ಹಾನಾಂಕ್ ಉಗ್ತೆ ಕೆಲೆಯ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ಜೆಜುನ್ ತಾಂಕಾಂ ಆನ್ಯೇಕ್ ಒಪಾರ್ ಸಾಂಗ್ಲಿ: “ಸರ್ಗಿಂಚೆಂ ರಾಜ್ಯ್ ಅಶೆಂ ಮ್ಹಣ್ಯೆತ್ : ಎಕ್ಲ್ಯಾನ್ ಆಪ್ಲ್ಯಾ ಶೆತಾಂತ್ ಬರೆಂ ಬೀಂ ಒಂಪ್ಲೆಂ. ಪುಣ್ ಸಕ್ಕಡ್ ನಿದೊನ್ ಆಸ್ತಾಂ ತಾಚೊ ದುಸ್ಮಾನ್ ಆಯ್ಲೊ ಆನಿ ಗೊಂವಾ ಮಧೆಂ ನೇರ್ ಒಂಪುನ್ ಗೆಲೊ. ಪಾಲ್ವಿ ಫುಟೊನ್ ಕಣ್ಸಾಂ ಯೆತಾನಾ, ನೇರ್‌ಯೀ ದಿಷ್ಟಿ ಪಡ್ಲೊ. ತವಳ್ ಧನಿಯಾಚೆ ವಾವ್ರಾಡಿ ಯೇವ್ನ್ ತಾಚೆ ಲಾಗಿಂ ಮ್ಹಣಾಲೆ: ‘ಧನಿಯಾ, ತುಜ್ಯಾ ಶೆತಾಂತ್ ತುವೆಂ ಬರೆಂ ಬೀಂ ಒಂಪ್‍ಲ್ಲೆಂ ನ್ಹಯ್? ತರ್ ತಾಂತುಂ ನೇರ್ ಖಂಯ್ ಥಾವ್ನ್ ಆಯ್ಲೊ?’ ಧನಿಯಾನ್ ಜಾಪ್ ದಿಲಿ: ‘ಏಕ್ ದುಸ್ಮಾನಾಚೆಂ ಕಾಮ್ ಜಾಯ್ಜಯ್ ಹೆಂ!’ ‘ತರ್ ಆಮಿ ವಚುನ್ ತೊ ಹುಮ್ಟುನ್ ಕಾಡ್ನ್ ರಾಸ್ ಘಾಲುಂವೆ?’ ಮ್ಹಣುನ್ ವಾವ್ರಾಡ್ಯಾಂನಿ ತಾಚೆಲಾಗಿಂ ವಿಚಾರ್ಲೆಂ. ತೊ ಮ್ಹಣಾಲೊ: ‘ನಾಕಾ, ನೇರ್ ಬುಡ್ಡಿತಾನಾ ಸಾಂಗಾತಾಚ್ ತುಮಿ ಗೋಂವ್‍ಯೀ ಹುಮ್ಟಿಶಾತ್. ಲುಂವಣ್ ಪರ್ಯಾನ್ ದೋನ್‍ಯೀ ಸಾಂಗಾತಾ ವಾಡೊಂಕ್ ಸೊಡಾ; ಲುಂವ್ಣೆ ವೆಳಾರ್ ಲುಂವ್ತಲ್ಯಾಂಕ್ ಹಾಂವ್ ಸಾಂಗ್ತಲೊಂ: ಪಯ್ಲೆಂ ನೇರ್ ಎಕ್ಟಾಂಯ್ ಕರಾ ಆನಿ ಉಜ್ಯಾಕ್ ಲಾಂವ್ಕ್ ಪೆಂಡಿಯೋ ಬಾಂಧಾ, ಉಪ್ರಾಂತ್ ಗೋಂವ್ ಮ್ಹಜ್ಯಾ ತುಪ್ಯಾಂತ್ ಭರಾ’.”
ಆನ್ಯೇಕ್ ಒಪಾರ್ ಜೆಜುನ್ ತಾಂಚೇ ಮುಖಾರ್ ಘಾಲಿ: “ಸರ್ಗಿಂಚೆಂ ರಾಜ್ಯ್ ಏಕ್ ಮನ್ಶಾನ್ ಆಪ್ಲ್ಯಾ ಶೆತಾಂತ್ ಒಂಪ್ಲಲ್ಯಾ ಏಕ್ ಸಾಸ್ವಾ ಬಿಯಾಬರಿ. ನಿಜಾಕ್‍ಯೀ ತೆಂ ಬೀಂ ಸರ್ವ್ ಬಿಯಾಂ ಪಯ್ಕಿ ಲ್ಹಾನ್, ಪುಣ್ ವಾಡ್ತಚ್ ಸರ್ವ್ ಝಾಡಾಂ ಪ್ರಾಸ್ ತೆಂ ವ್ಹಡ್ ಜಾತಾ ಆನಿ ರೂಕ್ ಜಾತಾನಾ ಅಂತ್ರಳಾಚಿಂ ಸುಕ್ಣಿಂ ಯೇವ್ನ್ ತಾಚ್ಯಾ ಖಾಂದಿಯಾಂನಿ ಘೊಂಟೆರ್ ಬಾಂಧ್ತಾತ್.”
ಜೆಜುನ್ ತಾಂಕಾಂ ಆನ್ಯೇಕ್ ಒಪಾರ್ ಸಾಂಗ್ಲಿ: “ಸರ್ಗಿಂಚೆಂ ರಾಜ್ಯ್ ಏಕ್ ಸ್ತ್ರಿಯೆನ್ ತೀನ್ ಕಳ್ಶೊ ಪಿಟಾಂತ್ ಭರ್ಶಿಲ್ಲ್ಯಾ ಖಮಿರಾ ಬರಿ. ಕ್ರಮೇಣ್ ತೆಂ ಪೀಟ್ ಸಗ್ಳೆಂ ಫುಗ್ಲೆಂ.”
ಹ್ಯೊ ಸರ್ವ್ ಸಂಗ್ತಿ ಜೆಜು ಒಪಾರಿಂನಿ ಲೊಕಾ ಲಾಗಿಂ ಉಲಯ್ಲೊ; ಒಪಾರಿವಿಣೆಂ ತಾಂಚೆಲಾಗಿಂ ತೊ ಉಲಯ್ನಾತ್‍ಲ್ಲೊ. ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಸಾಂಗ್‍ಲ್ಲೆಂ ತೆಂ:
‘ಒಪಾರಿ ವಾಪರುನ್ ಹಾಂವ್ ಉಲಯ್ತಲೊಂ,
ಸಂಸಾರಾಚೆ ಸ್ಥಾಪನೆ ಥಾವ್ನ್ ಗುಪಿತ್ ಆಸ್‍ಲ್ಲ್ಯೊ ಸಂಗ್ತಿ
ಹಾಂವ್ ಪರ್ಗಟ್ ಕರ್ತಲೊಂ.’
ತಿತ್ಲ್ಯಾರ್ ಲೊಕಾಕ್ ಧಾಡ್ತಚ್ ಜೆಜುಯೀ ಆಪ್ಲ್ಯಾ ಘರಾ ಗೆಲೊ. ತವಳ್ ತಾಚೆ ಶಿಸ್ ತಾಚೆ ಸರ್ಶಿಂ ಯೇವ್ನ್: “ಶೆತಾಂತ್ಲ್ಯಾ ನೆರಾಚಿ ಒಪಾರ್ ಆಮ್ಕಾಂ ಸೊಡೊವ್ನ್ ಸಾಂಗ್” ಮ್ಹಣುನ್ ವಿಚಾರಿಲಾಗ್ಲೆ. ಜೆಜು ತಾಂಕಾಂ ಜಾಪ್ ದೀವ್ನ್ ಮ್ಹಣಾಲೊ: “ಬರೆಂ ಬೀಂ ಒಂಪ್ತಾ ತೊ ಮನ್ಶಾಪೂತ್. ಶೆತ್ ಮ್ಹಳ್ಯಾರ್ ಹೊ ಸಂಸಾರ್. ಬರೆಂ ಬೀಂ ಮ್ಹಳ್ಯಾರ್ ರಾಜ್ಯಾಚಿಂ ಭುರ್ಗಿಂ ಆನಿ ನೇರ್ ಮ್ಹಳ್ಯಾರ್ ಸೈತಾನಾಚಿ ಪಿಳ್ಗಿ; ನೇರ್ ಒಂಪ್ಲಲೊ ದುಸ್ಮಾನ್ ದೆಂವ್ಚಾರ್. ಲುಂವಣ್ ಮ್ಹಳ್ಯಾರ್ ಸಂಸಾರಾಚೊ ಅಂತ್; ಆನಿ ಲುಂವ್ತಲೆಚ್ ದೇವ್‍ದೂತ್. ದೆಕುನ್ ಜಶೆಂ ನೇರ್ ಎಕ್ಟಾಂಯ್ ಕರ್ನ್ ಉಜ್ಯಾಂತ್ ಲಾಸ್ತಾತ್, ತಶೆಂಚ್ ಘಡ್ತಲೆಂ ಸಂಸಾರಾಚ್ಯಾ ಅಂತ್‍ಕಾಳಾರ್. ಮನ್ಶಾಪೂತ್ ಆಪ್ಲ್ಯಾ ದುತಾಂಕ್ ಧಾಡ್ತಲೊ ಆನಿ ತೆ ತಾಚ್ಯಾ ರಾಜ್ಯಾಂತ್ ಪಾತ್ಕಾಕ್ ವೊಡ್ತಲ್ಯಾ ಸಕ್ಟಾಂಕ್ ಆನಿ ಖೊಟೆಪಣ್ ಆಧಾರ್ತಲ್ಯಾ ಸಮೆಸ್ತಾಂಕ್ ಎಕ್ಟಾಂಯ್ ಕರ್ತಲೆ ಆನಿ ಉಜ್ಯಾಚ್ಯಾ ಆಗ್ಟ್ಯಾಂತ್ ಉಡಯ್ತಲೆ. ತವಳ್ ನಿತಿವಂತ್ ಆಪ್ಲ್ಯಾ ಬಾಪಾಚ್ಯಾ ರಾಜ್ಯಾಂತ್ ಸುರ್ಯಾಬರಿ ಪರ್ಜಳ್ತಲೆ. ತುಮ್ಕಾಂ ಕಾನ್ ಆಸಾತ್ ಜಾಲ್ಯಾರ್ ಆಯ್ಕಾ!