📖 ಆಯ್ತಾರಾಚಿಂ ವಾಚ್ಪಾಂ

ಇಸಾಯಿಯಾ ಪ್ರವಾದ್ಯಾಚ್ಯಾ ಪುಸ್ತಕಾಂತ್ಲೆಂ ವಾಚಪ್‌
ಸರ್ವೆಸ್ಪರ್‌ ಅಶೆಂ ಮ್ಹಣ್ತಾ:
ಕಿತ್ಯಾಕ್‌ ಜಶೆಂ ಪಾವ್ಸ್ ಆನಿ ಬರ್ಫ್ ಮಳ್ಬಾ ಥಾವ್ನ್ ಪಡ್ತಾತ್,
ಆನಿ ಒಂಪಿಯಾಕ್ ಬಿಂ ದಿಂವ್ಕ್ ಆನಿ ಜೆವ್ತಲ್ಯಾಕ್ ಜೆವಣ್ ದಿಂವ್ಕ್
ಭುಂಯ್ ಭಿಜಯ್ತಾತ್, ತಿ ಸುಫಳ್ ಕರ್ತಾತ್, ತಾಂತುಂ ಕಿರ್ಲೊಂಕ್ ಲಾಯ್ತಾತ್,
ಆನಿ ಹೆಂ ಕೆಲ್ಲೆ ಶಿವಾಯ್ ಪಾಟಿಂ ವಚನಾಂತ್,
ತಶೆಂ ಮ್ಹಜ್ಯಾ ತೊಂಡಾಂತ್ಲೆಂ ಭಾಯ್ರ್ ಸರ್ತಾ ತೆಂ ಉತರ್
ನಿರ್ಫಳ್ ಜಾವ್ನ್ ಮ್ಹಜೆಶಿಂ ಪಾಟಿಂ ಯೆನಾ,
ಬಗರ್ ಮ್ಹಜಿ ಖುಶಿ ಪಾಳ್ತಾ,
ಆನಿ ಜೆಂ ಕಿತೆಂ ಕರುಂಕ್ ಹಾಂವೆಂ ತಾಕಾ ಧಾಡ್‍ಲ್ಲೆಂ, ತೆಂ ಸಗ್ಳೆಂ ಕರ್ತಾ.

ಶ್ಲೋಕ್: ಥೊಡೆಂ ಬಿಂ ಬರ‍್ಯೆ ಸುವಾತೆರ್ ಪಡ್ಲೆಂ ಆನಿ ಫೊಳ್ ದಿಂವ್ಕ್ ಲಾಗ್ಲೆಂ.

1. ಪ್ರಿಥುಮೆಚಿ ತುಂ ಭೆಟ್ ಕರ‍್ತಾಯ್, ತಿಚೆರ್ ಪಾವ್ಸ್ ಒತ್ತಾಯ್‌,
   ಸುಭಾಮ್‌ಪಣಾನ್ ತಿಕಾ ಸುಫಳ್ ಕರ‍್ತಾಯ್‌.
   ದೆವಾ, ತುಜ್ಯಾ ವ್ಹಾಳಾಂ-ನ್ಹಂಯಾಂನಿ ಉದ್ಕಾಚೊ ಅಭಾವ್ ನಾ,
   ಭುಂಯ್ ಭಿಜೊವ್ನ್ ಧಾನಿ ಕಾಡುಂಕ್ ತಾಂಕಾಂ ತುಂ ಫರ್ಮಾಯ್ತಾಯ್.
2. ವ್ಹಯ್, ಕೊಸ್ಲಲಿ ಭುಮಿ ಪಾವ್ಸಾಚ್ಯಾ ಶಿಂವೊರಾನ್ ತುಂ ಭಿಜಯ್ತಾಯ್‌,
   ತಾಂತ್ಲ್ಯೊ ವೊಳಿಯೀ ಉದ್ಕಾನ್ ಮೋವ್ ಕರ‍್ತಾಯ್‌;
   ಧರ್ಣ್ ಸಪಾಟ್ ಕರ‍್ತಾಯ್, ತಿ ಭಿಜಯ್ತಾಯ್
   ಆನಿ ತಾಂತ್ಲ್ಯಾ ಫೊಳಾಂಚೆರ್ ತುಜೊ ಆಶೀರ್ವಾದ್ ಘಾಲ್ತಾಯ್‌
3. ತುಜ್ಯಾ ಉದಾರ್‌ಪಣಾನ್ ವರ್ಸ್-ಭರ್ ಆಮ್ಕಾಂ ಮೆಳ್ತಾತ್ ಫಳಾಂ
   ತುಜಿಂ ಪಾವ್ಲಾಂ ಪಡ್ತಾತ್ ಥಂಯ್ ಸಗ್ಳೆಂ ಜಾತಾ ಸುಫಳ್ ಪೀಕ್‌,
   ಪಣ್ಗಿಲ್ ಸುವಾತ್ಯಾಂನಿ ಸಯ್ತ್ ಬರ್ಪೂರ್ ಮೆಳ್ತಾ ಚರವ್‌,
   ವ್ಹಯ್, ಗುಡೆ-ದೊಂಗೊರ್ ಅನಂದಾನ್ ನಾಚ್ತಾತ್.
4. ಬಕ್ರ್ಯಾಂಚ್ಯೆ ಹಿಂಡ್ ಮಯ್ದಾನಾಂತ್ ದಿತಾತ್ ಸೊಭಾಯ್‌,
   ಗೊಂವಾ-ಭಾತಾಚಿ ಕೃಷಿ ಬೆಟಾಂ-ಬಯ್ಲಾಂಕ್ ದಿತಾ ಶೃಂಗಾರ್‌:
   ತಿಂ ಸಗ್ಳಿಂ ಸಂತೊಸಾಚ್ಯಾ ಉಮಾಳ್ಯಾಂನಿ ಗಾಯಾನ್ ಕರ‍್ತಾತ್‌ಶೆಂ ದಿಸ್ತಾತ್.

ಸಾಂ ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ
ಹ್ಯಾ ಕಾಳಾರ್ ಆಮಿ ಸೊಸ್ತಾಂವ್ ತೆ ಕಷ್ಟ್ ಮುಖ್ಲ್ಯಾ ಕಾಳಾರ್ ಆಮ್ಚೆ ಥಂಯ್ ಉಗ್ಡಾಪಿ ಜಾಂವ್ಚಿ ಆಸಾ ತೆ ಮಹಿಮೆಕ್ ಸರಿ ಕೆಲ್ಯಾರ್, ತೆ ಕಾಂಯ್ಚ್ ನ್ಹಯ್ ಮ್ಹಣ್ ಮ್ಹಾಕಾ ದಿಸ್ತಾ. ಆಪ್ಲ್ಯಾ ಭುರ್ಗ್ಯಾಂಚಿ ಮಹಿಮಾ ದೇವ್ ಕೆದಾಳಾ ಉಗ್ಡಾಪಿ ಕರಿತ್ ಮ್ಹಣ್ ಸಗ್ಳಿ ರಚ್ನಾ ವ್ಹಡ್ ಅತ್ರೆಗಾನ್ ರಾಕುನ್ ಆಸಾ. ಸಗ್ಳೆ ಸೃಷ್ಟೆನ್ ಆಪ್ಲೊ ಶೆವಟ್ ಜೊಡ್ಲೊನಾ ಜಾಲ್ಯಾರ್, ತೆಂ ತಿಚೆ ಸ್ವಂತ್ ಖುಶೆ ವರ್ವಿಂ ನ್ಹಯ್; ಬಗರ್ ತಿಕಾ ತಶೆಂ ಖಾಲ್ ಕೆಲ್ಲೆ ದೆವಾಚೆ ಖುಶೆ ವರ್ವಿಂ ತೆಂ ಜಾಲಾಂ.ತರ್‌ಯೀ ಸೃಷ್ಟೆಕ್ ಏಕ್ ಭರ್ವಸೊ ಆಸಾ. ಆಪುಣ್ ನಾಸಾಚ್ಯಾ ಗುಲಾಮ್‍ಪಣಾಂತ್ಲಿ ಸುಟೊನ್ ದೆವಾಚ್ಯಾ ಭುರ್ಗ್ಯಾಂಚೆ ಮಹಿಮೆವಂತ್ ಸ್ವಾತಂತ್ರಾಚಿ ವಾಂಟೆಲಿಣ್ ಜಾತಲಿ ಮ್ಹಣ್ ತಿಚೊ ಭರ್ವಸೊ. ಕಿತ್ಯಾಕ್ ಪ್ರಸೂತಿ ಫುಡೆಂ ಯೆತಾತ್ ತ್ಯಾ ಯೆಣಾಂಬರಿ ಸಗ್ಳಿ ಸೃಷ್ಟಿ ಆಪ್ಲೆ ಹರ್ಯೇಕ್ ರಚ್ನೆ ಸವೆಂ ಆಜೂನ್ ಪರ್ಯಾನ್ ಕಷ್ಟಾಂ ದುಖಿಂಚೆ ಹಾಸ್ಕಾರ್ ಸುಸ್ಕಾರ್ ಸೊಡ್ನ್ ಆಸಾ ಮ್ಹಣ್ ಆಮಿ ಜಾಣಾಂವ್. ಸಗ್ಳಿ ಸೃಷ್ಟಿ ಮಾತ್ರ್ ನ್ಹಯ್, ಪವಿತ್ರ್ ಅತ್ಮೊಚ್ ಪ್ರಥಮ್ ಫಳ್ ಮ್ಹಣ್ ಘೆತ್ಲಲಿಂ ಆಮಿಯೀ, ಆಮ್ಚೇ ಸಗ್ಳೆ ಕುಡಿಕ್ ಗುಲಾಮ್‍ಪಣಾಂತ್ಲಿ ಸುಟ್ಕಾ ಮೆಳೊನ್, ದೆವಾಚ್ಯಾ ಭುರ್ಗ್ಯಾಂಚೆಂ ದತ್ತ್-ಪಣ್ ಆಮ್ಕಾಂ ಕೆದಳಾ ಲಾಭತ್ ಮ್ಹಣ್ ಅತ್ರೆಗುನ್ ಆಸ್ತಾಂ, ಅಂತಸ್ಕರ್ನಿಂ ಸುಸ್ಕಾರ್ತಾಂವ್.

ಬಿಂ ದೆವಾಚೆಂ ಉತರ್, ಕ್ರೀಸ್ತ್‌ ತೊ ಒಂಪಿ;
ಜಾಕಾ ತೊ ಮೆಳ್ತಾ, ತೊ ಸಾಸ್ಣಾಕ್ ಬಾಳ್ತಾ!

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತ್ಯಾಚ್ ದಿಸಾ ಜೆಜು ತ್ಯಾ ಘರಾಂತ್ಲೊ ಭಾಯ್ರ್ ಸರುನ್ ಸರೋವರಾಚೆ ವೆಳೆರ್ ವಚುನ್ ಬಸ್ಲೊ. ಆಪ್ಣಾ ಭೊಂವ್ತಣಿಂ ಎಕ್ಟಾಂಯ್ ಜಾಲ್ಲೆ ಲೊಕಾಚೆ ಜಮೆ ಪಳೆವ್ನ್, ತೊ ಎಕ್ ದೊಣಿರ್ ಚಡ್ಲೊ. ಲೋಕ್ ಸಕ್ಕಡ್ ವೆಳೆರ್ ಉಬೊ ರಾವ್ಲೊ.
ತವಳ್ ಜೆಜು ಒಪಾರಿಂನಿ ಸಬಾರ್ ಸಂಗ್ತಿ ತಾಂಚೆ ಲಾಗಿಂ ಉಲಯ್ಲೊ. ತಾಣೆ ಮ್ಹಳೆಂ: “ಏಕ್ ಒಂಪ್ಪಿ ಒಂಪುಂಕ್ ಭಾಯ್ರ್ ಸರ್ನ್ ಗೆಲೊ. ತೊ ಒಂಪ್ತಾನಾ, ಥೊಡೆಂ ಬಿಂ ಮೆರೆರ್ ಪಡ್ಲೆಂ, ಆನಿ ಆಕಾಸಾಚ್ಯಾ ಸುಕ್ಣ್ಯಾಂನಿ ಯೇವ್ನ್ ತೆಂ ಖೆಲೆಂ. ಹೆರ್ ಥೊಡೆಂ ಮಾತಿ ನಾತ್ಲಲೆ ಖಡ್ಪಿ ಸುವಾತೆರ್ ಪಡ್ಲೆಂ. ಹಾಂಗಾ ಮಾತಿ ವಯ್ಲೆಭಾರ್‌ಚ್‌ ಆಸ್ಲಲೆ ವರ್ವಿಂ ವೆಗಿಂಚ್ ತೆಂ ಕಿರ್ಲಲೆಂ. ಪುಣ್ ಸುರ್ಯೊ ಉದೆವ್ನ್ ಯೆತಚ್ ತೆಂ ಕರ್ಪಲೆಂ ಆನಿ ತಾಕಾ ಪಾಳಾಂ ಫುಟೊಂಕ್ ನಾಂತ್ ದೆಕುನ್ ತೆಂ ಸುಕೊನ್ ಗೆಲೆಂ. ಹೆರ್ ಥೊಡೆಂ ಕಾಂಟ್ಯಾ ಝಾಡಾಂ ಮಧೆಂ ಪಡ್ಲೆಲೆಂ ಆನಿ ಕಾಂಟ್ಯಾ ಝಾಡಾಂ ವಾಡ್ತಾನಾ ತಾಕಾ ತಾಣಿಂ ಚಿರ್ಡುನ್ ಮಾರ್ಲೆಂ. ಆನಿ ಹೆರ್ ಥೊಡೆಂ ಬರೆ ಸುವಾತೆರ್ ಪಡ್ಲೆಂ ಆನಿ ಥಂಯ್ ವಾಡೊನ್ ಫೊಳ್ ದಿಂವ್ಕ್ ಪಾವ್ಲೆಂ: ಥೊಡೆಂ ಶೆಂಭರ್ ವಾಂಟೆ, ಥೊಡೆಂ ಸಾಟ್ ಆನಿ ಥೊಡೆಂ ತೀಸ್. ತುಮ್ಕಾಂ ಕಾನ್ ಆಸಾತ್ ಜಾಲ್ಯಾರ್ ಆಯ್ಕಾ!”
ಉಪ್ರಾಂತ್ ಶಿಸ್ ಫುಡೆಂ ಯೇವ್ನ್ ಜೆಜುಲಾಗಿಂ ವಿಚಾರಿಲಾಗ್ಲೆ: “ತುಂ ತಾಂಚೆಲಾಗಿಂ ಒಪಾರಿಂನಿ ಕಿತ್ಯಾಕ್ ಉಲಯ್ತಾಯ್?” ತಾಣೆ ತಾಂಕಾಂ ಜಾಪ್ ದಿಲಿ: “ಕಿತ್ಯಾಕ್ ಮ್ಹಳ್ಯಾರ್, ಸರ್ಗಿಂಚ್ಯಾ ರಾಜ್ಯಾಚೆ ಗುಟ್ ಸಮ್ಜುಂಕ್ ತುಮ್ಕಾಂ ಫಾವೊ ಜಾಲಾಂ, ತಾಂಕಾಂ ಫಾವೊ ಜಾಂವ್ಕ್ ನಾ. ಜಾಚೆ ಲಾಗಿಂ ಆಸಾ, ತಾಕಾ ಭರೊನ್ ವೊಮ್ತಸರ್ ದಿತಲೆ ಆನಿ ಜಾಚೆ ಲಾಗಿಂ ಕಾಂಯ್ ನಾ, ತಾಚೆಂ ಆಸ್ಲಲೆಂ ಸಯ್ತ್ ಕಾಡ್ನ್ ವ್ಹರ್ತಲೆ. ದೆಕುನ್ ಹಾಂವ್ ತಾಂಚೆ ಲಾಗಿಂ ಒಪಾರಿಂನಿ ಉಲಯ್ತಾಂ: ಕಿತ್ಯಾಕ್ ತೆ ಪಳೆತಾತ್,ತರ್‌ಯೀ ತಾಂಕಾಂ ದಿಸನಾ; ಆನಿ ತೆ ಕಾನ್ ದಿತಾತ್,ತರ್‌ಯೀ ತಾಂಕಾಂ ಆಯ್ಕನಾ ವಾ ಸಮ್ಜನಾ. ಅಶೆಂ ತಾಂಚೆ ಥಂಯ್ ಸಿದ್ಧ್ ಜಾತಾ ಇಸಾಯಿಯಾಚೊ ಪ್ರವಾದ್:
‘ತುಮಿ ಪರ್ತ್ಯಾನ್ ಪರ್ತ್ಯಾನ್ ಕಾನ್ ದಿತಲ್ಯಾತ್,
ತರ್‌ಯೀ ತುಮ್ಕಾಂ ಸಮ್ಜೊಂಚೆಂನಾ,
ದೊಳೆ ಸೊಡ್ನ್ ಪಳೆತಲ್ಯಾತ್,
ತರ್‌ಯೀ ತುಮ್ಕಾಂ ದಿಸ್ಚೆಂನಾ.
ಕಾರಣ್, ಹೆ ಪರ್ಜೆಚೆಂ ಕಾಳಿಜ್ ದಾಡ್ಡೆಂ ಜಾಲಾಂ,
ತಾಂಚೆ ಕಾನ್ ಜಾಲ್ಯಾತ್ ದಾಟ್ ಆನಿ ದೊಳ್ಯಾಂಕ್ ಪಡ್ಲಾಂ ಧಾಂಪಣ್.
ನಾ ತರ್, ತಾಂಚ್ಯಾ ದೊಳ್ಯಾಂಕ್ ದಿಸ್ತೆಂ,
ತಾಂಚ್ಯಾ ಕಾನಾಂಕ್ ಆಯ್ಕತೆಂ, ತಾಂಚೇ ಮತಿಂಕ್ ಸಮ್ಜತೆಂ,
ಅಶೆಂ ಮ್ಹಜೇ ಥಂಯ್ ತೆ ಪಾಟಿಂ ಪರ್ತತೆ, ಆನಿ ಹಾಂವ್ ತಾಂಕಾಂ ಗೂಣ್ ಕರ್ತೊಂ.’
"ಪುಣ್ ಭಾಗಿ ದೀಷ್ಟ್ ಆಸ್ಲಲೆ ತುಮ್ಚೆ ದೊಳೆ, ಆಯ್ಕುಂಕ್ ಸಕತ್ ಆಸ್ಲಲೆ ತುಮ್ಚೆ ಕಾನ್! ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಸಬಾರ್ ಪ್ರವಾದಿ ಆನಿ ಭಾಗೆವಂತ್ ತುಮಿ ಪಳೆತಾತ್ ತೆಂ ಪಳೆಂವ್ಕ್ ಆಶೆಲ್ಲೆ, ಪುಣ್ ತಾಂಕಾಂ ಪಳೆಂವ್ಕ್ ಮೆಳ್ಳೆಂನಾ, ಆನಿ ತುಮಿ ಆಯ್ಕಾತಾತ್ ತೆಂ ಆಯ್ಕುಂಕ್ ಆಶೆಲ್ಲೆ, ಪುಣ್ ತಾಂಕಾಂ ತೆಂ ಆಯ್ಕುಂಕ್ ಮೆಳ್ಳೆಂನಾ. ತರ್, ಆಯ್ಕಾ ತುಮಿ, ಒಂಪ್ಪಿಯಾಚೆ ಒಪಾರಿಚೊ ವಿವರ್: ಜೊ ಕೊಣ್ ರಾಜ್ಯಾ ವಿಶ್ಯಾಂತ್ಲೆಂ ಉತರ್ ಆಯ್ಕತಾ, ಪುಣ್ ತೆಂ ಮತಿಂತ್ ವ್ಹರಿನಾ, ತೊ ಮೆರೆರ್ ಪಡ್ಲಲ್ಯಾ ಬಿಯಾ ಬರಿ. ದೆಂವ್ಚಾರ್ ಯೆತಾ ಆನಿ ತಾಚ್ಯಾ ಕಾಳ್ಜಾಂತ್ ಒಂಪ್ಲಾಂ ತೆಂ ಕಾಡ್ನ್ ವ್ಹರ್ತಾ. ಖಡ್ಪಿ ಸುವಾತೆರ್ ಪಡ್ಲಲೆಂ ಬಿಂ, ಉತಾರ್ ಆಯ್ಕಲ್ಲ್ಯಾಫರಾ ಸಂತೊಸಾನ್ ಘೆತಾ ತಾಕಾ ಸರಿ ಕರ್ಯೆತ್. ಪುಣ್ ತಾಚೆ ಥಂಯ್ ಪಾಳ್ ರೊಂಬನಾತ್‍ಲ್ಲೆ ವರ್ವಿಂ, ಥೊಡೊಚ್ ಕಾಳ್ ತೆಂ ಉರ್ತಾಂ; ಉತ್ರಾ ಪಾಸತ್ ಕಷ್ಟ್ ದಗ್ಧಣಿ ಉಠತ್ ಜಾಲ್ಯಾರ್, ತೊ ತೆಂ ಘಡಿಯೆನ್ ಸಾಂಡ್ತಾ. ಜೊ ಕೊಣ್ ಉತರ್ ಆಯ್ಕತಾ, ಪುಣ್ ಹ್ಯಾ ಸಂಸಾರಾಚ್ಯಾ ರಾಟಾವಳಿಂನಿ ಆನಿ ಧನಾಚೆ ಭುಲಿನ್ ತೆಂ ಚಿರ್ಡಿತಾ ಆನಿ ಫಳಾವಿಣ್ ಕರ್ತಾ, ತೊ ಕಾಂಟ್ಯಾ ಝಾಟ್ಕುಟಾಂ ಮಧೆಂ ಪಡ್ಲಲ್ಯಾ ಬಿಯಾ ಬರಿ. ಶೆಕಿಂ ಬರೆ ಸುವಾತೆರ್ ಪಡ್ಲಲೆಂ ಬೀಂ, ಉತಾರ್ ಆಯ್ಕುನ್ ಮತಿಂತ್ ವ್ಹರ್ತಲ್ಯಾಕ್ ಸರಿ ಕರ್ಯೆತ್. ತಸಲೊ ಫೊಳ್ ದಿತಾ, ಎಕ್ಲೊ ಶೆಂಭರ್, ಎಕ್ಲೊ ಸಾಟ್, ಆನ್ಯೆಕ್ಲೊ ತೀಸ್ ವಾಂಟ್ಯಾಂನಿ.”