📖 ಆಯ್ತಾರಾಚಿಂ ವಾಚ್ಪಾಂ

ಜಾಕಾರಿಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಪ್‌
ಸಿಯೊನಾಚೆ ಧುವೆ, ವ್ಹಡ್ ಉಲ್ಲಾಸ್ ಕರ್!
ಜೆರುಜಲೆಮಾಚೆ ಧುವೆ, ಸಂತೊಸಾನ್ ಬೋಬ್ ಮಾರ್!
ಪಳೆ, ತುಜೊ ರಾಯ್ ತುಜೆಶಿಂ ಯೆತಾ;
ತೊ ನಿತಿವಂತ್ ಆನಿ ಜಯ್ತೆವಂತ್,
ತೊ ಖಾಲ್ತೊ ಆನಿ ಗಾಢ್ವಾರ್ ಬಸುನ್ ಯೆತಾ,
ಗಾಡ್ವಾಚ್ಯಾ ಪೊರಾರ್,
ಗಾಡ್ವಾಚ್ಯಾ ತರುಣ್ ಪೊರಾರ್ ಬಸುನ್ ತೊ ಯೆತಾ.
ಎಫ್ರಯಿಮಾಚೆ ರಥ್
ಆನಿ ಜೆರುಸಾಲೆಮಾಚೆ ಘೊಡೆ
ತೊ ನಾಂಚ್ ಕರ್ತಲೊ;
ಝುಜಾಚೆಂ ಧೊಣು ತೊ ಮೊಡ್ತಲೊ
ಆನಿ ರಾಷ್ಟ್ರಾಂಕ್ ಶಾಂತಿ ಪರ್ಗಟ್ತಲೊ;
ತಾಚೆಂ ಸಾಮ್ರಾಜ್ಯ್ ದರ್ಯಾ ಥಾವ್ನ್ ದರ್ಯಾ ಪರ್ಯಾಂತ್,
ಆನಿ ಯುಫ್ರಾಟಿಸ್ ನ್ಹಂಯ್ ಥಾವ್ನ್ ಪೃಥ್ವೆಚ್ಯಾ ಶಿಮಾಂ ಪರ್ಯಾಂತ್ ಪಾವ್ತಲೆಂ.

ಶ್ಲೋಕ್: ದೆವಾ, ಮ್ಹಜ್ಯಾ ರಾಯಾ, ಹಾಂವ್ ತುಜಿ ಸ್ತುತಿ ಗಾತಾಂ,
ಸದಾಂಕಾಲ್ ತುಜ್ಯಾ ನಾಂವಾಚಿ ವ್ಹಡ್ವಿಕ್ ಗಾತಾಂ.

1. ಹಾಂವ್ ತುಕಾ ಮಹಿಮಾ ದಿತಾಂ, ದೆವಾ, ಮ್ಹಜ್ಯಾ ರಾಯಾ,
   ಸದಾಂಕಾಲ್ ತುಜೆಂ ನಾಂವ್ ಹಾಂವ್ ವಾಖಣ್ತಾಂ.
   ದಿಸಾನ್-ದೀಸ್ ತುಕಾ ಹಾಂವ್ ಧಿನ್ವಾಸ್ತಾಂ,
   ಆನಿ ಸಾಸ್ಣಾಕ್ ತುಜ್ಯಾ ನಾಂವಾಚಿ ಸ್ತುತಿ ಕರ್ತಾಂ.
2. ಸೊಮಿ, ದಯಾಳ್ ಆನಿ ಕಾಕುಳ್ತ್‌ದಾರ್‌,
   ಸೊಸ್ಣಿಕಾಯೆನ್ ಆನಿ ಪ್ರಿತಿ-ಮೊಗಾನ್ ಭರ್ಲಲೊ.
   ಸಮೆಸ್ತಾಂಕ್ ಸರ್ವೆಸ್ಪರ್ ಕಿತ್ಲೊ ಬರೊ!
   ಸಗ್ಳ್ಯೆ ಆಪ್ಲ್ಯೆ ರಚ್ನೆ ಥಂಯ್ ಕಣ್ವಾಳಾಯೆನ್ ಭರ್ಲಲೊ
3. ಸರ್ವೆಸ್ಪರಾ, ತುಂವೆಂ ರಚ್ಲಾಂಯ್ ತೆಂ ಸಗ್ಳೆಂ ತುಜಿಸ್ತುತಿ ಗಾತಲೆಂ,
   ತುಜೆ ಭಕ್ತ್ ತುಕಾ ಧಿನ್ವಾಸ್ತಲೆ;
   ತುಜ್ಯೆ ರಾಜ್ವಟ್ಕಾಯೆಚಿ ಮಹಿಮಾ ವಾಖಣ್ತಲೆ,
   ಆನಿ ತುಜಿಂ ವ್ಹಡ್ ವ್ಹಡ್ ಕೃತ್ಯಾಂ ತೆ ನಾಂವಾಡ್ತೆಲೆ.
4. ದಿಲ್ಲ್ಯಾ ಉತ್ರಾಕ್ ಸರ್ವೆಸ್ಪರ್ ಸದಾಂಚ್ ವಿಶ್ವಾಸಿ,
   ಸರ್ವ್ ಆಪ್ಲ್ಯಾ ಕರ್ನ್ಯಾಂನಿ ತೊ ಮೊಗಾಪಾತ್ರ್;‌
   ಸಕ್ಲಾ ಪಡ್ಲಲ್ಯಾಂಕ್ ಸರ್ವೆಸ್ಪರ್ ಹಾತ್ ದಿತಾ,
   ಬಾಗ್ವಲ್ಲ್ಯಾಂಕ್ ತೊ ನೀಟ್ ಉಬಿಂ ಕರ್ತಾ.

ಸಾಂ. ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ದೆವಾಚೊ ಪವಿತ್ರ್ ಅತ್ಮೊ ತುಮ್ಚೆ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ತುಮಿ ರಗ್ತಾಮಾಸಾಚೆ ಅಪೇಕ್ಷೆ ಪರ್ಮಾಣೆಂ ನ್ಹಯ್, ಬಗರ್ ಪವಿತ್ರ್ ಅತ್ಮ್ಯಾಚೆ ಖುಶೆ ಪರ್ಮಾಣೆ ಜಿಯೆತಾತ್; ಆನಿ ಜಾಚೆ ಥಂಯ್ ಕ್ರಿಸ್ತಾಚೊ ಅತ್ಮೊ ನಾ, ತೊ ಕ್ರಿಸ್ತಾಚೊ ನ್ಹಯ್.
ತಿತ್ಲೆಂಚ್ ನ್ಹಯ್, ಜೆಜುಕ್ ಮೆಲ್ಲ್ಯಾಂತ್ಲೊ ಉಠಯ್ಲಲ್ಯಾ ದೆವಾಚೊ ಅತ್ಮೊ ತುಮ್ಚೆ ಥಂಯ್ ಜಿಯೆತಾ ವ್ಹಯ್ ಜಾಲ್ಯಾರ್, ಜೆಜು ಕ್ರಿಸ್ತಾಕ್ ಮೆಲ್ಲ್ಯಾಂತ್ಲೊ ಉಠಯ್ಲಲೊ ದೇವ್ ತ್ಯಾಚ್ ಅತ್ಮ್ಯಾ ಉದೆಶಿಂ ತುಮ್ಚ್ಯೊ ವಿನಾಶಿ ಕುಡಿ ನವ್ಯಾ ಜಿವಾನ್ ಭರ್ತಲೊ.
ತರ್ ಭಾವಾಂನೋ, ಆಮಿ ಋಣಿ. ಪುಣ್ ರಗ್ತಾಮಾಸಾಚೆ ಅಪೇಕ್ಷೆಕ್ ಸರಿ ಜಾಲ್ಲ್ಯಾ ಜೀವನಾಚೆ ಋಣಿ ನ್ಹಯ್; ಕಿತ್ಯಾಕ್ ರಗ್ತಾಮಾಸಾ ಪರ್ಮಾಣೆ ಜಿಯೆಶಾತ್ ಜಾಲ್ಯಾರ್ ತುಮಿ ಮರ್ತಲ್ಯಾತ್. ಪುಣ್ ಅತ್ಮ್ಯಾ ವರ್ವಿಂ ತುಮ್ಚ್ಯಾ ರಗ್ತಾಮಾಸಾಚ್ಯಾ ಖೊಟ್ಯಾ ಕರ್ನ್ಯಾಂಚೊ ನಾಸ್ ಕರ್ಶಾತ್ ಜಾಲ್ಯಾರ್ ತುಮಿ ಜಿಯೆತಲ್ಯಾತ್.

ಸದೆಂವ್ ತುಂ, ಬಾಪಾ, ಸರ್ಗಾ-ಸಂಸಾರಾಚ್ಯಾ ಧನಿಯಾ,
ಕಿತ್ಯಾಕ್ ಸರ್ಗಿಂಚ್ಯಾ ರಾಜಾಚೆ ಘುಟ್ ಲ್ಹಾನಾಂಕ್ ತುವೆಂ ಉಗಡ್ಲ್ಯಾಯ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್‌ವಾರ್ತಾ
ತ್ಯಾ ವೆಳಿಂ ಜೆಜು ಮ್ಹಣಾಲೊ: “ಬಾಪಾ, ಸರ್ಗಾ ಸಂಸಾರಾಚ್ಯಾ ಧನಿಯಾ, ಜಾಣ್ತ್ಯಾಂ ಆನಿ ಬುದ್ವಂತಾಂ ಥಾವ್ನ್ ಲಿಪೊವ್ನ್ ದವರ್ ಲ್ಲ್ಯೊ ಹ್ಯೊ ಸಂಗ್ತಿ ಲ್ಹಾನಾಂಕ್ ತುವೆಂ ಉಗ್ಡಾಪ್ಯೊ ಕೆಲ್ಲೆ ಖಾತಿರ್ ಹಾಂವ್ ತುಕಾ ಅರ್ಗಾಂ ದಿತಾಂ. ವ್ಹಯ್ ಬಾಪಾ ತಶೆಂ ಕರುಂಕ್ ತುಕಾ ಬರೆಂ ದಿಸ್ಲೆಂ."
"ಮ್ಹಜ್ಯಾ ಬಾಪಾನ್ ಸರ್ವ್ ವಸ್ತು ಮ್ಹಜೆ ಆಧೀನ್ ದಿಲ್ಯಾತ್. ಪುಣ್ ಬಾಪಾ ಶಿವಾಯ್ ಪುತಾಕ್ ಕೊಣ್‍ಚ್ ಒಳ್ಕನಾ, ಆನಿ ಪುತಾ ಶಿವಾಯ್, ಆನಿ ಜಾಕಾ ಪುತಾನ್ ಉಗ್ಡಾಪೆಂ ಕರುಂಕ್ ಖುಶಿ ವ್ಹೆಲ್ಯಾ ತಾಚೆ ಶಿವಾಯ್, ಬಾಪಾಕ್‍ಯೀ ಕೊಣ್‍ಚ್ ಒಳ್ಕನಾ."
"ಯೆಯಾ ಮ್ಹಜೆ ಸರ್ಶಿಂ ಸಮೆಸ್ತ್ ತುಮಿ ಕಷ್ಟತಲ್ಯಾಂನೊ ಆನಿ ವಜನ್ ವ್ಹಾವಯ್ತಲ್ಯಾಂನೋ, ಆನಿ ಹಾಂವ್ ತುಮ್ಕಾಂ ವಿಶೆವ್ ದಿತಲೊಂ. ಮ್ಹಜೆಂ ಜೂಂ ತುಮ್ಚ್ಯಾ ಖಾಂದಾರ್ ಘೆಯಾ ಆನಿ ಮ್ಹಜೆ ಲಾಗ್ಚೆಂ ಶಿಕಾ, ಕಿತ್ಯಾಕ್ ಹಾಂವ್ ಭೊಳ್ಯಾ ಆನಿ ಖಾಲ್ತ್ಯಾ ಕಾಳ್ಜಾಚೊ; ಆನಿ ತುಮ್ಕಾಂ ಸಮಾಧಾನ್ ಮೆಳ್ತಲೆಂ. ಕಿತ್ಯಾಕ್ ಮ್ಹಜೆಂ ಜೂಂ ವ್ಹಾವೊಂವ್ಕ್ ಸುಲಭ್; ಮ್ಹಜೆಂ ವೊಜೆಂ ಹಳು.”