📖 ಆಯ್ತಾರಾಚಿಂ ವಾಚ್ಪಾಂ

ರಾಯಾಂಚ್ಯಾ ದುಸ್ರ್ಯಾ ಪುಸ್ತಾಕಾಂತ್ಲೆಂ ವಾಚಾಪ್
ಏಕ್ ದೀಸ್ ಎಲೀಶಾ ಶುನೆಮಾಕ್ ಆಯ್ಲೊ. ಥಂಯ್ ಏಕ್ ಗ್ರೇಸ್ತ್ ಸ್ತ್ರೀ ಜಿಯೆತಾಲಿ. ಆಪ್ಣಾಗೆರ್ ಜೆಂವ್ಕ್ ತಿಣೆ ತಾಕಾ ಆಗ್ರೊ ಕೆಲೊ. ಹ್ಯಾ ಉಪ್ರಾಂತ್ ಹರೇಕ್ ಪಾವ್ಟಿಂ ತೊ ತೆ ವಾಟೆನ್ ವೆತಾನಾ ಥಂಯ್ ಜೆಂವ್ಕ್ ರಾವ್ತಾಲೊ. ತಿಣೆಂ ಆಪ್ಲ್ಯಾ ಘೊವಾಕ್ ಮ್ಹಳೆಂ: “ಆಮ್ಚೆ ವಾಟೆನ್ ಕೆದ್ನಾಯೀ ಯೆವ್ನ್ ವಚುನ್ ಆಸಾ ತೊ ಮನಿಸ್ ಏಕ್ ಭಾಗೆವಂತ್ ಮನಿಸ್ ಮ್ಹಣ್ ಹಾಂವ್ ಖರೆಂಚ್ ಜಾಣಾಂ. ದೆಕುನ್ ಆಮಿ ತಾಚೆ ಪಾಸತ್ ಮಾಳಯೆರ್ ಏಕ್ ಕೂಡ್ ತಯಾರ್ ಕರುಂಯಾ ಆನಿ ತಾಂತುಂ ಏಕ್ ಖಾಟ್, ಏಕ್ ಮೇಜ್, ಏಕ್ ಕದೆಲ್ ಆನಿ ಏಕ್ ದಿವೊ ದವರುಂಯಾ. ತೊ ಆಮ್ಗೆರ್ ಯೆತಾ ತೆದ್ನಾ ತಾಣೆ ಥಂಯ್ ರಾವುಂಯೆತ್.” ಏಕ್ ದೀಸ್ ತೊ ಥಂಯ್ ಆಯ್ಲೊ ಆನಿ ವಯ್ಲ್ಯಾ ಕುಡಾಂತ್ ನಿದುಂಕ್ ಗೆಲೊ.
ಎಲೀಶಾನ್ ಫುಡೆಂ ಉಲೊವ್ನ್ ವಿಚಾರ್ಲೆಂ: “ತಿಚೆ ಪಾಸತ್ ಕಿತೆಂ ಕರುಂಯೆತ್?” ಗೆಹಾಜಿನ್ ಜಾಪ್ ದಿಲಿ: “ತಿಕಾ ಕೋಣ್‍ಚ್ ಪೂತ್ ನಾ, ಆನಿ ತಿಚೊ ಪತಿ ಮ್ಹಾತಾರೊ ಜಾಲಾ.” ಎಲೀಶಾನ್ ಮ್ಹಳೆಂ: “ತಿಕಾ ಆಪಯ್.” ತಾಣೆಂ ತಿಕಾ ಆಪಯ್ಲಿ ಆನಿ ತಿ ಯೆವ್ನ್ ದಾರಾಕಡೆ ಉಬಿ ರಾವ್ಲಿ. ಎಲೀಶಾನ್ ತಿಕಾ ಬಾಸಾಯ್ಲೆಂ: “ಫುಡ್ಲ್ಯಾ ವರ್ಸಾ ಹ್ಯಾಚ್ ವೆಳಾರ್ ತುಂ ಎಕಾ ಪುತಾಕ್ ವೆಂಗೆಂತ್ ಧರ್ತಲಿಯ್.” ತಿಣೆಂ ಜಾಪ್‌ ದಿಲಿ:"ನಾ, ಮ್ಹಜ್ಯಾ ಧನಿಯಾ! ತುಂ ಏಕ್‌ ದೆವಾಚೊ ಮನಿಸ್;‌ ತುಜೆ ಚಾಕಾರ್ನಿಕ್‌ ಫಸಯ್ನಾಕಾ."

ಶ್ಲೋಕ್: ತುಜಿ ದಯಾ, ಸರ್ವೆಸ್ಪರಾ, ಸದಾಂಕಾಲ್‌ ಗಾಯನಾಂನಿ ವಾಖಣ್ತಲೊಂ.

1. ತುಜಿ ದಯಾ, ಸರ್ವೇಸ್ಪರಾ, ಸದಾಂಕಾಲ್‌ ವಾಖಾಣ್ತಲೊಂ,
   ಸಂತತೆಚ್ಯೆ ಸಂತತೆಕ್ ತುಜೆಂ ವಿಶ್ವಾಸೀಪಣ್ ಪರ್ಗಟ್ತಲೊಂ.
   ತುಜೊ ಮೋಗ್ ಸಾಸ್ಣಾಕ್ ಬಾಳ್ತಾ ತಸೊ ಥಿರ್ ಕೆಲಾಯ್ ಮ್ಹಣ್ ಹಾಂವ್ ಜಾಣಾಂ,
   ತುಜ್ಯಾ ವಿಶ್ವಾಸೀಪಣಾಚಿ ಬುನ್ಯಾದ್ ಸರ್ಗಾರ್ ತುಂವೆಂ ಘಾಲ್ನ್ ದವರ್ಲ್ಯಾಯ್.
2. ಉತ್ಸವಾಚ್ಯೊ ಬೊಬೊ ಮಾರ್ನ್ ಅನ್ಭೊಗ್ ಆಸ್ಲಲಿ ಪರ್ಜಾ ಖರಿಚ್ ಭಾಗಿ!
   ತುಜ್ಯಾ ಮುಖಮಳಾಚ್ಯಾ ಉಜ್ವಾಡಾಂತ್ ತಿ ಚಲ್ತಾ, ಸರ್ವೆಸ್ಪರಾ.
   ಸದಾಂಚ್ ತುಜ್ಯಾ ನಾಂವಾ ಥಂಯ್ ತಿ ಅನಂದ್ ಭೊಗ್ತಾ,
   ತುಜ್ಯಾ ನಿತಿವಂತ್ಪಣಾಂತ್ ವಸ್ತಲೆಂ ತಾಂಚೆಂ ಸುಭಾಮ್‌ಪಣ್.
3. ತುಂಚ್ ತಾಂಚಿ ವ್ಹಡ್ವಿಕ್, ತುಂಚ್ ತಾಂಚೆಂ ಬಳ್
   ತುಜ್ಯೆಚ್ ದಯೆನ್ ಉಕಲ್ನ್ ಧರ್ತಾಂವ್ ಆಮ್ಚ್ಯಾ ಜಯ್ತಾಚೆಂ ಕೊಂಬ್
   ಖರೆಂಚ್, ಸರ್ವೆಸ್ಪರಾ ಆಮ್ಚ್ಯಾ ರಕ್ಷಣಾಚೆಂ ಢಾಲ್,
   ಇಸ್ರಾಯೆಲಾಚೊ ಪವಿತ್ರ್ ದೇವ್ ಖರೊಚ್ ಆಮ್ಚೊ ರಾಜಾ.

ಸಾಂ.ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಕ್ರಿಸ್ತಾ ಜೆಜುಚ್ಯಾ ಎಕ್ವಟಾಂತ್ ಮೆಳ್ಚೆಖಾತಿರ್ ಆಮಿ ಪವಿತ್ರ್ ಸ್ನಾನ್ ಘೆತ್ಲೆಂ ತವಳ್ ತಾಚ್ಯಾ ಮೊರ್ನಾಂತ್‍ಯೀ ಎಕ್ವಟ್ ಜಾಂವ್ಚೆ ಖಾತಿರ್ ಆಮಿ ಸ್ನಾನ್ ಘೆತ್ಲೆಂ - ಹೆಂ ತುಮಿ ನೆಣಾಂತ್? ತಶೆಂ ಆಸ್ತಾಂ ಬಾಪಾಚೆ ಮಹಿಮೆಭರಿತ್ ಸಕ್ತೆನ್ ಕ್ರಿಸ್ತಾಕ್ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲೊ ತೇಚ್‍ಪರಿಂ ಆಮಿಯೀ ನವ್ಯಾ ಜಿವಿತಾಂತ್ ಚಲ್ಚೆ ಖಾತಿರ್ ಆಮ್ಚ್ಯಾ ಪವಿತ್ರ್‌ಸ್ನಾನಾ ಮಾರಿಫತ್ ಆಮ್ಕಾಂ ಕ್ರಿಸ್ತಾ ಸವೆಂ ನಿಕೆಪಿಲ್ಯಾಂತ್ ಆನಿ ತಾಚ್ಯಾ ಮೊರ್ನಾಂತ್ ವಾಂಟೆಲಿ ಕೆಲ್ಯಾಂತ್. ಆಮಿ ಕ್ರಿಸ್ತಾ ಸಾಂಗಾತಾ ಮೆಲ್ಯಾಂವ್ ಜಾಲ್ಯಾರ್, ತಶೆಚ್ ಕ್ರಿಸ್ತಾ ಸವೆಂ ಜಿಯೆಂವ್ಕ್‍ಯೀ ಪಾವ್ತಲ್ಯಾಂವ್ ಮ್ಹಣ್ ಆಮಿ ಸತ್ಮಾನ್ತಾಂವ್. ಕ್ರೀಸ್ತ್ ಮೆಲ್ಲ್ಯಾಂತ್ಲೊ ಜಿವಂತ್ ಜಾಲಾ, ತೊ ಪರ್ತ್ಯಾನ್ ಮೊರನಾ ಮ್ಹಣ್ ಆಮಿ ಜಾಣಾಂವ್; ಮೊರ್ನಾಕ್ ತಾಚೆ ವಯ್ರ್ ಹ್ಯಾ ಫುಡಾಂ ಕಸಲಿಚ್ ಪದ್ವಿ ನಾ. ತೊ ಮೆಲ್ಲ್ಯಾನ್ ತಾಚೆರ್ ಪಾತ್ಕಾಕ್ ಕಸಲೊಚ್ ಅಧಿಕಾರ್ ನಾ - ಆನಿ ತೊ ಎಕ್‍ಚ್ ಪಾವ್ಟಿಂ ಮೆಲೊ; ಆನಿ ಆತಾಂ ಆಪ್ಲಿ ಜಿಣಿ ತೊ ದೆವಾ ಪಾಸತ್ ಜಿಯೆತಾ. ತಶೆಂಚ್ ತುಮಿಯೀ ಪಾತ್ಕಾಕ್ ಮೆಲ್ಯಾತ್ ಆನಿ ಕ್ರಿಸ್ತಾ ಜೆಜುಚ್ಯಾ ಎಕ್ವಟಾಂತ್ ದೆವಾ ಖಾತಿರ್ ಜಿಯೆತಾತ್ ಮ್ಹಣ್ ಸಮ್ಜುನ್ ಘೆಯಾ.

ವಿಂಚುನ್ ಕಾಡ್ಲೆಲಿ ಪರ್ಜಾ ತುಮಿ,
ರಾಯಾಳ್ ಯಾಜಕ್ ವರ್ಗ್, ಏಕ್ ಪವಿತ್ರ್ ರಾಷ್ಟ್ರ್,
ಕಾಳೊಕಾ ಥಾವ್ನ್ ಆಪ್ಲ್ಯಾ ವಿಚಿತ್ರ್ ಉಜ್ವಾಡಾಕ್
ತುಮ್ಕಾಂ ಆಪಯ್ಲಲ್ಯಾ ದೆವಾಚಿಂ
ಉತ್ತೀಮ್ ಕೃತ್ಯಾಂ ತುಮಿ ಗಾಜಾಯಾ.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್-ವಾರ್ತಾ
ತ್ಯಾ ವೆಳಿಂ ಜೆಜು ಆಪ್ಲ್ಯಾ ಬಾರಾ ಜಣಾಂಕ್‌ ಮ್ಹಣಾಲೊ: “ಮ್ಹಜೆ ವರ್ನ್ ಚಡ್ ಆಪ್ಲ್ಯಾ ಬಾಪಾಯ್ಚೊ ವಾ ಆವಯ್ಚೊ ಮೋಗ್ ಕರ್ತಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್; ಮ್ಹಜೆ ವರ್ನ್ ಚಡ್ ಆಪ್ಲ್ಯಾ ಪುತಾಚೊ ವಾ ಧುವೆಚೊ ಮೋಗ್ ಕರ್ತಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್. ಆಪ್ಲೊ ಖುರಿಸ್ ಘೆವ್ನ್ ಮ್ಹಜ್ಯಾ ಮೆಟಾಂನಿ ಚಲನಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್. ಆಪ್ಲೊ ಜೀವ್ ವಾಂಚೊಂವ್ಕ್ ಸೊಧ್ತಾ ತೊ ಆಪ್ಲೊ ಜೀವ್ ಹೊಗ್ಡಾಯ್ತಾ;ಆನಿ ಮ್ಹಜೆ ಪಾಸತ್ ಆಪ್ಲೊ ಜೀವ್ ಹೊಗ್ಡಾಯ್ತಾ ತೊ ಆಪ್ಲೊ ಜೀವ್ ವಾಟಾಯ್ತಾ.
ತುಮ್ಕಾಂ ಸ್ವಾಗತ್ ದಿತಾ ತೊ ಮ್ಹಾಕಾ ಸ್ವಾಗತ್ ದಿತಾ, ಆನಿ ಮ್ಹಾಕಾ ಸ್ವಾಗತ್ ದಿತಾ ತೊ ಮ್ಹಾಕಾ ಧಾಡ್ಲಲ್ಯಾಕ್ ಸ್ವಾಗತ್ ದಿತಾ. ಪ್ರವಾದ್ಯಾಕ್, ತೊ ಪ್ರವಾದಿ ದೆಕುನ್ ಸ್ವಾಗತ್ ದಿತಾ ತಾಕಾ, ಪ್ರವಾದ್ಯಾಚೊ ಪ್ರತಿಫಳ್ ಮೆಳ್ತಲೊ; ಆನಿ ನಿತಿವಂತಾಕ್, ತೊ ನಿತಿವಂತ್ ದೆಕುನ್ ಸ್ವಾಗತ್ ದಿತಾ ತಾಕಾ, ನಿತಿವಂತಾಚೊ ಪ್ರತಿಫಳ್ ಲಾಭ್ತಲೊ. ಆನಿ ಜೊ ಕೊಣ್ ಮ್ಹಜ್ಯಾ ಅತೀ ಲ್ಹಾನಾಂತ್ಲ್ಯಾ ಎಕ್ಲ್ಯಾಕ್, ತೊ ಮ್ಹಜೊ ಪಾಟ್ಲಾವ್ದಾರ್ ದೆಕುನ್, ಏಕ್ ಕೊಪ್ ಶೆಳೆಂ ಉದಕ್ ಲೆಗುನ್ ದಿತಾ, ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ, ತಾಚೊ ಪ್ರತಿಫಳ್ ತಾಕಾ ಚುಕಾಸೊನಾ."