📖 ಆಯ್ತಾರಾಚಿಂ ವಾಚ್ಪಾಂ

ಜೆರೆಮಿಯಾ ಪ್ರವಾದ್ಯಾಚ್ಯಾ ಪುಸ್ತಾಕಾಂತ್ಲೆಂ ವಾಚಪ್
ಕಿತ್ಯಾಕ್ ಜಾಯ್ತೆ ಜಣ್ ಅಶೆಂ ಪುಸ್ಪುಸ್ತಾತ್ ತೆಂ ಮ್ಹಾಕಾ ಆಯ್ಕಾತಾ:
"ಸಗ್ಳ್ಯಾ ವಾಟಾಂನಿ ಆಕಾಂತ್!
ತಾಕಾ ಗುನ್ಯಾಂವ್ಕಾರ್ ಕರಾ!
ತಾಕಾ ಗುನ್ಯಾಂವ್ಕಾರ್ ಕರುಂಯಾ!
ಸಗ್ಳೆ ಮ್ಹಜೆ ಲಾಗ್ಶಿಲೆ ಈಷ್ಟ್
ಹಾಂವ್ ಕೆದ್ನಾ ಆದ್ಳೊನ್ ಪಡನ್‍ಗಾಯ್
ಮ್ಹಣ್ ಪಳೆಂವ್ಕ್ ಆಯ್ತೆ ರಾವ್ಲ್ಯಾತ್.
ತೆ ಮ್ಹಣ್ತಾತ್: ಘಡ್ಯೆ ತೊ ಭುಲೊನ್ ಪಾಸಾಂತ್ ಪಡ್ತಲೊ,
ಆಮಿ ತಾಚೆರ್ ಜಯ್ತ್ ವ್ಹರ್ತಲ್ಯಾಂವ್
ಆನಿ ತಾಚೆಂ ಫಾರಿಕ್ಪಣ್ ಘೆತಲ್ಯಾಂವ್."
ಪೂಣ್ ಎಕಾ ಬಳ್ವಂತ್ ವೀರಾ ಸಾರ್ಕೊ
ಸರ್ವೆಸ್ಪರ್ ಮ್ಹಜೆ ಸವೆಂ ಆಸಾ;
ದೆಕುನ್ ಮ್ಹಜೆ ದುಸ್ಮಾನ್ ಆದ್ಳೊನ್ ಪಡ್ತಲೆ,
ಆನಿ ತೆ ಮ್ಹಜೆರ್ ಜಯ್ತ್ ವ್ಹರ್ಚೆ ನಾಂತ್;
ತೆ ಲಜೆನ್ ಭರ್ತಲೆ,
ಕಿತ್ಯಾಕ್ ತೆ ಸುಫಳ್ ಜಾಂವ್ಚೆ ನಾಂತ್;
ತಾಂಚಿ ಸಾಸ್ಣಿಕ್ ಲಜ್ ಕೆದಿಂಚ್ ವಿಸ್ರೊನ್ ವೆಚಿ ನಾ.
ದಳ್ಬಾರಾಂಚ್ಯಾ ಸರ್ವೆಸ್ಪರಾ,
ತುಂ ನಿತಿವಂತಾಂಚಿ ತಪಾಸ್ಣಿ ಕರ್ತಾಯ್,
ಕಾಳ್ಜಾಂ ಮನಾಂ ತುಂ ಪಾರ್ಕಿತಾಯ್,
ತುಂ ತಾಂಚೆ ಕಡ್ಚೆಂ ಘೆತಲೊಯ್ ತೆಂ ಫಾರಿಕ್ಪಣ್
ಮ್ಹಾಕಾ ಪಳೆಂವ್ಕ್ ದಿ,
ಕಿತ್ಯಾಕ್ ಮ್ಹಜೊ ತಕ್ರಾರ್
ಹಾಂವೆಂ ತುಜ್ಯಾ ಹಾತಾಂತ್ ಸೊಡ್ಲಾ.
ಸರ್ವೆಸ್ಪರಾಕ್ ಗಾಯನ್ ಕರಾ,
ಸರ್ವೆಸ್ಪರಾಚಿ ಸ್ತುತಿ ಕರಾ,
ಕಿತ್ಯಾಕ್ ತಾಣೆಂ ದುಬ್ಳ್ಯಾಚೊ ಅತ್ಮೊ
ನಷ್ಟ್ಯಾಂಚ್ಯಾ ಹಾತಾಂತ್ಲೊ ನಿವಾರ್ಲಾ.

ಶ್ಲೋಕ್: ತುಜ್ಯೆ ಉದಂಡ್ ದಯೆನ್ ಮ್ಹಾಕಾ ತುಂ ಆಯ್ಕ್,ಸರ್ವೆಸ್ಪರಾ.

1. ತುಜ್ಯೆ ಪಾಸತ್, ದೆವಾ, ಹಿ ನಿಂದಾ ಹಾಂವ್ ಸೊಸ್ತಾಂ,
   ತುಜ್ಯೆಚ್ ಪಾಸತ್ ಹಿ ಲಜ್ ಹಾಂವ್ ಭೊಗ್ತಾಂ.
   ಹಾಂವ್ ಜಾಲಾಂ ಮ್ಹಜ್ಯಾ ಭಾವಾ-ಭಯ್ಣಿಂಕ್ ಪರ್ಕಿ;
   ಮ್ಹಜ್ಯಾ ದಾಯ್ಜಾಂ-ಗೊತ್ರಾಂಕ್ ಪರ್ದೆಶಿ.
   ತುಜ್ಯಾ ಘರಾಚೊ ಮಾನ್ ರಾಕ್ಚೆ ಖಾತಿರ್ ಲಾಸ್ತಾ ಮ್ಹಜೆಂ ಕಾಳಿಜ್,
   ತುಕಾ ಖೆಂಡ್ತಲ್ಯಾಂಚ್ಯೊ ಖೆಬ್ಡಾಯೋ ಮ್ಹಜೆರ್ ಪಡತ್ತ್ ಆಸಾತ್.
2. ವೆಗಿಂಚ್ ಮ್ಹಾಕಾ ಪ್ರಸನ್ನ್ ಜಾ ಮ್ಹಣುನ್‌
   ತುಜ್ಯೆ ಲಾಗಿಂ ಪ್ರಾರ್ಥುನ್ ಮಾಗ್ತಾಂ, ಸರ್ವೆಸ್ಪರಾ
   ತುಜ್ಯೆ ವರ್ತೆ ದಯೆನ್ ಮ್ಹಾಕಾ ಆಯ್ಕ್, ದೆವಾ,
   ವಿಶ್ವಾಸೀ ಧನಿಯಾ, ಪಾವ್ ಮ್ಹಾಕಾ.
   ತುಂ, ಸರ್ವೆಸ್ಪರಾ, ಮೊಗಾಳ್-ದಯಾಳ್ ಕಾಳ್ಜಾಚೊ,
   ತರ್ ಮ್ಹಾಕಾ ಜಾಪ್ ದೀ.
   ತುಜ್ಯೆ ಅಪಾರ್ ಕಾಕುಳ್ತಿನ್ ಮ್ಹಜೆರ್ ದೀಷ್ಟ್ ಘಾಲ್‌.
3. ಹೆಂ ಪಳೆವ್ನ್ ದುಬ್ಳಿಂ-ಧಾಕ್ಟಿಂ ಸಂತೊಸ್ತೆಲಿಂ,
   ದೇವ್ ದರ್ಶನ್ ಆಶೆತೆಲ್ಯಾಂಚಿಂ ಕಾಳ್ಜಾಂ ನವ್ಯಾ ಹುರುಪಾನ್ ಭರ್ತೆಲಿಂ;
   ಕಿತ್ಯಾಕ್ ಸರ್ವೆಸ್ಪರ್ ದುಬ್ಳ್ಯಾ-ಧಾಕ್ಟ್ಯಾಂಚಿಂ ಮಾಗ್ಣಿಂ ಆಯ್ಕಾತಾ,
   ಖೊಡ್ಯಾರ್ ಆಸ್ಲಲ್ಯಾ ಆಪ್ಲ್ಯಾಚಿ ತೊ ಬೆಪರ್ವಾ ಕರಿನಾ.
   ಸರ್ಗ್ ಆನಿ ಪೃಥ್ವಿ ತಾಕಾ ವಾಖಣುಂ,
   ದರ್ಯೊ ಆನಿ ತಾಂತ್ಲ್ಯೊ ಜಿವಿ ತಾಚಿ ಸ್ತುತಿ ಕರುಂ.

ಸಾಂ ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಪಳೆಯಾ ತರ್‌: ಏಕ್ ಮನ್ಶಾ ವರ್ವಿಂ ಸಂಸಾರಾಂತ್ ಪಾತಕ್ ಭಿತರ್ ಸರ್ಲೆಂ ಆನಿ ತ್ಯಾ ಪಾತ್ಕಾ ಬರಾಬರ್ ಮೊರ್ನ್‍ಯೀ ಆಯ್ಲೆಂ. ಅಶೆಂ ಸರ್ವ್ ಮನ್ಶಾಂನಿ ಪಾತಕ್ ಆಧಾರ್ಲೆಂ ಜಾಲ್ಲ್ಯಾನ್, ಮೊರ್ನ್ ಸಗ್ಳ್ಯಾ ಮನ್ಶಾಕುಳಾಚೆರ್ ವಿಸ್ತಾರ್ಲೆಂ. ನಿಯಮ್‍ಶಾಸ್ತ್ರ್ ನಾತ್‍ಲ್ಲೆ ವರ್ವಿಂ ಕಾಯ್ದ್ಯಾ ವಿರೋಧ್ ಪಾತಕ್ ಜಾಲೆಂ ಮ್ಹಣ್ ಅಪ್ರಾಧ್ ಲೆಖುಂಕ್ ಜಾಯ್ನಾತ್ಲೆಂ. ಆದಾಂವ್ಚ್ಯಾ ಕಾಳಾ ಥಾವ್ನ್ ಮೊಯ್ಜೆಚ್ಯಾ ಕಾಳಾ ಪರ್ಯಾನ್ ಮೊರ್ನಾನ್ ಆಪ್ಲಿ ರಾಜ್ವಟ್ಕಿ ಚಲಯ್ಲಿ. ಆದಾಂವ್‍ಬರಿ ದೆವಾಚೆಂ ಸ್ವಷ್ಟ್ ಫರ್ಮಾಣ್ ಮೋಡ್ನ್ ಪಾತಕ್ ಆಧಾರಿನಾತ್ಲಲ್ಯಾಂಚೆರ್ ಸಯ್ತ್ ಮೊರ್ನಾನ್ ಆಪ್ಲೊ ಅಧಿಕಾರ್ ಚಲಯ್ಲೊ. ಪುಣ್ ಹೊ ಆದಾಂವ್ ಉಪ್ರಾಂತ್ ಯೆಂವ್ಚೊ ಆಸ್ಲಲ್ಯಾಚೊ ಏಕ್ ರುಪ್ಕಾರ್ ಮ್ಹಣ್ಯೆತ್.
ಪುಣ್ ದೆವಾಚ್ಯಾ ಧರ್ಮಾರ್ಥ್ ದೆಣ್ಯಾ ಆನಿ ಆದಾಂವ್ಚ್ಯಾ ಪಾತ್ಕಾ ಮಧೆಂ ಕಸಲಿಚ್ ಸರ್ ನಾ. ಏಕ್ ಮನ್ಶಾಚ್ಯಾ ಪಾತ್ಕಾವರ್ವಿಂ ಸಮೆಸ್ತ್ ಮೆಲೆ ವ್ಹಯ್, ಹಾಚ್ಯಾ ಪರಿಣಾಮಾ ಪ್ರಾಸ್, ದೆವಾಚಿಂ ಕುರ್ಪೆದೆಣಿಂ ಆನಿ ತ್ಯಾ ಬರಾಬರ್ ಏಕ್ ಮನ್ಶಾಚೆ, ಮ್ಹಣ್ಜೆ ಜೆಜು ಕ್ರಿಸ್ತಾಚೆ ಕುರ್ಪೆ ಉದೆಶಿಂ ಮನ್ಶಾಕ್ ಮೆಳ್ಳಲಿಂ ದೆಣಿಂ ಅನಿಕ್‍ಯೀ ಚಡ್ ವರ್ತಿಂ ಮ್ಹಣ್ಯೆತ್.

ಸತಾಚೊ ತೊ ಅತ್ಮೊ ಮ್ಹಜೆ ವಿಶಿಂ ಸಾಕ್ಸ್ ದಿತೊಲೊ, ಮ್ಹಣ್ತಾ ಸೊಮಿ.
ಆನಿ ತುಮಿಂಯ್ ಮ್ಹಜೆವಿಶಿಂ ಸಾಕ್ಸ್ ದಿತೆಲ್ಯಾತ್.

ಮಾತೆವಾ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್-ವಾರ್ತಾ
ತ್ಯಾ ವೆಳಿಂ ಜೆಜುನ್‌ ಆಪ್ಲ್ಯಾ ಬಾರಾ ಜಣಾಂ ಶಿಸಾಂಕ್‌ ಮ್ಹಳೆಂ:“ ಮನ್ಶಾಂಕ್ ಭಿಯೆನಾಕಾತ್. ಧಾಂಪುನ್ ಆಸಾ ತೆಂ ಸಕ್ಕಡ್ ಉಗ್ತೆಂ ಜಾತಲೆಂ ಆನಿ ಗುಪಿತ್ ಆಸಾ ತೆಂ ಸಕ್ಕಡ್ ಪರ್ಗಟ್ ಜಾತಲೆಂ. ಹಾಂವ್ ತುಮ್ಕಾಂ ಕಿತೆಂ ಕಾಳೊಕಾಂತ್ ಸಾಂಗ್ತಾಂ ತೆಂ ತುಮಿ ಉಜ್ವಾಡಾಂತ್ ಸಾಂಗಾ, ಆನಿ ತುಮ್ಕಾಂ ಗುಟಾನ್ ಸಾಂಗ್ಲಾಂ ತೆಂ ತುಮಿ ಪಾಕ್ಯಾರ್ ಥಾವ್ನ್ ಗಾಜಯಾ. ಕುಡಿಚೊ ಜೀವ್ ಕಾಡ್ತಲ್ಯಾಂಕ್ ಭಿಯೆನಾಕಾತ್, ಕಿತ್ಯಾಕ್ ತೆ ಅತ್ಮ್ಯಾಚೊ ಜೀವ್ ಕಾಡುಂಕ್ ಸಕ್ಚೆನಾಂತ್. ಬಗರ್ ಕೂಡ್ ಆನಿ ಅತ್ಮೊ ದೊನ್‍ಯೀ ಯಮ್ಕೊಂಡಾಂತ್ ನಾಸ್ ಕರುಂಕ್ ಸಕ್ತಲ್ಯಾಕ್ ಭಿಯೆಯಾ. ಗಿರ್ಬುಜ್ಯೊ ಪೈಶಾಕ್ ದೋನ್ ವಿಕ್ತಾತ್ ನ್ಹಯ್? ತರಿಪುಣ್ ತಾಂಚೆ ಭಿತರ್ ಎಕ್‍ಚ್ ಏಕ್ ತುಮ್ಚ್ಯಾ ಬಾಪಾಚೆ ಕಬ್ಲಾತೆವಿಣೆ ಭುಂಯ್ ಪಡನಾ. ತಿತ್ಲೆಂಚ್‍ವೇ? ತುಮ್ಚ್ಯಾ ಮಾತ್ಯಾಚೆ ಕೇಸ್ ಲೆಗುನ್ ಸಕ್ಕಡ್ ಮೆಜುನ್ ದವರ್ಲ್ಯಾತ್. ದೆಕುನ್ ತುಮಿ ಭಿಯೆನಾಕಾತ್; ಜಾಯ್ತ್ಯಾ ಗಿರ್ಬುಜ್ಯಾಂ ಪ್ರಾಸ್ ಕಿತ್ಲ್ಯಾಕ್‍ಯೀ ಚಡ್ ಮೊಲಾಚೆ ತುಮಿ!"
"ದೆಕುನ್ ಮನ್ಶಾಂ ಹುಜಿರ್ ಜೊ ಕೊಣ್ ಆಪುಣ್ ಮ್ಹಜೊ ಪಾಟ್ಲಾವ್ದಾರ್ ಮ್ಹಣುನ್ ಪರ್ಗಟ್ತಾ, ತಾಕಾ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾ ಹುಜಿರ್ ಮ್ಹಜೊ ಮ್ಹಣುನ್ ಹಾಂವ್ ಪರ್ಗಟ್ತಲೊಂ. ಪುಣ್ ಮನ್ಶಾಂ ಹುಜಿರ್ ಜೊ ಕೊಣ್ ಮ್ಹಾಕಾ ನಾಕಾರ್ತಾ, ತಾಕಾ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾ ಹುಜಿರ್ ಹಾಂವ್‍ಯೀ ನಾಕಾರ್ತಲೊಂ.”