📖 ಆಯ್ತಾರಾಚಿಂ ವಾಚ್ಪಾಂ

ನಿರ್ಗಮನ್‌ ಪುಸ್ತಕಾಂತ್ಲೆಂ ವಾಚಪ್
ರೆಫಿದಿಮಾ ಥಾವ್ನ್ ಭಾಯ್ರ್ ಸರುನ್ ಸಿನಾಯ್ಚ್ಯಾ ಅರಣ್ಯಾಂತ್ ಇಸ್ರಾಯೆಲ್‌ ಪರ್ಜಾ ಆಯ್ಲಿಂ ಆನಿ ಥಂಯ್ ತಾಂಣಿಂ ಪರ್ವತಾ ಮುಕಾರ್ ತಂಬು ಮಾರ್ಲೊ. ಮೊಯ್ಜೆ ಪರ್ವತಾ ವಯ್ರ್ ದೆವಾ ಸರ್ಶಿಂ ಗೆಲೊ ಆನಿ ಪರ್ವತಾ ಥಾವ್ನ್ ಸರ್ವೆಸ್ಪರಾನ್ ತಾಕಾ ಉಲೊ ಮಾರುನ್ ಮ್ಹಳೆಂ: “ತುವೆಂ ಹೆಂ ಜಾಕೊಬಾಚ್ಯಾ ಘರಾಣ್ಯಾಕ್ ಸಾಂಗುಂಕ್ ಜಾಯ್ ಆನಿ ಇಸ್ರಾಯೆಲಿತಾಂಕ್ ಪರ್ಗಟ್ ಕರುಂಕ್ ಜಾಯ್: ‘ಹಾಂವೆಂ ಎಜಿಪ್ತಾಕ್ ಕಿತೆಂ ಕೆಲೆಂ ಆನಿ ತುಮ್ಕಾಂ ಕಶೆಂ ಗರುಡಾಚ್ಯಾ ಪಾಕಾಟ್ಯಾಂ ವಯ್ರ್ ಬಸೊವ್ನ್ ಮ್ಹಜೆಶಿಂ ಹಾಡ್ಲಿಂ ಮ್ಹಣ್ ತುಮಿ ತುಮ್ಚ್ಯಾಚ್ ದೊಳ್ಯಾಂನಿ ದೆಕ್ಲಾಂ. ದೆಕುನ್ ಆತಾಂ ತುಮಿ ಮ್ಹಜೊ ತಾಳೊ ಆಯ್ಕಶಾತ್ ಜಾಲ್ಯಾರ್ ಆನಿ ಮ್ಹಜೊ ಸೊಲ್ಲೊ ಪಾಳ್ಶಾತ್ ಜಾಲ್ಯಾರ್, ತುಮಿ ಸರ್ವ್ ಲೊಕಾಂ ಮಧೆಂ ಮ್ಹಜಿ ಆಸ್ತ್ ಜಾತಲ್ಯಾತ್, ಕಿತ್ಯಾಕ್ ಸಗ್ಳಿ ಪೃಥ್ವಿ ಮ್ಹಜಿ! ತುಮಿ ಮ್ಹಾಕಾ ಏಕ್ ಯಾಜಕಾಂಚೆಂ ರಾಜ್ಯ್ ಆನಿ ಪವಿತ್ರ್ ರಾಷ್ಟ್ರ್ ಜಾತಲ್ಯಾತ್."

ಶ್ಲೋಕ್: ಆಮಿ ತಾಚೊ ಲೋಕ್, ತಾಚ್ಯಾ ಹಿಂಡಾಚ್ಯೊ ಶೆಳಿಯೊ

1. ಸಂತೊಸಾನ್ ಸರ್ವೆಸ್ಪರಾಕ್ ಜೈ ಜೈ ಮ್ಹಣ್ ಏ ಪೃಥ್ವಿಯೇ,
   ಉಲ್ಲಾಸಾನ್ ತಾಚಿ ಸೆವಾ ಕರ್‌,
   ಸಂತೊಸಾಚಿಂ ಗಿತಾಂ ಗಾವುನ್ ಯೆ ತಾಚ್ಯೆ ಸಮೊರ್.
2. ಸರ್ವೆಸ್ಪರ್‌ಚ್‌ ದೇವ್ ಮ್ಹಣ್ ಜಾಣಾ ಜಾಯಾ,
   ತೊ ಆಮ್ಚೊ ರಚ್ನಾರ್, ಆಮಿ ತಾಚಿಂ ಜಾವ್ನಾಸಾಂವ್,
   ಆಮಿ ತಾಚೊ ಲೋಕ್, ತಾಚ್ಯಾ ಹಿಂಡಾಚ್ಯೊ ಶೆಳಿಯೊ.
3. ಆಮ್ಚೊ ಸರ್ವೆಸ್ಪರ್ ಕಿತ್ಲೊ ಬರೊ!
   ತಾಚಿ ಕೃಪಾ ಯುಗ-ಯುಗಾಂತರಾಕ್‌,
   ತಾಚೆಂ ವಿಶ್ವಾಸಿಪಣ್ ಸಂತತಿಚ್ಯೆ ಸಂತತೆಕ್ ಬಾಳ್ತಾ

ಸಾಂ ಪಾವ್ಲುನ್‌ ರೊಮಾಗಾರಾಂಕ್‌ ಬರಯ್ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಕಿತ್ಯಾಕ್‌ ಆಮ್ಕಾಂ ಆನಿಕ್‍ಯೀ ಕಿತೆಂಚ್ ಕರುಂಕ್ ಸಕತ್ ನಾತ್ಲಲ್ಯಾ ಕಾಳಾರ್, ಕ್ರಿಸ್ತಾನ್ ತಾಚೊ ನೆಮ್ಲಲೊ ವೇಳ್ ಪಾವ್ತಚ್, ಖೊಟ್ಯಾಂ ಖಾತಿರ್ ಆಪ್ಲೊ ಜೀವ್ ದಿಲೊ. ಏಕ್ ವರ್ತ್ಯಾ ಮನ್ಶಾ ಪಾಸತ್ ಮೊರೊಂಕ್ ಕೊಣ್‍ಯೀ ಎಕ್ಲೊ ಮುಖಾರ್ ಸರ್ಲ್ಯಾರ್‌ಯೀ ಸರ್ಲೊ. ಪುಣ್ ನಿತಿವಂತ್ ಮನ್ಶಾ ಪಾಸತ್ ಸಸಾರಾಯೆನ್ ಮೊರೊಂಕ್ ಕೊಣ್ ತೊ ತಯಾರ್? ಪುಣ್ ಆಮಿ ಪಾತ್ಕಿ ಆಸ್‍ಲ್ಲ್ಯಾಂವ್ ತೆದ್ನಾ ಕ್ರೀಸ್ತ್ ಆಮ್ಚೇ ಖಾತಿರ್ ಮೆಲೊ ಆನಿ ಹಾಚೇ ವರ್ವಿಂ ದೆವಾನ್ ಆಪುಣ್ ಕಿತ್ಲೊ ಆಮ್ಚೊ ಮೋಗ್ ಕರ್ತಾ ತೆಂ ದಾಖೊವ್ನ್ ದಿಲೆಂ. ಕ್ರಿಸ್ತಾಚ್ಯಾ ರಗ್ತಾ ವರ್ವಿಂ ಆತಾಂ ಆಮಿ ನಿತಿವಂತ್ ಜಾಲ್ಯಾಂವ್; ತರ್ ತಾಚೇ ವರ್ವಿಂಚ್ ದೆವಾಚ್ಯಾ ಕ್ರೋದಾಂತ್ಲಿಂಯೀ ಆಮಿ ಖಂಡಿತ್ ಬಚಾವ್ ಜಾಂವ್ಕ್ ಪಾವ್ತಲ್ಯಾಂವ್. ಆಮಿ ತಾಚೆ ದುಸ್ಮಾನ್ ಆಸ್ತಾಂ, ಆಪ್ಲ್ಯಾ ಪುತಾಚ್ಯಾ ಮೊರ್ನಾ ಮಾರಿಫತ್ ದೆವಾನ್ ಆಮ್ಕಾಂ ರಾಜಿ ಕರ್ನ್ ಘೆತ್ಲ್ಯಾಂತ್ ಜಾಲ್ಯಾರ್, ಆತಾಂ ತಾಚೆ ಈಷ್ಟ್ ಜಾಲ್ಲೆ ಆಮಿ ಜಿವಂತ್ ಕ್ರಿಸ್ತಾ ಮಾರಿಫತ್ ತಾಚೇ ಥಾವ್ನ್ ಆನಿಕ್‍ಯೀ ಚಡ್ ವಿಶೇಸ್ ಥರಾನ್ ತಾರಣ್ ಜೊಡ್ತಲ್ಯಾಂವ್. ತಿತ್ಲೆಂಚ್ ನ್ಹಯ್, ಸೊಮಿಯಾ ಜೆಜು ಕ್ರಿಸ್ತಾ ವರ್ವಿಂ ಆಮ್ಕಾಂ ರಾಜಿ ಕರ್ನ್ ಘೆತ್ಲಲ್ಯಾ ದೆವಾ ಥಂಯ್, ತ್ಯಾಚ್ ಕ್ರಿಸ್ತಾ ಉದೆಶಿಂ ಆಮಿ ಸಂತೊಸಾನ್ ಭರ್ಲ್ಯಾಂವ್.

ವೇಳ್‌ ಭರ್ತಿ ಜಾಲೊ,ದೆವಾಚೆಂ ರಾಜ್ ಲಾಗಿಂ ಪಾವ್ಲಾಂ;
ಪಾತ್ಕಿ ಜಿಣಿ ಬದಲಾ, ಬರಿ ಖಬರ್ ಸತ್ಮಾನಾ.

ಲೊಕಾಚೆ ಜಮೆ ಪಳೆವ್ನ್ ತಾಚೆಂ ಕಾಳಿಜ್ ಕಣ್ವಾಳಾಯೆನ್ ಭರ್ಲೆಂ; ಕಿತ್ಯಾಕ್ ಗೊವ್ಳಿ ನಾತ್‍ಲ್ಲ್ಯಾ ಬಕ್ರ್ಯಾಂಬರಿ ತೆ ಘುಸ್ಪಡೊನ್ ಭಿಜುಡ್‍ಲ್ಲೆ. ದೆಕುನ್ ಜೆಜು ಆಪ್ಲ್ಯಾ ಶಿಸಾಂಲಾಗಿಂ ಮ್ಹಣಾಲೊ: “ಪಿಕಾವಳ್ ಯಥೇಷ್ಟ್ ಆಸಾ, ಪುಣ್ ವಾವ್ರಾಡಿ ಥೊಡೆಚ್. ದೆಕುನ್ ಪಿಕಾಚ್ಯಾ ಧನಿಯಾಲಾಗಿಂ, ತಾಣೆಂ ಆಪ್ಲ್ಯಾ ಪಿಕಾಚ್ಯಾ ಶೆತಾಂತ್ ವಾವ್ರಾಡಿ ಧಾಡ್ಚ್ಯಾಕ್ ಮಾಗಾ.” 

ಉಪ್ರಾಂತ್ ಜೆಜುನ್ ಆಪ್ಲ್ಯಾ ಬಾರಾ ಶಿಸಾಂಕ್ ಲಾಗಿಂ ಆಪಯ್ಲೆ ಆನಿ ದೆಂವ್ಚಾರ್ ಧಾಂವ್ಡಾಂವ್ಚೊ ಆನಿ ಸರ್ವ್ ರೋಗ್ ಆನಿ ಪಿಡಾಶಿಡಾ ಗೂಣ್ ಕರ್ಚೊ ಅಧಿಕಾರ್ ತಾಂಕಾಂ ದಿಲೊ. ತ್ಯಾ ಬಾರಾ ಧರ್ಮ್‍ದುತಾಂಚಿಂ ನಾಂವಾಂ ಹಿಂ: ಪಯ್ಲೊ ಸಿಮಾಂವ್ ಜಾಕಾ ಪೆದ್ರು ಮ್ಹಣ್ ಆಪಯ್ತಾತ್ ಆನಿ ತಾಚೊ ಭಾವ್, ಆಂದ್ರೆ. ಜೆಬೆದೆವಾಚೆ ಪೂತ್, ಜಾಕೊಬ್ ಆನಿ ಜುವಾಂವ್; ಫಿಲಿಪ್ ಆನಿ ಬಾರ್ತೊಲೊಮೆವ್; ತೊಮಾಸ್ ಆನಿ ಸುಂಕಾಗಾರ್ ಮಾತೆವ್; ಆಲ್ಫೆವಾಚೊ ಪೂತ್ ಜಾಕೊಬ್ ಆನಿ ಥಾದ್ದೆವ್, ದೇಶ್‍ಭಕ್ತ್ ಸಿಮಾಂವ್ ಆನಿ ಜೆಜುಕ್ ಘಾತಾನ್ ಪರಾಧೀನ್ ಕೆಲ್ಲೊ ಇಸ್ಕಾರಿಯೊತ್ ಜುದಾಸ್.
ಹ್ಯಾ ಬಾರಾ ಜಣಾಂಕ್ ಜೆಜುನ್ ಅಶೆ ನಿರ್ದೇಶ್ ದೀವ್ನ್ ಧಾಡ್ಲೆ: “ಅನ್ಯ ಜಾತಿಂಚ್ಯಾ ಗಾಂವಾಂಕ್ ವ್ಹರ್ತಾತ್ ತ್ಯೊ ವಾಟೋ ಧರಿನಾಕಾತ್ ಆನಿ ಸಾಮಾರಿಯಾಗಾರಾಂಚ್ಯಾ ಶಹರಾಂನಿ ಪ್ರವೇಸ್ ಜಾಯ್ನಾಕಾತ್. ಬಗರ್ ಇಸ್ರಾಯೆಲ್ ಕುಳಿಯೆಚ್ಯಾ ಚುಕೊನ್ ಗೆಲ್ಲ್ಯಾ ಬಕ್ರ್ಯಾಂ ಮಧೆಂ ವಚಾ. ವೆತಾನಾ ‘ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ’ ಮ್ಹಳ್ಳೊ ಸಂದೇಶ್ ಪಾಚಾರಿತ್ ವಚಾ. ಪಿಡೆಸ್ತಾಂಕ್ ಗೂಣ್ ಕರಾ, ಮೆಲ್ಲ್ಯಾಂಕ್ ಜೀವ್ ಕರಾ, ಕೊಡ್ಕಾರಾಂಕ್ ನಿತಳ್ ಕರಾ, ದೆಂವ್ಚಾರ್ ಧಾಂವ್ಡಾಯಾ, ಫುಂಕ್ಯಾಕ್ ತುಮ್ಕಾಂ ಮೆಳ್ಳಾಂ, ಫುಂಕ್ಯಾಕ್ ತುಮಿ ದಿಯಾ".