📖 ಆಯ್ತಾರಾಚಿಂ ವಾಚ್ಪಾಂ

ದ್ವಿತಿನಿಯಮ್‌ ಪುಸ್ತಕಾಂತ್ಲೆಂ ವಾಚಪ್‌

ಪರ್ಜೆಲಾಗಿಂ ಉಲೊವ್ನ್‌ ಮೊಯ್ಜೆನ್‌ ಮ್ಹಳೆಂ:"ಸರ್ವೆಸ್ಪರಾ ತುಜಾ ದೆವಾನ್ ಕಷ್ಟಾಂ ಮುಖಾಂತ್ರ್ ತುಜಿ ಪರಿಕ್ಷಾ ಕರ್ಚೆ ಖಾತಿರ್ ಆನಿ ತುಂ ತಾಚೆ ಉಪದೆಸ್ ಪಾಳುಂಕ್ ಖುಶಿ ವ್ಹರ್ತಾಯ್ ಕಿ ನಾ ಮ್ಹಣ್ ಸಾರ್ಕೆಂ ಸಮ್ಜುನ್ ಘೆಂವ್ಚೆ ಖಾತಿರ್ ತಾಣೆ ತುಕಾ ಪಾಟ್ಲ್ಯಾ ಚಾಳಿಸ್ ವರ್ಸಾಂನಿ ಅರಣ್ಯಾಂತ್ ತುಜ್ಯಾ ಸಗ್ಳ್ಯಾ ಪಯ್ಣಾ ವೆಳಾರ್ ಕಶೆಂ ಚಲೊವ್ನ್ ಹಾಡ್ಲೊ ಮ್ಹಣ್ ಉಗ್ಡಾಸ್ ದವರ್. ಮನಿಸ್ ಉಂಡ್ಯಾ ವರ್ವಿಂ ಮಾತ್ರ್ ಜಿಯೆನಾ, ಬಗರ್ ಸರ್ವೆಸ್ಪರಾಚ್ಯಾ ತೊಂಡಾಂತ್ ಥಾವ್ನ್ ಯೆತಾ ತ್ಯಾ ಹರೆಕ್ ಉತ್ರಾವರ್ವಿಂ ಜಿಯೆತಾ ಮ್ಹಣ್ ತುವೆಂ ಸಮ್ಜುನ್ ಘೆಂವ್ಚೆ ಖಾತಿರ್ ತಾಣೆ ತುಕಾ ಭುಕೆ ವರ್ವಿಂ ಖಾಲ್ತೊ ಕೆಲೊ ಆನಿ ತುಕಾ ವಾ ತುಜ್ಯಾ ಪುರ್ವಜಾಂಕ್ ಕಳಿತ್ ನಾತ್ಲಲೆಂ ಮಾನ್ನಾ ದಿವ್ನ್ ತುಕಾ ಪೊಸ್ಲೊ.
ತುಕಾ ಎಜಿಪ್ತಾಂತ್ಲೊ,ಗುಲಾಮ್‍ಪಣಾಚ್ಯಾ ಘರಾಂತ್ಲೊ ಭಾಯ್ರ್ ಕಾಡ್‍ಲ್ಲ್ಯಾ ಸರ್ವೆಸ್ಪರಾ ತುಜ್ಯಾ ದೆವಾಕ್ ವಿಸರ್ನಾಶೆಂ ರಾವುಂಕ್ ಚತ್ರಾಯ್ ಘೆ. ವಿಕಾಳ್ ಸೊರಪ್ ಆನಿ ವಿಚು ಆಸ್ಲಲ್ಯಾ ತ್ಯಾ ವಿಸ್ತಾರ್ ಆನಿ ಭಯಂಕರ್ ಅರಣ್ಯಾಂತ್ಲ್ಯಾನ್, ಸುಕ್ಯಾ ಆನಿ ಉದಕ್ ನಾತ್ಲಲ್ಯಾ ದೆಶಾಂತ್ಲ್ಯಾನ್ ತೊ ತುಜಿ ವಾಟ್ ವ್ಹರುನ್ ಗೆಲೊ ಆನಿ ತಾಣೆಂ ತುಜೆ ಪಾಸತ್ ಖಡ್ಪಾಂತ್ಲೆಂ ಉದಕ್ ವ್ಹಾಳಶೆಂ ಕೆಲೆಂ. ತಾಣೆ ತುಕಾ ಹ್ಯಾ ಅರಣ್ಯಾಂತ್ ತುಜ್ಯಾ ಪುರ್ವಜಾಂಕ್ ಕಳಿತ್ ನಾತ್ಲಲೆಂ ಮಾನ್ನಾ ಖಾಂವ್ಕ್ ದಿವ್ನ್ ಪೊಸ್ಲೊ".

ಶ್ಲೋಕ್: ನಾಂವಾಡ್ ಸೊಮಿಯಾಕ್, ಜೆರುಜಲೆಮಾ

1. ಸರ್ವೆಸ್ಪರಾಕ್ ವಂದಿ, ಏ ಜೆರುಜಲೆಮಾ,
   ತುಜ್ಯಾ ದೆವಾಕ್ ನಾಂವಾಡ್, ಏ ಸಿಯೊನಾ.
   ಕಿತ್ಯಾಕ್ ತಾಣೆ ತುಜ್ಯಾ ದರ್ವಾಟ್ಯಾಚ್ಯೆ ಆಡಾಂಬೆ ಘಟ್ ಕೆಲ್ಯಾತ್,
   ಆನಿ ತುಜ್ಯೆ ಭಿತರ್ ಜಿಯೆತೆಲ್ಯಾ ತುಜ್ಯಾಭುರ್ಗ್ಯಾಂಕ್ ಆಶೀರ್ವಾದಿತ್ ಕೆಲ್ಯಾಂತ್ .
2. ತುಜ್ಯಾ ಶಿಮಾಂ ಭಿತರ್ ತಾಣೆ ತುಕಾ ದಿಲ್ಯಾ ಸವಸ್ತ್‌ಕಾಯ್,
   ಉಂಚಿ ಗೋಂವ್ ತುಕಾ ದೀವ್ನ್ ಧಾದೊಶಿ ಕೆಲಾಂ.
   ಸಂಸಾರಾಚೆರ್ ತೊ ಆಪ್ಲೊ ಸಂದೇಶ್ ದಾಡ್ತಾ,
   ತುರ್ತಾನ್ ತಾಚಿ ಶುಭ್‌ವಾರ್ತಾ ಪ್ರಸಾರ್ ಜಾತಾ.
3. ತೊ ಆಪ್ಲೆಂ ಉತಾರ್ ಜಾಕೊಬಾಕ್ ಕಳಿತ್ ಕರ್ತಾ,
   ಇಸ್ರಾಯೆಲಾಕ್ ಆಪ್ಲಿಂ ವಿಧಿ-ನಿಯಮಾಂ ಪರ್ಗಟ್ತಾ.
   ದುಸ್ರ್ಯಾ ಖಂಯ್ಚ್ಯಾಚ್ ರಾಷ್ಟ್ರಾಂಕ್ ತಾಣೆ ಅಶೆಂ ಕರುಂಕ್ ನಾ,
   ಆಪ್ಲ್ಯಾ ನಿಯಮಾಂಚಿ ರೀತ್-ನೀತ್ ತಾಂಕಾ೦ ಉಘಡುಂಕ್ ನಾ.

ಸಾಂ. ಪಾವ್ಲುನ್‌ ಕೊರಿಂಥ್‌ಗಾರಾಂಕ್‌ ಬರಯ್‌ಲ್ಲ್ಯಾ ಪಯ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೊ,
ಆಮಿ ದೆವಾಕ್ ಅರ್ಗಾಂ ದೀವ್ನ್ ಸೆವ್ತಾಂವ್ ತಿ ಸಂಸ್ಕಾರ್ಲಲಿ ಕಾಲ್ಸ್ ಕ್ರಿಸ್ತಾಚ್ಯಾ ರಗ್ತಾಂತ್ ಆಮ್ಕಾಂ ವಾಂಟೆಲಿ ಕರ್ತಾ ನ್ಹಯ್? ಆನಿ ಆಮಿ ಮೊಡ್ತಾಂವ್ ತೊ ಉಂಡೊ ಕ್ರಿಸ್ತಾಚ್ಯಾ ಮಾಸಾಂತ್ ಆಮ್ಕಾಂ ವಾಂಟೆಲಿ ಕರ್ತಾ ನ್ಹಯ್? ಆಮಿ ಜಾಯ್ತಿಂ ಜಣಾಂ ತರ್‌ಯೀ ಉಂಡೊ ಎಕ್‍ಚ್ ದೆಕುನ್ ಆಮಿ ಏಕ್ ಕೂಡ್ ಜಾತಾಂವ್; ಕಿತ್ಯಾಕ್ ಆಮಿ ಸಮೆಸ್ತ್ ತ್ಯಾ ಎಕಾಚ್ ಉಂಡ್ಯಾಂತ್ ವಾಂಟೆಲಿ ಜಾತಾಂವ್.

ಹಾಂವ್‌ಚ್ ತೊ ಸರ್ಗಿಂ ಥಾವ್ನ್ ದೆಂವೊನ್ ಅಯ್ಲಲೊ ಜಿವೊ ಉಂಡೊ, ಮ್ಹಣ್ತಾ ಸೊಮಿ,
ಹೊ ಉಂಡೊ ಖಾತಾ ತೊ ಸಾಸ್ಣಾಕ್ ಜಿಯೆತೊಲೊ.

ತ್ಯಾ ವೆಳಿಂ, ಜೆಜುನ್‌ ಜುದೆವಾಂಚ್ಯಾ ಜಮ್ಯಾಕ್‌ ಮ್ಹಳೆಂ: “ಹಾಂವ್‍ಚ್ ತೊ ಸರ್ಗಿಂ ಥಾವ್ನ್ ದೆಂವುನ್ ಆಯ್ಲಲೊ ಜಿವೊ ಉಂಡೊ. ಹೊ ಉಂಡೊ ಖಾತಾ ತೊ ಸಾಸ್ಣಾಕ್ ಜಿಯೆತಲೊ. ಸಂಸಾರಾಕ್ ಜಿವಿತ್ ಮೆಳ್ಚ್ಯಾಕ್ ಹಾಂವ್ ದಿತಾಂ ತೊ ಉಂಡೊ ಮ್ಹಜೆಂಚ್ ಮಾಸ್.”
ತಿತ್ಲ್ಯಾರ್ ಜುದೆವ್ ಎಕಾಮೆಕಾ ವಾದ್‍ವಿವಾದ್ ಕರುನ್ ಮ್ಹಣಾಲೆ: “ಹಾಣೆ ಆಮ್ಕಾಂ ಆಪ್ಲೆಂ ಮಾಸ್ ಖಾಂವ್ಕ್ ದಿಂವ್ಚೆಂ ಜಾಲ್ಯಾರ್‍ಯಿ ಕಶೆಂ?” ದೆಕುನ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮಿ ಮನ್ಶಾಪುತಾಚೆಂ ಮಾಸ್ ಖೆಲ್ಲೆ ಖರಿತ್ ಆನಿ ತಾಚೆಂ ರಗತ್ ಪಿಯೆಲ್ಲೆ ಖರಿತ್ ತುಮ್ಚೆ ಥಂಯ್ ಜೀವ್ ಆಸ್ಚೊ ನಾ. ಜೊ ಕೊಣ್ ಮ್ಹಜೆಂ ಮಾಸ್ ಖಾತಾ ಆನಿ ಮ್ಹಜೆಂ ರಗತ್ ಪಿಯೆತಾ, ತಾಚೆ ಥಂಯ್ ಸಾಸ್ಣಾಚೊ ಜೀವ್ ಆಸಾ; ಆನಿ ನಿಮಾಣ್ಯಾ ದಿಸಾ ಹಾಂವ್ ತಾಕಾ ಜಿವಂತ್ ಉಠಯ್ತಲೊಂ. ಕಿತ್ಯಾಕ್ ಮ್ಹಜೆಂ ಮಾಸ್ ಖರೆಂ ಖಾಣ್ ಆನಿ ಮ್ಹಜೆಂ ರಗತ್ ಖರೆಂ ಪೀವನ್. ಜೊ ಕೊಣ್ ಮ್ಹಜೆಂ ಮಾಸ್ ಖಾತಾ ಆನಿ ಮ್ಹಜೆಂ ರಗತ್ ಪಿಯೆತಾ, ತೊ ಮ್ಹಜೆ ಥಂಯ್ ಜಿಯೆತಾ ಆನಿ ಹಾಂವ್ ತಾಚೆ ಥಂಯ್ ಜಿಯೆತಾಂ. ಜಶೆಂ ಜಿವಂತ್ ಬಾಪಾನ್ ಮ್ಹಾಕಾ ಧಾಡ್ಲಾ ಆನಿ ಬಾಪಾ ವರ್ವಿಂಚ್ ಹಾಂವ್‍ಯಿ ಜಿಯೆತಾಂ, ತಶೆಂ ಜೊ ಕೊಣ್ ಮ್ಹಾಕಾ ಖಾತಾ ತೊಯಿ ಮ್ಹಜೆ ವರ್ವಿಂ ಜಿಯತಲೊ. ಹೊ ಸರ್ಗಾರ್ ಥಾವ್ನ್ ದೆಂವ್ಲಲೊ ಉಂಡೊ, ತುಮ್ಚ್ಯಾ ಪುರ್ವಜಾಂನಿ ಖೆಲೊ ತ್ಯಾ ಉಂಡ್ಯಾಬರಿ ನ್ಹಯ್; ತೆ ಮೊರ್ನ್ ಪಾವ್ಲೆ. ಜೊ ಕೊಣ್ ಹೊ ಉಂಡೊ ಖಾತಾ ತೊ ಸಾಸ್ಣಾಕ್ ಜಿಯೆತಲೊ.”