📖 ಆಯ್ತಾರಾಚಿಂ ವಾಚ್ಪಾಂ

ನಿರ್ಗಮನ್ ಪುಸ್ತಕಾಂತ್ಲೆಂ ವಾಚಪ್
ಸರ್ವೆಸ್ಪರಾನ್‌ ಫರ್ಮಾಯ್‌ಲ್ಲೆ ಪರ್ಮಾಣೆಂ ಮೊಯ್ಜೆ ಫಾತ್ರಾಚ್ಯೊ ದೋನ್ ಫಳಿಯೊ ಹಾತಿಂ ಘೆವ್ನ್ ಸಿನಾಯ್ ಪರ್ವತಾಚೆರ್ ಚಡ್ಲೊ. ಸರ್ವೆಸ್ಪರ್ ಎಕಾ ಕುಪಾಂತ್ಲ್ಯಾನ್ ಸಕ್ಲಾ ದೆಂವುನ್ ತಾಚೆ ಬಗ್ಲೆಕ್ ರಾವ್ಲೊ ಆನಿ ತಾಣೆಂ ಸರ್ವೆಸ್ಪರ್ ಮ್ಹಳ್ಳೆಂ ನಾಂವ್ ಪರ್ಗಟ್ಲೆಂ. ಸರ್ವೆಸ್ಪರ್ ತಾಚೆ ಮುಕ್ಲ್ಯಾನ್ ಉತ್ರುನ್ ಗೆಲೊ ಆನಿ ಉದ್ಗಾರ್ಲೊ: “ಸರ್ವೆಸ್ಪರ್, ಸರ್ವೆಸ್ಪರ್, ದಯಾಳ್ ಆನಿ ಕಾಕುಳ್ದಾರ್ ದೇವ್, ರಾಗಾರ್ ಜಾಂವ್ಕ್ ಸವ್ಕಾಸ್, ಮೊಗಾನ್ ಆನಿ ವಿಶ್ವಾಸಾನ್ ಭರ್ಲಲೊ.” ಮೊಯ್ಜೆ ತಕ್ಷಣ್ ಧರ್ಣಿರ್ ಸರ್ಪಡ್ಲೊ ಆನಿ ತಾಣೆಂ ಅರಾಧನ್ ಕೆಲೆಂ. ತಾಣೆಂ ಮ್ಹಳೆಂ: “ಸರ್ವೆಸ್ಪರಾ, ಹಾಂವ್ ತುಕಾ ಮಾನ್ವಲಾಂ ಜಾಲ್ಯಾರ್, ದಯಾ ಕರುನ್ ಆಮ್ಚೆ ಸಾಂಗಾತಾ ಯೆ. ವ್ಹಯ್, ಹೊ ಲೋಕ್ ಧಾರುಣ್ ಕಾಳ್ಜಾಚೊ, ಪೂಣ್ ಆಮ್ಚ್ಯೊ ಚುಕಿ ಆನಿ ಅಪ್ರಾಧ್ ಭೊಗ್ಶಿ ಆನಿ ಆಮ್ಕಾಂ ತುಜೆ ದಾಯ್ಜಿ ಕರುನ್ ಸ್ವೀಕಾರ್ ಕರ್.”

ಶ್ಲೋಕ್: ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್.

1. ಸದೆಂವ್ ತುಂ ಅಮ್ಚ್ಯಾ ಪುರ್ವಜಾಂಚ್ಯಾ ದೆವಾ,
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್.
   ಸದೆಂವ್ ತುಜೆಂ ಮಹಿಮೆವಂತ್ ಪವಿತ್ರ್ ನಾಂವ್‌,
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್.
2. ಸದೆಂವ್ ತುಂ ತುಜ್ಯಾ ಮಹಿಮೆಚ್ಯಾ ಮಂದಿರಾಂತ್‌,
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್. ‌
   ಸದೆಂವ್ ತುಂ ತುಜ್ಯಾ ರಾಜ್ಯಾಚ್ಯಾ ಸಿಂಹಾಸನಾರ್‌,
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್.
3. ಸದೆಂವ್ ತುಂ ಸಮ್ದಿರಾಚಿ ಗುಂಡಾಯ್ ಮೆಜ್ತಲ್ಯಾ
   ಆನಿ ಖೆರುಬಾಂ ವಯ್ರ್ ಬಸ್ಲಲ್ಯಾ,
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್.
   ಸದೆಂವ್ ತುಂ ಅಂತ್ರಳಾರ್ ಬಸ್ಲಲ್ಯಾ
   ಮಾನ್ ಆನಿ ವ್ಹಡ್ವಿಕ್ ತುಕಾ ಸಾಸ್ಣಾಚ್ಯಾ ಸಾಸ್ಣಾಕ್

ಸಾಂ ಪಾವ್ಲುನ್‌ ಕೊರಿಂಥ್‌ಗಾರಾಂಕ್‌ ಬರಯ್‌ಲ್ಲ್ಯಾ ದುಸ್ರ್ಯಾ ಪತ್ರಾಂತ್ಲೆಂ ವಾಚಪ್
ಭಾವಾಂ-ಭಯ್ಣಿಂನೋ,
ಹಾಂವ್ ತುಮ್ಕಾಂ ವಿದಾಯ್ ಮ್ಹಣ್ತಾಂ, ಸಂಪೂರ್ಣ್‍ಕಾಯ್ ಜೊಡುಂಕ್ ವಾವುರಾ. ಮ್ಹಜ್ಯಾ ಉಲ್ಯಾಕ್ ಪಾಳೊ ದಿಯಾ. ಏಕ್ ಮನಾಚೆ ಜಾಯಾ; ಸಮಾಧಾನ್ ಸೊಧಾ. ತವಳ್ ಮೊಗಾಚೊ ಆನಿ ಶಾಂತಿಚೊ ದೇವ್ ತುಮ್ಚೆ ಸವೆಂ ಆಸ್ತಲೊ. ಪವಿತ್ರ್ ಉಮ್ಯಾನ್ ಎಕಾಮೆಕಾಕ್ ನಮಾನ್ ಕರಾ. ಸಮೆಸ್ತ್ ಭಕ್ತ್ ತುಮ್ಕಾಂ ನಮಾನ್ ಧಾಡ್ತಾತ್. ಸೊಮಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ, ದೆವಾಚೊ ಮೋಗ್ ಆನಿ ಪವಿತ್ರ್ ಅತ್ಮ್ಯಾಚೊ ಎಕ್ವಟ್ ತುಮ್ಚೆ ಸವೆಂ ಆಸುಂ.

ಆನಂದ್ ಬಾಪಾಕ್ ಆನಿ ಪುತಾಕ್ ಆನಿ ಪವಿತ್ರ್ ಅತ್ಮ್ಯಾಕ್,
ಜೊ ಆಸಾ, ಜೊ ಆಸ್ಲಲೊ ಆನಿ ಜೊ ಆಸ್ತೊಲೊ ತ್ಯಾ ದೆವಾಕ್.

ಜೆಜುನ್‌ ನಿಕೊದೆಮಾಕ್‌ ಮ್ಹಳೆಂ: “ದೆವಾನ್ ಸಂಸಾರಾಚೊ ಅಸೊಯಿ ಮೋಗ್ ಕೆಲೊ ಕೀ, ತಾಣೆ ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಒಪುನ್ ದಿಲೊ, ತಾಕಾ ಸತ್ಮಾನ್ತಲ್ಯಾ ಕೊಣಾಚೊಚ್ ನಾಸ್ ಜಾಯ್ನಾ ಜಾಂವ್ಚ್ಯಾಕ್; ಬಗಾರ್ ತಾಕಾ ಸಾಸ್ಣಿಕ್ ಜಿವಿತ್ ಮೆಳ್ಚ್ಯಾಕ್. ಕಿತ್ಯಾಕ್ ದೆವಾನ್ ಆಪ್ಲ್ಯಾ ಪುತಾಕ್ ಸಂಸಾರಾಕ್ ಧಾಡ್ಲೊ ಸಂಸಾರಾಚಿ ನೀತ್ ಕರ್ಚ್ಯಾಕ್ ನ್ಹಯ್, ಬಗರ್ ತಾಚೆ ಮಾರಿಫಾತ್ ಸಂಸಾರಾಚಿ ಸೊಡ್ವಣ್ ಜಾಂವ್ಚ್ಯಾಕ್. ಪುತಾಕ್ ಸತ್ಮಾನ್ತಲ್ಯಾಚಿ ನೀತ್ ಜಾಯ್ನಾ. ಪುಣ್ ಜೊ ಕೊಣ್ ತಾಕಾ ಸತ್ಮಾನಿನಾ, ಹ್ಯಾ ಕಾರಣಾ ಪಾಸತ್ ತಾಚಿ ನೀತ್ ಜಾವ್ನ್ ಗೆಲ್ಯಾ.”