📖 ಆಯ್ತಾರಾಚಿಂ ವಾಚ್ಪಾಂ

ಧರ್ಮ್ ದುತಾಂಚಿಂ ಕೃತ್ಯಾಂ ಪುಸ್ತಾಕಾಂತ್ಲೆಂ ವಾಚಪ್.
ಪೆಂತೆಕೊಸ್ತಾಚೇ ಪರ್ಬೆಚೊ ದೀಸ್ ಆಯ್ಲೊ ಆಸ್ತಾಂ, ತೆ ಸಮೆಸ್ತ್ ಏಕ್ ಸುವಾತೆರ್ ಸಾಂಗಾತಾ ಮೆಳೊನ್ ಆಸ್ಲೆ. ತೆದ್ವಾಂ ಎಕಾಚ್ಚಾಣೆಂ ಕಠಿಣ್ ಝಡ್‍ವಾರೆಂ ಆಯ್‍ಲ್ಲೇಬರಿ ಮಳ್ಬಾರ್ ಥಾವ್ನ್ ಏಕ್ ಆವಾಜ್ ಆಯ್ಲೊ ಆನಿ ತೆ ಬಸೊನ್ ಆಸ್ಲಲೆ ತ್ಯಾ ಘರಾಂತ್ ಭರ್ಲೊ. ತವಳ್ ತಾಂಕಾಂ ದಿಸ್ಲ್ಯೊ ಉಜ್ಯಾಸಾರ್ಕ್ಯೊ ಜಿಬೊ. ತ್ಯೊ ವಿಂಗಡ್ ವಿಂಗಡ್ ಜಾವ್ನ್ ತಾಂಚೇ ಮಧ್ಲ್ಯಾ ಹರೆಕ್ಲ್ಯಾಚೆರ್ ವಚುನ್ ರಾವ್ಲ್ಯೊ. ತೆ ಸಮೆಸ್ತ್ ಪವಿತ್ರ್ ಅತ್ಮ್ಯಾನ್ ಭರ್ಲೆ ಆನಿ ತ್ಯಾ ಅತ್ಮ್ಯಾನ್ ತಾಂಕಾಂ ದಿಲ್ಲೇ ವಾಚಾ ಸಕ್ತೇ ಪರ್ಮಾಣೆಂ ಪರ್ಕಿ ಭಾಸಾಂನಿ ತೆ ಉಲೊಂವ್ಕ್ ಲಾಗ್ಲೆ.
ಸಂಸಾರಾಂತ್ಲ್ಯಾ ಹರೇಕ್ ಗಾಂವ್ಚೆ ಭಕ್ತಿವಂತ್ ಜುದೆವ್ ತ್ಯಾ ವೆಳಾರ್ ಜೆರುಜಲೆಮಾಕ್ ಆಯ್ಲಲೆ ಥಂಯ್ ಆಸ್ಲೆ. ಹೊ ಆವಾಜ್ ಆಯ್ಕುನ್ ಲೊಕಾಚೊ ವ್ಹಡ್ ಏಕ್ ಜಮೊ ಎಕ್ಟಾಂಯ್ ಜಾಲೊ ಆನಿ ತಾಣಿಂ ಉಲಯ್ಲಲೆಂ ಹರೆಕ್ಲ್ಯಾಕ್ ಆಪಾಪ್ಲೇ ಭಾಶೆನ್ ಆಯ್ಕತಾಲೆಂ ದೆಕುನ್ ಲೋಕ್ ಸಕ್ಕಡ್ ಥಟಕ್ ಜಾಲೊ. ತೆ ಶೆರ್ಮೆಲೆ ಆನಿ ವಿಜ್ಮಿತ್ ಜಾವ್ನ್ ಮ್ಹಣಾಲೆ: “ಪಳೆಯಾ, ಹೆ ಉಲಯ್ತಾತ್ ತೆ ಸಮೇಸ್ತ್ ಗಾಲಿಲೆಯಾಗಾರ್ ನ್ಹಯ್‍ವೇ? ತರ್ ಆಮ್ಚೇ ಮಧ್ಲ್ಯಾ ಹರೆಕ್ಲ್ಯಾಕ್ ತೆ ಉಲಯ್ತಾತ್ ತೆಂ ಆಮ್ಚೇ ಆಮ್ಚೇ ಮಾಯ್‍ಭಾಶೆನ್ ಆಯ್ಕತಾ ತೆಂ ಕಶೆಂ? ಆಮಿ ಹಾಂಗಾ ಆಸಾಂವ್ ಪಾರ್ಥಿಯಾಂತ್ಲೆ, ಮೇದಿಯಾಂತ್ಲೆ, ಎಲಾಮಾಂತ್ಲೆ, ಮೆಸಾಪೊತಾಮಿಯಾಂತ್ಲೆ, ಜುದೇಯಾಂತ್ಲೆ, ಆನಿ ಕಾಪ್ಪಾದೋಸಿಯಾಂತ್ಲೆ, ಪೊಂತುಸಾಂತ್ಲೆ ಆನಿ ಆಸಿಯಾಂತ್ಲೆ,ಫ್ರೀಜಿಯಾಂತ್ಲೆ ಆನಿ ಪಂಫೀಲಿಯಾಂತ್ಲೆ, ಎಜಿಪ್ತಾಂತ್ಲೆ ಆನಿ ಸಿರೆನ್ ಭೊಂವ್ತಿಂಚ್ಯಾ ಲೀಬಿಯಾಂತ್ಲೆ ಆನಿ ಥೊಡೆ ರೊಮಾ ಥಾವ್ನ್ ಸಯ್ತ್ ಆಯ್ಲಲೆ. ಜುದೆವ್ ಆನಿ ಜುದೆವ್ ಧರ್ಮಾಕ್ ಆಯ್ಲೆವಾರ್-ಚ್ ಮೆಳ್‍ಲ್ಲೆ, ಕ್ರೇತಾಂತ್ಲೆ ಆನಿ ಅರ್ಬಿಸ್ಥಾನಾಂತ್ಲೆ ಸಯ್ತ್. ತರ್‌ಯೀ ದೆವಾಚ್ಯಾ ವಿಚಿತ್ರ್ ಕೃತ್ಯಾಂ ವಿಶ್ಯಾಂತ್ ತೆ ಸಾಂಗ್ತಾತ್ ತೆಂ ಆಮಿ ಆಮ್ಚೇ ‌ಆಮ್ಚೇ ಮಾಯ್‍ಭಾಶೆನ್ ಆಯ್ಕಾತಾಂವ್!”

ಶ್ಲೋಕ್:‌ ಧಾಡ್‌ ತುಜ್ಯಾ ಅತ್ಮ್ಯಾಕ್‌,ಸರ್ವೆಸ್ಪರಾ,
        ಆನಿ ಸಂಸಾರಾಚೆಂ ರೂಪ್‌ ತುಂ ನವೆಂ ಕರ್.

1. ಅತ್ಮ್ಯಾ ಮ್ಹಜ್ಯಾ, ಸರ್ವೆಸ್ಪರಾಕ್‌ ನಾಂವಾಡ್:‌
   ಸರ್ವೆಸ್ಪರಾ,ಮ್ಹಜ್ಯಾ ದೆವಾ,ಕಿತ್ಲೊ ತುಂ ವರ್ತೊ!
   ಕಿತ್ಲಿಂ ವಿವಿಧ್‌ ತುಜಿಂ ಕೃತ್ಯಾಂ,ಸರ್ವೆಸ್ಪರಾ,
   ಪ್ರಥ್ವಿ ಸಗ್ಳಿ ತುಜ್ಯಾ ರಚ್ನಾಂನಿ ಭರ್ಲ್ಯಾ.
2. ತುಂ ತುಜೆಂ ತೊಂಡ್‌ ಲಿಪಯ್ತಾನಾ ರಚ್ನಾಂ ಘಾಬಾರ್ತಾತ್‌,
   ತುಂ ಪ್ರಾಣ್‌ ಮಾತ್ರ್‌ ಕಾಡ್‌, ತಿಂ ಮೊರುನ್‌ ಪರ್ತ್ಯಾನ್‌ ಧುಳಿಕ್‌ ವೆತಾತ್.
   ಪುಣ್‌ ತುಂ ಸ್ವಾಸ್‌ ದಿಶಿ ಜಾಲ್ಯಾರ್‌,ತಿಂ ಪರತ್‌ ರಚೊನ್‌ ಯೆತಾತ್‌,
   ಅಶೆಂ ಪ್ರಿಥುಮೆಚೆಂ ರೂಪ್‌ ತುಂ ನವೆಂ ಕರ್ತಾಯ್‌.
3. ಸರ್ವೆಸ್ಪರಾಕ್‌ ಜಾಂವ್‌ ಮಹಿಮಾ ಸಾಸ್ಣಾಚ್ಯಾ ಸಾಸ್ಣಾಕ್!‌
   ಆಪ್ಲ್ಯಾಂ ಕೃತ್ಯಾಂನಿ ಜಾಂವ್‌ ತಾಕಾ ಅನಂದ್!‌
   ಮ್ಹಜಿಂ ಚಿತ್ನಾಂ ತಾಕಾ ಮಾನ್ವೊಂ!
   ವ್ಹಯ್‌,ಸರ್ವೆಸ್ಪರಾ ಥಂಯ್‌ ಆಸಾ ಮ್ಹಜೊ ಸಂತೊಸ್‌

ವಿ.ಸೂ: ದಯಾಕರ್ನ್‌ ಕೀರ್ತನ್‌ ಗಾಯ್ತಾನಾ ಹಾಂಗಾಸರ್‌ ದಿಲ್ಲೆ ಸಬ್ಧ್‌ ವಾಪಾರಾ.

ಸಾಂ. ಪಾವ್ಲುನ್‌ ಕೊರಿಂಥ್‌ಗಾರಾಂಕ್ ಬರಯ್-ಲ್ಲ್ಯಾ ಪಯ್ಲ್ಯಾ ಪತ್ರಾಂತ್ಲೆಂ ವಾಚಪ್.‌
ಭಾವಾಂ-ಭಯ್ಣಿಂನೋ,
ಪವಿತ್ರ್ ಅತ್ಮ್ಯಾಚ್ಯಾ ಪ್ರಭಾವಾವಿಣೆ ಕೊಣ್‍ಯೀ ಮನಿಸ್ “ಜೆಜುಚ್ ಸೊಮಿ” ಮ್ಹಣ್ ಸಾಂಗುಂಕ್‍ಯೀ ಸಕನಾ. ಅತ್ಮಿಕ್ ದೆಣಿಂ ವಿವಿಧ್; ಪುಣ್ ಏಕ್‍ಚ್ ಅತ್ಮೊ ತಿಂ ದಿತಾ. ಸೆವಾಯೀ ವೆವೆಗ್ಳ್ಯಾ ಥರಾಂಚಿ ಆಸಾ; ಪುಣ್ ಎಕಚ್ ಸೊಮಿಯಾಚಿ ಆಮಿ ಸೆವಾ ಕರ್ತಾಂವ್. ಆನಿ ಕಾಮಾಂಯೀ ವೆವೆಗ್ಳ್ಯಾ ಥರಾಂಚಿಂ ಆಸಾತ್; ಪುಣ್ ಸಮೆಸ್ತಾಂ ಥಂಯ್ ಸರ್ವ್ ಕಾಮಾಂ ಜ್ಯಾರಿ ಕರ್ತಾ ತೊ ದೇವ್ ಎಕ್ಲೊಚ್. ಹರೆಕ್ಲ್ಯಾ ಥಂಯ್ ದಿಸೊನ್ ಯೆತಾತ್ ತಿಂ ಪವಿತ್ರ್ ಅತ್ಮ್ಯಾಚಿಂ ದೆಣಿಂ ಸಮೆಸ್ತಾಂಚ್ಯಾ ಆದಾಯಾ ಪಾಸತ್ ಮ್ಹಣ್ ದಿಲ್ಯಾಂತ್.
ಕೂಡ್ ಏಕ್ ಜಾಲ್ಯಾರ್‌ಯೀ ಸಾಂದೆ ಜಾಯ್ತೆ ಆಸಾತ್; ಆನಿ ಕುಡಿಚೆ ತೆ ಸರ್ವ್ ಸಾಂದೆ, ಜಾಯ್ತೆ ಜಾಲ್ಯಾರ್‍ಯೀ, ಏಕ್‍ಚ್ ಕೂಡ್ ಜಾತಾತ್. ತೆಚ್ ಪರಿಂ ಕ್ರಿಸ್ತಾ ಥಂಯ್ ಘಡ್ತಾ. ಆಮಿ ಸಮೆಸ್ತಾಂನಿ, ಜುದೆವಾಂನಿ ಆನಿ ಹೆರ್ ಜಾತಿಂಚ್ಯಾಂನಿ, ಸ್ವತಂತ್ರ್ ಜಣಾಂನಿ ಆನಿ ಗುಲಾಮಾಂನಿ ಏಕ್ ಕೂಡ್ ಜಾವ್ಚೇ ಖಾತಿರ್ ಏಕ್‍ಚ್ ಆತ್ಮ್ಯಾ ಥಂಯ್ ಪವಿತ್ರ್‌ಸ್ನಾನ್ ಘೆತ್ಲಾಂ; ಆನಿ ಏಕ್‍ಚ್ ಅತ್ಮೊ ಆಮ್ಕಾಂ ಸಮೆಸ್ತಾಂಕ್ ಪೀವನ್‍ಸೊ ದಿಲಾ.

ಪವಿತ್ರ್ ಅತ್ಮ್ಯಾ ದೆಂವೊನ್ ಯೇ,
ಭರ್ ಕಾಳ್ಜಾಂ ತುಜ್ಯಾ ಭಾವಾರ್ಥ್ಯಾಂಚಿಂ,
ಆನಿ ಪೆಟಯ್ ತಾಂತುಂ ಉಜೊ ತುಜ್ಯಾ ಮೊಗಾಚೊ.

ಜೆಜು ಪುನರ್‌ಜಿವಂತ್‌ ಜಾಲೊ ತ್ಯಾ ಆಯ್ತಾರಾ ಸಾಂಜೆರ್ ಜುದೆವಾಂಚ್ಯಾ ಭಿಯಾನ್ ಶಿಸ್ ದಾರಾಂ ಧಾಂಪುನ್ ಭಿತರ್ ಎಕ್ಟಾಂಯ್ ಜಾವ್ನ್ ಆಸ್‍ಲ್ಲೆ. ತವಳ್ ಜೆಜು ತಾಂಚೆ ಮಧೆಗಾತ್ ಯೇವ್ನ್ ರಾವ್ಲೊ ಆನಿ “ಶಾಂತಿ ತುಮ್ಕಾಂ!” ಮ್ಹಣಾಲೊ. ಇತ್ಲೆಂ ಮ್ಹಣುನ್ ತಾಣೆ ತಾಂಕಾಂ ಆಪ್ಲೆ ಹಾತ್ ಆನಿ ಆಪ್ಲೆಂ ಕಡ್ವಳ್ ದಾಖಯ್ಲೆಂ. ಸೊಮಿಯಾಕ್ ದೆಖ್ತಚ್ ಶಿಸ್ ಸಂತೊಸಾನ್ ಭರ್ಲೆ. ಪರ್ತ್ಯಾನ್ ಜೆಜುನ್ ತಾಂಕಾಂ ಮ್ಹಳೆಂ: “ಶಾಂತಿ ತುಮ್ಕಾಂ! ಜಶೆಂ ಬಾಪಾನ್ ಮ್ಹಾಕಾ ಧಾಡ್ಲಾ, ತಶೆಂ ಹಾಂವ್ ತುಮ್ಕಾಂ ಧಾಡ್ತಾಂ.” ಅಶೆಂ ಮ್ಹಣುನ್ ತಾಣೆ ತಾಂಚೆರ್ ಸ್ವಾಸ್ ಸೊಡ್ಲೊ ಆನಿ ಮ್ಹಳೆಂ: “ಘೆಯಾ ಪವಿತ್ರ್ ಅತ್ಮ್ಯಾಕ್. ಕೊಣಾಚಿಂ ಪಾತ್ಕಾಂ ತುಮಿ ಬೊಗ್ಸಿತಾತ್ ತಿಂ ಬೊಗ್ಸತಲಿಂ; ಜಾಂಚಿಂ ಪಾತ್ಕಾಂ ತುಮಿ ಬೊಗ್ಸಿನಾತ್, ತಿಂ ಬೊಗ್ಸಶಿಂನಾತ್.”