📖 ಆಯ್ತಾರಾಚಿಂ ವಾಚ್ಪಾಂ

ಧರ್ಮ್‌ದುತಾಂಚಿಂ ಕೃತ್ಯಾಂ ಪುಸ್ತಕಾಂತ್ಲೆಂ ವಾಚಪ್
 ‌    ಮ್ಹಜ್ಯಾ ಗ್ರಂಥಾಚ್ಯಾ ಪಯ್ಲ್ಯಾ ಭಾಗಾಂತ್, ಏ ಥಿಯೋಫಿಲಾ, ಜೆಜುನ್ ಆಪ್ಲೆಂ ಕಾಮ್ ಸುರು ಕೆಲೆಂ ತವಳ್ ಥಾವ್ನ್ ತಾಕಾ ಸರ್ಗಾರ್ ಉಬಾರ್ನ್ ವ್ಹೆಲೊ ತೊ ದೀಸ್ ಪರ್ಯಾಂತ್, ತಾಣೆಂ ಕೆಲ್ಲ್ಯಾ ಆನಿ ಪವಿತ್ರ್ ಅತ್ಮ್ಯಾ ಮಾರಿಫಾತ್ ಆಪ್ಣೆಂ ವಿಂಚುನ್ ಕಾಡ್ಲಲ್ಯಾ ಧರ್ಮ್‍ದುತಾಂಕ್ ತಾಣೆಂ ಶಿಕಯ್‍ಲ್ಲ್ಯಾ ಸರ್ವ್ ಸಂಗ್ತಿಂ ವಿಶ್ಯಾಂತ್ ಹಾಂವೆಂ ಬರಯ್ಲಾಂ. ಆಪ್ಲ್ಯಾ ಮೊರ್ನಾ ಉಪ್ರಾಂತ್ಲ್ಯಾ ಕಾಳಾರ್ ಆಪುಣ್ ಪರ್ತ್ಯಾನ್ ಜಿವಂತ್ ಜಾಲಾ ಮ್ಹಣ್ ಸಬಾರ್ ರುಜ್ವಾತ್ಯಾಂನಿ ತಾಣೆಂ ತಾಂಕಾಂ ದಾಖೊವ್ನ್ ದಿಲೆಂ; ಚಾಳೀಸ್ ದೀಸ್ ಪರ್ಯಾನ್ ತೊ ತಾಂಕಾಂ ದಿಷ್ಟಿ ಪಡ್ಲೊ ಆನಿ ದೆವಾಚ್ಯಾ ರಾಜ್ಯಾ ವಿಶ್ಯಾಂತ್ ತಾಂಚೆ ಲಾಗಿಂ ಉಲಯ್ಲೊ.ಏಕ್ ಪಾವ್ಟಿಂ ತೆ ಸಾಂಗಾತಾ ಮೆಳ್‍ಲ್ಲ್ಯಾ ವೆಳಾರ್, ತಾಣಿಂ ಜೆರುಜಲೆಮಾಂತ್ಲೆ ಭಾಯ್ರ್ ಸರ್ನ್ ವಚನಯೆ, ಬಗರ್ ಬಾಪಾನ್ ಭಾಸಾಯ್ಲಲ್ಯಾ ದೆಣ್ಯಾಚಿ ವಾಟ್ ಪಳೆವ್ನ್ ರಾವಜೆ ಮ್ಹಣುನ್ ತಾಣೆಂ ತಾಂಕಾಂ ತಾಕಿದ್ ದಿಲಿ; ಆನಿ ತಾಣೆಂ ಮ್ಹಳೆಂ: “ತ್ಯಾ ಭಾಸಾವ್ಣ್ಯಾ ವಿಶ್ಯಾಂತ್ ಮ್ಹಜ್ಯಾಚ್ ತೊಂಡಾಂತ್ಲೆಂ ಅಶೆಂ ತುಮಿ ಆಯ್ಕಲಾಂ: ಜುವಾಂವ್ನ್ ಉದ್ಕಾಚೆಂ ಸ್ನಾನ್ ದಿಲೆಂ; ಪುಣ್ ತುಮಿ ಆನಿಕ್ ಥೊಡ್ಯಾಚ್ ದಿಸಾಂನಿ ಪವಿತ್ರ್ ಅತ್ಮ್ಯಾಚೆಂ ಸ್ನಾನ್ ಘೆತಲ್ಯಾತ್.”
     ಅಶೆಂ ಧರ್ಮ್‍ದೂತ್ ಸಾಂಗಾತಾ ಮೆಳ್‍ಲ್ಲ್ಯಾ ವೆಳಾರ್ ಜೆಜು ಲಾಗಿಂ ವಿಚಾರುಂಕ್ ಲಾಗ್ಲೆ: “ಸೊಮಿಯಾ, ಹ್ಯಾಚ್ ಕಾಳಾರ್ ವೆ ತುಂ ಇಸ್ರಾಯೆಲಾಚೆಂ ರಾಜ್ಯ್ ಪುನರ್‌ ಸ್ಥಾಪಿತ್ ಕರ್ತಲೊಯ್?” ಪುಣ್ ತಾಣೆಂ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: “ಬಾಪಾನ್ ಆಪ್ಲ್ಯಾ ಸ್ವಂತ್ ಅಧಿಕಾರಾನ್ ನಿಶ್ಚಿತ್ ಕೆಲ್ಲಿ ವೇಳ್‍ಘಡಿ ಸಮ್ಜುನ್ ಘೆವ್ಚೆಂ ಕಾಮ್ ತುಮ್ಚೆಂ ನ್ಹಯ್. ಪುಣ್ ತುಮ್ಚೆರ್ ಪವಿತ್ರ್ ಅತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ. ಉಪ್ರಾಂತ್ ಜೆರುಸಾಲೆಮಾಂತ್ ಸಗ್ಳ್ಯಾ ಜುದೇಯಾಂತ್ ಆನಿ ಸಾಮಾರಿಯಾಂತ್ ಆನಿ ಸಂಸಾರಾಚ್ಯಾ ಪೊಂತಾ ಥಾವ್ನ್ ಪೊಂತ್ ಪರ್ಯಾಂತ್ ತುಮಿ ಮ್ಹಾಕಾ ಸಾಕ್ಸ್ ದಿತಲ್ಯಾತ್.” ತಾಣೆಂ ಇತ್ಲೆಂ ಸಾಂಗುನ್ ಜಾತಚ್ ತೆ ಪಳೆವ್ನ್ ಆಸ್ತಾನಾಚ್ ತಾಕಾ ವಯ್ರ್ ವಯ್ರ್ ಉಬಾರ್ನ್ ವ್ಹೆಲೊ ಆನಿ ತಾಂಚ್ಯಾ ದೊಳ್ಯಾಂ ಮುಖಾವಯ್ಲೊ ತಾಕಾ ಏಕ್ ಕುಪಾನ್ ಲಿಪಯ್ಲೊ. ಅಶೆಂ ಚಡತ್ ವೆತಾನಾ ಆನಿ ತೆ ಆನಿಕ್‍ಯೀ ಮಳ್ಬಾಕ್‍ಚ್ ದೀಷ್ಟ್ ಲಾವ್ನ್ ಆಸ್ತಾನಾ, ಧವೆಂ ವಸ್ತುರ್ ನ್ಹೆಸ್ಲಲೆ ದೋಗ್ ಜಣ್ ಎಕಾಚ್ಚಾಣೆಂ ತಾಂಚೇ ಸರ್ಶಿನ್ ಉಬೆ ಜಾಲೆ. ತೆ ಮ್ಹಣಾಲೆ: “ಗಾಲಿಲೆಯಾಚ್ಯಾ ಮನ್ಶಾಂನೋ, ತುಮಿ ಅಶೆಂ ಮಳ್ಬಾಕ್ ದೀಷ್ಟ್ ಲಾವ್ನ್ ಕಿತ್ಯಾಕ್ ಉಬೆ ರಾವ್ಲ್ಯಾತ್? ಹೊ, ತುಮ್ಚೇ ಮಧ್ಲೊ ವಯ್ರ್ ಉಕೊಲ್ನ್ ವ್ಹೆಲಾ ತೊ ಜೆಜು, ಜಸೊ ತುಮಿ ತಾಕಾ ಸರ್ಗಾಕ್ ಚಡುನ್ ವೆತಾನಾ ಪಳೆಲಾ ತಸೊಚ್ ಪರ್ತ್ಯಾನ್ ಯೆತಲೊ.

ಶ್ಲೋಕ್: ಸಂತೊಸಾಚ್ಯಾ ಉದ್ಗಾರಾಂ ಮಧೆಂ ದೇವ್ ಸರ್ಗಾರ್ ಚಡ್ತಾ,
        ತುತೂರೆಚ್ಯಾ ನಾದಾನ್ ಸರ್ವೆಸ್ಪರ್ ಚಡತ್ತ್ ವೆತಾ.

1. ಸಮೆಸ್ತ್ ಪರ್ಜಾಂನೋ, ತಾಳಿಯೊ ಪೆಟಾ,
   ಬೊಬಾಟ್ ಮಾರುನ್ ದೆವಾಕ್ ಜಯ್ತಾ-ಗೀತ್ ಗಾಯಾ,
   ಅತ್ಯುನ್ನತ್ ದೆವಾಚಿ ಭಿರಾಂತ್ ಆಮ್ಕಾಂ ಆಸುಂಕ್ ಜಾಯ್‌ ,
   ಕಿತ್ಯಾಕ್, ಆಬ್ಳೆ, ಪ್ರಿಥುಮೆಚೊ ಅಧಿಕ್ ವ್ಹರ್ತೊ ರಾಜಾ ತೊ.
2. ಸಂತೊಸಾಚ್ಯಾ ಉದ್ಗಾರಾಂ ಮಧೆಂ ದೇವ್ ಸರ್ಗಾರ್ ಚಡ್ತಾ,
   ತುತೂರೆಚ್ಯಾ ನಾದಾನ್ ಸರ್ವೆಸ್ಪರ್ ಚಡತ್ತ್ ವೆತಾ.
   ಆಮ್ಚ್ಯಾ ದೆವಾಕ್ ವಂದಿಯಾ, ತಾಕಾ ವಾಖಣಾ!
   ಆಮ್ಚ್ಯಾ ರಾಯಾಕ್ ಹರ್ಸಿಯಾ, ತಾಕಾ ವಾಖಣಾ!
3. ಆಖ್ಖ್ಯೆ ಪ್ರಿತುಮೆಚೊ ರಾಜಾ ತೊ,
   ಸಗ್ಳೆ ತುಮ್ಚ್ಯೆ ನಿಪುಣಾಯೆನ್ ತಾಚಿ ಕೀರ್ತ್ ಗಾಯಾ.
   ಜನಾಂಗಾಚೆರ್ ಸರ್ವ್ ಅಧಿಕಾರ್ ತಾಣೆ ಘೆತ್ಲಾ,
   ಆಪ್ಲ್ಯಾ ಪವಿತ್ರ್ ಸಿಂಹಾಸನಾರ್ ತಾಣೆ ಬಸ್ಕಾ ಘೆತ್ಲ್ಯಾ.

ಸಾಂ. ಪಾವ್ಲುನ್‌ ಎಫೆಜ್-ಗಾರಾಂಕ್‌ ಬರಯ್‌ಲ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
        ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೊ ದೇವ್, ಮಹಿಮೆಚೊ ಬಾಪ್, ಆಪ್ಣಾಚಿ ತುಮ್ಕಾಂ ಸಾರ್ಕಿ ಒಳಕ್ ಮೆಳ್ಚೇ ಖಾತಿರ್ ಜಾಣ್ವಾಯೆನ್ ಭರ್ತಾ ತೊ ಆನಿ ಆಪ್ಲೆಂ ದರ್ಶನ್ ದಯಾ ಕರ್ತಾ ತೊ ಪವಿತ್ರ್ ಅತ್ಮೊ ತುಮ್ಕಾಂ ದೀಂವ್ ಮ್ಹಣ್ ಆಮಿ ಮಾಗ್ತಾಂವ್. ತುಮ್ಚ್ಯಾ ಅಂತಸ್ಕರ್ನಾಚೆ ದೊಳೆ ಆತಾಂ ಉಘಡ್ಲ್ಯಾತ್ ಆಸ್ತಾಂ ದೆವಾನ್ ತುಮ್ಕಾಂ ಕಸಲ್ಯಾ ಭರ್ವಶಾಕ್ ಆಪಯ್ಲ್ಯಾಂತ್ ಮ್ಹಣ್ ತುಮಿ ಸಮ್ಜಜೆ; ಆಪ್ಲೇ ಪರ್ಜೆಕ್ ಮ್ಹಣ್ ತಯಾರ್ ಕೆಲ್ಲ್ಯಾ ಕೆದ್ಯಾ ವರ್ತ್ಯಾ ಗ್ರೇಸ್ತ್-ಕಾಯೆಚ್ಯಾ ದಾಯ್ಜಾಂತ್ ತುಮ್ಕಾಂ ವಾಂಟೆಲಿ ಕೆಲ್ಯಾಂತ್ ಮ್ಹಣ್ ತುಮ್ಕಾಂ ಕಳಜೆ; ಆಪ್ಣಾಚೆರ್ ಭಾವಾರ್ಥ್ ದವರ್ತಲ್ಯಾಂ ಥಂಯ್ ತೊ ದಾಖಯ್ತಾ ತಿ ಪದ್ವಿ ಕಿತ್ಲಿ ಶ್ರೇಷ್ಠ್ ಮ್ಹಣ್ ತುಮಿ ಜಾಣಾ ಜಾಯ್ಜೆ- ಹೆಂಚ್ ಮ್ಹಜೆಂ ಮಾಗ್ಣೆಂ. ಹೇಚ್ ಪದ್ವೇ ವರ್ವಿಂ ಆಪ್ಲ್ಯಾ ಪುತಾಕ್ ತಾಣೆಂ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲೊ ಆನಿ ಸರ್ಗಾರಾಜ್ಯಾಂತ್ ಆಪ್ಲ್ಯಾ ಉಜ್ವ್ಯಾಕ್ ಶಿಯಾಸಣಾರ್ ಬಸಯ್ಲೊ. ಸಮೆಸ್ತ್ ಪ್ರಧಾನ್ಯಾಂ ಆನಿ ಅಧಿಕಾರ್ಯಾಂ, ಪದ್ವ್ಯಾಂ ಆನಿ ಪ್ರಭುತ್ವಾಂ ವಯ್ರ್ ಕ್ರೀಸ್ತ್ ಆಪ್ಲೆಂ ರಾಜ್ಯ್ ಚಲಯ್ತಾ. ಹ್ಯಾ ಸಂಸಾರಾಚೇ ವಾ ಫುಡ್ಲ್ಯಾ ಸಂಸಾರಾಚೇ ಖಂಯ್ಚೆಯೀ ಪದ್ವೆ ಪ್ರಾಸ್ ತಾಚಿ ಪದ್ವಿ ವರ್ತಿ. ಸರ್ವ್ ವಸ್ತು ತಾಚ್ಯಾ ಪಾಂಯಾಂಥಳಾ ಘಾಲ್ಲ್ಯಾ ದೆವಾನ್, ತಾಕಾ ಪವಿತ್ರ್ ಸಭೆಚೆಂ ಮಸ್ತಕ್ ನೆಮ್ಲಾ. ತಿ ಪವಿತ್ರ್ ಸಭಾ ತಾಚಿಚ್ ಕೂಡ್; ಸಗ್ಳ್ಯೊ ವಸ್ತು ಸರ್ವ್ ಥರಾಂನಿ ಸಂಪೂರ್ಣ್ ಕರ್ತಲ್ಯಾ ವರ್ವಿಂ ತಿ ಕೂಡ್ ಸಂಪೂರ್ಣ್ ಜಾಲ್ಯಾ.

ವಚಾ ಆನಿ ಸಮೇಸ್ತ್ ಪರ್ಜಾಂಕ್ ಶಿಕಯಾ, ಮ್ಹಣ್ತಾ ಸೊಮಿ,
ಆನಿ ಸಂಸಾರಾಚೆಂ ಅಂತ್ ಪರ್ಯಾಂತ್ ಹಾಂವ್ ತುಮ್ಚೆ ಸಾಂಗಾತಾ ಆಸ್ತೊಲೊಂ.

ತವಳ್‌ ಇಕ್ರಾ ಶಿಸ್ ಗಾಲಿಲೆಯಾಕ್ ಗೆಲೆ ಆನಿ ಜೆಜುನ್ ತಾಂಕಾಂ ಮೆಳೊಂಕ್ ಸಾಂಗ್‍ಲ್ಲ್ಯಾ ದೊಂಗ್ರಾರ್ ಯೇವ್ನ್ ಪಾವ್ಲೆ. ತಾಕಾ ಪಳೆತಚ್ ಶಿಸಾಂನಿ ತಾಕಾ ನಮಸ್ಕಾರ್ ಕೆಲೊ, ತಾಂಚೇ ಭಿತರ್ಲ್ಯಾ ಥೊಡ್ಯಾಂಚೊ ದುಭಾವ್ ತವಳ್ ಪರ್ಯಾನ್ ವಚುಂಕ್ ನಾತ್‍ಲ್ಲೊ. ಜೆಜು ಲಾಗಿಂ ಯೇವ್ನ್, ತಾಂಚೆಲಾಗಿಂ ಉಲೊವ್ನ್ ಮ್ಹಣಾಲೊ: “ಸರ್ಗಿಂ ಆನಿ ಸಂಸಾರಿಂ ದೆವಾನ್ ಮ್ಹಾಕಾ ಸರ್ವ್ ಪದ್ವಿ ದಿಲ್ಯಾ. ದೆಕುನ್ ವಚಾ ಆನಿ ಸಮೆಸ್ತ್ ಪರ್ಜಾಂಚೆ ಶಿಸ್ ಕರಾ; ಬಾಪಾಚೇ ಆನಿ ಪುತಾಚೇ ಆನಿ ಪವಿತ್ರ್ ಅತ್ಮ್ಯಾಚೇ ನಾಂವಿಂ ತಾಂಕಾಂ ಪವಿತ್ರ್ ಸ್ನಾನ್ ದಿಯಾ; ಆನಿ ಹಾಂವೆಂ ತುಮ್ಕಾಂ ದಿಲ್ಲ್ಯೊ ಸರ್ವ್ ಆಜ್ಞಾ ಪಾಳುಂಕ್ ತಾಂಕಾಂ ಶಿಕಯಾ. ಆನಿ ಹಾಂವ್, ಸದಾಂಕಾಲ್, ಸಂಸಾರಾಚಿ ಆಖೇರ್ ಪರ್ಯಾನ್ ತುಮ್ಚೇ ಸಾಂಗಾತಾ ಆಸ್ತಲೊಂ ಮ್ಹಣ್ ಉಗ್ಡಾಸ್ ದವರಾ.”