📖 ಆಯ್ತಾರಾಚಿಂ ವಾಚ್ಪಾಂ

ಧರ್ಮ್‌ದುತಾಂಚಿಂ ಕೃತ್ಯಾಂ ಪುಸ್ತಾಕಾಂತ್ಲೆಂ ವಾಚಪ್
ತವಳ್‌ ಫಿಲಿಪ್ ಸಾಮಾರಿಯಾ ಶಹರಾಕ್ ಗೆಲೊ ಆನಿ ಥಂಯ್ ಕ್ರಿಸ್ತಾಕ್ ಪರ್ಗಟುಂಕ್ ಲಾಗ್ಲೊ. ತಾಚಿ ಶಿಕೊವ್ಣ್ ಆಯ್ಕುನ್ ಆನಿ ತಾಣೆಂ ಕೆಲ್ಲಿಂ ಅಚರ್ಯಾಂ ಪಳೆವ್ನ್, ಫಿಲಿಪಾಚ್ಯಾ ಸಂದೇಶಾಕ್ ಲೊಕಾಜಮ್ಯಾಂನಿ ಏಕ್ ಮನಾನ್ ಗಮನ್ ದಿಲೆಂ. ದೆಂವ್ಚಾರ್ ಲಾಗ್‍ಲ್ಲ್ಯಾ ಸಬಾರಾಂ ಥಾವ್ನ್ ಅಶುದ್ಧ್ ಆತ್ಮೆ ಕಿಕ್ರಾಟ್ಯೊ ಮಾರ್ನ್ ಭಾಯ್ರ್ ವೆತಾಲೆ; ಜಾಯ್ತೆ ಆರ್‍- ಮಾರ್‌ಲ್ಲೆ ಆನಿ ಪಾಂಗ್ಳೆ ಗೂಣ್ ಜಾತಾಲೆ. ಹ್ಯಾ ಪಾಸತ್ ತೆಂ ಶಹರ್ ವ್ಹಡ್ ಸಂತೊಸಾನ್ ಆಸ್ಲೆಂ. ಸಾಮಾರಿಯಾಗಾರಾಂನಿ ದೆವಾಚೆಂ ಉತಾರ್ ಮಾನುನ್ ಘೆತ್ಲೆಂ. ಹಿ ಖಬರ್ ಜೆರುಜಲೆಮಾಂತ್ ಆಸ್ಲಲ್ಯಾ ಧರ್ಮ್‍ದುತಾಂನಿ ಆಯ್ಕಲಿ; ಆನಿ ತಾಣಿ ಪೆದ್ರುಕ್ ಆನಿ ಜುವಾಂವ್ಕ್ ತಾಂಚೆ ಸರ್ಶಿಂ ಧಾಡ್ಲೆ. ತೆ ಥಂಯ್ಸರ್ ಪಾವ್ತಚ್ ಥಂಯ್ಚ್ಯಾ ಭಾವಾರ್ಥ್ಯಾಂನಿ ಪವಿತ್ರ್ ಅತ್ಮ್ಯಾಕ್ ಘೆಶೆಂ ತಾಂಣಿಂ ತಾಂಚೆ ಪಾಸತ್ ಮಾಗ್ಣೆಂ ಕೆಲೆಂ. ಕಿತ್ಯಾಕ್ ತಾಂಚೆ ಮಧ್ಲ್ಯಾ ಕೊಣಾಚೆರ್‌ಯೀ ತೆದೊಳ್ ಪರ್ಯಾನ್ ಪವಿತ್ರ್ ಅತ್ಮೊ ದೆಂವುಂಕ್ ನಾತ್ಲೊ; ತಾಂಕಾಂ ಸೊಮಿಯಾ ಜೆಜುಚ್ಯಾ ನಾಂವಾನ್ ಪವಿತ್ರ್ ಸ್ನಾನ್ ಮಾತ್ರ್ ದಿಲ್ಲೆಂ. ತವಳ್ ಪೆದ್ರುನ್ ಆನಿ ಜುವಾಂವ್ನ್ ತಾಂಚೆರ್ ಆಪ್ಲೆ ಹಾತ್ ದವರ್ಲೆ ಆನಿ ತಾಣಿಂ ಪವಿತ್ರ್ ಅತ್ಮೊ ಘೆತ್ಲೊ.

ಶ್ಲೋಕ್: ಭುಮಿಚ್ಯಾ ನಿವಾಸ್ಯಾಂನೋ, ದೆವಾಕ್ ಅನಂದಾಚಿ ಬೋಬ್ ಉಠಯಾ.

1. ಭುಮಿಚ್ಯಾ ನಿವಾಸ್ಯಾಂನೋ, ದೆವಾಕ್ ಅನಂದಾಚಿ ಬೋಬ್ ಉಠಯಾ.
   ತಾಚಿ ಮಹಿಮಾ ಗಿತಾಂ-ಗಾಯಾನಾಂನಿ ವರ್ನಿಯಾ;
   ತಾಚಿ ಕೀರ್ತ್ ಗಾಜಯಾ,
   ದೆವಾಕ್ ಸಾಂಗಾ, ‘ಕಿತ್ಲಿಂ ವಿಚಿತ್ರ್ ತುಜಿಂ ಕರ್ತುವಾಂ’.
2. ಸಗ್ಳಿ ಪೃಥ್ವಿ ತುಜ್ಯೆ ಮುಖಾರ್ ಸರ್ಪಡ್ತಾ,
   ತುಜಿ ವಾಖಣ್ಣಿ ಕರ‍್ತಾ, ತುಜ್ಯಾ ನಾಂವಾಚಿ ಕೀರ್ತ್ ಗಾಯ್ತಾ.
   ಯೆಯಾ ಆನಿ ದೆವಾಚಿಂ ಕರ್ತುವಾಂ ಪಳೆಯಾ
   ಮನ್ಶ್ಯಾಂ ಮಧೆಂ ಆಮ್ಕಾಂ ಥಟಾಕ್ಕ್ ಕರ್ತಾತ್‌ ತಸಲಿಂ, ತಾಚಿಂ ಕಾಮಾಂ.
3. ದರ‍್ಯೊ ತಾಣೆ ಸುಕಿ ಧರ್ಣ್ ದಿಸ್ತಾ ಪರ‍್ಯಾನ್ ಸುಕಯ್ಲೊ,
   ಸುಕ್ಲಲ್ಯಾ ಆಳ್ವ್ಯಾಂತ್ಲ್ಯಾನ್ ಲೋಕ್ ಪಾಂಯ್ ಭಿಜನಾಸ್ತಾಂ ಉತರ‍್ಲೊ.
   ಹ್ಯಾ ಪಾಸತ್ ಆಮಿ ತಾಚ್ಯೆ ಉದೆಶಿಂ ಸಂತೊಸ್ ಪಾವ್ಯಾಂ,
   ತೊ ಆಪ್ಲ್ಯಾ ಪದ್ವೆನ್ ಸದಾಂಚ್ ರಾಜ್ವಟ್ ಚಲಯ್ತಾ.
4. ದೆವಾಚ್ಯಾ ಭಕ್ತಾಂನೋ, ತುಮಿ ಸಮೆಸ್ತ್ ಯೆಯಾ,
   ದೆವಾನ್ ಮ್ಹಜೆ ಪಾಸತ್ ಕಿತೆಂ ಕೆಲಾಂ ತೆಂ ವರ್ನಿತಾಂ, ಆಯ್ಕಾ:
   ಮ್ಹಜ್ಯಾ ಮಾಗ್ಣ್ಯಾಚಿ ದೆವಾನ್ ಬೆಪರ್ವಾ ಕರುಂಕ್ ನಾ,
   ಮ್ಹಜೆ ವಯ್ಲಿ ದಯಾ ತಾಣೆ ಪಾಟಿಂ ಕಾಡುಂಕ್ ನಾ;
   ತಾಕಾ ಜಾಂವ್ ಮಹಿಮಾ.

ಸಾಂ. ಪೆದ್ರುಚ್ಯಾ ಪಯ್ಲ್ಯಾ ಪತ್ರಾಂತ್ಲೆಂ ವಾಚಪ್‌

ಪ್ರಿತಿ ಮೊಗಾಚ್ಯಾಂನೋ,
ಕ್ರಿಸ್ತಾಕ್ ಸೊಮಿ ಮ್ಹಣ್ ತುಮ್ಚ್ಯಾ ಅಂತಸ್ಕರ್ನಾಂನಿ ಮಾನಾನ್ ಒಳ್ಕಾ. ತುಮ್ಚೆ ಥಂಯ್ ಆಸ್ಲಲ್ಯಾ ಭರ್ವಶಾಚೆಂ ಕಾರಣ್ ವಿಚಾರ್ತಲ್ಯಾ ಹರ್ಯೆಕ್ಲ್ಯಾಕ್ ಜಾಪ್ ದಿಂವ್ಕ್ ತುಮಿ ಸದಾಂಚ್ ತಯಾರ್ ಆಸುಂಕ್ ಜಾಯ್, ತರಿಪುಣ್ ಹೆಂ ಕಾಮ್ ನಮ್ರತೆನ್ ಆನಿ ಮರ್ಯಾದ್ ದೀವ್ನ್ ಕರಾ. ತುಮ್ಚೆಂ ಅಂತಸ್ಕರ್ನ್ ನಿತಳ್ ದವರಾ, ಕಿತ್ಯಾಕ್ ಕ್ರಿಸ್ತಾ ಥಂಯ್ ತುಮಿ ಆಧಾರ್ತಾತ್ ತೆ ಬರೆ ಚಾಲಿಚಿ ನಿಂದಾ ಕರ್ನ್ ಕೊಣ್-ಯೀ ತುಮ್ಕಾಂ ಉಲಯ್ತಿತ್ ಜಾಲ್ಯಾರ್, ಉಲಯ್ತಾತ್ ತೆಚ್ ಲಜೆಕ್ ಪಡ್ತಲೆ. ಕಿತ್ಯಾಕ್ ತುಮಿ ಕಷ್ಟ್ ಸೊಸಿಜೆ ಮ್ಹಣ್ ದೆವಾಚಿ ಖುಶಿ ಜಾಲ್ಯಾರ್ ವಾಯ್ಟ್ ಆಧಾರ್ನ್ ಶಿಕ್ಷಾ ಸೊಸ್ಚೆ ಪ್ರಾಸ್ ಬರೆಂ ಆಧಾರ್ಲಲೆ ಖಾತಿರ್ ತುಮಿ ಕಷ್ಟ್ ಸೊಸ್ಚೆಂ ಚಡ್ ಬರೆಂ. ಅಶೆಂ ಕ್ರೀಸ್ತ್, ನಿರಪ್ರಾಧಿ ಜಾಲ್ಯಾರ್‌ಯೀ, ಅಪ್ರಾಧ್ಯಾಂ ಪಾಸತ್, ಮ್ಹಣ್ಜೆ ಆಮಾ ಪಾಪಿಯಾಂಕ್ ದೆವಾ ಥಂಯ್ ಪಾಟಿಂ ಹಾಡ್ಚೆ ಪಾಸತ್ ಎಕ್‍ಚ್ ಪಾವ್ಟಿಂ ಮೊರ್ನ್ ಪಾವ್ಲೊ. ಕುಡಿಂತ್ ತಾಚೊ ಜೀವ್ ಕಾಡ್ಲೊ ಜಾಲ್ಯಾರ್‌ಯೀ ಆತ್ಮಿಂ ತಾಕಾ ಪರ್ತ್ಯಾನ್ ಜಿವಂತ್ ಕೆಲೊ.

ಜೊ ಕೋಣ್ ಮ್ಹಜೊ ಮೋಗ್ ಕರ್ತಾ,
ತೊ ಮ್ಹಜೆಂ ಉತರ್ ಪಾಳ್ತಾ, ಮ್ಹಣ್ತಾ ಸೊಮಿ,
ತವಳ್ ಮ್ಹಜೊ ಬಾಪ್ ತಾಚೊ ಮೋಗ್ ಕರ್ತಾ,
ಆನಿ ಆಮಿ ದೊಗೀ ತಾಚೆಶಿಂ ಯೆತಾಂವ್.

ತ್ಯಾ ವೆಳಿಂ ಜೆಜುನ್‌ ಆಪ್ಲ್ಯಾ ಶಿಸಾಂಕ್‌ ಮ್ಹಳೆಂ:"ತುಮಿ ಮ್ಹಜೊ ಮೋಗ್ ಕರ್ತಾತ್ ಜಾಲ್ಯಾರ್ ಮ್ಹಜೆ ಉಪದೆಸ್ ಪಾಳ್ತಲ್ಯಾತ್. ತವಳ್ ಹಾಂವ್ ಬಾಪಾಲಾಗಿಂ ಮಾಗ್ತಲೊಂ, ತೊ ತುಮ್ಕಾಂ ಏಕ್ ಮಜತ್‍ದಾರ್ ದಿತಲೊ ಆನಿ ಹೊ ತುಮ್ಚೆ ಸವೆಂ ಸದಾಂಕಾಳ್ ರಾವ್ತಲೊ. ತೊಚ್ ತೊ ಸತಾಚೊ ಅತ್ಮೊ. ಸಂಸಾರ್ ತಾಕಾ ಘೆಂವ್ಕ್ ಸಕನಾ. ಕಿತ್ಯಾಕ್ ಸಂಸಾರ್ ತಾಕಾ ಪಳೆನಾ, ತಾಕಾ ಒಳ್ಕಾಯಿನಾ. ಪುಣ್ ತುಮಿ ತಾಕಾ ಒಳ್ಕತಾತ್; ಕಿತ್ಯಾಕ್ ತುಮ್ಚೆ ಸಾಂಗಾತಾ ಆನಿ ತುಮ್ಚೆ ಥಂಯ್ ತೊ ರಾವ್ತಾ.
ಹಾಂವ್ ತುಮ್ಕಾಂ ಅನಾಥಾಂಬರಿ ಸೊಡ್ನ್ ವಚನಾ; ಹಾಂವ್ ತುಮ್ಚೆಶಿಂ ಪರ್ತ್ಯಾನ್ ಯೆತಲೊಂ. ಆನಿ ಥೊಡ್ಯಾ ವೆಳಾ ಉಪ್ರಾಂತ್ ಸಂಸಾರ್ ಮ್ಹಾಕಾ ಪಳೆಂವ್ಚೊನಾ, ಪುಣ್ ತುಮಿ ಮ್ಹಾಕಾ ಪಳೆತಲ್ಯಾತ್. ಹಾಂವ್ ಜಿಯೆತಾಂ ದೆಕುನ್ ತುಮಿಯೀ ಜಿಯೆತಲ್ಯಾತ್. ಹಾಂವ್ ಮ್ಹಜ್ಯಾ ಬಾಪಾ ಥಂಯ್, ತುಮಿ ಮ್ಹಜೆ ಥಂಯ್ ಆನಿ ಹಾಂವ್‌ ತುಮ್ಚೆ ಥಂಯ್ ಆಸಾ ಮ್ಹಣ್ ತ್ಯಾ ದಿಸಾ ತುಮಿ ಸಮ್ಜತಲ್ಯಾತ್. ಮ್ಹಜೆ ಉಪದೆಸ್ ಘೆವ್ನ್ ತೆ ಪಾಳ್ತಾ ತೊ ಮ್ಹಜೊ ಮೋಗ್ ಕರ್ತಾ. ಜೊ ಕೊಣ್ ಮ್ಹಜೊ ಮೋಗ್ ಕರ್ತಾ, ತಾಚೊ ಮ್ಹಜೊ ಬಾಪ್ ಮೋಗ್ ಕರ್ತಲೊ; ಹಾಂವ್‍ಯೀ ತಾಚೊ ಮೋಗ್ ಕರ್ತಲೊಂ ಆನಿ ತಾಕಾ ಮ್ಹಜಿ ಒಳಕ್ ದಿತಲೊಂ.”ಯಾಜಕ್: ಸೊಮ್ಯಾಚೆಂ ಶುಭ್‌ವರ್ತಮಾನ್ಲೋಕ್: ವಾಖಣ್ಣಿ ತುಕಾ, ಕ್ರಿಸ್ತಾ.