📖 ಆಯ್ತಾರಾಚಿಂ ವಾಚ್ಪಾಂ

ಧರ್ಮ್‌ದುತಾಂಚಿಂ ಕೃತ್ಯಾಂ ಪುಸ್ತಾಕಾಂತ್ಲೆಂ ವಾಚಪ್
ತ್ಯಾ ದಿಸಾಂನಿ ಶಿಸಾಂಚೊ ಸಂಖೊ ಚಡತ್‌ ವೆತಲೊ ಆಸ್ತಾಂ, ಗ್ರೇಕ್‌ ಭಾಸ್‌ ಉಲಯ್ತಾಲ್ಯಾ ಆನಿ ಹಿಬ್ರೂ ಭಾಸ್‌ ಉಲಯ್ತಲ್ಯಾ ಜುದೆವಾಂ ಮಧೆಂ ಮನಾಭೇದ್‌ ಉಠ್ಲೊ. ದಿಸ್ಪಡ್ತೇ ಸೆವೆಂತ್‌ ಆಪ್ಲ್ಯಾ ವಿಧ್ವಿಂಚಿ ಲಕ್ಷಾ ಕರಿನಾತ್‌ ಮ್ಹಣುನ್ ಗ್ರೇಕ್‌ ಉಲಯ್ತಲೆ ಜುದೆವ್‌ ಭಾವ್‌ ಗುಣ್ಗುಣುಂಕ್‌ ಲಾಗ್ಲೆ. ದೆಕುನ್‌ ಬಾರಾ ಜಣ್‌ ಧರ್ಮ್‌ದುತಾಂನಿ ಶಿಸಾಂಚಿ ಸಗ್ಳಿ ಜಮಾತ್‌ ಆಪೊವ್ನ್,ತಾಂಚೇ ಲಾಗಿಂ ಮ್ಹಳೆಂ:"ಆಮಿ ದೆವಾಚೆಂ ಉತರ್‌ ಪರ್ಗಟ್‌ ಕರ್ಚೆಂ ಕಾಮ್‌ ಕುಶಿನ್‌ ಲೊಟುನ್‌,ಖಾಣಾ ಜೆವ್ಣಾಚಿ ಖಬರ್‌ ಘೆವ್ಚಿ ಸಮಾ ನ್ಹಯ್.ದೆಕುನ್‌ ಭಾವಾಂನೋ, ತುಮ್ಚೇ ಮಧ್ಲೆ ಲೋಕ್‌ ಮಾನ್ತಾ ತಸಲೆ, ಸಾಂಗಾತಾಚ್‌ ಪವಿತ್ರ್‌ ಅತ್ಮ್ಯಾನ್‌ ಆನಿ ಜಾಣ್ವಾಯೆನ್‌, ಭರ್ಲಲೆ ಸಾತ್‌ ಜಣ್‌ ವಿಂಚುನ್‌ ಕಾಡಾ. ಹೆಂ ಕಾಮ್‌ ಆಮಿ ತಾಂಚೆ ಅಧೀನ್‌ ಕರ್ತಾಂವ್‌ ಆನಿ ಆಮಿ ಆಮ್ಚೊ ವೇಳ್‌ ಮಾಗ್ಣ್ಯಾಂತ್‌ ಆನಿ ದೆವಾಚೆಂ ಉತರ್ ಪರ್ಗಟ್‌ ಕರ್ಚ್ಯಾಂ ಕಾಮಾಂತ್‌ ಖರ್ಚಿತಾಂವ್."‌ ಹಿ ಅಲೋಚನ್‌ ಸಗ್ಳೇ ಜಮಾತೆಕ್‌ ಪಸಂದ್‌ ಜಾಲಿ. ತಾಣಿಂ ಹ್ಯಾ ಸಾತ್‌ ಜಣಾಂಕ್‌ ವಿಂಚುನ್‌ ಕಾಡ್ಲೆ: ಭಾವಾರ್ಥಾನ್‌ ಆನಿ ಪವಿತ್ರ್‌ ಅತ್ಮ್ಯಾನ್‌ ಭರ್ಲಲ್ಯಾ ಸ್ತೆಫಾನಾಕ್‌,ಫಿಲಿಪಾಕ್,ಪ್ರೊಖೊರಾಕ್‌,ನಿಕಾನೊರಾಕ್‌,ತಿಮೊನಾಕ್‌,ಪಾರ್ಮೆನಾಕ್‌ ಆನಿ ಜುದೆವ್‌ ಧರ್ಮಾಕ್‌ ಮತಾಂತರ್‌ ಜಾಲ್ಲ್ಯಾ ಅಂತಿಯೊಕಾಚ್ಯಾ ನಿಕ್ಲಾಂವ್ಕ್.‌ ಹಾಂಕಾಂ ತಾಂಣಿಂ ಧರ್ಮ್‌ದುತಾಂ ಮುಖಾರ್‌ ಉಬೆಂ ಕೆಲೆ. ಧರ್ಮ್‌ದುತಾಂನಿ ಪಯ್ಲೆಂ ಮಾಗ್ಣೆಂ ಕೆಲೆಂ ಆನಿ ಉಪ್ರಾಂತ್‌ ತಾಂಚೆರ್‌ ಹಾತ್‌ ದವರ್ಲೆ. ದೆವಾಚೆಂ ಉತರ್‌ ಆತಾಂ ವಿಸ್ತಾರತ್‌ ಗೆಲೆಂ.ಜೆರುಸಾಲೆಮಾಂತ್‌ ಆಸ್ಲಲ್ಯಾ ಶಿಸಾಂಚೊ ಸಂಖೊ ವಾಡತ್‌ ಆಯ್ಲೊ ಆನಿ ಯಾಜಕಾಂ ಮಧ್ಲ್ಯಾ ಸಬಾರಾಂನಿಯೀ ಹೊ ಭಾವಾರ್ಥ್ ಘೆತ್ಲೊ.

ಶ್ಲೋಕ್: ಜಸೊ ತುಜೆರ್ ಆಮ್ಚೊ ವಿಶ್ವಾಸ್, ಸರ್ವೆಸ್ಪರಾ,ತಶಿ ಆಮ್ಚೆರ್ ದೆಂವುಂ ತುಜಿ ದಯಾ.

1. ನಿತಿವಂತಾಂನೋ, ಸರ್ವೆಸ್ಪರಾಕ್ ಉಲ್ಲಾಸಾಚಿಂ ಗಿತಾಂ ಗಾಯಾ,
   ವಿಧೇಯ್ ಕಾಳ್ಜಾಚ್ಯಾಂಕ್ ಅಸಲಿ ಸ್ತುತಿ ಸೊಭ್ತಾ.
   ವಿಣಿಂ ವ್ಹಾಜವ್ನ್ ಸರ್ವೆಸ್ಪರಾಕ್ ವಾಖಣಾ,
   ಧಾ ಸರಿಯಾಂಚ್ಯೆ ಕಿನ್ನರೆನ್ ತಾಕಾ ಸಂಗೀತ್ ಕರಾ.
2. ಸರ್ವೆಸ್ಪರಾಚೆಂ ಉತರ್ ಖರೆಂಚ್ ಖರೆಂ,
   ಸಗ್ಳಿಂ ತಾಚಿಂ ಕರ್ತುವಾಂ ವಿಶ್ವಾಸಿಪಣಾಚಿಂ.
   ನ್ಯಾಯ್-ನಿತಿಚೊ ಸರ್ವೆಸ್ಪರ್ ಮೋಗ್ ಕರ‍್ತಾ,
   ತಾಚ್ಯಾ ವಿಶ್ವಾಸಿ ಮೊಗಾನ್ ಸಂಸಾರ್ ಸಗ್ಳೊ ಭರ‍್ಲಾ.
3. ಸರ್ವೆಸ್ಪರ್ ಜಾಲ್ಯಾರ್ ಆಪ್ಲಿ ಭಯ-ಭಕ್ತ್ ಆಸ್ಲಲ್ಯಾಂಚೆರ್,
   ಆಪ್ಲ್ಯಾ ವಿಶ್ವಾಸೀ ಮೊಗಾಚೆರ್ ಭರ್ವಸ್ತಲ್ಯಾಂಚೆರ್ ಜತ್ನೆನ್ ನದರ್ ಘಾಲ್ತಾ.
   ತೊಚ್ ತಾಂಕಾ ಮರ್ಣಾಂತ್ಲಿಂ ನಿವಾರ‍್ತಾ,
   ದುಕಳಾಚ್ಯಾ ಕಾಳಾರ್ ತಾಂಚೊ ಜೀವ್ ವಾಟಾಯ್ತಾ.

ಸಾಂ ಪೆದ್ರುಚ್ಯಾ ಪಯ್ಲ್ಯಾ ಪತ್ರಾಂತ್ಲೆಂ ವಾಚಪ್‌
ಭಾವಾಂ-ಭಯ್ಣಿಂನೋ,
ಸೊಮಿ ಜೆಜು ಜಾವ್ನಾಸಾ ತೊ ಜಿವಂತ್ ಫಾತರ್ ಮನ್ಶಾಂನಿ ಉಪ್ಕಾರ್ನಾ ಮ್ಹಣುನ್ ಕಾಡ್ನ್ ಉಡಯ್ಲಲೊ, ಪುಣ್ ದೆವಾನ್ ಮೊಲಾದಿಕ್ ಮ್ಹಣ್ ವಿಂಚುನ್ ಕಾಡ್ಲಲೊ. ದೆಕುನ್ ಏಕ್ ಅತ್ಮಿಕ್ ದೆವಾಳ್ ಉಬಾರುಂಕ್ ಜಿವೆ ಫಾತರ್ ತುಮಿ ಜಾಯಾ. ದೆವಾಕ್ ಮಾನ್ತಾತ್ ತಸಲಿಂ ಅತ್ಮಿಕ್ ಬಲಿದಾನಾಂ ಜೆಜು ಕ್ರಿಸ್ತಾ ಮಾರಿಫತ್ ಭೆಟೊವ್ನ್ ದಿತಲೊ ಏಕ್ ಪವಿತ್ರ್ ಯಾಜಕ್ ವರ್ಗ್ ತುಮಿ ಜಾಯ್ಜಯ್. ಪವಿತ್ರ್ ಪುಸ್ತಕ್ ಮ್ಹಣ್ತಾ: “ಪಳೆಯಾ, ಸಿಯೊನಾಂತ್ ಹಾಂವ್ ದವರ್ತಾಂ ಏಕ್ ಮುಲ್ಯಾ ಫಾತರ್,
ವಿಂಚುನ್ ಕಾಡ್ಲಲೊ ಆನಿ ಮೊಲಾದಿಕ್;
ತಾಚೆರ್ ಪಾತ್ಯೆವ್ನ್ ರಾವ್ಲಲೊ ಕೆದಿಂಚ್ ಲಜೆಕ್ ಪಡ್ಚೊನಾ”.
ತುಮ್ಕಾಂ, ಸತ್ಮಾನ್ತಲ್ಯಾಂಕ್, ತೊ ನಿಜಾಕ್-ಯೀ ಮೊಲಾದಿಕ್, ಪುಣ್ ಸತ್ಮಾನಿನಾತ್ ತಾಂಕಾಂ:
“ಬಾಂಧ್ತಲ್ಯಾಂನಿ ಉಪ್ಕಾರ್ನಾ ಮ್ಹಣುನ್ ಕಾಡ್ನ್ ಉಡಯ್ಲಲೊ,
ತೊಚ್ ಮುಲ್ಯಾಚೊ ಫಾತರ್ ಜಾಲೊ”.
“ಆದ್ಳತಾ ತಸಲೊ ಫಾತರ್ ತೊ, ಪಡುಂಕ್ ಕರ್ತಾ ತಸಲಿ ಶಿಳಾ ತೊ”. ಅಶೆಂ ಉತ್ರಾಕ್ ಪಾಳೊ ದೀವ್ನ್ ಸತ್ಮಾನಿನಾಂತ್ ತಿಂ ಹ್ಯಾ ಫಾತ್ರಾಕ್ ಆದ್ಳೊನ್ ಪಡ್ತಾತ್. ಹೆಂ ತಾಂಕಾಂ ದೆವಾಚೆಂಚ್ ನಿರ್ಮೊಣೆಂ. ಪುಣ್ ತುಮಿ ವಿಂಚುನ್ ಕಾಡ್ಲಲಿ ಪರ್ಜಾ, ರಾಯಾಳ್ ಯಾಜಕ್ ವರ್ಗ್, ಏಕ್ ಪವಿತ್ರ್ ರಾಷ್ಟ್ರ್ ಆನಿ ದೆವಾನ್ ಆಪ್ಲೆಂಚ್ ದಾಯ್ಜ್ ಕರ್ನ್ ಘೆತ್ಲಲೊ ಲೋಕ್. ಕಾಳೊಕಾ ಥಾವ್ನ್ ಆಪ್ಲ್ಯಾ ವಿಚಿತ್ರ್ ಉಜ್ವಾಡಾಕ್ ತುಮ್ಕಾಂ ಆಪಯ್ಲಲ್ಯಾ ದೆವಾಚಿಂ ಉತ್ತೀಮ್ ಕೃತ್ಯಾಂ ತುಮಿ ಗಾಜಯ್ಜಯ್ ಮ್ಹಣ್ ತಾಣೆ ತುಮ್ಕಾಂ ವಿಂಚ್ಲ್ಯಾಂತ್.

ಹಾಂವ್‌ಚ್‌ ವಾಟ್, ಹಾಂವ್‌ಚ್‌ ಸತ್ ಆನಿ ಹಾಂವ್‌ಚ್‌ ಜಿವಿತ್ ಮ್ಹಣ್ತಾ ಸೊಮಿ,
ಮ್ಹಜ್ಯೆ ಮಾರಿಫಾತ್‌ ಗೆಲ್ಯಾ ಶಿವಾಯ್ ಕೊಣಾಚ್ಯಾನ್‌ಯೀ ಬಾಪಾಶಿಂ ವಚುಂಕ್‌ ಜಾಯ್ನಾ.

ಜುವಾಂವ್‌ ಪರ್ಮಾಣೆಂ ಜೆಜು ಕ್ರಿಸ್ತಾಚಿ ಶುಭ್ ವಾರ್ತಾ
ತ್ಯಾ ವೆಳಿಂ ಜೆಜುನ್‌ ಆಪ್ಲ್ಯಾ ಶಿಸಾಂ ಲಾಗಿಂ ಮ್ಹಳೆಂ: “ತುಮಿ ಕಳ್ವಳ್ಚೆಂ ನ್ಹಯ್, ದೆವಾಚೆರ್ ವಿಶ್ವಾಸ್ ದವರಾ; ಮ್ಹಜೆರ್‌ಯೀ ವಿಶ್ವಾಸ್ ದವರಾ. ಮ್ಹಜ್ಯಾ ಬಾಪಾಚ್ಯಾ ಘರಾಂತ್ ಜಾಯ್ತಿಂ ಕುಡಾಂ ಆಸಾತ್. ನಾತ್‍ಲ್ಲಿಂ ಜಾಲ್ಯಾರ್ ಹಾಂವ್ ತುಮ್ಕಾಂ ಪಯ್ಲೆಂಚ್ ಸಾಂಗ್ತೊಂ. ಹಾಂವ್ ಆತಾಂ ವಚುನ್ ತುಮ್ಕಾಂ ಏಕ್ ಜಾಗೊ ತಯಾರ್ ಕರ್ತಾಂ. ಹಾಂವ್ ವಚುನ್ ತುಮ್ಕಾಂ ಎಕ್ ಜಾಗೊ ತಯಾರ್ ಕರ್ತಚ್, ಹಾಂವ್ ಆಸ್ತಲೊಂ ಥಂಯ್ ತುಮಿಯೀ ಆಸ್ಚ್ಯಾಕ್ ಹಾಂವ್ ಪಾಟಿಂ ಯೇವ್ನ್ ತುಮ್ಕಾಂ ಮ್ಹಜೆ ಸವೆಂ ಆಪೊವ್ನ್ ವ್ಹರ್ತಲೊಂ. ಹಾಂವ್ ವೆತಾಂ ಥಂಯ್ ವೆಚಿ ವಾಟ್ ತುಮಿ ಜಾಣಾಂತ್.” ತೊಮಾಸ್ ತವಳ್ ಮ್ಹಣಾಲೊ: “ಸೊಮಿಯಾ, ತುಂ ಖಂಯ್ ವೆತಾಯ್ ತೆಂ ಆಮಿ ನೆಣಾಂವ್; ತರ್ ಥಂಯ್ ವೆಚಿ ವಾಟ್ ಆಮಿ ಜಾಣಾ ಜಾವ್ಚಿ ಕಶಿ?” ಜೆಜುನ್ ತಾಕಾ ಜಾಪ್ ದಿಲಿ: “ಹಾಂವ್‍ಚ್ ವಾಟ್, ಸತ್ ಆನಿ ಜಿವಿತ್. ಮ್ಹಜೆ ಮಾರಿಫಾತ್ ಗೆಲ್ಯಾ ಶಿವಾಯ್ ಕೊಣಾಚ್ಯಾನ್‍ಯೀ ಬಾಪಾ ಸರ್ಶಿಂ ವಚುಂಕ್ ಜಾಯ್ನಾ. ತುಮಿ ಮ್ಹಾಕಾ ಒಳ್ಕತಾತ್ ದೆಕುನ್ ಮ್ಹಜ್ಯಾ ಬಾಪಾಕ್‍ಯೀ ತುಮಿ ಒಳ್ಕತಾತ್. ಪುಣ್ ಹ್ಯಾ ಫುಡಾಂ ತಾಕಾ ತುಮಿ ಒಳ್ಕತಾತ್ ಆನಿ ತಾಕಾ ತುಮಿ ಪಳೆಲಾ.” ತವಳ್ ಫಿಲಿಪಾನ್ ತಾಚೆಲಾಗಿಂ ಮ್ಹಳೆಂ: “ಸೊಮಿಯಾ, ಆಮ್ಕಾಂ ಬಾಪ್ ದಾಖಯ್. ತಿತ್ಲೆಂಚ್ ಆಮ್ಕಾಂ ಪುರೊ.” ಜೆಜು ತಾಕಾ ಮ್ಹಣಾಲೊ: “ಫಿಲಿಪಾ, ಇತ್ಲೊ ಕಾಳ್ ಹಾಂವ್ ತುಮ್ಚೆ ಸಾಂಗಾತಾ ಆಸುನ್‍ಯೀ, ಹಾಂವ್ ಕೊಣ್ ಮ್ಹಣ್ ತುಕಾ ಸಮ್ಜನಾಮೂ? ಜಾಣೆ ಮ್ಹಾಕಾ ಪಳೆಲಾ, ತಾಣೆಂ ಬಾಪಾಕ್‍ಯೀ ಪಳೆಲಾ. ತಶೆಂ ಆಸ್ತಾಂ ‘ಆಮ್ಕಾಂ ಬಾಪ್ ದಾಖಯ್’ ಮ್ಹಣ್ ತುಜ್ಯಾನ್ ಕಶೆಂ ಮ್ಹಣುಂಯೆತ್? ಹಾಂವ್ ಬಾಪಾಸವೆಂ ಆಸಾಂ ಆನಿ ಬಾಪ್ ಮ್ಹಜೆ ಸವೆಂ ಆಸಾಂ-ಹೆಂ ತುಂ ಸತ್ಮಾನಿನಾಯ್? ಹಾಂವ್ ತುಮ್ಚೆಲಾಗಿಂ ಉಲಯ್ತಾಂ ತಿಂ ಉತ್ರಾಂ ಮ್ಹಜೆಸ್ತಕಿಂಚ್ ಹಾಂವ್ ಉಲಯ್ನಾ. ಬಾಪ್‍ಚ್ ಮ್ಹಜೆ ಸವೆಂ ರಾವುನ್ ಆಪ್ಲಿಂ ಕಾಮಾಂ ಚಲಯ್ತಾ. ಹಾಂವ್ ಬಾಪಾ ಸವೆಂ ಆಸಾ ಮ್ಹಣುನ್ ಹಾಂವ್ ಸಾಂಗ್ತಾಂ ತೆಂ ತುಮಿ ಸತ್ಮಾನಾ. ನ್ಹಯ್ ಜಾಲ್ಯಾರ್ ಹಿಂ ಕಾಮಾಂ ಪಳೆವ್ನ್ ಪುಣ್‍ಯೀ ಸತ್ಮಾನಾ. ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಮ್ಹಾಕಾ ಸತ್ಮಾನ್ತಾ, ತೊ ಹಾಂವ್ ಕರ್ತಾಂ ತಿಂ ಕಾಮಾಂ ಕರ್ತಲೊ; ತಿತ್ಲೆಂಚ್ ನ್ಹಯ್, ತಾಚ್ಯಾಕ್‍ಯೀ ವರ್ತಿಂ ಕಾಮಾಂ ಕರ್ತಲೊ. ಕಿತ್ಯಾಕ್ ಹಾಂವ್ ಬಾಪಾ ಸರ್ಶಿಂ ವೆತಾಂ.