📖 ಆಯ್ತಾರಾಚಿಂ ವಾಚ್ಪಾಂ

ತವಳ್ ಪೆದ್ರು ಇಕ್ರಾ ಜಣಾಂ ಸಾಂಗಾತಾ ಉಬೊ ರಾವ್ಲೊ ಆನಿ ವ್ಹಡ್ಲ್ಯಾ ತಾಳ್ಯಾನ್ ಲೊಕಾಲಾಗಿಂ ಅಶೆಂ ಉಲೊಂವ್ಕ್ ಲಾಗ್ಲೊ: "ತರ್ ತುಮಿ ಖುರ್ಸಾರ್ ಮಾರ್ಲಲ್ಯಾ ತ್ಯಾಚ್ ಜೆಜುಕ್ ದೆವಾನ್ ಸೊಮಿ ಆನಿ ಕ್ರಿಸ್ತ್ ಕೆಲೊ ಮ್ಹಣ್ ಇಸ್ರಾಯೆಲಾಚೆಂ ಸಗ್ಳೆಂ ಘರಾಣೆಂ ದುಬಾವಾವಿಣ್ ಜಾಣಾ ಜಾಂವ್.”
ಹಿಂ ಉತ್ರಾಂ ಆಯ್ಕತಚ್ ತಾಂಚಿಂ ಕಾಳ್ಜಾಂ ಶಿಂದ್ಲಲೇಬರಿ ಜಾಲಿಂ ಆನಿ ಪೆದ್ರು ಲಾಗಿಂ ಆನಿ ಹೆರ್ ಧರ್ಮ್‍ದುತಾಂ ಲಾಗಿಂ ತಾಣಿಂ ಅಶೆಂ ವಿಚಾರ್ಲೆಂ: “ಭಾವಾಂನೋ, ತರ್ ಆಮಿ ಕಿತೆಂ ಕರಿಜೆ?” ತವಳ್ ಪೆದ್ರುನ್ ತಾಂಕಾಂ ಜಾಪ್ ದಿಲಿ: “ಪಾತಕ್ ರಡಾ ಆನಿ ಜಿಣಿ ಬದಲಾ, ಆನಿ ತುಮ್ಚೇ ಮಧ್ಲೊ ಹರ್ಯೆಕ್ಲೊ ಆಪ್ಲ್ಯಾ ಪಾತ್ಕಾಂಚೆಂ ಭೊಗ್ಸಣೆಂ ಜೊಡ್ಚ್ಯಾಕ್ ಜೆಜು ಕ್ರಿಸ್ತಾಚೇ ನಾಂವಿಂ ಪವಿತ್ರ್‌ಸ್ನಾನ್ ಘೆಂವ್; ತವಳ್ ತುಮ್ಕಾಂ ಪವಿತ್ರ್ ಅತ್ಮ್ಯಾಚೆಂ ದೆಣೆಂ ಮೆಳ್ತಲೆಂ. ಕಿತ್ಯಾಕ್, ತುಮ್ಕಾಂಚ್ ಮ್ಹಣ್ ಹಿ ಭಾಸಾವ್ಣಿ ಕೆಲ್ಯಾ; ತುಮ್ಕಾಂ ಆನಿ ತುಮ್ಚ್ಯಾ ಭುಗ್ಯಾಂಕ್ ಆನಿ ಪಯ್ಸ್ ಆಸ್ಲಲ್ಯಾ ಸಮೆಸ್ತಾಂಕ್ ಮ್ಹಣ್ ತಿ ಕೆಲ್ಯಾ; ಜಾಕಾ ಸರ್ವೆಸ್ಪರ್ ಆಮ್ಚೊ ದೇವ್ ಆಪೊವ್ಣೆಂ ದಿತಾ ತ್ಯಾ ಹರ್ಯೆಕ್ಲ್ಯಾಕ್ ಮ್ಹಣ್ ತಿ ಕೆಲ್ಯಾ".
ಹ್ಯಾ ಆನಿ ಹೆರ್ ಸಬಾರ್ ಉತ್ರಾಂನಿ ಪೆದ್ರುನ್ ತಾಂಕಾಂ ರುಜ್ವಾತ್ ದಿಂವ್ಕ್ ಪಳೆಲೆಂ ಆನಿ “ಹೇ ನಷ್ಟೆ ಸಂತತಿ ಥಾವ್ನ್ ತುಮ್ಕಾಂಚ್ ಬಚಾವ್ ಕರಾ” ಮ್ಹಣುನ್ ತಾಂಕಾಂ ಉಲೊ ದಿಲೊ. ಉಪ್ರಾಂತ್ ತಾಚೆಂ ಉತಾರ್ ಮಾನುನ್ ಘೆತ್ಲಲ್ಯಾಂಕ್ ಪವಿತ್ರ್‌ ಸ್ನಾನ್ ದಿಲೆಂ; ಸುಮಾರ್ ತೀನ್ ಹಜಾರ್ ಜಣ್ ತ್ಯಾ ದಿಸಾ ತಾಂಚ್ಯಾ ಮೆಳಾಂತ್ ದಾಖಲ್ ಜಾಲೆ.

ಶ್ಲೋಕ್: ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ ಉಣೆಂ ನಾ.

1. ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ ಉಣೆಂ ನಾ.
   ಪಾಚ್ವೊ ಚರವ್ ಮೆಳ್ತಾ ಥಂಯ್ ತೊ ಮ್ಹಾಕಾ ವಿಶೆವ್ ದಿತಾ;
   ನಿಶಾಂತ್ ಉದ್ಕಾ ಸರ್ಶಿಂ ಮ್ಹಾಕಾ ತೊ ವ್ಹರ್ತಾ,
   ಮ್ಹಜ್ಯಾ ಜಿವಾಕ್ ನವ್ಯಾನ್ ಘಟಾಯ್ ದಿತಾ.
2. ಆಪ್ಲ್ಯಾ ನಾಂವಾಸರಿ ತೊ ಮ್ಹಾಕಾ ನೀಟ್ ವಾಟೆನ್ ಚಲಯ್ತಾ.
   ಕಾಳೊಕಾಚ್ಯಾ ಭುಂಯಾರಾಂತ್ಲ್ಯಾನ್ ಹಾಂವ್ ಚಲ್ತಾಂ
   ತರ್‌ಯೀ ಕಸಲ್ಯಾಚ್ ವಾಯ್ಟಾಕ್ ಹಾಂವ್ ಭಿಯೆಂವ್ಚೊ ನಾಂ,
   ಕಿತ್ಯಾಕ್ ತುಂ ಮ್ಹಜ್ಯೆ ಸವೆಂ ಆಸಾಯ್‌:
   ತುಜೊ ದಾಂಡೊ ಆನಿ ಬೆತ್ ಆಸಾತ್ ತಿಂ ಮ್ಹಾಕಾ ಧಯ್ರ್ ದಿತಾತ್.
3. ಗಡ್ದ್ ಜೆವಣ್ ಮ್ಹಜ್ಯಾ ದುಸ್ಮಾನಾಂ ಹುಜಿರ್ ತುವೆಂ ತಯಾರ್ ಕೆಲಾಂಯ್‌,
   ತೆಲಾನ್ ಮ್ಹಜೆಂ ಮಾತೆಂ ತುಂ ಮಾಖ್ತಾಯ್‌,
   ಮ್ಹಜೆಂ ಕೊಪ್ ಭರೊನ್ ವೊಮ್ತಾತಾ.
4. ಖಂಡಿತ್ ಜಾವ್ನ್ ಸಗ್ಲ್ಯಾ ಮ್ಹಜ್ಯಾ ಜಿವಿತಾಂತ್‌
   ತುಜಿ ದಯಾಮಯಾ ಮ್ಹಜ್ಯೆ ಸವೆಂ ಆಸ್ತಲಿ,
   ಆನಿ ಸರ್ವೆಸ್ಪರಾಚ್ಯೆ ಘರಿಂ ಸದಾಂಕಾಲ್ ಹಾಂವ್ ಜಿಯೆತಲೊಂ.

ಪ್ರಿತಿ ಮೊಗಾಚ್ಯಾಂನೋ,
ಬರೆಂ ಕೆಲ್ಲೇ ಖಾತಿರ್ ತುಕಾ ಜರ್ ಸೊಸುಂಕ್ ಮೆಳ್ಳೆಂ ಆನಿ ಸೊಸ್ಣಿಕಾಯೆನ್ ತುವೆಂ ತೆಂ ಸೊಸ್ಲೆಂಯ್, ತೆದ್ವಾಂ ಜಾಲ್ಯಾರ್ ದೆವಾಕ್ ತುಂ ಮಾನ್ವತಾಯ್. ತುಮ್ಕಾಂ ಆಪೊವ್ಣೆಂ ಮೆಳ್ಳಾಂ ಹ್ಯಾಚ್ ಖಾತಿರ್. ಕಾರಣ್, ತುಮ್ಚೆ ಪಾಸತ್ ಪಯ್ಲೆಂ ಕ್ರಿಸ್ತಾನ್ ಕಷ್ಟ್ ಸೊಸ್ಲ್ಯಾತ್; ತಾಚ್ಯಾ ಮೆಟಾಂನಿ ತುಮಿ ಚಲ್ಚ್ಯಾಕ್ ತಾಣೆಂಚ್ ತುಮ್ಕಾಂ ದೇಖ್ ದಿಲ್ಯಾ. ತಾಣೆ ಕಾಂಯ್ ಪಾಪ್ ಆಧಾರ್-ಲ್ಲೆಂ ನಾ ಆನಿ ತಾಚ್ಯಾ ತೊಂಡಾಂತ್ ಥಾವ್ನ್ ಕಸಲೆಂಚ್ ಕಪಟಿಪಣ್ ಆಯ್ಲೆಂನಾ. ತಾಕಾ ಸೊವ್‍ಲ್ಲ್ಯಾ ವೆಳಾರ್ ತಾಣೆಂ ಪಾಟಿಂ ಸೊವ್ಲೆಂನಾ; ತಾಕಾ ಕಷ್ಟಾಯ್ತಾನಾ ತಾಣೆಂ ಭೆಷ್ಟಾಯ್ಲೆಂನಾ; ಬಗರ್ ನಿತಿ ಪ್ರಕಾರ್ ಝಡ್ತಿ ಕರ್ತಲ್ಯಾಚೆ ಜತ್ನೆಕ್ ಆಪ್ಣಾಕ್‍ಚ್ ತಾಣೆ ಒಪುನ್ ದಿಲೊ. ಆಮಿ ಪಾತ್ಕಾಕ್ ಮರುನ್ ಪವಿತ್ರ್‌ಪಣಾಕ್ ಜಿಯೆಂವ್ಚೆ ಖಾತಿರ್ ಖುರ್ಸಾಯ್‍ಲ್ಲೆ ಆಪ್ಲೇ ಕುಡಿಂತ್ ತಾಣೆಂ ಆಮ್ಚಿಂ ಪಾತ್ಕಾಂ ವ್ಹಾವಯ್ಲಿಂ; ತಾಚ್ಯಾ ಘಾಯಾಂ ವರ್ವಿಂ ತುಮಿ ಗೂಣ್ ಜಾಲ್ಯಾತ್. ತವಳ್ ಪರ್ಯಾನ್ ವಾಟ್ ಚುಕೊನ್ ಗೆಲ್ಲ್ಯಾ ಬಕ್ರ್ಯಾಂಬರಿ ಆಸ್‍ಲ್ಲಿಂ ತುಮಿ ಆತಾಂ ತುಮ್ಚ್ಯಾ ಅತ್ಮ್ಯಾಚ್ಯಾ ರಾಕ್ಣ್ಯಾ ಆನಿ ಗೊವ್ಳ್ಯಾ ಥಂಯ್ ಪಾಟಿಂ ಆಯ್ಲ್ಯಾತ್.

ಹಾಂವ್‌ಚ್ ಬರೊ ಗೊವ್ಳಿ, ಮ್ಹಣ್ತಾ ಸೊಮಿ,
ಹಾಂವ್ ಮ್ಹಜ್ಯಾ ಬೊಕ್ರ್ಯಾಂಕ್ ಒಳ್ಕತಾಂ ಆನಿ ತೆಯೀ ಮ್ಹಾಕಾ ಒಳ್ಕತಾತ್

ತ್ಯಾ ವೆಳಿಂ ಜೆಜುನ್‌ ಫಾರಿಜೆವಾಂ ಲಾಗಿಂ ಮ್ಹಳೆಂ:"ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಜೊ ಕೊಣ್ ಬಕ್ರ್ಯಾಂಚ್ಯಾ ಗೊಟ್ಯಾಕ್ ದಾರಾಂತ್ಲ್ಯಾನ್ ಭಿತರ್ ಸರನಾಸ್ತಾನಾ ದುಸ್ರೇಚ್ ವಾಟೇನ್ ವಯ್ರ್ ಚಡುನ್ ಯೆತಾ, ತೊ ಚೋರ್ ಆನಿ ಲುಟ್ಕಾರ್. ಜೊ ಕೊಣ್ ದಾರಾಂತ್ಲ್ಯಾನ್ ಭಿತರ್ ಸರ್ತಾ, ತೊ ಬಕ್ರ್ಯಾಂಚೊ ಗೊವ್ಳಿ. ಹಾಕಾ ರಾಕ್ವಲ್ ದಾರ್ ಕಾಡ್ತಾ. ಬಕ್ರೆ ತಾಚ್ಯಾ ತಾಳ್ಯಾಕ್ ಕಾನ್ ದಿತಾತ್; ಆಪ್ಲ್ಯಾ ಬಕ್ರ್ಯಾಂಕ್ ತಾಂಚ್ಯಾ ತಾಂಚ್ಯಾ ನಾಂವಾನ್ ಉಲೊ ಕರ್ನ್, ತಾಂಕಾಂ ತೊ ಭಾಯ್ರ್ ವ್ಹರ್ತಾ. ತಾಂಕಾಂ ಸಕ್ಟಾಂಕ್ ಭಾಯ್ರ್ ಕಾಡ್ತಚ್, ತಾಂಚ್ಯಾ ಫುಡ್ಲ್ಯಾನ್ ತೊ ವೆತಾ ಆನಿ ತಾಚೊ ತಾಳೊ ಒಳ್ಕತಾತ್, ತೆ ಬಕ್ರೆ ತಾಚ್ಯಾ ಪಾಟ್ಲ್ಯಾನ್ ವೆತಾತ್. ಪರ್ಕ್ಯಾ ಪಾಟ್ಲ್ಯಾನ್ ತೆ ಬಿಲ್ಕುಲ್ ವಚನಾಂತ್. ತೆ ಪರ್ಕ್ಯಾಚೊ ತಾಳೊ ಒಳ್ಕನಾಂತ್ ಜಾಲ್ಲ್ಯಾನ್, ತಾಚೆ ಥಾವ್ನ್ ತೆ ಪೊಳ್ನ್ ಧಾಂವ್ತಾತ್.” ಜೆಜುನ್ ತಾಂಕಾಂ ಹಿ ಒಪಾರ್ ಸಾಂಗ್ಲಿ. ಪುಣ್ ತಾಣೆಂ ಸಾಂಗ್ಲಲ್ಯಾಚೊ ತಾಂಕಾಂ ಅರ್ಥ್ ಜಾಲೊನಾ.
ದೆಕುನ್ ಜೆಜು ಪರ್ತ್ಯಾನ್ ಮ್ಹಣಾಲೊ: “ಸತ್‍ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಹಾಂವ್ ಬಕ್ರ್ಯಾಂಚೆಂ ದಾರ್. ಮ್ಹಜೇ ಪಯ್ಲೆಂ ಆಯ್‍ಲ್ಲೆ ಸರ್ವ್ ಚೋರ್ ಆನಿ ಲುಟ್ಕಾರ್. ದೆಕುನ್ ಬಕ್ರ್ಯಾಂನಿಯಿ ತಾಂಕಾಂ ಗುಮಾನ್ ಕರುಂಕ್ ನಾ. ಹಾಂವ್‍ಚ್ ತೆಂ ದಾರ್, ಮ್ಹಜೆ ಮುಖಾಂತ್ರ್ ಭಿತರ್ ಸರ್ತಾ ತೊ ಶಾಬಿತಾಯೆನ್ ಆಸ್ತಲೊ. ತೊ ಭಾಯ್ರ್ ಭಿತರ್ ವೆತಲೊ; ತಾಕಾ ಚರವ್‍ಯಿ ಮೆಳ್ತಲೊ. ಚೋರ್ ಯೆತಾ ಫಕತ್ ಚೊರುಂಕ್, ಜಿವೆಶಿಂ ಮಾರುಂಕ್ ಆನಿ ವಿಬಾಡ್ ಕರುಂಕ್. ಹಾಂವ್ ಆಯ್ಲಾಂ ತಾಂಕಾಂ ಜಿವಿತ್ ಮೆಳೊಂ ಮ್ಹಣ್: ಭರೊನ್ ವೊಮ್ತೊಂಚ್ಯಾ ಮಾಪಾನ್ ತೆಂ ಮೆಳೊಂ ಮ್ಹಣ್.