📖 ಆಯ್ತಾರಾಚಿಂ ವಾಚ್ಪಾಂ

ಪೆಂತೆಕೊಸ್ತಾಚ್ಯಾ ದಿಸಾ ಪೆದ್ರು ಇಕ್ರಾ ಜಣಾಂ ಸಾಂಗಾತಾ ಉಬೊ ರಾವ್ಲೊ ಆನಿ ವ್ಹಡ್ಲ್ಯಾ ತಾಳ್ಯಾನ್ ಲೊಕಾ ಲಾಗಿಂ ಅಶೆಂ ಉಲೊಂವ್ಕ್ ಲಾಗ್ಲೊ: "ಜುದೆವ್‌ ಭಾವಾಂನೋ ಆನಿ ಜೆರುಸಾಲೆಮಾಚ್ಯಾ ನಿವಾಸಿಯಾಂನೋ, ಮ್ಹಾಕಾ ಆಯ್ಕಾ ಆನಿ ಹಾಂವ್‌ ಆತಾಂ ಸಾಂಗ್ತಾಂ ತ್ಯಾ ಉತ್ರಾಂಕ್‌ ಚೀತ್‌ ದಿಯಾ.

ಇಸ್ರಾಯೆಲಾಚ್ಯಾ ಮನ್ಶಾಂನೋ, ಮ್ಹಜ್ಯಾ ಉತ್ರಾಂಕ್ ಕಾನ್ ದಿಯಾ; ನಜರೆತ್ಚೊ ಜೆಜು ದೆವಾನ್ ಪಸಂದ್ ಕರ್ನ್ ತುಮ್ಚೆ ಮಧೆಂ ಧಾಡ್ಲಲೊ ಮನಿಸ್. ಹಾಕಾ ರುಜ್ವಾತ್ ಜಾವ್ನ್ ದೆವಾನ್ ತಾಚೇ ಮಾರಿಫಾತ್ ತುಮ್ಚೇ ಮುಖಾರ್ ಕೆಲ್ಲಿಂ ತಿಂ ಅಚರ್ಯಾಂ, ವಿಚಿತ್ರ್ ಕಾರ್ಯಾಂ ಆನಿ ಖುಣಾ ತುಮಿಚ್ ಜಾಣಾತ್. ದೆವಾನ್ ಆಪ್ಲೇ ಸ್ವಂತ್ ಖುಶೆನ್ ಆನಿ  ಯೆವ್ಜಿಲ್ಲೇ  ಮಾಂಡಾವಳೇ ಪರ್ಮಾಣೆಂ ತಾಕಾ ತುಮ್ಚೆ ಆಧೀನ್ ಕೆಲ್ಲ್ಯಾ ವೆಳಾರ್, ತುಮಿ ತಾಕಾ ಅನ್ಭಾವಾರ್ಥ್ಯಾಂ ಕರ್ನಾ ಖುರ್ಸಾಯ್ಲೊ ಆನಿ ಜಿವೆಶಿಂ ಮಾರ್ಲೊ. ಪುಣ್ ದೆವಾನ್ ತಾಕಾ ಮೊರ್ನಾಚ್ಯಾ ಪಾಸಾಂತ್ಲೊ ನಿವ್ರಾವ್ನ್ ಜಿವಂತ್ ಉಠಯ್ಲಾ. ಕಿತ್ಯಾಕ್ ಮೊರ್ನ್ ತಾಕಾ ಆಪ್ಲೆ ಮುಟಿ ಭಿತರ್ ಧರ್ನ್ ದವರುಂಕ್ ಸಕ್ಲೆಂನಾ. ತಾಚೆ ವಿಶ್ಯಾಂತ್ ಉಲೊವ್ನ್ ದಾವಿದ್ ಮ್ಹಣ್ತಾ:

ʼಸೊಮಿಯಾಕ್ ಹಾಂವ್ ಸದಾಂಚ್ ಮ್ಹಜ್ಯಾ ದೊಳ್ಯಾಂ ಮುಖಾರ್ ದವರ್ತಲೊಂ,

ತೊ ಮ್ಹಜ್ಯಾ ಉಜ್ವ್ಯಾಕ್ ಆಸಾ ಮ್ಹಣ್ತಚ್ ಹಾಂವ್ ಕೆದಿಂಚ್ ಹಾಲ್ಚೊನಾಂ,

ಹ್ಯಾ ಪಾಸತ್ ಮ್ಹಜೆಂ ಕಾಳಿಚ್ ಸಂತೊಸಲಾಂ,

ಆನಿ ಮ್ಹಜಿ ಜೀವ್ ಉಲ್ಲಾಸುನ್ ಗಾಯ್ತಾ,

ಆನಿ ಮ್ಹಜಿ ಕೂಡ್‍ಯೀ ಭರ್ವಶಾಂತ್ ಜಿಯೆತಲಿ.

ಕಿತ್ಯಾಕ್ ತುಂ ಮ್ಹಜೊ ಅತ್ಮೊ ಪಾತಾಳಾಂತ್ ಸಾಂಡ್ಚೊನಾಯ್,

ಅನಿ ತುಜ್ಯಾ ವಿಶ್ವಾಸಿ ಚಾಕ್ರಾಕ್ ಕುಸೊಂಕ್ ಸೊಡ್ಚೊನಾಯ್.

ಜಿವಿತಾಚ್ಯೊ ವಾಟೋ ತುವೆಂ ಮ್ಹಾಕಾ ದಾಖೊವ್ನ್ ದಿಲ್ಯಾಯ್.

ತುಜೇ ಸಮೊರ್ ಸಂತೊಸಾನ್ ತುಂ ಮ್ಹಾಕಾ ಧಾದೊಶಿ ಕರ್ತಲೊಯ್ʼ.

ಭಾವಾಂನೋ, ಆಮ್ಚ್ಯಾ ಪುರ್ವಜ್ ಬಾಪಾ ದಾವಿದಾ ವಿಶ್ಯಾಂತ್ ಇತ್ಲೆಂ ಹಾಂವೆಂ ತುಮ್ಕಾಂ ದೃಢ್ ಸಾಂಗ್ಯೆತ್: ತೊ ಮೊರ್ನ್ ಪಾವ್ಲೊ ಆನಿ ತಾಕಾ ನಿಕೆಪಿಲೊ; ತಾಚೊ ಫೊಂಡ್ ಆಜ್ ಪರ್ಯಾನ್ ಆಮ್ಚೆ ಮಧೆಂ ಆಸಾ. ತೊ ಏಕ್ ಪ್ರವಾದಿ ಜಾವ್ನ್ ಆಸ್ತಾಂ ಆಪ್ಲೇ ಸಂತತಿಚೊ ಎಕ್ಲೊ ಆಪ್ಲ್ಯಾ ರಾಜ್ಯಾಸನಾರ್ ಬಸ್ತಲೊ ಮ್ಹಣ್ ದೆವಾನ್ ಆಪ್ಣಾಕ್ ಪರ್ಮಾಣಾರ್ ಕೆಲ್ಲಿ ಭಾಸಾವ್ಣಿ ತೊ ಜಾಣಾ ಆಸ್ಲೊ; ಆನಿ ‘ತಾಕಾ ಪಾತಾಳಾಂತ್ ಸಾಂಡ್ಲೊನಾ ಆನಿ ತಾಚೇ ಕುಡಿನ್ ಕುಸಡಾಯ್ ದೆಖ್ಲಿನಾ’ ಮ್ಹಣ್ ತಾಣೆಂ ಮ್ಹಳ್ಳ್ಯಾ ಉತ್ರಾಂನಿ ಕ್ರಿಸ್ತಾಚ್ಯಾ ಜಿವಂತ್ಪಣಾ ವಿಶ್ಯಾಂತ್ಲೆಂ ಸತ್ ತಾಣೆಂ ಪಯ್ಲೆಂಚ್ ಪರ್ಗಟ್ ಕೆಲೆಂ. ಹ್ಯಾಚ್ ಜೆಜುಕ್ ದೆವಾನ್ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲಾ ಆನಿ ಆಮಿ ಸಮೆಸ್ತ್ ತ್ಯಾ ಸತಾಚ್ಯೊ ಸಾಕ್ಷ್ಯೊ. ಅಶೆಂ ದೆವಾಚ್ಯಾ ಉಜ್ವ್ಯಾಕ್ ತಾಕಾ ಊಂಚ್ ಉಬಾರ್ತಚ್ ಭಾಸಾಯ್‍ಲ್ಲೊ ಪವಿತ್ರ್ ಅತ್ಮೊ ಬಾಪಾಲಾಗ್ಚೊ ತಾಣೆಂ ಪಯ್ಲೊ ಘೆತ್ಲೊ ಆನಿ ಉಪ್ರಾಂತ್ ಆಮ್ಚೆರ್ ಧಾಡ್ಲೊ. ಹೆಂಚ್ ತೆಂ ತುಮಿ ಆತಾಂ ಆಯ್ಕತಾತ್ ಆನಿ ಪಳೆತಾತ್.

ಶ್ಲೋಕ್: ಸರ್ವೆಸ್ಪರಾ, ಜಿವಿತಾಚಿ ವಾಟ್ ಆಮ್ಕಾಂ ದಾಖಯ್.

1. ಸಾಂಬಾಳ್ನ್ ಧರ್ ತುಂ ಮ್ಹಾಕಾ, ದೆವಾ ಮ್ಹಜ್ಯಾ,
   ಕಿತ್ಯಾಕ್ ತುಜೆರ್ ಹಾಂವ್ ಪಾತ್ಯೆತಾಂ.
   ಸರ್ವೆಸ್ಪರಾ ಲಾಗಿಂ ಹಾಂವ್ ಮ್ಹಣ್ತಾಂ`
   "ತು೦ಚ್ ಮ್ಹಜೊ ಧನಿ ಆನಿ ಮ್ಹಜೆಂ ದಾಯ್ಜ್,
   ಆನಿ ಮ್ಹಜೆಂ ಪೀವನ್-ಪಾತ್ರ್
   ಮ್ಹಜ್ಯೆ ಜಿಣಿಯೆಚೊ ಫುಡಾರ್ ತುಜ್ಯಾಚ್ ಹಾತಾಂತ್ ಆಸಾ"
   
   
2. ಮ್ಹಾಕಾ ಬೂದ್ ಸಾಂಗ್ತಲ್ಯಾ ಸರ್ವೆಸ್ಪರಾಕ್ ಹಾಂವ್ ಧಿನ್ವಾಸ್ತಾಂ
   ರಾತಿಚೆಂ ಪರ್‍ಯಾನ್ ಮ್ಹಜೆಂ ಅಂತಸ್ಕರ್ನ್ ಮ್ಹಾಕಾ ತಿ ಉಗ್ಡಾಸಾಕ್ ಹಾಡ್ತಾ.
   ಸರ್ವೆಸ್ಪರಾಕ್ ಸದಾಂಚ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಹಾಂವ್ ದವರ‍್ತಾಂ,
   ತೊ ಜರ್ ಮ್ಹಜ್ಯೆ ಉಜ್ವೆಶಿಂ ಆಸಾ, ತರ್ ಹಾಂವ್ ಕೆದಿಂಚ್ ಹಾಲ್ಚೊ ನಾಂ.
   
   
3. ದೆಕುನ್ ಮ್ಹಜೆಂ ಕಾಳಿಜ್ ಉಲ್ಲಾಸ್ತಾ, ಮ್ಹಜೊ ಅತ್ಮೊ ಧಾದೊಸ್ಕಾಯೆನ್ ಉಮಾಳ್ತಾ,
   ಮ್ಹಜಿ ಕೂಡ್ ಲೆಗುನ್ ಸವಸ್ತ್-ಕಾಯೆನ್ ಜಿಯೆತಾ;
   ಕಿತ್ಯಾಕ್ ತುಂ ಮ್ಹಾಕಾ ಪಾತಾಳಾಂತ್ ಸಾಂಡ್ಚೊನಾಯ್;
   ಆನಿ ಮ್ಹಾಕಾ, ತುಜ್ಯಾ ವಿಶ್ವಾಸಿ ಭಕ್ತಾಕ್, ಕುಸಡಾಯ್ ದೆಕುಂಕ್ ದಿಂವ್ಚೊನಾಯ್.
   
   
4.  ತುಂ ಮ್ಹಾಕಾ ಜಿವಿತಾಚಿ ವಾಟ್ ದಾಕಯ್ತಲೊಯ್,
   ತುಜ್ಯೆ ಸದ್ರ್ಯೆ ಮುಕಾರ್ ಮ್ಹಾಕಾ ಮೆಳ್ತಲಿ ಅನಂದಾಚಿ ಭರ್ತಿ
   ಆನಿ ತುಜ್ಯಾ ಉಜ್ವ್ಯಾಕ್ ಸಾಸ್ಣಾಚೆಂ ಸುಖ್.

ಭಾವಾಂ-ಭಯ್ಣಿಂನೋ,

ತಾಚ್ಯಾ ತಾಚ್ಯಾ ಕರ್ನ್ಯಾಂ ಪರ್ಮಾಣೆಂ ಹರ್ಯೆಕ್ಲ್ಯಾಚಿ ನೀತ್ ಕರ್ತಲ್ಯಾ ದೆವಾಕ್ ತುಮ್ಚ್ಯಾ ಮಾಗ್ಣ್ಯಾಂನಿ ‘ಬಾಪ್’ ಮ್ಹಣುನ್ ತುಮಿ ಉಲೊ ಕರ್ತಾತ್. ತಶೆಂ ಜಾಲ್ಯಾರ್ ಹ್ಯಾ ಪರ್ಕಿ ಗಾಂವಾಂತ್ ತುಮ್ಚಿ ಸಗ್ಳಿ ಜಿಣಿ ಭಕ್ತಿ ಭಿರಾಂತೆನ್ ಮಾಂಡುನ್ ಹಾಡಾ. ತುಮ್ಚ್ಯಾ ಪುರ್ವಜಾಂ ಥಾವ್ನ್ ದೆಂವುನ್ ಆಯ್ಲಲ್ಯಾ ವ್ಯರ್ಥ್ ಜೀವನಾಚ್ಯಾ ಚಾಲಿಂತ್ಲಿಂ ತುಮ್ಕಾಂ ಸೊಡಯ್ಲ್ಯಾಂತ್ ಮ್ಹಣ್ ತುಮಿ ಜಾಣಾತ್. ಅಶೆಂ ಸೊಡಯ್‍ಲ್ಲೆಂ ರುಪ್ಯಾನ್ ವಾ ಭಾಂಗಾರಾನ್ ವಾ ನಾಸ್ ಜಾತಲ್ಯಾ ಮ್ಹಾಲಾನ್ ನ್ಹಯ್, ಬಗರ್ ಆಯ್ಬಾವಿಣ್ ಆನಿ ಖತಾವಿಣ್ ಶೆಳಿಯೆಚ್ಯಾ, ಮ್ಹಣ್ಜೆ ಕ್ರಿಸ್ತಾಚ್ಯಾ ಅಮೊಲಿಕ್ ರಗ್ತಾನ್. ಸಂಸಾರಾಚೆ ಸ್ಥಾಪನೇ ಆದಿಂಚ್ ದೆವಾನ್ ತಾಕಾ ವಿಂಚ್ಲೊ ಆನಿ ಹ್ಯಾ ಶೆವಟಿಂಚ್ಯಾ ಕಾಳಾರ್ ತುಮ್ಚೇ ಪಾಸತ್ ತಾಕಾ ಉಗ್ಡಾಪೊ ಕೆಲೊ. ತಾಕಾ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲಲ್ಯಾ ಆನಿ ಮಹಿಮೆವಂತ್ ಕೆಲ್ಲ್ಯಾ ದೆವಾಕ್ ತಾಚೇ ಮಾರಿಫತ್ ತುಮಿ ಸತ್ಮಾನುಂಕ್ ಪಾವ್ಲ್ಯಾತ್; ಅಶೆಂ ತುಮ್ಚೊ ಭಾವಾರ್ಥ್ ಆನಿ ಭರ್ವಸೊ ದೆವಾಚೆರ್ ತುಮಿ ದವರ್ಲಾ.  

ಸೊಮಿಯಾ ಜೆಜು, ಪವಿತ್ರ್ ಪುಸ್ತಕ್ ಆಮ್ಕಾಂ ವಿವರುನ್ ಸಾಂಗ್,

ತುಂ ಆಮ್ಚ್ಯೆ ಲಾಗಿಂ ಉಲಯ್ತಾನಾ ಆಮ್ಚಿಂ ಕಾಳ್ಜಾಂ ಪೆಟಶಿಂ ಕರ್.

ಜೆಜು ಜಿವಂತ್‌ ಜಾಲ್ಲ್ಯಾ ತ್ಯಾಚ್‌ ಆಯ್ತಾರಾ ದಿಸಾ ತಾಂಚೇ ಮಧ್ಲೆ ದೋಗ್ ಜಣ್ ಜೆರುಸಾಲೆಮಾ ಥಾವ್ನ್ ಸಾತ್ ಮೈಲಾಂ ಪಯ್ಸ್ ಆಸ್ಲಲ್ಯಾ ಎಮ್ಮಾವ್ಸ್ ನಾಂವಾಚೇ ಹಳ್ಳೆಕ್ ಪಯ್ಣ್ ಕರ್ನ್ ವೆತಾಲೆ. ಘಡ್‍ಲ್ಲ್ಯಾ ಸರ್ವ್ ಸಂಗ್ತಿಂ ವಿಶ್ಯಾಂತ್ ತೆ ಎಕಾಮೆಕಾ ಉಲಯ್ತ್ ಆಸ್ಲೆ. ಅಶೆಂ ಸಾಂಗಾತಾ ಉಲಯ್ತ್ ಆನಿ ಚರ್ಚಾ ಕರ್ನ್ ವೆತಾಸ್ತಾನಾ, ಜೆಜು ಖುದ್ಧ್ ಲಾಗಿಂ ಸರ್ಲೊ ಆನಿ ತಾಂಚೇ ಬರಾಬರ್ ಚಲುಂಕ್ ಲಾಗ್ಲೊ. ಪುಣ್ ತಾಂಕಾಂ ತಾಚಿ ಒಳಕ್ ಮೆಳ್ಳಿನಾ, ತಾಂಚೆ ದೊಳೆ ಬಾಂಧ್ಲಲೇಬರಿ ಜಾಲ್ಲೆ. ಜೆಜುನ್ ತಾಂಕಾಂ ವಿಚಾರ್ಲೆಂ: “ತುಮಿ ಚಲ್ತಾಂ ಚಲ್ತಾಂ ಕಸಲ್ಯಾ ಸಂಗ್ತಿಂ ವಿಶ್ಯಾಂತ್ ಉಲೊವ್ನ್, ತರ್ಕ್ ಕರಿತ್ ಆಸಾತ್?” ತವಳ್ ತೆ ಥಂಯ್ಚ್ ರಾವ್ಲೆ; ತಾಂಚಿಂ ತೊಂಡಾಂ ಬಾವ್‍ಲ್ಲಿಂ. ತಾಂಚೇ ಪೈಕಿ ಎಕ್ಲೊ, ಕ್ಲೆಯೊಫಾಸ್ ನಾಂವಾಚೊ, ತಾಕಾ ಜಾಪ್ ದೀವ್ನ್ ಮ್ಹಣಾಲೊ: “ಜೆರುಸಾಲೆಮಾಕ್ ಆಯ್‍ಲ್ಲ್ಯಾ ಯಾತ್ರಿಕಾಂ ಪಯ್ಕಿ ತುಂ ಎಕ್ಲೊಚ್ ಪರ್ಕಿ ಕಿತೆಂ? ಹ್ಯಾ ದಿಸಾಂನಿ ಥಂಯ್ ಘಡ್ಲಲ್ಯೊ ಸಂಗ್ತಿ ತುಂ ನೆಣಾಯ್?” ಜೆಜುನ್ ವಿಚಾರ್ಲೆಂ: “ಕಸಲ್ಯೊ ಸಂಗ್ತಿ?” ತಾಣಿಂ ಜಾಪ್ ದಿಲಿ: “ಜೆಜು ನಜರೆನಾ ವಿಶ್ಯಾಂತ್ಲ್ಯೊ, ತೊ ದೆವಾ ಆನಿ ಮನ್ಶಾಂ ಮುಖಾರ್ ಉತ್ರಾನ್ ಆನಿ ಕರ್ನೆನ್ ಏಕ್ ಬಳಿಷ್ಠ್ ಪ್ರವಾದಿ ಆಸ್ಲೊ. ಆಮ್ಚ್ಯಾ ಪ್ರಧಾನ್ ಯಾಜಕಾಂನಿ ಆನಿ ಅಧಿಕಾರ್ಯಾಂನಿ ತಾಕಾ ಮೊರ್ನಾಚೆಂ ಫರ್ಮಾಣ್ ದಿಂವ್ಚ್ಯಾಕ್ ಧರ್ನ್ ದಿಲೊ ಆನಿ ತಾಕಾ ಖುರ್ಸಾಯ್ಲೊ. ಪುಣ್ ಇಸ್ರಾಯೆಲ್ ಪರ್ಜೆಕ್ ಸೊಡ್ವಣ್ ಹಾಡ್ತಲೊ ತೊ ಹೊಚ್ ಮ್ಹಣ್ ಆಮಿ ಭರ್ವಸುನ್ ಆಸ್ಲ್ಯಾಂವ್. ಇತ್ಲೆಂಚ್ ನ್ಹಯ್, ಆನಿ ಆತಾಂ ಹೆಂ ಸಗ್ಳೆಂ ಘಡೊನ್ ಆಜ್ ತೀನ್ ದೀಸ್ ಜಾಲೆ. ಹಾಚೇ ಶಿವಾಯ್ ಆಮ್ಚೇ ಮಧ್ಲ್ಯಾ ಥೊಡ್ಯಾ ಸ್ತ್ರಿಯಾಂನಿ ಆಮ್ಕಾಂ ಆಕಾಂತುಂಕ್ ಕೆಲೆಂ. ತ್ಯೊ ಉಜ್ವಾಡ್ಚೇ ಆದಿಂ ಸಮಾಧೇ ಸರ್ಶಿಂ ಗೆಲ್ಲ್ಯೊ. ಪುಣ್ ತಾಚಿ ಕೂಡ್ ತಾಂಕಾಂ ಮೆಳಾನಾಸ್ತಾನಾ ತ್ಯೊ ಪಾಟಿಂ ಆಯ್ಲ್ಯೊ; ಆನಿ ಆಪ್ಣಾಕ್ ದೇವ್‍ದೂತ್ ದಿಷ್ಟಿ ಪಡ್ಲೆ ಆನಿ ತಾಣಿಂ ತೊ ಜಿವಂತ್ ಆಸಾ ಮ್ಹಣ್ ಸಾಂಗ್ಲೆಂ ಮ್ಹಣಾಲ್ಯೊ. ದೆಕುನ್ ಆಮ್ಚೇ ಪಯ್ಕಿ ಥೊಡೆ ಸಮಾಧೇ ಸರ್ಶಿಂ ಗೆಲೆ ಆನಿ ಸ್ತ್ರಿಯಾಂನಿ ಸಾಂಗ್ಲಲೇಬರಿಚ್ ತಾಂಕಾಂ ಮೆಳ್ಳೆಂ, ಪುಣ್ ತೊ ತಾಂಕಾಂ ಪಳೆಂವ್ಕ್ ಮೆಳ್ಳೊನಾ.”

ತವಳ್ ಜೆಜುನ್ ತಾಂಕಾಂ ಸಾಂಗ್ಲೆಂ: “ತುಮಿ ಕಾಂಯ್ಚ್ ಸಮ್ಜಣಿ ನಾತ್‍ಲ್ಲೆ! ಪ್ರವಾದ್ಯಾಂನಿ ಸಾಂಗ್‍ಲ್ಲೆಂ ಸಗ್ಳೆಂ ಸತ್ಮಾನುಂಕ್ ಕಿತ್ಲೆ ಪಾಟಿಂ ತುಮಿ! ಕ್ರಿಸ್ತಾನ್ ಆಪ್ಲೇ ಮಹಿಮೆಂತ್ ರಿಗ್ಚೆ ಆದಿಂ ಹೆಂ ಸಗ್ಳೆಂ ಸೊಸ್ಚಿ ಗರ್ಜ್ ಆಸ್ಲಿ ನ್ಹಯ್?” ಉಪ್ರಾಂತ್ ಮೊಯ್ಜೆ ಥಾವ್ನ್ ಸುರು ಕರ್ನ್ ಸರ್ವ್ ಪ್ರವಾದ್ಯಾಂನಿ ಆನಿ ಸಗ್ಳ್ಯಾ ಪವಿತ್ರ್ ಪುಸ್ತಕಿಂ ಆಪ್ಣಾ ವಿಶ್ಯಾಂತ್ ಬರಯ್ಲಾಂ ತೆಂ ತಾಣೆ ತಾಂಕಾಂ ವಿವರುನ್ ಸಾಂಗ್ಲೆಂ.

ಉಲಯ್ತ್ ವೆತಾಂ ತಾಂಕಾಂ ವಚುಂಕ್‍ಜಾಯ್ ತೇ ಹಳ್ಳೆಕ್ ತೆ ಯೇವ್ನ್ ಪಾವ್ಲೆ, ಆನಿ ಜೆಜುನ್ ಆಪುಣ್ ಫುಡೆಂ ವೆತಾಶೆಂ ಕೆಲೆಂ. ಪುಣ್ ತಾಕಾ ತಾಣಿಂ ಪರಾತುನ್ ಮ್ಹಳೆಂ: “ಆಮ್ಚೆ ಸಾಂಗಾತಾ ರಾವ್; ಆತಾಂ ಸಾಂಜ್ ಜಾಲಿ ಆನಿ ಘಡಿಯೆನ್ ದೀಸ್ ಬುಡ್ತಲೊ.” ದೆಕುನ್ ತೊ ತಾಂಚೆ ಸಾಂಗಾತಾ ರಾವುಂಕ್ ಭಿತರ್ ಸರ್ಲೊ.

ಉಪ್ರಾಂತ್ ತಾಂಚೇ ಸಾಂಗಾತಾ ಜೆವ್ಣಾರ್ ಆಸ್ತಾನಾ ತಾಣೆಂ ಉಂಡೊ ಘೆತ್ಲೊ. ಅರ್ಗಾಂ ದೀವ್ನ್ ತೊ ಮೊಡ್ಲೊ ಆನಿ ತಾಂಕಾಂ ದಿಲೊ. ತೆದ್ವಾಂ ತಾಂಚೆ ದೊಳೆ ಉಗ್ತೆ ಜಾಲೆ ಆನಿ ತಾಣಿಂ ತಾಚಿ ಒಳಕ್ ಧರ್ಲಿ. ಪುಣ್ ತೊ ತಾಂಚ್ಯಾ ದೊಳ್ಯಾಂ ಮುಖ್ಲೊ ನಪಂಯ್ಚ್ ಜಾಲೊ.ತವಳ್ ಎಕಾಮೆಕಾ ತೆ ಮ್ಹಣುಂಕ್ ಲಾಗ್ಲೆ: “ವಾಟೆರ್ ತೊ ಆಮ್ಚೆ ಲಾಗಿಂ ಉಲೊವ್ನ್ ಆಸ್ತಾನಾ ಆನಿ ಪವಿತ್ರ್ ಪುಸ್ತಕಾಚೊ ಅರ್ಥ್ ಸಾಂಗ್ತಾನಾ, ಆಮ್ಚೆಂ ಕಾಳಿಜ್ ಆಮ್ಚೆ ಭಿತರ್ ಪೆಟ್ತಾಲೆಂ ನ್ಹಯ್?”

ತೆಚ್ ಘಡಿಯೇ ಉಠುನ್ ತೆ ಜೆರುಸಾಲೆಮಾಕ್ ಪಾಟಿಂ ಗೆಲೆ. ಥಂಯ್ ಇಕ್ರಾ ಜಣ್ ಆನಿ ತಾಂಚೆ ಸವೆಂ ಹೆರ್ ಸಾಂಗಾತಾ ಜಮೊ ಜಾಲ್ಲೆ ತಾಂಕಾಂ ಮೆಳ್ಳೆ. ತೆ ಮ್ಹಣ್ತಾಲೆ: “ಸೊಮಿ ಖರೊಚ್ ಜಿವಂತ್ ಜಾಲಾ! ಸಿಮಾಂವ್ಕ್ ತೊ ದಿಷ್ಟಿ ಪಡ್ಲಾ!” ತವಳ್ ವಾಟೆರ್ ಆಪ್ಣಾಕ್ ಘಡ್‍ಲ್ಲ್ಯಾ ಸಂಗ್ತಿಂ ವಿಶ್ಯಾಂತ್ ಆನಿ ಉಂಡೊ ಮೊಡ್ತಾನಾ ಆಪ್ಣೆಂ ತಾಚಿ ಒಳಕ್ ಕಶಿ ಧರ್ಲಿ ಹ್ಯಾ ವಿಶ್ಯಾಂತ್ ತಾಣಿಂ ತಾಂಕಾಂ ಸಾಂಗುಂಕ್ ಸುರು ಕೆಲೆಂ.