📖 ಆಯ್ತಾರಾಚಿಂ ವಾಚ್ಪಾಂ

ಧರ್ಮ್‍ದುತಾಂಚಿ ಶಿಕೊವ್ಣ್ ಆಯ್ಕುಂಚ್ಯಾಂತ್, ಭಾವ್ಪಣಾಚ್ಯಾ ಎಕ್ತಾರಾಂತ್, ಉಂಡೊ ಮೊಡ್ಚ್ಯಾಂತ್ ಆನಿ ಮಾಗ್ಣೆಂ ಕರ್ಚ್ಯಾಂತ್ ವಾಂಟೆಲಿ ಜಾವ್ಚ್ಯಾಕ್ ಸಮೆಸ್ತ್‌ ಥಿರಾಸಣೆನ್ ಆಪ್ಲೊ ವೇಳ್ ಖರ್ಚಿತಾಲಿಂ. ಧರ್ಮ್‍ದುತಾಂ ಮಾರಿಫತ್ ಸಬಾರ್ ಅಚರ್ಯಾಂ ಆನಿ ಖುಣಾ ಜಾತಾಲ್ಯೊ ದೆಕುನ್ ಸಮೆಸ್ತಾಂಚೆರ್ ಏಕ್ ಥರಾಚಿ ಭಿರಾಂತ್ ಆಯ್‍ಲ್ಲಿ. ಭಾವಾರ್ಥ್ ಸ್ವೀಕಾರ್ ಕೆಲ್ಲಿಂ ಸಗ್ಳಿಂ ಎಕ್ವಟಾನ್ ಜಿಯೆತಾಲಿಂ ಆನಿ ಆಪಾಪ್ಲೆಂ ಖಾಸ್ಗಿ ಆಸ್ತ್ ಬದಿಕ್ ವಿಕುನ್ ಮೆಳ್ಳಲೊ ದುಡು ಸಾಮೂಹಿಕ್ ಐವಜ್ ಮ್ಹಣ್ ದವರ್ತಾಲಿಂ ಆನಿ ಜಣ್ ಎಕ್ಲ್ಯಾಚೆ ಗರ್ಜೆ ಪರ್ಮಾಣೆಂ ಸಮೆಸ್ತಾಂ ಮಧೆಂ ವಾಂಟುನ್ ಘೆತಾಲಿಂ.ಹರ್ಯೆಕ್ ದೀಸ್ ಏಕ್ ಮನಾನ್ ದೆವಾಳಾಂತ್ ತಿಂ ಸಾಂಗಾತಾ ಮೆಳ್ತಾಲಿಂ ಆನಿ ಉಂಡೊ ಮೊಡುಂಕ್ ಘರಾಂನಿ ಎಕ್ಟಾಂಯ್ ಜಾತಾಲಿಂ. ಕಾಳ್ಜಾಚ್ಯಾ ಸಂತೊಸಾನ್ ಆನಿ ಸಾದೆಪಣಾನ್ ದೆವಾಕ್ ಹೊಗ್ಳಾಪ್ ದೀವ್ನ್ ಜೆವ್ತಾಲಿಂ. ಸಗ್ಳ್ಯಾ ಲೊಕಾಕ್ ಮಾನ್ವತಾಲಿಂ ಆನಿ ಜಾಂಕಾಂ ಬಚಾವಿ ಜೊಡುಂಕ್ ಆಪಯ್ಲ್ಯಾಂತ್ ತಾಂಕಾಂ ಮೆಳಾಂತ್ ಭರ್ತಿ ಕರ್ನ್ ದಿಸಾನ್‍ದೀಸ್ ಸೊಮಿ ತಾಂಚೊ ಸಂಖೊ ಚಡಯ್ತಾಲೊ.

ಸರ್ವೆಸ್ಪರಾಕ್ ಧಿನ್ವಾಸುಂಯಾ, ಕಿತ್ಯಾಕ್ ತೊ ಬರೊ
ತಾಚಿ ವಿಶ್ವಾಸಿ ದಯಾ ಸಾಸ್ಣಾಕ್ ಬಾಳ್ತಾ. 

1. ಇಸ್ರಾಯೆಲಾಚಿಂ ಭುರ್ಗಿಂ ಸರ್ವೆಸ್ಪರಾಕ್ ವಾಖಣುನ್‌ ಮ್ಹಣುಂ:
   "ತಾಚೊ ವಿಶ್ವಾಸಿ ಮೋಗ್, ಸಾಸ್ಣಾಕ್ ಬಾಳ್ತಾ"
   ಆರೊನಾಚೆಂ ಘರಾಣೆಂ ಮ್ಹಣುಂ:
   "ತಾಚೊ ವಿಶ್ವಾಸಿ ಮೋಗ್ ಸಾಸ್ಣಾಕ್ ಬಾಳ್ತಾ."
   ಸರ್ವೆಸ್ಪರಾಚಿ ಭಕ್ತ್ ಕರ‍್ತಲಿಂ ಮ್ಹಣುಂ:
   "ತಾಚೊ ವಿಶ್ವಾಸಿ ಮೋಗ್ ಸಾಸ್ಣಾಕ್ ಬಾಳ್ತಾ."
   
   
2. ಹಾಂವ್ ಪಡಶೆಂ ಮ್ಹಾಕಾ ಬಳಾನ್ ಲೊಟ್ಲೊ,
   ಪುಣ್ ಸರ್ವೆಸ್ಪರಾನ್ ಮ್ಹಾಕಾ ಆಧಾರ್ ದಿಲೊ.
   ಸರ್ವೆಸ್ಪರ್ ಮ್ಹಜೆಂ ಬಳ್, ತಾಣೆಂಚ್ ಮ್ಹಾಕಾ ಸುಟ್ಕಾ ದಿಲ್ಯಾ
   ದೆಕುನ್ ತಾಚೆಂ ಕೀರ್ತನ್ ಹಾಂವ್ ಗಾತಾಂ.
   ಆಯ್ಕಾ, ಭಕ್ತಾಂಚ್ಯಾ ತಂಬಾಂತ್ ಜಾತಾತ್ ತೆ
   ಸಂತೊಸಾಚ್ಯೆ ಆನಿ ಜಯ್ತಾಚ್ಯೆ ಉಲ್ಲಾಸ್-ಉದ್ಗಾರ್:‌
   ಸರ್ವೆಸ್ಪರಾಚ್ಯಾ ಉಜ್ವ್ಯಾ ಹಾತಾನ್ ವಿಚಿತ್ರಾಂ ಕೆಲ್ಯಾಂತ್.
   
   
3. ಬಾಂಧ್ಪ್ಯಾಂನಿ ನಾಕಾ ಮ್ಹಣ್ ಉಡಯ್ಲಲೊ ಫಾತೊರ್
   ಜಾಲೊ ಬಾಂಧ್ಪಾಚೊ ಮುಲ್ಯಾ-ಫಾತೊರ್.‌
   ಆಬ್ಳೆ, ಸರ್ವೆಸ್ಪರಾಚೆಂ ಕಾಮ್ ಹೆಂ;
   ಹೆಂ ಪಳೆವ್ನ್ ಆಮಿ ಥಟಾಕ್ಕ್ ಜಾತಾಂವ್.‌
   ದೀಸ್ ಹೊ ಆಯ್ಚೊ ಸರ್ವೆಸ್ಪರಾನ್ ಕೆಲ್ಲೊ,
   ಸಂತೊಸ್-ಉಲ್ಲಾಸ್ ಆಮಿ ಭೊಗ್ಯಾಂ.

ಹರ್ಸಿಲ್ಲೊ ಜಾಂವ್ ದೇವ್, ಆಮ್ಚ್ಯಾ ಸೊಮಿಯಾ ಜೆಜು ಕ್ರಿಸ್ತಾಚೊ ಬಾಪ್, ತಾಣೆಂ ಆಪ್ಲೆ ವ್ಹಡ್ ಕಾಕುಳ್ತಿನ್, ಜೆಜು ಕ್ರಿಸ್ತಾಚ್ಯಾ ಜಿವಂತ್ಪಣಾ ಮಾರಿಫತ್ ಆಮ್ಕಾಂ ಏಕ್ ಜಿವ್ಯಾ ಭರ್ವಶಾಕ್ ನವ್ಯಾನ್ ಜನಿತ್ ಕೆಲ್ಯಾಂತ್. ಆನಿ ಸರ್ಗಾರ್ ತಯಾರ್ ಕೆಲ್ಲ್ಯಾ ಏಕ್ ಅವಿನಾಶಿ, ಆಯ್ಬಾವಿಣ್, ಬಾವನಾ ತಸಲ್ಯಾ ದಾಯ್ಜಾಕ್ ಆಯ್ತಿಂ ಕೆಲ್ಯಾಂತ್. ಅಂತಿಮ್ ಕಾಳಾರ್ ಪ್ರತ್ಯಕ್ಷ್ ಜಾಂವ್ಕ್ ತಯಾರ್ ಆಸ್ಲಲೆ ಸೊಡ್ವಣೆಕ್ ದೆವಾಚಿ ಪದ್ವಿ ಭಾವಾರ್ಥಾ ಮಾರಿಫತ್ ತುಮ್ಕಾಂ ಶಾಬಿತ್ ಸಾಂಬಾಳ್ತಲಿ.
ಹಾಚೆ ಖಾತಿರ್ ತುಮಿ ಸಂತೊಸ್ ಪಾವಾ. ಆತಾಂ ಥೊಡ್ಯಾ ಕಾಳಾಕ್ ಥರಾವಳ್ ಕಷ್ಟ್ ತುಮ್ಕಾಂ ಸೊಸುಂಕ್ ಮೆಳ್ತಾತ್ ಜಾಲ್ಯಾರ್‌ಯೀ ಕಿತೆಂ ಜಾಲೆಂ? ಫುಟಾಕ್ ಫಾಲ್ನ್ ವರೊವ್ನ್ ಪಳೆಲ್ಲ್ಯಾ ನಶ್ವರ್ ಭಾಂಗಾರಾ ಪ್ರಾಸ್ ಚಡ್ ಮೊಲಾದಿಕ್ ಜಾವ್ನಾಸ್ಲಲೊ ತುಮ್ಚೊ ಭಾವಾರ್ಥ್, ಜೆಜು ಕ್ರೀಸ್ತ್ ಪ್ರತ್ಯಕ್ಷ್ ಜಾಂವ್ಕ್ ಆಸ್ಲಲ್ಯಾ ಕಾಳಾರ್, ಕೀರ್ತ್, ಮಾನ್ ಆನಿ ಮಹಿಮಾ ಜೊಡುಂಕ್ ತುಮ್ಕಾಂ ಫಾವೊ ಕರ್ತಲೊ. ಕ್ರಿಸ್ತಾಕ್ ತುಮಿ ದೆಖುಂಕ್ ನಾ ಜಾಲ್ಯಾರ್‌ಯೀ ತುಮಿ ತಾಚೊ ಮೋಗ್ ಕರ್ತಾತ್; ಆನಿ ಆತಾಂಯೀ ತಾಕಾ ತುಮಿ ಪಳೆನಾಂತ್ ಜಾಲ್ಯಾರ್‌ಯೀ ತಾಚೆ ವಯ್ರ್ ವಿಶ್ವಾಸ್ ದವರ್ನ್ ಮಹಿಮೆನ್ ಭರ್ಲಲ್ಯಾ, ಉತ್ರಾಂ ವರ್ತ್ಯಾ ಸಂತೊಸಾನ್ ತುಮಿ ಉಮಾಳ್ತಾತ್. ಕಿತ್ಯಾಕ್ ಭಾವಾರ್ಥಾಚೆಂ ಇನಾಮ್, ಮ್ಹಣ್ಜೆ ತುಮ್ಚ್ಯಾ ಅತ್ಮ್ಯಾಂಚೆಂ ತಾರಣ್ ತುಮಿ ಜೊಡ್ನ್ ಆಸಾತ್.

ಸೊಮಿ ಮ್ಹಣಾಲೊ: "ತೊಮಾಸಾ, ತುವೆಂ ಮ್ಹಾಕಾ ಪಳೆಲೊಯ್‌
ದೆಕುನ್ ತುಂ ಸತ್ಮಾನ್ತಾಯ್,
ಪಳೆನಾಸ್ತಾಂ ಸತ್ಮಾನ್ತಾಲಿಂ ಕಿತ್ಲಿಂ ಭಾಗಿ!"

ಜೆಜು ಜಿವಂತ್‌ ಜಾಲ್ಲ್ಯಾ ತ್ಯಾಚ್ ಆಯ್ತಾರಾ ಸಾಂಜೆರ್ ಜುದೆವಾಂಚ್ಯಾ ಭಿಯಾನ್ ಶಿಸ್ ದಾರಾಂ ಧಾಂಪುನ್ ಭಿತರ್ ಎಕ್ಟಾಂಯ್ ಜಾವ್ನ್ ಆಸ್‍ಲ್ಲೆ. ತವಳ್ ಜೆಜು ತಾಂಚೆ ಮಧೆಗಾತ್ ಯೇವ್ನ್ ರಾವ್ಲೊ ಆನಿ “ಶಾಂತಿ ತುಮ್ಕಾಂ!” ಮ್ಹಣಾಲೊ. ಇತ್ಲೆಂ ಮ್ಹಣುನ್ ತಾಣೆ ತಾಂಕಾಂ ಆಪ್ಲೆ ಹಾತ್ ಆನಿ ಆಪ್ಲೆಂ ಕಡ್ವಳ್ ದಾಖಯ್ಲೆಂ. ಸೊಮಿಯಾಕ್ ದೆಖ್ತಚ್ ಶಿಸ್ ಸಂತೊಸಾನ್ ಭರ್ಲೆ. ಪರ್ತ್ಯಾನ್ ಜೆಜುನ್ ತಾಂಕಾಂ ಮ್ಹಳೆಂ: “ಶಾಂತಿ ತುಮ್ಕಾಂ! ಜಶೆಂ ಬಾಪಾನ್ ಮ್ಹಾಕಾ ಧಾಡ್ಲಾ, ತಶೆಂ ಹಾಂವ್ ತುಮ್ಕಾಂ ಧಾಡ್ತಾಂ.” ಅಶೆಂ ಮ್ಹಣುನ್ ತಾಣೆ ತಾಂಚೆರ್ ಸ್ವಾಸ್ ಸೊಡ್ಲೊ ಆನಿ ಮ್ಹಳೆಂ: “ಘೆಯಾ ಪವಿತ್ರ್ ಆತ್ಮ್ಯಾಕ್. ಕೊಣಾಚಿಂ ಪಾತ್ಕಾಂ ತುಮಿ ಬೊಗ್ಸಿತಾತ್ ತಿಂ ಬೊಗ್ಸತಲಿಂ; ಜಾಂಚಿಂ ಪಾತ್ಕಾಂ ತುಮಿ ಬೊಗ್ಸಿನಾತ್, ತಿಂ ಬೊಗ್ಸಶಿಂನಾತ್.”
ಬಾರಾ ಜಣಾಂತ್ಲೊ ಎಕ್ಲೊ ಜವ್ಳೊ ಮ್ಹಣ್ತಾತ್ ತೊ ತೊಮಾಸ್, ಜೆಜು ಆಯ್‍ಲ್ಲ್ಯಾ ವೆಳಾರ್ ತಾಂಚೆ ಸಾಂಗಾತಾ ನಾತ್ಲಲೊ. “ಆಮಿ ಸೊಮಿಯಾಕ್ ಪಳೆಲೊ” ಮ್ಹಣುನ್ ಹೆರಾಂ ಶಿಸಾಂನಿ ತಾಕಾ ಸಾಂಗ್ಲೆಂ. ಪುಣ್ ತೊಮಾಸಾನ್ ತಾಂಕಾಂ ಜಾಪ್ ದಿಲಿ: “ತಾಚ್ಯಾ ಹಾತಾಂಚೆರ್ ಆಸ್ಲಲೆ ಖಿಳ್ಯಾಂಚೆ ಗುರ್ತ್ ಹಾಂವೆಂ ದೆಖ್ಲ್ಯಾ ಶಿವಾಯ್, ಆನಿ ತ್ಯಾ ಖಿಳ್ಯಾಂಚ್ಯಾ ಜಾಗ್ಯಾರ್ ಮ್ಹಜೆಂ ಬೊಟ್ ಆನಿ ತಾಚ್ಯಾ ಕಡ್ವಳಾಂತ್ ಮ್ಹಜೊ ಹಾತ್ ಹಾಂವೆಂ ಘಾಲ್ಯಾ ಶಿವಾಯ್ ಹಾಂವ್ ಸತ್ಮಾನ್ಚೊನಾ.”
ಆಟ್ ದೀಸ್ ಉತರ್ಲೆ. ಶಿಸ್ ಪರ್ತ್ಯಾನ್ ಘರಾ ಭಿತರ್ ಆಸ್ಲೆ. ತೊಮಾಸ್‍ಯಿ ತಾಂಚೆ ಸಾಂಗಾತಾ ಆಸ್ಲೊ. ದಾರಾಂ ಧಾಂಪುನ್ ಆಸ್ಲಿಂ ತರ್‌ಯೀ, ಜೆಜು ಯೇವ್ನ್ ತಾಂಚೆ ಮಧೆಗಾತ್ ರಾವ್ಲೊ ಆನಿ “ಶಾಂತಿ ತುಮ್ಕಾಂ!” ಮ್ಹಣಾಲೊ. ಉಪ್ರಾಂತ್ ತೊಮಸಾಕ್ ತಾಣೆ ಸಾಂಗ್ಲೆಂ: “ತುಜೆಂ ಬೊಟ್ ಹಾಂಗಾ ಹಾಡ್; ಮ್ಹಜೆ ಹಾತ್ ಪಳೆ; ತುಜೊ ಹಾತ್ ಮುಖಾರ್ ಹಾಡ್ನ್ ಮ್ಹಜ್ಯಾ ಕಡ್ವಳಾಂತ್ ಘಾಲ್. ಬೆವಿಶ್ವಾಸಿ ಜಾಯ್ನಾಕಾ. ಬಗರ್ ಸತ್ಮಾನ್.” ತವಳ್ ತೊಮಾಸಾನ್ ಮ್ಹಳೆಂ: “ಮ್ಹಜ್ಯಾ ಸೊಮಿಯಾ! ಮ್ಹಜ್ಯಾ ದೆವಾ!” ಜೆಜುನ್ ತಾಕಾ ಮ್ಹಳೆಂ: “ತುವೆಂ ಮ್ಹಾಕಾ ಪಳೆಲೊಯ್ ದೆಕುನ್ ತುಂ ಸತ್ಮಾನ್ತಾಯ್ ನ್ಹಯ್? ಪಳೆನಾಸ್ತಾಂ ಸತ್ಮಾನ್ತಾತ್ ತೆ ಕಿತ್ಲೆ ಭಾಗಿ!”
ಜೆಜುನ್ ಕೆಲ್ಲಿಂ ಆನಿ ಶಿಸಾಂನಿ ದೆಖ್‍ಲ್ಲಿಂ ಅಚರ್ಯಾಂ ಆನಿಕ್ ಯೀ ಜಾಯ್ತಿಂ ಆಸಾತ್. ತಿಂ ಹ್ಯಾ ಪುಸ್ತಕಾಂತ್ ಬರೊವ್ನಾಂತ್. ಪುಣ್ ಹಾಂಗಾ ಬರಯ್ಲಲ್ಯಾ ಅಚರ್ಯಾಂಚೊ ಶೆವಟ್ ಹೊ: ಜೆಜುಚ್ ಕ್ರೀಸ್ತ್, ದೆವಾಚೊ ಪೂತ್ ಮ್ಹಣ್ ತುಮಿ ಸತ್ಮಾನಿಜಯ್; ಅಶೆಂ ಸತ್ಮಾನುನ್ ತಾಚ್ಯಾ ನಾಂವಾನ್ ತುಮಿ ಸಾಸ್ಣಿಕ್ ಜಿವಿತ್ ಜೊಡಿಜೆ.