📖 ಆಯ್ತಾರಾಚಿಂ ವಾಚ್ಪಾಂ

ತವಳ್ ಪೆದ್ರುನ್ ಉಲೊಂವ್ಕ್ ಸುರು ಕೆಲೆಂ: "ಜುವಾಂವ್ನ್ ಸ್ನಾನ್ ಪರ್ಗಟ್ಲೆಂ ತ್ಯಾ ಉಪ್ರಾಂತ್ ಗಾಲಿಲೆಯಾಂತ್ ಸುರು ಜಾವ್ನ್, ಅಖ್ಯಾ ಜುದೇಯಾಂತ್ ಕಿತೆಂ ಘಡ್ಲೆಂ ತೆಂ ತುಮ್ಕಾಂಚ್ ಕಳಿತ್ ಆಸಾ. ದೆವಾನ್ ಕಶೆಂ ನಜರೆತ್ಚ್ಯಾ ಜೆಜುಕ್ ಪವಿತ್ರ್ ಅತ್ಮ್ಯಾನ್ ಆನಿ ಪದ್ವೆನ್ ಮಾಖ್ಲೊ ಹ್ಯಾ ವಿಶಿಂಯ್ ತುಮಿ ಆಯ್ಕಲಾಂ. ತೊ ಸಗ್ಳ್ಯಾನ್‌ಯೀ ಬರೆಂ ಕರಿತ್ ಆನಿ ದೆಂವ್ಚಾರಾಂಚೆ ಪದ್ವೆಖಾಲ್ ಆಸ್ಲಲ್ಯಾಂಕ್ ಬರಿಂ ಕರಿತ್ ಗೆಲೊ, ಕಿತ್ಯಾಕ್ ದೇವ್ ತಾಚೆ ಸಾಂಗಾತಾ ಆಸ್ಲೊ. ಆನಿ ಜುದೆವಾಂಚ್ಯಾ ಗಾಂವಾಂತ್ ಆನಿ ಜೆರುಜಲೆಮಾಂತ್ ತಾಣೆ ಕೆಲ್ಲ್ಯಾ ಸರ್ವಾಚೆ ಆಮಿಚ್ ಸಾಕ್ಷಿ. ಏಕ್ ಖುರ್ಸಾರ್ ಉಮ್ಕಳಾವ್ನ್ ತಾಕಾ ತಾಂಣಿಂ ಜಿವೆಶಿಂ ಮಾರ್ಲೊ. ಪುಣ್ ತಿಸ್ರ್ಯಾ ದಿಸಾ ದೆವಾನ್ ತಾಕಾ ಜಿವಂತ್ ಉಠಯ್ಲೊ ಆನಿ ತೊ ದಿಷ್ಟಿ ಪಡೊಂಕ್ ನಿರ್ಮಿಲೆಂ. ಸಕ್ಕಡ್ ಲೊಕಾನ್ ನ್ಹಯ್, ಪುಣ್ ದೆವಾನ್ ಪಯ್ಲೆಂಚ್ ನೆಮ್ಲಲ್ಯಾ ಸಾಕ್ಷಿದಾರಾಂನಿ ಮ್ಹಣ್ಜೆ, ಆಮಿ ಮಾತ್ರ್ ತಾಕಾ ಪಳೆಲೊ. ದೆವಾನ್ ತಾಕಾ ಮೆಲ್ಲ್ಯಾಂತ್ಲೊ ಜಿವಂತ್ ಉಠಯ್ಲ್ಯಾ ಉಪ್ರಾಂತ್ ಆಮಿ ತಾಚೆ ಸಾಂಗಾತಾ ಜೆವ್ಲ್ಯಾಂವ್ ಆನಿ ಪಿಯೆಲ್ಯಾಂವ್. ಆನಿ ಆತಾಂ ದೆವಾನ್ ತಾಕಾ ಜಿವ್ಯಾಂಚೊ ಆನಿ ಮೆಲ್ಲ್ಯಾಂಚೊ ನಿತಿಕರ್ತ್ ನೆಮ್ಲಾ ಮ್ಹಣ್ ಲೊಕಾಕ್ ಪರ್ಗಟ್ ಕರುಂಕ್ ಆನಿ ತ್ಯಾ ವಿಶ್ಯಾಂತ್ ಸಾಕ್ಸ್ ದಿಂವ್ಕ್ ಜೆಜುನ್ ಆಮ್ಕಾಂ ತಾಕಿದ್ ದಿಲ್ಯಾ. ತಾಕಾ ಸತ್ಮಾನ್ತಲ್ಯಾ ಸಮೆಸ್ತಾಂಕ್ ತಾಚ್ಯಾ ನಾಂವಾ ಮಾರಿಫತ್ ಪಾತ್ಕಾಂಚೆಂ ಬೊಗ್ಸಾಣೆಂ ಮೆಳ್ತಾ ಮ್ಹಣ್ ಸಮೆಸ್ತ್ ಪ್ರವಾದಿ ರುಜ್ವಾತ್ ದಿತಾತ್."

ಶ್ಲೋಕ್: ದೀಸ್ ಹೊ ಸರ್ವೆಸ್ಪರಾನ್‌ಚ್ ಕೆಲ್ಲೊ,
ಹ್ಯಾ ದಿಸಾ ಆಮಿ ಸಂತೊಸ್ ಉಲ್ಲಾಸ್ ಕರುಂಯಾ.

1. ಸರ್ವೆಸ್ಪರಾಕ್ ಧಿನ್ವಾಸುಂಯಾ ಕಿತ್ಯಾಕ್ ತೊ ಬರೊ
ತಾಚಿ ವಿಶ್ವಾಸೀ ದಯಾ ಸಾಸ್ಣಾಕ್ ಬಾಳ್ತಾ
ತರ್ ಇಸ್ರಾಯೆಲ್ ತಾಕಾ ವಾಖಣುನ್ ಮ್ಹಣುಂ:
"ತಾಚೊ ವಿಶ್ವಾಸಿ ಮೋಗ್, ಸಾಸ್ಣಾಕ್ ಬಾಳ್ತಾ"

2. ಸರ್ವೆಸ್ಪರಾಚ್ಯಾ ಉಜ್ವ್ಯಾ ಹಾತಾನ್ ಜಯ್ತ್ ವ್ಹೆಲಾಂ,
ತಾಚ್ಯಾ ಉಜ್ವ್ಯಾ ಹಾತಾನ್ ಮಹತ್ಕಾರ್ಯಾಂ ಚಲಯ್ಲ್ಯಾಂತ್
‌ ಹಾಂವ್ ಮೊರ‍್ಚೊ ನಾ, ಹಾಂವ್ ಜಿವಂತ್ ರಾವ್ತಲೊಂ
ಆನಿ ಸರ್ವೆಸ್ಪರಾಚಿಂ ಅದ್ಭುತ್ ಕರ‍್ಯಾಂ ವರ್ಣಿತಲೊಂ

3. ಬಾಂಧ್ಪ್ಯಾಂನಿ ನಾಕಾ ಮ್ಹಣ್ ಉಡಯ್ಲಲೊ ಫಾತೊರ್,
ಜಾಲೊ ಬಾಂಧ್ಪಾಚೊ ಮುಲ್ಯಾ-ಫಾತೊರ್
ಆಬ್ಳೆ, ಸರ್ವೆಸ್ಪರಾಚೆಂ ಕಾಮ್ ಹೆಂ;
ಹೆಂ ಪಳೆವ್ನ್ ಆಮಿ ಥಟಾಕ್ಕ್ ಜಾತಾಂವ್!

ಕ್ರಿಸ್ತಾ ಸಾಂಗಾತಾ ಜರ್ ತುಮಿ ಜಿವಂತ್ ಜಾಲ್ಯಾತ್ ತರ್ ಸರ್ಗಿಂಚ್ಯೊ ವಸ್ತು ತುಮಿ ಅತ್ರೆಗಾ. ಥಂಯ್ ಕ್ರೀಸ್ತ್ ದೆವಾಚ್ಯಾ ಉಜ್ವ್ಯಾಕ್ ಬಸುನ್ ಆಸಾ. ಸಂಸಾರಿ ವಸ್ತುಂಕ್ ಗಮನ್ ದೀನಾಸ್ತಾನಾ ಸರ್ಗಿಂಚ್ಯಾ ವಸ್ತುಂಕ್ ಚಡ್ ಮನ್ ದಿಯಾ; ಕಿತ್ಯಾಕ್ ತುಮಿ ಮೆಲ್ಯಾತ್. ತುಮ್ಚಿ ಜಿಣಿ ಕ್ರಿಸ್ತಾ ಸವೆಂ ದೆವಾ ಥ೦ಯ್ ಲಿಪೊನ್ ಆಸಾ. ಆಮ್ಚೆಂ ಜಿವಿತ್ ಜಾವ್ನಾಸ್ಲಲೊ ಕ್ರೀಸ್ತ್ ಪ್ರತ್ಯಕ್ಷ್ ಜಾತಾ ತ್ಯಾ ವೆಳಾರ್ ತುಮಿಯೀ ತಾಚೆ ಸಾಂಗಾತಾ ಮಹಿಮೆನ್ ಪ್ರತ್ಯಕ್ಷ್ ಜಾತಲ್ಯಾತ್.

ಆಯ್ತಾರಾ ಫಾಂತ್ಯಾಪಾರಾರ್, ಉಜ್ವಾಡ್ಚೆ ಆದಿಂ, ಮಾಗ್ದಲಾಚಿ ಮರಿ ಫೊಂಡಾ ಸರ್ಶಿಂ ಆಯ್ಲಿ, ಥಂಯ್ ಸಮಾಧೆಚ್ಯಾ ತೊಂಡಾಕ್ ದವರ್ಲಲಿ ಶಿಳಾ ಪಾಟಿಂ ಲೊಳಯ್‍ಲ್ಲಿ ತಿಣೆ ಪಳೆಲಿ. ತವಳ್ ತಿ ಸಿಮಾಂವ್ ಪೆದ್ರು ಆನಿ ಜೆಜುಕ್ ಮೊಗಾಚೊ ಜಾವ್ನಾಸ್‍ಲ್ಲ್ಯಾ ಶಿಸಾಲಾಗಿಂ ಧಾಂವುನ್ ಯೇವ್ನ್ ಮ್ಹಣಾಲಿ: “ಸೊಮಿಯಾಕ್ ಫೊಂಡಾಂತ್ಲೊ ಕಾಡ್ನ್ ವ್ಹೆಲಾ; ಆನಿ ತಾಕಾ ಖಂಯ್ ದವರ್ಲಾ ಮ್ಹಣ್ ಆಮಿ ನೆಣಾಂವ್.” ತೆದ್ನಾಂ ಪೆದ್ರು ಆನಿ ತೊ ಆನ್ಯೆಕ್ಲೊ ಶಿಸ್ ಸಮಾಧೆ ಸರ್ಶಿಂ ಭಾಯ್ರ್ ಸರ್ನ್ ಗೆಲೆ. ತೆ ದೊಗ್‍ಯಿ ಧಾಂವತ್ ಗೆಲೆ, ಪೂಣ್ ತೊ ಆನ್ಯೆಕ್ಲೊ ಶಿಸ್ ಪೆದ್ರು ಪ್ರಾಸ್ ವೆಗಿಂ ಪಾವ್ಲೊ. ತಾಣೆ ಬಾಗ್ವೊನ್ ತೀಳ್ನ್ ಪಳೆತಾನಾ ಧರ್ಣಿರ್ ಪಡ್ಲೆಲಿಂ ಸಣಾಚಿಂ ವಸ್ತ್ರಾಂ ತಾಕಾ ದಿಸ್ಲಿಂ, ಪುಣ್ ತೊ ಭಿತರ್ ಗೆಲೊನಾ. ತಾಚ್ಯಾ ಪಾಟ್ಲ್ಯಾನ್ ಸಿಮಾಂವ್ ಪೆದ್ರು ಯೇವ್ನ್ ಶೀದಾ ಸಮಾಧೆ ಭಿತರ್ ರಿಗ್ಲೊ. ಥಂಯ್ ತಾಣೆ ಧರ್ಣಿರ್ ಅಸ್ಲಲಿಂ ಸಣಾಚಿಂ ವಸ್ತ್ರಾಂ ದೆಖ್ಲಿಂ. ಪುಣ್ ಜೆಜುಚ್ಯಾ ಮಸ್ತಕಾಕ್ ರೆವ್ಡಾಯ್ಲಲೊ ತುವಾಲೊ ತ್ಯಾ ಸಣಾಚ್ಯಾ ವಸ್ತ್ರಾಂ ಸಾಂಗಾತಾ ನಾಸ್ತಾನಾ ವೊರೆವಿಂಗಡ್ ದವರ್ಲಲೊ ತಾಕಾ ದಿಸ್ಲೊ. ತೆದ್ವಾಂ ಸಮಾಧೆ ಸರ್ಶಿಂ ಪಯ್ಲೆಂ ಪಾವ್ಲಲೊ ತೊ ಆನ್ಯೇಕ್ ಶಿಸ್‍ಯಿ ಭಿತರ್ ಸರ್ಲೊ ಆನಿ ತಾಣೆಂ ದೆಖ್ಲೆಂ ಆನಿ ಸತ್ಮಾನ್ಲೆಂ. ತೊ ಮೆಲ್ಲ್ಯಾಂತ್ಲೊ ಪರ್ತ್ಯಾನ್ ಜಿವಂತ್ ಜಾಂವ್ಕ್ ಜಾಯ್ ಆಸ್ಲೊ. ಹಿ ಪವಿತ್ರ್ ಪುಸ್ತಕಾಚಿ ಸಾಂಗ್ಣಿ ತೆದೊಳ್ ಪರ್ಯಾನ್ ತಾಂಕಾಂ ಸಮ್ಜಲಿನಾ.