📖 ಆಯ್ತಾರಾಚಿಂ ವಾಚ್ಪಾಂ

ತ್ಯಾ ದಿಸಾಂನಿ ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: “ತುಜ್ಯಾ ಶಿಂಗಾಂತ್ ತೇಲ್ ಭರ್ ಆನಿ ತುಜೆ ವಾಟೆಕ್ ಲಾಗ್. ಹಾಂವ್ ತುಕಾ ಬೆತ್ಲೆಹೆಮಾಚ್ಯಾ ಜೆಸ್ಸೆ ಸರ್ಶಿಂ ಧಾಡ್ತಾಂ, ಕಿತ್ಯಾಕ್ ಮ್ಹಜ್ಯಾ ರಾಯಾಕ್ ಹಾಂವೆಂ ತಾಚ್ಯಾ ಪುತಾಂ ಮಧ್ಲೊ ವಿಂಚ್ಲಾ.” ತೆ ಥಂಯ್ ಪಾವ್ತಚ್ ತಾಣೆ ಎಲಿಯಾಬಾಕ್ ದೆಕ್ಲೊ ಆನಿ ಚಿಂತ್ಲೆಂ: “ದುಭಾವಾವೀಣ್ ಸರ್ವೆಸ್ಪರಾಚೊ ಅಭಿಷಿಕ್ತ್ ಹಾಂಗಾ ತಾಚೆ ಮುಕಾರ್ ಆಸಾ.” ಪೂಣ್ ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: “ತಾಚೆಂ ರೂಪ್ ವಾ ತಾಚಿ ಉಂಚಾಯ್ ಪಳೆನಾಕಾ, ಕಿತ್ಯಾಕ್ ಹಾಂವೆಂ ತಾಚೊ ತಿರಸ್ಕಾರ್ ಕೆಲಾ. ಮನಿಸ್ ಪಳೆತಾ ತಶೆಂ ದೇವ್ ಪಳೆನಾ, ಕಿತ್ಯಾಕ್ ಮನಿಸ್ ಭಾಯ್ಲೆಂ ರೂಪ್ ಪಳೆತಾ, ಪೂಣ್ ಸರ್ವೆಸ್ಪರ್ ಕಾಳಿಜ್ ಪಳೆತಾ.”

ಅಶೆಂ ಜೆಸ್ಸೆನ್ ಆಪ್ಲ್ಯಾ ಸಾತ್‍ಯೀ ಪುತಾಂಕ್ ಸಾಮುಯೆಲಾಕ್ ದಾಕಯ್ಲೆ, ಪೂಣ್ ಸಾಮುಯೆಲಾನ್ ಜೆಸ್ಸೆಕ್ ಮ್ಹಳೆಂ: “ಹಾಂಚೆ ಮಧ್ಲ್ಯಾ ಎಕ್ಲ್ಯಾಕ್‍ಯೀ ಸರ್ವೆಸ್ಪರಾನ್ ವಿಂಚುನ್ ಕಾಡುಂಕ್ ನಾ.” ಉಪ್ರಾಂತ್ ಸಾಮುಯೆಲಾನ್ ಜೆಸ್ಸೆಕ್ ವಿಚಾರ್ಲೆಂ: “ತುಜೆ ಸಕ್ಕಡ್ ಪೂತ್ ಇತ್ಲೆಚ್?” ಜೆಸ್ಸೆನ್ ಜಾಪ್ ದಿಲಿ: “ಸಕ್ಟಾಂ ಪ್ರಾಸ್ ಲ್ಹಾನ್ ಎಕ್ಲೊ ಆಸಾ, ಪೂಣ್ ತೊ ಬಕ್ರ್ಯಾಂಕ್ ಚರಯ್ತಾ.” ಸಾಮುಯೆಲಾನ್ ಜೆಸ್ಸೆಕ್ ಮ್ಹಳೆಂ: “ತಾಕಾ ಆಪೊಂವ್ಕ್ ಧಾಡ್; ತೊ ಯೆಸರ್ ಆಮಿ ಜೆವ್ಣಾಕ್ ಬಸ್ಚೆ ನಾಂವ್.” ಜೆಸ್ಸೆನ್ ತಾಕಾ ಆಪೊಂವ್ಕ್ ಧಾಡ್ಲೊ. ತೊ ತಾಂಬ್ಶೆ ಕುಡಿಚೊ, ಸೊಬಿತ್ ದೊಳ್ಯಾಂಚೊ ಆನಿ ಸುಂದರ್ ರುಪಾಚೊ ಆಸ್ಲೊ. ಸರ್ವೆಸ್ಪರಾನ್ ಮ್ಹಳೆಂ: “ಊಟ್, ತಾಕಾ ಅಭಿಷೆಕ್ ಕರ್; ಹೊಚ್ ತೊ.” ಸಾಮುಯೆಲಾನ್ ತೆಲಾಚೆಂ ಶಿಂಗ್ ಘೆತ್ಲೆಂ ಆನಿ ತಾಕಾ ತಾಚ್ಯಾ ಭಾವಾಂ ಮಧೆಂ ಮಾಖ್ಲೊ; ಆನಿ ತ್ಯಾ ದಿಸಾ ಸರ್ವೆಸ್ಪರಾಚೊ ಅತ್ಮೊ ದಾವಿದಾಚೆರ್ ದೆಂವ್ಲೊ ಆನಿ ಉಪ್ರಾಂತ್ ಸದಾಂಚ್ ತಾಚೆ ಸವೆಂ ರಾವ್ಲೊ. ಸಾಮುಯೆಲ್‌ ಭಾಯ್ರ್‌ ಸರುನ್‌ ರಾಮಾಕ್‌ ಗೆಲೊ.

ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ  ಉಣೆಂ ನಾಂ

1. ಸರ್ವೆಸ್ಪರ್ ಮ್ಹಜೊ ಗೊವ್ಳಿ, ಕಾಂಯ್ಚ್ ಮ್ಹಾಕಾ  ಉಣೆಂ ನಾಂ
   ಪಾಚ್ವೊ ಚರವ್ ಮೆಳ್ತಾ ಥಂಯ್, ತೊ ಮ್ಹಾಕಾ ವಿಶೆವ್ ದಿತಾ
   ನಿಶಾಂತ್ ಉದ್ಕಾ ಸರ್ಶಿಂ, ಮ್ಹಾಕಾ ತೊ ಆಪವ್ನ್ ವ್ಹರ್ತಾ
   ಮ್ಹಜ್ಯಾ ಜಿವಾಕ್ ನವ್ಯಾನ್ ಘಟಾಯ್ ದಿತಾ.
2. ಆಪ್ಲ್ಯಾ ನಾಂವಾ ಸರಿ, ತೊ ಮ್ಹಾಕಾ ನೀಟ್ ವಾಟೆನ್ ಚಲಯ್ತಾ
   ಕಾಳೊಕಾಚ್ಯಾ ಭುಂಯಾರಾಂತ್ಲ್ಯಾನ್  ಹಾಂವ್ ಚಲ್ತಾಂ ತರ್‌ಯೀ
   ಕಸಲ್ಯಾಚ್ಚ್ ವಾಯ್ಟಾಕ್ ಹಾಂವ್ ಭಿಯೆಂವ್ಚೊ ನಾ
   ಕಿತ್ಯಾಕ್ ತುಂ ಮ್ಹಜೆ ಸವೆಂ ಆಸಾಯ್
   ತುಜೊ ದಾಂಡೊ ಆನಿ ಬೆತ್ ಆಸಾತ್ ತಿಂ ಮ್ಹಾಕಾ ಧಯ್ರ್ ದಿತಾತ್
3. ಗಡ್ದ್ ಜೆವಣ್ ಮ್ಹಜ್ಯಾ ದುಸ್ಮಾನಾಂ ಹುಜಿರ್
   ತುವೆಂ ತಯಾರ್ ಕೆಲಾಂಯ್
   ತೆಲಾನ್ ಮ್ಹಜೆಂ ಮಾತೆಂ ತುಂ ಮಾಖ್ತಾಯ್
   ಮ್ಹಜೆಂ ಕೊಪ್ ಭರೊನ್ ವೊಮ್ತಾತಾ.
4. ಖಂಡಿತ್ ಜಾವ್ನ್ ಸಗ್ಳ್ಯಾ  ಮ್ಹಜ್ಯಾ ಜಿವಿತಾಂತ್
   ತುಜಿ ದಯಾಮಯಾ ಮ್ಹಜ್ಯೆ ಸವೆಂ ಆಸ್ತಲಿ
   ಆನಿ ಸರ್ವೆಸ್ಪರಾಚ್ಯೆ ಘರಿಂ ಸದಾಂಕಾಲ್ ಹಾಂವ್ ಜಿಯೆತಲೊಂ

ಭಾವಾಂ-ಭಯ್ಣಿಂನೋ, ಏಕ್ ಕಾಳಾರ್ ತುಮಿ ಅಂಧ್ಕಾರ್ ಜಾವ್ನಾಸ್‍ಲ್ಲ್ಯಾತ್, ಆತಾಂ ಸೊಮಿಯಾ ಥಂಯ್ ತುಮಿ ಉಜ್ವಾಡ್ ಜಾಂವ್ಕ್ ಪಾವ್ಲ್ಯಾತ್. ದೆಕುನ್ ಉಜ್ವಾಡಾಚ್ಯಾ ಭುರ್ಗ್ಯಾಂಬರಿ ಚಲಾ. ಕಿತ್ಯಾಕ್ ಸರ್ವ್ ಬರೆಪಣ್, ಪವಿತ್ರ್‌ಪಣ್ ಆನಿ ಸಾತ್ವಿಕ್ಪಣ್ ಉಬ್ಜತಾ ಉಜ್ವಾಡಾ ಥಾವ್ನ್. ಸೊಮಿಯಾಕ್ ಕಿತೆಂ ಮಾನ್ವತಾ ತೆಂ ಸೊಧುನ್ ಕಾಡುಂಕ್ ಶಿಕಾ.  ಕಾಳೊಕಾಚ್ಯಾ ನಿರ್ಫಳ್ ಕಾಮಾಂನಿ ಹಾತ್ ಘಾಲುಂಕ್ ವಚನಾಕಾತ್; ತಿತ್ಲೆಂಚ್ ನ್ಹಯ್, ತಸಲ್ಯಾ ಕಾಮಾಂಚೆರ್ ತುಮಿ ನಿಷೇಧ್ ಉಚಾರಾ. ತಿಂ ಗುಟಾನ್ ಕರ್ತಾತ್ ತೆ ವಿಶಿಂ ಉಲೊಂವ್ಕ್ ಪರ್ಯಾನ್ ಲಜ್ ದಿಸ್ತಾ.  ಪುಣ್ ಸಗ್ಳ್ಯೊ ವಸ್ತು ಉಜ್ವಾಡಾ ಹಾಡ್ತಚ್ ತಾಂಚೆಂ ನೀಜ್ ಸ್ವರೂಪ್ ಆಮ್ಕಾಂ ಕಳ್ತಾ, ಕಿತ್ಯಾಕ್ ಕಸಲಿಯೀ ವಸ್ತ್ ಉಜ್ವಾಡಾ ಹಾಡ್ತಚ್ ತಿ ಉಜ್ವಳ್ತಾ.  ದೆಕುನ್ ಆಮಿ ಅಶೆಂ ಗಾಯನ್ ಕರ್ತಾಂವ್:
         “ನಿದೊನ್ ಪಡ್ಲಲ್ಯಾ, ಜಾಗೊ ಜಾ, ಮೆಲ್ಲ್ಯಾಂತ್ಲೊ ಊಠ್;
          ಕ್ರೀಸ್ತ್ ತುಜೆರ್ ಪರ್ಜಳ್ ಘಾಲ್ತಲೊ.”

ಹಾಂವ್‌ಚ್ ಸಂಸಾರಾಚೊ ಉಜ್ವಾಡ್, ಮ್ಹಣ್ತಾ ಸೊಮಿ
ಜೊ ಕೋಣ್ ಮ್ಹಜೊ ಪಾಟ್ಲಾವ್ ಕರ್ತಾ‌, ತಾಕಾ ಜಿವಿತಾಚೊ ಉಜ್ವಾಡ್ ಆಸ್ತೊಲೊ.

ಜೆಜು ಆಪ್ಲಿ ವಾಟ್ ಧರ್ನ್ ವೆತಾಸ್ತಾನಾ, ಜಲ್ಮಾ ಥಾವ್ನ್ ಕುರ್ಡೊ ಜಾವ್ನಾಸ್ಲಲ್ಯಾ ಎಕ್ಲ್ಯಾಕ್ ತಾಣೆ ದೆಖ್ಲೊ. ತಾಚ್ಯಾ ಶಿಸಾಂನಿ ತಾಚೆಲಾಗಿಂ ವಿಚಾರ್ಲೆಂ: “ಮೆಸ್ತ್ರಿ, ಹೊ ಕುರ್ಡೊ ಜಾವ್ನ್ ಜಲ್ಮೊಂಕ್ ಕೊಣಾಚೆಂ ಪಾತಕ್ ಕೆಲೆಂ ಮ್ಹಣ್ ನ್ಹಯ್ ಪುಣ್ ದೆವಾಚಿ ಪದ್ವಿ ತಾಚೆ ಥಂಯ್ ಕಾರ್ಯಾನ್ ದಿಸೊನ್ ಯೆಂವ್ಚೆ ಪಾಸತ್ ತೊ ಅಸೊ ಜಲ್ಮಲೊ. ದೀಸ್ ಬುಡಸರ್ ಮ್ಹಾಕಾ ಧಾಡ್ಲಲ್ಯಾಚಿಂ ಕಾಮಾಂ ಆಮಿ ಕರುಂಕ್ ಜಾಯ್; ರಾತ್ ಯೆಂವ್ಚಿ ಜಾಲಿ. ತವಳ್ ಕೊಣಾಯ್ಚಾನ್‍ಯಿ ಕಾಮ್ ಕರುಂಕ್ ಜಾಯ್ನಾ. ಹಾಂವ್ ಸಂಸಾರಾಂತ್ ಆಸಾಸರ್ ಹಾಂವ್ ಸಂಸಾರಾಚೊ ಉಜ್ವಾಡ್.” ಇತ್ಲೆಂ ಮ್ಹಣುನ್ ತಾಣೆ ಧರ್ಣಿರ್ ಥಿಂಪಿ ಉಡಯ್ಲಿ. ಥಿಂಪಿಯೆನ್ ಮಾತಿ ಕಾಲಯ್ಲಿ, ಆನಿ ಕಾಲಯಿಲ್ಲಿ ಮಾತಿ ಕುರ್ಡ್ಯಾಚ್ಯಾ ದೊಳ್ಯಾಂಕ್ ಸಾರೊವ್ನ್ ”ವಚ್ ಆನಿ ಸಿಲೊಆಮ್ ತಳ್ಯಾಂತ್ ಧುವ್ನ್ ಕಾಡ್” ಮ್ಹಣ್ ಸಾಂಗ್ಲೆಂ, (ಸಿಲೊಆಮ್ ಮ್ಹಳ್ಯಾರ್ ‘ಧಾಡ್ಲಲೊ; ಮ್ಹಣ್ ಅರ್ಥ್) ಕುರ್ಡೊ ಗೆಲೊ ಆನಿ ತಾಣೆ ಧುಲೆಂ; ಆನಿ ದೀಷ್ಟ್ ಮೆಳೊನ್ ತೊ ಪಾಟಿಂ ಪರ್ತಲೊ.

ತವಳ್ ತಾಚ್ಯಾ ಸೆಜಾರ್ಚಿಂ ಆನಿ ಹಾಚ್ಯಾ ಆದಿಂ ತೊ ಭಿಕ್ ಮಾಗ್ತಾನಾ ತಾಕಾ ಪಳೆಲ್ಲಿಂ ಮ್ಹಣಾಲಿಂ: “ಭಿಕ್ ಮಾಗುಂಕ್ ಬಸುನ್ ಆಸ್ತಾಲೊ ಹೊಚ್ ನ್ಹಯ್?” ಥೊಡಿಂ ಮ್ಹಣಾಲಿಂ: “ಹೊಚ್ ತೊ.” ಹೆರ್ ಮ್ಹಣಾಲಿಂ. “ನ್ಹಯ್, ಹೊ ನ್ಹಯ್, ಹೊ ತಾಚೆಬರಿ ದಿಸ್ತಾ ಮಾತಿರ್.” ತವಳ್ ತ್ಯಾ ಮನ್ಶಾನ್-ಚ್ ಮ್ಹಳೆಂ: “ಹಾಂವ್‍ಚ್ ತೊ.” ತಾಣಿಂ ತಾಕಾ ವಿಚಾರ್ಲೆಂ ತರ್ ತುಜೆ ದೊಳೆ ಕಶೆಂ ಉಗ್ತೆ ಜಾಲೆ?” ತಾಣೆಂ ಜಾಪ್ ದಿಲಿ: “ಜೆಜು ನಾಂವಾಚ್ಯಾ ಎಕ್ಲ್ಯಾನ್ ಇಲ್ಲಿ ಮಾತಿ ಕಾಲೊವ್ನ್ ಮ್ಹಜ್ಯಾ ದೊಳ್ಯಾಂಕ್ ಲಾಯ್ಲಿ. ಉಪ್ರಾಂತ್ ‘ಸಿಲೊಅಮ್ ತಳ್ಯಾಕ್ ವಚ್ ಆನಿ ಧು’ ಮ್ಹಣ್ ತಾಣೆ ಮ್ಹಾಕಾ ಸಾಂಗ್ಲೆಂ. ಹಾಂವೆಂ ವಚುನ್ ಧುತಚ್ ಮ್ಹಾಕಾ ದೀಷ್ಟ್ ಮೆಳ್ಳಿ.” ತಾಣಿಂ ವಿಚಾರ್ಲೆಂ: “ತೊ ಖಂಯ್ ಆಸಾ?” ತಾಣೆಂ ಮ್ಹಳೆಂ: “ಹಾಂವ್ ನೆಣಾ.”

ತವಳ್ ತಾಣಿಂ ಆದಿಂ ಕುರ್ಡೊ ಆಸ್ಲಲ್ಯಾಕ್ ಫಾರಿಜೆವಾಂ ಹುಜಿರ್ ವ್ಹೆಲೊ. ಜೆಜುನ್ ಮಾತಿ ಕಾಲೊವ್ನ್ ತಾಚೆ ದೊಳೆ ಉಘಡ್ಲಲೆ ತೊ ದೀಸ್ ಸನ್ವಾರ್. ತಾಕಾ ದೀಷ್ಟ್ ಕಶಿ ಮೆಳ್ಳಿ ಮ್ಹಣುನ್ ಫಾರಿಜೆವಾಂನಿ ತಾಚೆಲಾಗಿಂ ಪರ್ತ್ಯಾನ್ ವಿಚಾರ್ಲೆಂ. ತಾಣೆ ಮ್ಹಳೆಂ: “ತಾಣೆ ಇಲ್ಲಿ ಮಾತಿ ಕಾಲೊವ್ನ್ ಮ್ಹಜ್ಯಾ ದೊಳ್ಯಾಂಕ್ ಲಾಯ್ಲಿ. ಹಾಂವೆಂ ಧುಲೆಂ ಆನಿ ಆತಾಂ ಮ್ಹಾಕಾ ದಿಸ್ತಾ.” ತವಳ್ ಫಾರಿಜೆವಾಂ ಮದ್ಲೆ ಥೊಡೆ ಮ್ಹಣಾಲೆ: ಹೊ ದೆವಾಚೊ ಮನಿಸ್ ನ್ಹಯ್, ಕಿತ್ಯಾಕ್ ತೊ ಸಾಬ್ಬಾತ್ ಪಾಳಿನಾ.” ಪುಣ್ ಹೆರ್ ಮ್ಹಣಾಲೆ: “ಏಕ್ ಪಾತ್ಕಿ ಮನ್ಶಾನ್ ಅಸಲಿಂ ಅಚರ್ಯಾಂ ಕರ್ಚಿಂ ಜಾಲ್ಯಾರ್-ಯೀ ಕಶೆಂ?” ಅಶೆಂ ತಾಂಚೆ ಮಧೆಂ ವಿವಾದ್ ಉಬ್ಜಲೊ. ದೆಕುನ್ ಫಾರಿಜೆವ್ ಪರ್ತ್ಯಾನ್ ತಾಚೆಲಾಗಿಂ ವಿಚಾರಿ: “ತಾಣೆ ತುಜೆ ದೊಳೆ ಉಘಡ್ಲೆ ಮ್ಹಣ್ತಾಯ್” ತಾಣೆ ಮ್ಹಳೆಂ: “ತೊ ಏಕ್ ಪ್ರವಾದಿ”.

ತೊ ಮನಿಸ್ ನಿಜಾಕ್‍ಯಿ ಆದಿಂ ಕುರ್ಡೊ ಆನಿ ಉಪ್ರಾಂತ್ ತಾಕಾ ದೀಷ್ಟ್ ಮೆಳ್ಳಿ ಮ್ಹಣ್ ಪಾತ್ಯೆಂವ್ಕ್ ಜುದೆವ್ ಕಬೂಲ್ ಜಾಲೆನಾಂತ್. ದೆಕುನ್ ತಾಚ್ಯಾ ಆವಯ್‍ಬಾಪಾಯ್ಕ್ ಆಪೊಂವ್ಕ್ ಧಾಡ್ನ್, “ಹೊ ತುಮ್ಚೊ ಪೂತ್‍ಮೂ? ಜಲ್ಮಾ ಥಾವ್ನ್ ಕುರ್ಡೊ ಮ್ಹಣ್ ತುಮಿ ಮ್ಹಣ್ತಾತ್ ಹೊಚ್‍ವೆ? ತರ್ ಆತಾಂ ತಾಕಾ ದೊಳೆ ದಿಸ್ತಾತ್ ಕಶೆ?” ಮ್ಹಣುನ್ ತಾಣಿಂ ಸವಾಲಾಂ ಕೆಲಿಂ. ತಾಚ್ಯಾ ಆವಯ್ ಬಾಪಾಯ್ನ್ ಜಾಪ್ ದಿಲಿ: “ಹೊ ಆಮ್ಚೊ ಪೂತ್, ಆನಿ ತೊ ಜಲ್ಮಾ ಥಾವ್ನ್ ಕುರ್ಡೊ ಹೆಂ ಆಮಿ ಜಾಣಾಂವ್, ಪೂಣ್ ತಾಕಾ ಆತಾಂ ದಿಸ್ತಾ ಕಶೆಂ ಆನಿ ಕೊಣೆ ತಾಚೆ ದೊಳೆ ಉಗ್ತೆ ಕೆಲೆ ಹೆಂ ಆಮಿ ನೆಣಾಂವ್. ತಾಂಚೆಲಾಗಿಂಚ್ ವಿಚಾರಾ; ತೊ ಪ್ರಾಯೆಚೊ. ಆಪ್ಣಾ ವಿಶ್ಯಾಂತ್ ತೊಚ್ ಸಾಂಗ್ತಲೊ.” ಜುದೆವಾಂಚ್ಯಾ ಭಿಯಾನ್ ತಾಚ್ಯಾ ಆವಯ್ ಬಾಪಾಯ್ನ್ ಅಶೆಂ ಮ್ಹಳೆಂ: ಕಿತ್ಯಾಕ್ ಕೊಣೆಯಿ ಜೆಜುಕ್ ಕ್ರೀಸ್ತ್ ಮ್ಹಣುನ್ ಪಾಚಾರಿತ್ ಜಾಲ್ಯಾರ್, ತಾಕಾ ಸಿನಾಗೊಗಾ ಭಾಯ್ರ್ ಘಾಲಿಜಯ್ ಮ್ಹಣ್ ಜುದೆವಾಂನಿ ಹಾಚೆ ಆದಿಂಚ್ ಠರಾಯ್‍ಲ್ಲೆಂ. ದೆಕುನ್-ಚ್ ತಾಚ್ಯಾ ಆವಯ್‍ಬಾಪಾಯ್ನ್ “ತೊ ಪ್ರಾಯೆಚೊ; ತಾಚೆಲಾಗಿಂಚ್ ವಿಚಾರಾ” ಮ್ಹಣ್ ಮ್ಹಳ್ಳೆಂ.

ಅಶೆಂ ಆದಿಂ ಕುರ್ಡೊ ಆಸ್‍ಲ್ಲ್ಯಾ ತ್ಯಾ ಮನ್ಶಾಕ್ ಜುದೆವಾಂನಿ ದುಸ್ರೆ ಪಾವ್ಟಿಂ ಆಪಯ್ಲೊ ಆನಿ ತಾಕಾ ಸಾಂಗ್ಲೆಂ: “ದೆವಾಚೆ ನಾಂವಿಂ ಸಪುತ್ ಘಾಲ್ನ್ ಸತ್ ಸಾಂಗ್! ತೊ ಮನಿಸ್ ಪಾತ್ಕಿ ಮ್ಹಣ್ ಆಮಿ ಜಾಣಾಂವ್.” ತಾಣೆ ಜಾಪ್ ದಿಲಿ: “ತೊ ಪಾತ್ಕಿ ವಾ ನ್ಹಯ್ ತೆಂ ಹಾಂವ್ ನೆಣಾ, ಇತ್ಲೆಂ ಮಾತಿರ್ ಹಾಂವ್ ಜಾಣಾ: ಹಾಂವ್ ಆದಿಂ ಕುರ್ಡೊ ಆಸ್‍ಲ್ಲೊಂ, ಪುಣ್ ಆತಾಂ ಮ್ಹಾಕಾ ದಿಸ್ತಾ.” ತಾಣಿಂ ತಾಕಾ ವಿಚಾರ್ಲೆಂ: ‘ತಾಣೆ ತುಕಾ ಕಿತೆಂ ಕೆಲೆಂ? ತುಜೆ ದೊಳೆ ತಾಣೆ ಕಶೆಂ ಉಗ್ತೆ ಕೆಲೆ?” ತಾಣೆ ಜಾಪ್ ದಿಲಿ: ಏಕ್ ಪಾವ್ಟಿಂ ಹಾಂವೆಂ ತುಮ್ಕಾಂ ಸಾಂಗುನ್ ಜಾಲೆಂ; ಪೂಣ್ ತುಮಿ ತಾಕಾ ಕಾನ್ ದಿಲೆನಾಂತ್. ಪರ್ತ್ಯಾನ್ ತುಮ್ಕಾಂ ಕಿತ್ಯಾಕ್ ತೆಂ ಆಯ್ಕಜಯ್ ಜಾಲಾಂ? ತುಮಿಯಿ ತಾಚೆ ಶಿಸ್ ಜಾಂವ್ಕ್ ಖುಶಿ ವ್ಹರ್ತಾತ್ ಕಿತೆಂ?” ತಿತ್ಲ್ಯಾರ್ ತೆ ತಾಕಾ ಕೆಂಡುನ್ ಮ್ಹಣಾಲೆ: “ಮೊಯ್ಜೆಲಾಗಿಂ ದೇವ್ ಉಲಯ್‍ಲ್ಲೊ ಮ್ಹಣ್ ಆಮಿ ಜಾಣಾಂವ್; ಪುಣ್ ಹೊ ಮನಿಸ್ ಖಂಯ್ ಥಾವ್ನ್ ಆಯ್ಲಾ ತೆಂ ಆಮಿ ನೆಣಾಂವ್.” ತ್ಯಾ ಮನ್ಶಾನ್ ಜಾಪ್ ದಿಲಿ “ವಿಚಿತ್ರ್ ಸಂಗತ್ ಹಿ! ಮ್ಹಜೆ ದೊಳೆ ಉಘಡ್ಲಲೊ ಮನಿಸ್ ಹೊ. ತರ್-ಯೀ ತೊ ಖಂಯ್ಚೊ ಮ್ಹಣ್ ತುಮಿ ನೆಣಾಂತ್. ದೇವ್ ಪಾತ್ಕ್ಯಾಂಕ್ ಆಯ್ಕನಾ ಮ್ಹಣ್ ಆಮಿ ಜಾಣಾಂವ್; ಪುಣ್ ಆಪ್ಣಾಚಿ ಭಕ್ತ್ ಆಧಾರ್ನ್, ಆಪ್ಣಾಚಿ ಖುಶಿ ಕರ್ತಲ್ಯಾಕ್ ತೊ ಖಂಡಿತ್ ಆಯ್ಕತಾ. ಕುರ್ಡೊ ಜಾವ್ನ್ ಜಲ್ಮಲ್ಯಾಂಚೆ ದೊಳೆ ಕೊಣೆಂಯಿ ಉಗ್ತೆ ಕೆಲೆ ಮ್ಹಣ್ ಆಮಿ ಯೆದೊಳ್ ಪರ್ಯಾನ್ ಆಯ್ಕಾಲ್ಲೆಂ ನಾ. ಹೊ ದೆವಾಚೊ ಮನಿಸ್ ನ್ಹಯ್ ಜಾಲ್ಲೊ ಜಾಲ್ಯಾರ್, ತೊ ಕಿತೆಂಚ್ ಕರುಂಕ್ ಸಕ್ತೊ ನಾ.” ತಾಣಿಂ ತಾಕಾ ಮ್ಹಳೆಂ: “ಪಾತ್ಕಾಂತ್‍ಚ್ ಜಲ್ಮುನ್ ಲ್ಹಾನ್ ವ್ಹಡ್ ಜಾಲ್ಲೊ ತುಂ, ಆಮ್ಕಾಂ ಶಿಕೊಂವ್ಕ್ ಭಾಯ್ರ್ ಸರ್ಲಾಯ್ ಕಿತೆಂ?” ಆನಿ ತಾಣಿಂ ತಾಕಾ ಭಾಯ್ರ್ ಘಾಲೊ.

ತಾಕಾ ಭಾಯ್ರ್ ಘಾಲ್ಲಿ ಖಬರ್ ಜೆಜುಚ್ಯಾ ಕಾನಾಂತ್ ಪಡ್ಲಿ. ತೊ ತಾಕಾ ಮೆಳ್ಳೊ ತೆದ್ನಾ ಜೆಜುನ್ ತಾಕಾ ವಿಚಾರ್ಲೆಂ: “ದೆವಾಚ್ಯಾ ಪುತಾಕ್ ತುಂ ಸತ್ಮಾನ್ತಾಯ್?” ತಾಣೆ ಜಾಪ್ ದಿಲಿ: “ಸಾಯ್ಬಾ, ತೊ ಕೊಣ್ ಮ್ಹಣ್ ಮ್ಹಾಕಾ ಸಾಂಗ್, ಹಾಂವ್ ಸತ್ಮಾನ್ತಾಂ.” ಜೆಜುನ್ ತಾಕಾ ಮ್ಹಳೆಂ: “ತುವೆಂ ತಾಕಾ ಪಳೆಲಾಯ್; ತುಜೆಲಾಗಿಂ ಉಲಯ್ತಾ ತೊಚ್ ತೊ.” ತಾಣೆ ಮ್ಹಳೆಂ: “ಹಾಂವ್ ಸತ್ಮಾನ್ತಾಂ ಸೊಮಿಯಾ” ಆನಿ ಸರ್ಪಡುನ್ ಜೆಜುಕ್ ತಾಣೆ ನಮಸ್ಕಾರ್ ಕೆಲೊ. ತಿತ್ಲ್ಯಾರ್ ಜೆಜುನ್ ಮ್ಹಳೆಂ: “ನಿತಿಚೆಂ ಫೈಸಲ್ ದೀಂವ್ಕ್ ಮ್ಹಣ್ ಹಾಂವ್ ಹ್ಯಾ ಸಂಸಾರಾಂತ್ ಆಯ್ಲಾಂ: ಕುಡ್ರ್ಯಾಂಕ್ ದೀಷ್ಟ್ ಮೆಳ್ಚ್ಯಾಕ್ ಆನಿ ದೀಷ್ಟ್ ಆಸ್ಲಲ್ಯಾಂನಿ ಕುರ್ಡೆ ಜಾಂವ್ಚ್ಯಾಕ್ ಹಾಂವ್ ಆಯ್ಲಾಂ.” ತಾಂಚೆ ಸಾಂಗಾತಾ ಆಸ್ಲಲ್ಯಾ ಥೊಡ್ಯಾ ಫಾರಿಜೆವಾಂನಿ ಹೆಂ ಆಯ್ಕುನ್ ತಾಚೆಲಾಗಿಂ ವಿಚಾರ್ಲೆಂ: “ತರ್ ಆಮಿಯಿ ಕುರ್ಡೆಗಾಯ್?” ಜೆಜು ತಾಂಕಾಂ ಮ್ಹಣಾಲೊ: “ತುಮಿ ಕುರ್ಡೆ ಜಾಲ್ಲೆ ಜಾಲ್ಯಾರ್ ತುಮಿ ಗುನ್ಯಾಂವ್ಕಾರ್ ಜಾತೆನಾಂತ್. ಪುಣ್ ಆಮ್ಕಾಂ ಸಾರ್ಕೆಂ ದಿಸ್ತಾ ಮ್ಹಣ್ ತುಮಿ ಮ್ಹಣ್ತಾತ್ ಜಾಲ್ಲ್ಯಾನ್, ತುಮಿ ಪಾತ್ಕಾಂತ್‍ಚ್ ಆಸಾತ್.”"